ཁྲིན་ལ་ལོ་ ༣ ཁྲིམས་ཐག་བཅད་འདུག

ཁ་སང་རྒྱ་གཞུང་གིས་ཁྲིན་ཀོང་ཁྲིན་གྱི་ཚ་བོ་ཁྲིན་ཁི་ཀོས་ལ་ལོ་ ༣ དང་ཟླ་ ༣ གྱི་བཙོན་འཇུག་ཁྲིམས་ཐག་བཅད་འདུག

ཁ་སང་ཕྱི་ཚེས་ ༣༠ ཉིན་ཕྱི་དྲོ་ཨ་རིར་གནས་སྡོད་མིག་ལོང་ཡིན་པའི་རྒྱ་རིགས་ཁྲིམས་རྩོད་པ་ཁྲིན་ཀོང་ཁྲིན་གྱི་ཚ་བོ་ཁྲིན་ཁི་ཀོས་ལ་བསམ་བཞིན་གཞན་ལ་གནོད་འཚེ་བཏང་བའི་ཉེས་མིང་འོག རྒྱ་གཞུང་ཧྲན་ཏུང་ཡུས་ནན་རྫོང་མི་དམངས་ཁྲིམས་ཁང་གིས་ལོ་ ༣ དང་ཟླ་ ༣ གྱི་བཙོན་འཇུག་ཁྲིམས་ཐག་བཅད་འདུག  

དེ་སྔོན་ས་གནས་རྒྱ་གཞུང་གི་བཀའ་མངགས་ལྟར་ཁྲིན་ཁི་ཀོས་ཡི་ཁྲིམས་རྩོད་པར་ཝང་ཧའེ་ཅོན་ཟེར་བ་དེ་གོ་སྒྲིག་བྱས་རྗེས།  ད་ལྟའི་བར་ཁྲིན་ཁི་ཀོས་ཀྱི་ཕ་རྒན་ཁྲིན་ཀོང་ཧྥུ་ཁྲིམས་རྩོད་པ་དེར་ཐུག་འཕྲད་བྱེད་བཅུགས་མེད་པ་རེད།  ཡིན་ནའང་། ཁ་སང་སྔ་དྲོ་གློ་བུར་དུ་ཕ་རྒན་ཁྲིན་ཀོང་ཧྥུ་ལ་ཁྲིམས་རྩོད་པ་ཝང་ཧའེ་ཅོན་གྱིས་ཁ་པར་ཞིག་འབྱོར་ཏེ། ཁྲིན་ཁི་ཀོས་ལ་ཁྲིམས་ར་འཚོགས་རྒྱུ་ཡིན་པ་བརྗོད་འདུག་ལ།  ཕ་རྒན་ཁྲིན་ཀོང་ཧྥུ་དང་མ་རྒན་བཟའ་ཚོ་གཉིས་དེ་འཕྲལ་སོ་སོའི་བུ་ལ་ཁྲིམས་ར་འཚོགས་སའི་ཁྲིམས་ཁང་དུ་བསྐྱོད་ཡོད་ཀྱང་། རྒྱ་གཞུང་ཉེན་རྟོག་པས་ཁོང་གཉིས་ཁྲིམས་རའི་ནང་ཟུར་ཉན་དུ་འགྲོ་རུ་བཅུག་མེད་པ་རེད།

ཁྲིམས་ནང་ཟུར་ཉན་དུ་ཕྱིན་པའི་ཁྲིན་ཁི་ཀོས་ཀྱི་ཕ་སྤུན་ཞིག་ཁྲིམས་གཅོད་ཀྱི་མཇུག་འབྲས་བརྗོད་པ་ལྟར་ན། རྒྱ་གཞུང་ཁྲིམས་ཁང་གིས་ཁྲིན་ཁི་ཀོས་ཡིས་སོ་སོའི་ནག་ཉེས་ངོས་ལེན་བྱས་པའི་སྐོར་མ་གཏོགས། ཁྲིམས་མཐུན་གྱིས་རང་སྲུང་བྱས་པའི་གནས་ལུགས་ཁག་རྩིས་མེད་དུ་བཏང་ཡོད་འདུག  འོན་ཀྱང་། ཁྲིན་ཁི་ཀོས་ཡིས་བསྐྱར་དུ་ཁྲིམས་བཤེར་ཞུ་གཏུགས་བྱ་རྒྱུ་མིན་པ་ཁས་ལེན་བྱས་ཡོད་འདུག 

འདི་ལོ་ཕྱི་ཟླ་ ༥ ནང་རྒྱ་གཞུང་ཉེན་རྟོག་པ་ཚོ་མི་དཀྱུས་མར་བརྫིས་ཏེ།  ཁྲིམས་མཐུན་མ་ཡིན་པའི་ཐོག་ནས་མཚན་མོ་ཁྲིན་ཚང་གི་ཁྱིམ་དུ་ལྡིང་འོང་སྟེ།  གང་འདོད་བསྔོག་བཤེར་དང་གཅར་རྡུང་བྱས་པ་ལ་བརྟེན་ནས།  ཁྲིན་ཁི་ཀོས་ཡིས་རང་སྲུང་ཆེད་ཉེན་རྟོག་པ་གཅིག་ལ་གྲི་བཙུགས་པའི་རྗེས། རྒྱ་གཞུང་གིས་བསམ་བཞིན་མི་གསོད་རྩིས་བྱས་པའི་ནག་ཉེས་བཙུགས་ཏེ་འཇུ་བཟུང་བྱས་ཡོད་པ་རེད། 

 ཁྲིན་ཁི་ཀོས་ལ་བཙོན་འཇུག་ཁྲིམས་ཐག་བཅད་པ་དེ་ནི།  འདི་ལོ་ཁྲིན་ཀུང་ཁྲིན་རྒྱ་གཞུང་གི་བཀག་ཉར་མནར་གཅོད་འོག་ཨ་རིའི་གཞུང་ཚབ་ཁང་དུ་བྲོས་བྱོལ་བྱ་དགོས་བྱུང་བའི་རྗེས།  རྒྱ་གཞུང་གིས་ཁྲིམས་མཐུན་མ་ཡིན་པའི་ཐོག་ནས་ཁྲིན་ཀུང་ཁྲིན་གྱིས་ནང་མི་ཉེ་འབྲེལ་ཚོར་དྲག་གནོན་མནར་གཅོད་བཏང་བ་ལ་བརྟེན་བྱུང་བ་ཞིག་ཡིན་འདུག

གསར་འགོད་པ། ཚེ་རིང་རྒྱལ།