དད་ལྡན་དྭངས་པ་འདྲེན་པའི་མིག་རྒྱན་ལས་འཕྲོས་པའི་གཏམ།

སྙིང་མིག

ལོ་ངོ་ཉིས་སྟོང་ལྔ་བརྒྱའི་ཡར་སྔོན་ནས་དབུ་བརྙེས་ཤིང་ད་ལྟའི་བར་དུ་རྒྱུན་མ་ཆད་པར་གཙང་པོའི་རླབས་རྒྱུན་ལྟར་འཕྱོ་བཞིན་པའི་ནང་པ་སངས་རྒྱས་ཀྱི་བསྟན་པ་འདི་ཉིད། ད་དུང་འདི་ལྟར་གྲྭ་མ་ཉམས་ཤིང་གྲུ་མ་ཞིག་པར་ཉེ་བར་འཚོ་བའི་རྒྱུ་རྐྱེན་གཙོ་བོ་ནི་གཅིག་སྟེ། དེ་འཛིན་གྱི་སྐྱེས་བུ་དམ་པ་རྣམས་ཀྱིས་ལྷག་བསམ་གཡོ་བ་མེད་པའི་ངང་ནས་བཤད་པ་དང་སྒྲུབ་པའི་བསྟན་པ་ཆེས་ཆེར་འཛིན་སྐྱོང་བྱས་པས་རེད་ཅེས་ཁ་ཚོན་གཅོད་ནུས། མ་འོངས་པར་སངས་རྒྱས་ཀྱི་བསྟན་པ་རིན་པོ་ཆེ་གནས་དང་མི་གནས་འདིའང་འགྲོ་བའི་ལས་འཕྲོ་ཕུད། དེ་འཛིན་གྱི་སྐྱེས་བུ་རྣམས་ལ་རག་ལས་པ་ཁོ་ན་ཡིན་པར་འཁུམས། དེ་འཛིན་གྱི་སྐྱེས་བུ་ཟེར་དུས་རིན་པོ་ཆེ་དང་སྤྲུལ་སྐུ། ཡང་ན་མཁན་པོ་དང་སློབ་དཔོན་ཙམ་མ་ཡིན་པར་གྲྭ་བཙུན་ཚང་མ་ལ་གོ་ན་ཡང་ཆོག་པར་སྙམ་མོ།།

འུ་ཚོས་ནམ་རྒྱུན་བཤད་ཚོད་ལ་སངས་རྒྱས་ཀྱི་བསྟན་པ་རིན་པོ་ཆེ་ནི་ཕན་པ་དང་བདེ་བ་མ་ལུས་པ་འབྱུང་བའི་སྒོ་གཅིག་པུར་གྱུར་པ་རེད་ཅེས་མགྲིན་པ་གཟེངས་སུ་བསྟོད་པ་འདིའང་རྒྱུ་མཚན་དང་། གནས་ལུགས་ཟབ་མོ་ཡོད་པའི་སྐད་ཆ་ཞིག་ལས་ཤོབ་གཏམ་པ་དང་བྱུང་རྒྱལ་སྨྲས་པ་ཞིག་མ་རེད་འདོད། དེས་ན་འགྲོ་བ་ཡོངས་ཀྱི་ཕན་པ་དང་བདེ་བ་མ་ལུས་པ་འབྱུང་བའི་སྒོ་གཅིག་པུར་གྱུར་པ་དེ་ལ་སྲུང་སྐྱོབ་དང་མེལ་ཚེ་བྱེད་པ་དེའང་ཉི་མ་འཕུད་ཐབས་ཙམ་དང་། མི་ཚེ་འཁྱོལ་ཐབས་ཙམ་མིན་པར་གཞན་དོན་རླབས་པོ་ཆེ་ལ་སྦྱོར་དངོས་མཇུག་གསུམ་ཚང་བའི་ཧུར་བརྩོན་ཞིག་བྱེད་ཀྱིན་ཡོད་པ་ངོས་འཛིན་བཞིན་མདུན་ནས་མདུན་དུ་བསྐྱོད་དགོས་མོད། འོན་ཀྱང་རང་ཉིད་ཀྱི་ཆོས་ལུགས་དེ་ཉིད་དར་ཞིང་རྒྱས་པའི་ཆེད་ཁོ་ནར་དམིགས་ནས་གཞན་གྱི་ཆོས་ལུགས་བསྒྱུར་བ། གཞན་གྱི་མངའ་རིས་འཕྲོག་པ། གཞན་གྱི་འབངས་མི་བསླུ་བ། གཞན་གྱི་སེམས་ཁམས་དཀྲུག་པ། གཞན་ལ་དོ་ཕོག་གཏོང་བ། གཞན་ལ་མཐོང་ཆུང་བྱེད་པ། མདོར་ན་གཞན་གྱི་ཕུན་ཚོགས་ལ་མ་བཟོད་ནས་དེ་དག་རང་ཉིད་ཀྱི་དཔལ་དུ་ཁུག་རེ་སོགས་ནི་དུས་ནམ་ཡང་འདོར་བྱ་ཞིག་ལས་བླང་བྱ་ཕྲ་མོ་ཙམ་ཡང་མ་ཡིན་ནོ།།

