བོད་ནང་རང་ལུས་མེར་བསྲེཊ་གནང་མཁན་ཚོར་གདུང་སེམས་མཉམ་སྐྱེད་ཆེད། བཙན་བྱོལ་བོད་མིའི་གཞིས་སྒར་ཁག་དང་དགོན་སྡེ་ཁག་ཅིག་ཏུ་བསྔོ་སྨོན་མཆོད་འབུལ་གནང་འདུག
ཉེ་ལམ་རྒྱ་ནག་དམར་ཤོག་ཚོགས་ཆེན་ ༡༨ པ་ཚོགས་པའི་སྔ་གཞུག་ཏུ་བོད་ནང་རང་ལུས་མེར་བསྲེཊ་ཀྱི་གནས་ཚུལ་བསྟུད་མར་བྱུང་བཞིན་པ་རྣམས་ལ་གདུང་སེམས་མཉམ་སྐྱེད་ཆེད། ཕྱི་ཚེས་ ༡༢ ཉིན་གྱི་དགོང་དྲོ་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ། དགའ་ལྡན་དགོན་དང་འབྲས་སྤུངས་དགོན་གཙོས་པའི་དགོན་སྡེ་ཁག་གི་དགེ་འདུན་པ་དང་། གཞིས་གྲོང་ཁག་གི་མི་མང་བཅས་མི་ ༦༠༠༠ ལྷག་འདུ་འཛོམས་ཐོག བོད་ནང་རང་ལུས་མེར་བསྲེཊ་ཀྱིས་འདས་གྲོངས་སུ་ཕྱིན་པའི་རྒྱལ་གཅེས་དཔའ་བོ་སྙིང་ལྩཊ་འབུམ་དང་སྙིང་དཀར་བཀྲ་ཤིས་གཉིས་གཙོས། རྒྱལ་གཅེས་དཔའ་བོ་དཔའ་མོ་ཡོངས་ཀྱི་ཆེད་མཆོད་འབུལ་སྨོན་ལམ་གནང་ཡོད་པ་མ་ཟད། བཞུགས་སྒར་ངྷ་རམ་ས་ལའི་མེག་གྷན་དང་ནོར་གླིང་གནས་སྡོད་བོད་མི་དང་། སྤིར་གཞིས་ཆགས་བཅས་སུའང་རང་ལུས་མེར་བསྲེཊ་གནང་མཁན་རྒྱལ་གཅེས་པ་ཡོངས་ཀྱི་ཆེད་བསྔོ་སྨོན་མཆོད་འབུལ་དང་མར་མེ་ཁྲོམ་སྐོར་སོགས་གནང་ཡོད་འདུག
དེ་བཞིན། ཁ་སང་ཕྱི་ཚེས་ ༡༣ ཉིན་གྱི་དགོང་དྲོ་རྒྱ་གར་ལྷོ་ཕྱོགས་སྦེལ་ཀོབ་མདོ་སྨད་ས་གནས་རྒྱུན་ལས་ཀྱིས་གོ་སྒྲིག་འོག སེ་ར་ཐེག་ཆེན་གླིང་གི་ཆོས་རའི་ནང་སེ་ར་བྱེས་སྨད་གཉིས་གྱི་བླ་སྤྲུལ་དགེ་བཤེས་དང་དགེ་འདུན་པ་གཙོས། སེར་སྐྱ་མི་མང་ ༤༠༠༠ ལྷག་འདུ་འཛོམས་ཐོག བོད་ནང་བོད་མི་རིགས་ཀྱི་རང་དབང་དང་བདེན་དོན་ཆེད་རང་ལུས་མེར་བསྲེཊ་གནང་སྟེ། སྐུ་གཤེགས་པའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད། མཆོད་མེ་སྟོང་ཚར་དང་བསྔོ་སྨོན་མཆོད་འབུལ་གནང་བ་དང་། གཞན་ཡང་རྒྱ་ནག་གི་བཙན་གནོན