བོད་མི་ཞིག་གིས་ཉེན་རྟོག་པར་གྲི་བཙུཊ་རྗེས་སོ་སོར་གྲིས་བརྒྱབ་པ།

གཟའ་ཉི་མའི་ཉིན་ངྷ་སའི་བདེ་སྲུང་ཡན་ལག་ལས་ཁུངས་མདུན་དུ་བོད་མི་ཞིག་གིས། རྒྱ་གར་ཉེན་རྟོག་པ་ཞིག་ལ་གྲི་བཙུགས་པ་དང་། དེའི་རྗེས་སོ་སོར་ཡང་གྲི་བཙུགས་ཏེ་ད་ཆར་གཉིས་ཀ་སྨན་ཁང་དུ་སྨན་བཅོས་བྱེད་བཞིན་ཡོད་འདུག 

ཕྱི་ཚེས་ ༢༥ ཉིན་གྱི་ཕྱི་དྲོའི་ཆུ་ཚོད་ ༥ ཡས་མས་ལ་ངྷ་སའི་བདེ་སྲུང་ཡན་ལག་ལས་ཁུངས་ཀྱི་ཉེ་འགྲམ་དུ་རང་ལོ་ ༣༢ ཡིན་པའི་བོད་མི་དར་རྒྱས་ཞུ་བ་ཞིག་གིས། རྒྱ་གར་ཉེན་རྟོག་པ་རཱ་ཇེན་ཌར་ཀཱུ་མར་ (Rajender Kumar) ཞེས་པ་ཞིག་ལ་གྲིས་བསྣུན་ཡོད་པ་དང་། དེའི་རྗེས་ཁོ་རང་ཉིད་ལའང་གྲི་ཐེངས་ ༩ ཙམ་བཙུགས་ཏེ་ཕྱོགས་གཉིས་ཀར་རྨས་སྐྱོན་ཆེན་པོ་ཕོག་ཡོད་འདུག

གནས་ཚུལ་དེ་བྱུང་མ་ཐག་ཉེན་རྟོག་པ་དང་དར་རྒྱས་གཉིས་ཀ་ཀང་རཱ་སྨན་ཁང་དུ་ཁྲིད་ཡོད་ཅིང་། ཉེན་རྟོག་པར་ཉེན་ཁ་ཆེན་པོ་མེད་ཀྱང་དར་རྒྱས་ཛ་དྲག་ཆགས་ཏེ་བཤག་བཅོས་བྱས་ཡོད་འདུག ད་ཆར་ཕན་ཚུན་གཉིས་ཀ་དྲག་སྐྱེད་གང་འཚམ་བྱུང་ཡོད་ཀྱང་བོད་པ་དེའི་རྨས་སྐྱོན་ཅུང་ལྕི་མོ་ཡིན་པ་མ་ཟད། དེ་རིང་ཞོགས་པའི་བར་ཁ་ཡང་གྲག་མ་ཐུབ་པའི་གནས་སྟངས་ཆགས་ཡོད་འདུག

ཁ་སང་ཕྱི་ཚེས་ ༢༧ ཉིན་གསར་འགོད་པ་ངྷ་ས་བདེ་དོན་ལས་ཁུངས་སུ་བཅར་ཏེ་གནས་ཚུལ་རྒྱུས་ལོན་བྱས་པར།  དར་རྒྱས་ནི་ཁམས་སྟེང་ཆེན་ནས་ཡིན་པ་དང་། ༢༠༠༢ ཡས་མས་ཤིག་ལ་རྒྱ་གར་ལ་འབྱོར་རྗེས་ཤེས་རབ་དགའ་ཚལ་སློབ་གླིང་དུ་ཕྱིན་ཏེ། ད་ཆར་ངྷ་སར་ལྷ་བྲིས་དང་ཟུར་དུ་ཟ་ཁང་ནང་ལས་ཀ་བྱེད་ཀྱི་ཡོད་འདུག དར་རྒྱས་ངོ་ཤེས་མཁན་ཚོ་དང་ཁོང་སྡོད་སའི་རྒྱ་གར་ཁང་བདག་གིས་བརྗོད་ན་དར་རྒྱས་ལགས་ནི་དུས་རྒྱུན་མི་ཉམས་ཆུང་ཞིག་ཡིན་རབས་འདུག  