གནད་དོན་འདིའི་སྐོར་ནས་༸གོང་ས་སྐྱབས་མགོན་ཆེན་པོའི་བཀའ་སློབ་གཅིག་ཏུ “ སྔོན་ཆད་ངས་སེམས་ལ་སངས་རྒྱས་ཀྱི་བསྟན་པ་འདི་ཉིད་ཕྱི་རྒྱལ་སོགས་ལ་རྒྱ་བསྐྱེད་ཐབས་ཀྱི་སྐོར་མང་པོ་དྲན་མྱོང་། ད་གཟོད་ཕྱི་རྒྱལ་སོགས་ནས་གཞན་གྱི་ཆོས་ལུགས་ཀྱི་ལེགས་ཆ་དེ་ཚོ་མཐོང་དུས། སྔོན་ཆད་ང་རང་གི་བསམ་བློ་དེ་ནོར་འཁྲུལ་ཡིན་པ་གཞི་ནས་ཤེས་ཤིང་། དེ་ནས་ངས་དེའི་སྐོར་གྱི་ལས་འགུལ་མི་སྤེལ་བ་རྦད་དེ་མཚམས་བཞག་པ་ཡིན” ཞེས་གསུངས་པ་དེ་མཐོང་དུས་ང་དངོས་གནས་ཧང་སངས་སོང་། རི་བོ་གངས་ཅན་པའི་ཆོས་བརྒྱུད་ཆེན་པོ་བཞི་སྟེ། སྔ་འགྱུར་རྙིང་མ་པ་དང་། འགྲོ་མགོན་བཀའ་བརྒྱུད་པ། དཔལ་ལྡན་ས་སྐྱ་པ་དང་། རི་བོ་དགེ་ལྡན་པ་བཞི་པོ་ནི་སངས་རྒྱས་ཀྱི་བསྟན་པ་ཡིན་པ་ལ་གཅིག་པ་ཡིན་པའི་མ་ཚད། ཐེག་པ་ཆེན་པོའི་བསྟན་པ་ཡིན་པ་ལ་གཅིག་པ་ཡིན་པ་ཕལ་ཆེར་ཡོངས་སུ་གྲགས། དེས་ན་རང་རང་གི་མེ་ཏོག་གང་ལ་ཕོག་པའི་ལྷ་སྐལ་གང་ཡིན་པ་དེ་ཉིད་བརྒྱུད་འཛིན་བྱེད་བཞིན། གཞན་གྱི་ཆོས་ལུགས་ཀུན་ལ་དད་པ་དང་དག་སྣང་སྦྱོང་དགོས་རྒྱུ་འདི་ནི་ཆོས་ཚུལ་བཞིན་ཤེས་མཁན་ཞིག་གི་ཉམས་ལེན་མཐིལ་ཕྱིན་པ་ཡང་དེ་ཁོ་ན་ཡིན་པ་ཚོར།

འུ་ཚོས་ངེས་པར་ཤེས་དགོས་ཤིང་ངེས་པར་དུ་ལག་ལེན་བསྟར་དགོས་པའི་གནད་དོན་དེ་དག་ནི་བཤད་སྒྲུབ་གཉིས་སམ་ལུང་རྟོགས་གཉིས་ཀྱི་སྒང་ལ་ཡོད་པ་མ་ཡིན་པར་ཀློག་པ་ཐོས་བསམ་པ་དང་། སྤོང་བ་བསམ་གཏན་པའི་སྒང་ལ་ཡོད་པ་ཤེས་དགོས་གལ་ཆེ་ཞིང་། སྤྱིར་སྙིགས་མ་ལྔ་བདོ་བའི་དུས་ལ་ཁག་བསྔས་ནས་གང་བྱས་ན་ཆོག་ཆོག་ཏུ་མི་རློམ་པར་གྲྭ་བཙུན་གྱི་སྤུས་ཚད་ལ་དག་འདོད་དང་གཅེས་སྐྱོང་བྱ་དགོས། ༸དཔལ་རྒྱལ་དབང་བཅུ་བདུན་པ་མཆོག་གིས་བཀའ་བརྒྱུད་སྨོན་ལམ་གྱི་སྐབས་སུ་ཆུ་མཆོད་པ་ནས་འདོན་རྟ་དབྱངས་བར་ལ་དྭངས་གཙང་དང་། གོས་ངུར་སྨྲིག་ནས་སེམས་དྲན་ཤེས་བར་ལ་འཐུས་ཚང་། ལུགས་ཧིན་དྷུ་ནས་ཆོས་སངས་རྒྱས་བར་ལ་དམ་གཙང་། རྒྱབ་བེར་ཟླ་ནས་ཕྱག་ལྷུང་བྱེད་བར་ལ་ཆ་ཚང་། མ་ནམ་མཁའ་ནས་བཀའ་བསྟན་འགྱུར་བར་ལ་ཆོག་ཚང་། རྟེན་དགེ་བསྙེན་ནས་དགེ་ཚུལ་སློང་བར་ལ་ཁྲིམས་གཙང་སོགས་ཆེས་ལོ་རྒྱུན་གྱི་རིན་ཐང་ལྡན་ཞིང་སྐྱེ་འགྲོ་ལ་དགེ་ཕན་ཆེ་བ་ངེས་དོན་གྱི་ཞི་བདེའི་སྨོན་ལམ་འདི་དང་འདིའི་ནང་བཞིན་འཚོགས་པའི་སྐབས་སུ་ཡིན་ན་ཡང་རུང་ལ། དེ་ལས་གཞན་དུའམ་དུས་རྟག་ཏུ་གྲྭ་བཙུན་རྣམས་ཀྱིས་དད་ལྡན་དྭངས་པ་འདྲེན་པའི་མིག་རྒྱན་ཞིག་དགོས་པ་ནི་ཤིན་ཏུ་གལ་ཆེ།