་འོག་ལྟོགས་ཤི་ཐེབས་པ་དང་། གཅར་རྡུང་ཚད་མེད་བཏང་སྟེ་འདས་གྲོངས་སུ་ཕྱིན་པའི་བོད་མི་དག་ངན་སོང་ངན་འགྲོའི་གནས་སུ་མི་སྐྱེ་བར་དལ་འབྱོར་གྱི་མི་ལུས་རིན་པོ་ཆེ་སླར་ཡང་ཐོབ་སྟེ། འཕགས་མཆོག་སྤྱན་རས་གཟིགས་ཀྱི་བྱམས་བརྩེ་ཐུགས་རྗེ་གྲིབ་གཟིགས་འོག་སྐུ་གསུང་ཐུགས་གསུམ་གྱི་མཛད་བཟང་ལ་ལོངས་སུ་སྤྱོད་ཐུབ་པ་དང་། ལྷག་པར་དུ་བོད་མི་རིགས་ཀྱི་རང་དབང་དང་རྩ་དོན་གྱི་ཆེད་དུ་རང་ལུས་མེ་ལ་བསྒྲོན་ཏེ། ཞི་བའི་ངོ་རྒོལ་གནང་ཡང་རང་སྲོག་མ་འགགས་པར་ད་ལྟ་སྡུག་བསྔལ་མྱོང་བཞིན་པའི་རྒྱལ་གཅེས་དཔའ་བོ་དཔའ་མོ་རྣམས་དང་། དེ་མིན་བཙོན་འོག་ན་མནར་གཅོད་ཀྱི་སྡུག་བསྔལ་ཚད་མེད་མྱོང་བཞིན་པའི་བོད་རིགས་སྤུན་ཟླ་དག་གི་སྡུག་བསྔལ་རྨེག་མེད་རང་སར་ཞུ་སྟེ། རང་ཅག་རྣམས་ཀྱི་དཔྲལ་བའི་མིག་དང་ཁོག་གི་སྙིང་ལྟ་བུའི་༸རྒྱལ་བ་བསྟན་འཛིན་རྒྱ་མཚོའི་ཞལ་གསུང་ལོངས་སུ་སྤྱོད་རྒྱུའི་བསྐལ་བཟང་གི་དུས་ཤིག་མྱུར་དུ་འཆར་རྒྱུ་དང་། བོད་གཞིས་བྱེས་ལྷན་འཛོམས་ཀྱིས་རྒྱལ་ས་ལྷ་སར་རང་དབང་གི་དགའ་སྟོན་གྱི་དཔལ་ལ་མྱུར་དུ་ལོངས་སུ་སྤྱོད་པའི་ཐུགས་སྨོན་སྐྱབས་འཇུག་དང་གསོལ་འདེབས་སྨོན་ལམ་གནང་ཡོད་འདུག
ཁ་སང་དགོང་དྲོ་གནས་མཆོག་རྡོ་རྗེ་གདན་དུ་བོད་མི་བསྟན་པ་ལགས་གཙོས་དང་བླངས་བོད་མི་ཁག་ཅིག་དང་ས་གནས་གཞོན་ནུ་མཉམ་རུབ་ཐོག རྣམ་རྒྱལ་གྲྭ་ཚང་དང་བཀའ་རྒྱུད་དགོན་པའི་དགེ་འདུན་པ་གཙོས། དེར་ཡོད་བོད་མི་དང་ཕྱི་རྒྱལ་བ་བཅས་མི་ ༥༠༠ ཡས་མས་རྡོ་རྗེ་གདན་གྱི་མཆོད་རྟེན་ནང་རོལ་དུ་འདུ་འཛོམས་ཀྱིས། བོད་ནང་གི་དཔའ་བོ་དཔའ་མོའི་ཆེད་དུ་རང་ལུས་མེར་བསྲེཊ་གནང་མཁན་རྒྱལ་གཅེས་དཔའ་བོ་དཔའ་མོ་ཡོངས་ལ་བསྔོ་སྨོན་མཆོད་འབུལ་དང་། མར་མེ་ཁྲོམ་སྐོར་གྱི་ལས་འགུལ་ཞིག་སྤེལ་ཡོད་འདུག
གསར་འགོད་པ། དོན་གོ