ངྷ་ས་ས་གནས་མགོ་འཛིན་བསོད་ནམས་རྡོ་རྗེ་ལགས་སུ་ཞིབ་ཕྲའི་གནས་ཚུལ་དྲིས་པར་ཁོང་གིས་བརྗོད་ན། གནས་ཚུལ་གྱི་ཐོག་མའི་བྱུང་སྟངས་ལ་བལྟས་ན། དར་རྒྱས་ཞུ་བ་ཁོང་སྐབས་དེར་སེམས་ཁམས་ཅུང་བདེ་མིན་གྱི་དབང་གིས་དོན་རྐྱེན་བྱུང་བ་མིན་ནམ་སྙམ་པའི་དོགས་པ་ཡོད་སྐོར་དང་། ཐོག་མར་ཁོས་མེག་ལོར་བདེ་སྲུང་ཡན་ལག་ལས་ཁུངས་ཀྱི་སྒེའུ་ཁུང་ལ་རྡོ་གཞུ་བཞིན་པའི་སྐབས་སུ་བོད་པའི་ཕོ་གསར་ཞིག་གིས་དེ་འདྲ་མ་བྱེད་ཅེས་བཤད་སྐབས། ཁོས་ཕོ་གསར་དེར་ས་ཕག་གཞུ་རྩིས་བྱས་ཡོད་ཚུལ་བརྗོད་བྱུང་།

བསོན་ནམས་རྡོ་རྗེ་ལགས་ཀྱིས་མུ་མཐུད་དུ་བརྗོད་ན། ཉེན་རྟོག་པ་རཱ་ཇེན་ཌར་ཀཱུ་མར་ཉིན་དེར་ཉེན་རྟོག་པའི་ལ་བ་མ་གྱོན་པར་དེའི་ཉེ་འདབས་ཀྱི་རྒྱ་གར་བའི་གཉེན་སྟོན་ཞིག་ཏུ་ཡོང་ཡོད་པར། བདེ་སྲུང་ཡན་ལག་ལས་ཁུངས་མདུན་དུ་རྙོག་གྲ་འབྱུང་བཞིན་ཡོད་པ་ཤེས་འཕྲལ་དེ་གར་ཡོང་སྟེ་གནས་ཚུལ་དེ་བྱུང་ཡོད་པ་དང་། དེ་མ་ཐག་ཉེ་འཁོར་གྱི་རྒྱ་གར་བ་ཚོས་ལག་ཏུ་རྡོ་དང་དབྱུགས་པ་བཟུང་སྟེ་དར་རྒྱས་ལ་ཉེས་རྡུང་གཏོང་རྩིས་བྱས་པར། དར་རྒྱས་བདེ་སྲུང་ཡན་ལག་ལས་ཁུངས་ཀྱི་ཁང་སྟེང་དུ་འཛེགས་ཏེ་སོ་སོའི་ལུས་ལ་གྲི་བཙུགས་ཡོད་འདུག

ཕྱི་ཚེས་ ༢༦ ཉིན་བོད་མིའི་སྒྲིག་འཛུགས་བདེ་སྲུང་དྲུང་ཆེ་དང་ནང་སྲིད་དྲུང་ཆེ། ངྷ་ས་ས་གནས་མགོ་འཛིན་བཅས་ཀང་རཱ་སྨན་ཁང་དུ་རྨས་མ་གཉིས་ལ་གཟིགས་སྐོར་གནང་ཡོད་འདུག་ཅིང་། གསར་འགོད་པས་བདེ་སྲུང་དྲུང་ཆེ་དངོས་གྲུབ་རྡོ་རྗེ་ལགས་སུ་བཅར་འདྲི་ཞུས་པར། བོད་མིའི་སྒྲིག་འཛུགས་ཀྱི་ངོས་ནས་ཉེན་རྟོག་པ་རཱ་ཇེན་ཌར་ཀཱུ་མར་ལ་སེམས་གསོ་དང་སྦྲགས། ཉེན་རྟོག་པ་དང་ཁོང་གི་ནང་མི་ཚོའི་རྣམ་འགྱུར་ཡག་པོ་ཡོད་སྐོར་གསུངས་སོང་ལ། དར་རྒྱས་བཤག་བཅོས་གྲུབ་ཟིན་ཙམ་ཡིན་སྟབས་སྐད་ཆ་བཤད་ཐུབ་མེད་ཀྱང་། མ་འོངས་པར་མཐུན་འགྱུར་གང་དགོས་གནང་རྒྱུ་ཡིན་སྐོར་གསུངས་ཡོད་འདུག

