གཟའ་སྤེན་པའི་ཉིན་འབར་མའི་ནང་རྒྱ་ནག་གི་ཐེ་ཇུས་ཡོད་པའི་གཏེར་ཁ་སྔོག་འདོན་ལ་མི་མང་གིས་ངོ་རྒོལ་བྱས་ཏེ། ངོ་རྒོལ་བ་མང་པོར་རྨས་སྐྱོན་བཟོས་ཡོད་འདུག
ཁ་སང་ཕྱི་ཚེས་ ༢༩ ཉིན་གྱི་ཞོགས་པར་འབར་མའི་མཱོ་ནེ་ཝ་(Monywa) ས་གནས་སུ་རྒྱ་ནག་གི་ཐེ་ཇུས་ཡོད་པའི་མཉམ་འབྲེལ་སྡེ་ཚན་ཞིག་གིས་ཟངས་ཀྱི་གཏེར་ཁ་སྔོག་འདོད་བྱེད་བཞིན་པར། ས་གནས་ཀྱི་གྲྭ་བ་དང་མི་མང་གིས་བྱས་ཡོད་འདུག་ལ། སྐབས་དེར་གཞུང་དམག་གིས་ངོ་རྒོལ་བྱེད་མཁན་མི་མང་ཐོག་ཆུ་མདའ་དང་དུག་རླངས་བཏང་སྟེ་མང་ཚོགས་ཁ་གཏོར་གཏོང་ཐབས་བྱས་ཡོད་པ་མ་ཟད། མི་མང་པོར་རྨས་སྐྱོན་དང་ངོ་རྒོལ་བའི་སྡོད་གུར་དག་མེར་བསྲེཊ་བཏང་ཡོད་འདུག
ཟངས་ཀྱི་གཏེར་ཁ་དེ་ནི་འབར་མའི་ནང་གི་གཏེར་ཁ་ཆེ་ཤོས་ཤིག་ཡིན་པ་དང་། དེ་སྔའི་འབར་མའི་དྲག་དམག་གཞུང་གི་དམག་དོན་ཁང་དང་རྒྱ་ནག་གི་དྲག་མཚོན་བཟོ་སྐྲུན་སྡེ་ཚན་གཉིས་ཀྱི་མཉམ་འབྲེལ་སྡེ་ཚན་ཞིག་གིས་བདག་བཟུང་སྔོག་འདོན་བྱེད་ཀྱི་ཡོད་ཅིང་། ལོ་ ༢ གོང་གཏེར་ཁ་སྔོག་འདོན་གྱི་ས་ཆ་རྒྱ་སྐྱེད་གཏོང་ཆེད་ས་གནས་མི་མང་འབོར་ཆེན་ཞིག་ལ་གུན་གསབ་དང་སྡོད་ཁང་གསར་རྒྱག་བྱ་རྒྱུའི་གན་རྒྱ་བཞག་ཏེ་གནས་སྤོར་བྱས་བཅུག་ཡོད་འདུག རྗེས་སུ་གན་རྒྱ་ཇི་བཞིན་ལག་བསྟར་མ་བྱས་པ་མ་ཟད། མཉམ་འབྲེལ་སྡེ་ཚན་གྱིས་ངོས་ནས་གན་རྒྱ་དེ་ནི་ས་གནས་མང་ཚོགས་ཚོ་དང་རང་འགུལ་ཐོག་བཞག་པ་ཞིག་ཡིན་པ་དང་། ཁོ་ཚོར་མཐུན་འགྱུར་བྱས་པར་ས་གནས་ཡུལ་མི་ཉུང་ཤས་ཤིག་ལས་ཚང་མས་མོས་མཐུན་བྱུང་ཡོད་ཚུལ་བསྒྲགས་ཡོད་འདུག
ད་ལྟའི་འབར་མའི་གཞུང་གིས་གནས་བབ་གང་འདྲ་ཞིག་གི་འོག་སྡེ་ཚན་དེ་དང་ཡུལ་མིའི་བར་གན་རྒྱ་བཞག་ཡོད་མེད་དང་། མང་ཚོགས་ལ་དཀའ་ངལ་གང་འདྲ་འཕྲད་ཀྱི་ཡོད་མེད་ཐད་རྟོག་ཞིབ་བྱ་འཆར་ཡོད་སྐོར་བརྗོད་ཡོད་པར། རྒྱ་གཞུང་གིས་གཏེར་ཁ་དེའི་སྔོག་འདོན་ལས་གཞི་ལ་འགོག་རྐྱེན་ཡོང་ཚེ་རྒྱལ་ཁབ་གཉིས་ཀར་གྱོང་གུད་ཕོག་རྒྱུ་ཡིན་སྐོར་བརྗོད་འདུག
གསར་འགོད་པ། བནྡེ་སྐྱབས།
