བསླབ་གཞི་རྩ་འཛིན་གཏན་འབེབས།

དྲ་གྲོགས་ནོར་ལགས། ཁྱོད་རང་གིས་ཏག་ཏག་ནོར་བ་རྐྱང་རྐྱང་ལ་བཤད་འདུག

ཨ་ལ་ལ། ཤ་བརྩེད་རྒྱུ་མི་ཡོང་གི་ན་དཀོན་མཆོག་གསུམ། ཡང་འདི་ཚོས་ཐན་ལྟས་ཏག་ཏག་ལས་ཀྱིན་པ་འདྲ། “གཞི་རིམ་གོང་མའི་ཚན་རིག་དང་རྩིས་རིག་གི་བསླབ་གཞི་རྩ་འཛིན་ལ་རགས་ཟིན་རྒྱག་གི་ཡིན” ཟེར་བ་ལ་ལྟོས་དང་། ཁོ་ཚོའི་སུ་ཞིག་ཚན་རྩིས་ཁྱད་མཁས་པ་ཡིན་ནམ། སུ་ལ་ཚན་རྩིས་ཀྱི་མྱོང་རྟོགས་མངའ་བ་ཡིན་ནམ། ད་ལྟའི་བར་དུ་ཚན་རིག་དར་མ་མྱོང་པའི་ལུང་ཀྱོག་གི་མི་ཏག་ཏག་གིས་ཚན་རིག་རྩ་འཛིན་ཅི་ལྟར་སྒྲིག་གི་ཡིན་ནམ། སོ་སོའི་མི་འཇོན་པའི་ལས་དེ་འདྲར་ཨུ་ཚུགས་འཇོན་མདོག་གིས་སྒྲུབ་པ་ལས། གནས་ཡུལ་རྒྱ་གར་གཞུང་གིས་གཏན་ལ་ཕབ་ཟིན་པའི་ཚན་རྩིས་བསླབ་གཞི་རྣམས་སྤུས་དག་ཁུངས་འཕེར་ཞིག་ཚུར་བསྒྱུར་ཨེ་ཐུབ་བལྟས་ན་མི་ལེགས་སམ། དངོས་གནས་ཤ་ཚ་སྙིང་ཉེ་ཡི་སྒོ་ནས་བསྒྲིག་འདུན་ཡོད་ན། སོ་སོའི་བོད་སྐད་ཡིག་སློབ་དེབ་དང་། དེ་འབྲེལ་གྱི་བོད་རང་གི་ལོ་རྒྱུས་དང་དམངས་ཁྲོད་རིག་གནས། ཡུལ་གོམས་གཤིས་ལུགས་སོགས། ཐ་སྙད་བབས་ཆགས་པ། གོ་སླ་བ། བྱིས་པའི་ཁོར་ཡུག་དང་ཐག་ཉེ་བ། བྱིས་པའི་བསམ་གཞིགས་འཁོར་སྐྱོད་ཀྱི་རྒྱ་དང་འཚམ་པ། བྱིས་པའི་ནར་སོན་གྱི་ལོ་རིམ་དང་བྱིས་པའི་འགུལ་བསྐྱོད་ཀྱི་ཁོར་ཡུག་གི་མཐོང་ཐོས་རེག་གསུམ་དང་ཐག་ཉེ་བ། མདོར་དྲིལ་ན་བྱིས་པ་ཚོའི་སེམས་ཁམས་ལ་གནོན་ཤུགས་ཀྱི་ངོ་བོར་མི་འགྱུར་བར་དགའ་སྣང་གི་དང་བ་འདྲེན་པར་བྱེད་པའི་རྒྱུ་རྐྱེན་ཆོས་ཉིད་ལ་བློ་ཞིབ་མོས་དཔྱད་ཀྱང་བརྟག་པའི་སྒོ་ནས། སྔོན་འགྲོ་ནས་གཞི་རིམ་གོང་མའི་བར་དུ་བོད་སྐད་ཡིག་གི་སློབ་དེབ་དང་ཀློག་དེབ་གྲ་དག་རེ་བསྒྲིག་ཨེ་ཐུབ་བལྟས་ན་ལེགས་ཤོས་རེད། འུ་ཅག་བཙན་བྱོལ་གྱི་བོད་སྐད་ཡིག་གི་སློབ་དེབ་དག་ལ་བསྐྱར་ཞིབ་ཅིག་བྱོས་དང་། ཧ་ལམ་འགྲོ་བ་མིའི་སྲིད་འབྱོར་རིག་གསུམ་གྱི་འཕེལ་འགྱུར་དང་དགའ་སྐྱོ་ཆགས་སྡང་གི་