གསར་འགོད་པས་བདེ་སྲུང་དྲུང་ཆེ་ལགས་སུ་དར་རྒྱས་ཀྱིས་བདེ་སྲུང་ཡན་ལག་ལས་ཁུངས་ལ་རྡོ་གཞུ་དོན། དེ་སྔ་ཁོང་དང་བདེ་སྲུང་བར་རྙོག་གླེང་རིགས་བྱུང་ཡོད་མེད་དྲིས་པར། དེ་འདྲ་མེད་སྐོར་དང་བོད་མི་ཚོས་རྒྱ་གར་ཡུལ་མི་དང་མཐུན་པོ་བྱ་རྒྱུ་གལ་ཆེན་ཡིན་པ། བོད་པ་ཚོ་རྒྱ་གར་ནང་གནས་དགོས་སྟབས་མཚམས་རེར་གྱོང་ཅུང་རེ་རག་ཀྱང་འཁུར་དགོས་སྐོར། གལ་སྲིད་ཡུལ་མི་དང་གནས་ཚུལ་རིགས་བྱུང་ཚེ་ཉེན་རྟོག་པར་སྙན་གསན་ཞུས་ཏེ་གནས་ཚུལ་མ་ལྷག་པ་གནང་གལ་ཆེ་ཚུལ་འབོད་སྐུལ་གནང་སོང་།

གནས་ཚུལ་འདིའི་ཐད་བོད་མིའི་སྒྲིག་འཛུགས་ནང་སྲིད་ལས་ཁུངས་ནས། དར་རྒྱས་ལ་བོད་མིའི་སྒྲིག་འཛུགས་ཀྱི་ངོས་ནས་སྨན་སྦྱོར་སོགས་ལ་མཐུན་འགྱུར་གནང་འཆར་ཡོད་སྐོར་དང་། གནས་ཚུལ་རྒྱུས་ལོན་བྱས་སྐབས་དར་རྒྱས་ནི་དུས་རྒྱུན་ཀུན་སྤྱོད་གཙང་མ་དང་བོད་དོན་ལ་སེམས་ཁུར་ཡོད་མཁན་ཞིག་ཡིན་པ་མ་ཟད། དེང་སྐབས་བོད་ནང་གནས་ཚུལ་ཛ་དྲག་ཆགས་ཡོད་པས་བོད་མི་ཚོར་སེམས་ཀྱི་དཀའ་ངལ་ཡོད་པ་མ་ཟད། བོད་མིའི་སྒྲིག་འཛུགས་ལའང་བསམ་ཚུལ་ཡོད་སྲིད་པས། དར་རྒྱས་ཀྱིས་བདེ་སྲུང་ལས་ཁུངས་ལ་དེ་ལྟར་བྱས་པ་ནི་ཕྱོགས་གཅིག་ནས་སེམས་ཚོར་ཕྱི་རུ་ཐོན་པ་ཞིག་ཀྱང་ཡིན་སྲིད་པས། བོད་མིའི་སྒྲིག་འཛུགས་ཀྱིས་བོད་རིགས་ན་གཞོན་ཚོའི་སེམས་ཚོར་ལ་བདག་པོ་རྒྱག་དགོས་པ་ཞིག་ལ་ངོས་འཛིན་གནང་གི་ཡོད་སྐོར་གསུངས་བྱུང་།

གསར་འགོད་པ། བནྡེ་སྐྱབས།