འཚོ་བའི་རྩི་བཅུད་མངར་བའི་མིའི་སྤྱི་ཚོགས་དང་ཁ་ཐག་ཆེས་ཆེར་རིང་བའི་བྲག་ནང་གི་སྒོམ་ཆེན་པ་དག་གིས་སོ་སོའི་འཁྲུལ་རྟོགས་ཀྱི་བློ་ལ་འཁྲུངས་པའི་འཇིག་རྟེན་ལས་འདས་པའི་ཞིང་འཁོལ་བསྐྲུན་བཞིན་པ་ལྟར། ཨ་མ་འབོད་མི་ཤེས་པའི་བྱིས་པར་སྒྲ་སློབ་པ་དང་། རྐང་ཁར་འགྲེངས་མི་ཐུབ་པའི་བྱིས་པར་བྲོ་སློབ་པ་ལྟ་བུའི་སློབ་གསོའི་གོ་རིམ་མེད་པ། བྱིས་པའི་འཚར་ལོངས་ཀྱི་ཆོས་ཉིད་དང་འགལ་བ། བྱིས་པའི་གཉུག་གཤིས་དང་འགལ་བ་ལྟག་སྤྲོད་དུ་གྱུར་པ་རྐྱང་སོ་སོའི་སྣང་ལ་གང་འགྲོ་ལྟར་སྒྲིག་པར་བརྟེན་ནས། བྱིས་པ་ཚོས་བོད་ཡིག་སློབ་དེབ་མཐོང་དུས་མགོ་ན་བ། ཉན་མི་སྤྲོ་བ། སེམས་ལ་སུན་སྣང་སློང་བ། འཚོ་བ་དང་ཁ་ཐག་རིང་བ། བསམ་གཞིགས་ལ་གནོན་ཤུགས་འབྱུང་བ། དང་བ་འབུར་འཇོམས་བྱེད་པ། སེམས་ལ་ངལ་བ་སྤྲོད། མཐར་བྱིས་པ་ཚོའི་སྣང་ངོར་བོད་ཡིག་ནི་མི་རིགས་ཀྱི་ཞེན་ཁོག་ཙམ་གྱིས་སྦྱོང་དགོས་པའི་སློབ་དེབ་ཅིག་ལས། སོ་སོའི་འཚོ་བ་དང་འདུན་པ། དགའ་ཕྱོགས། འཚོལ་སྙེགས་བཅས་ལ་གཏན་ནས་འབྲེལ་བ་མེད་པའི་འདུ་ཤེས་སྐྲུན་བཞིན་ཡོད། དངོས་གནས་ལྷག་བསམ་རྣམ་དག་དང་མི་རིགས་ཀྱི་སློབ་གསོ་ལ་ཤ་ཚ་སྙིང་ཉེ་ཡི་སྒོ་ནས་བསྒྲུབ་འདུན་ཡོད་ན། འདི་དག་གི་ཕྱོགས་ལ་གཡེར་རྒྱུགས་དང་སྐབས་ཐོག་གི་ཚོར་བ་ཟ་རི་ཟི་རི་ཙམ་མ་ཡིན་པར། སེམས་རྣལ་ཕབ་པའི་ཐོག་ནས་མིའི་སྐྱེ་འཚར་གྱི་སློབ་གསོའི་ཆོས་ཉིད་དང་འཚམ་པའི་བོད་སྐད་ཡིག་གི་སློབ་དེབ་བལྟས་ས་ལྟོས་འཇོག་གིས་ཡང་དག་པ་ཞིག་སྒྲིག་རོགས་ཞུ་ཞེས་མགོ་བོ་ལན་གསུམ་ཐང་ལ་བརྡབས་ཏེ་ཁྱེད་ཅག་ལ་ཞུ་བ་འཐེན། སློབ་གསོ་ནི་རྩེད་མོ་རྩེད་ས་མ་རེད། སློབ་དེབ་ནི་རྩེད་མོ་རྩེད་སྤྱད་མ་རེད། སྐུ་མཁྱེན་མི་ནི་སློབ་གསོའི་ཐོན་དངོས་ཡིན་པ་མ་བརྗེད་རོགས། མི་འཕྲོ་བརླག་ལ་མ་གཏོང་རོགས། མི། མི། མི། ཁྱེད་ཅག་མི་ཞིག་ཡིན་ན། འུ་ཅག་གི་མ་འོངས་པའི་བྱིས་པ་ཚོ་འཛམ་གླིང་གི་མི་གྲལ་ནས་མ་གཡུགས་རོགས།