སྤྱིར་དད་ལྡན་དྭངས་པ་འདྲེན་པའི་མིག་རྒྱན་ཟེར་དུས་དད་ལྡན་གྱི་མིག་ལ་དག་སྣང་གི་ལོངས་སྤྱོད་ཅིག་སྤྲད་ཐུབ་དགོས་ཤིང་། དེའང་ལུས་ཀྱི་ཆས་གོས་གྱོན་སྟངས་ཙམ་མ་ཡིན་པར་གཙོ་བོ་ལུས་ངག་ཡིད་གསུམ་གྱི་ཀུན་སྤྱོད་ཀྱི་ཐོག་ནས་དྭངས་པ་འདྲེན་པའི་མིག་རྒྱན་ཞིག་བཟོ་དགོས། ཀུན་སྤྱོད་ནི་ལུས་ངག་ཡིད་གསུམ་གང་རུང་གི་བྱ་སྤྱོད་ལ་གོ་ཞིང་། དེའང་ངག་གི་སྒོ་ནས་སྙན་ཞིང་འཇེབས་པའི་གཏམ་སྟེ། གཞན་ལ་ཕན་པའི་གཏམ། ཆོས་ལ་བསྐུལ་བའི་གཏམ། ཞི་བདེ་དང་ལྷིང་འཇགས་ཀྱི་གཏམ། དོན་སྙིང་ལྡན་པའི་གཏམ་སོགས་འབེལ་ནས་གཞན་ལ་བྱམས་བརྩེ་བསྐྱང་བ་དང་། ལུས་ཀྱི་སྒོ་ནས་ངུར་སྨྲིག་གི་ཚོན་མདོག་རན་པར་མནབ་པ་འདི་ཉིད་ཤིན་ཏུ་གལ་ཆེ་སྟེ། ལ་ལ་དག་གིས་དམར་མདངས་ཅུང་ཟད་ཙམ་ལས་མེད་པའི་སྐྱ་སེང་སེང་ཞིག་བཞེས་པ་དང་། འགའ་ཞིག་གིས་དམར་མདངས་གཏན་ནས་བྲལ་བའི་ནག་ཤས་ཆེ་བར་བགོས་པ་དང་། ཁ་གཅིག་གིས་ནི་དམར་པོ་དམར་རྐྱང་ཞིག་མནབ་པ་སོགས་ནི་མདོ་འདུལ་བ་དང་མི་མཐུན་ཞིང་། སྔགས་བླ་མེད་ལ་མི་རུང་བའི་རང་སྣང་གང་དྲན་གྱི་འཁྲབ་སྟོན་ཙམ་དུ་ཟད།

དེང་སང་བཙན་བྱོལ་ན་བཞུགས་པའི་ཆོས་བརྒྱུད་ཁག་ལས་གཟན་ཤམ་གྱི་ཚོན་མདངས་ནི་དགེ་ལུགས་དམར་རྐྱང་ལ་དགའ་ཞིང་། རྙིང་མ་ནག་རྐྱང་ལ་དགའ། ས་སྐྱ་དགེ་ལུགས་དང་མཐུན་ཤས་ཆེ་ཞིང་བཀའ་བརྒྱུད་རྙིང་མ་ལ་མཐུན་ཤས་ཆེ་བ་སོགས་གཟན་ཤམ་གྱི་ཚོན་མདངས་འདི་ལ་ཏག་ཏག་ཅིག་ཡོང་བཟོ་མི་འདུག་པས་ཏན་ཏན་ཐུགས་ལ་འཇོག་དགོས་ངེས་ཤིག་ཡིན་པར་མཐོང་། གཟན་ཤམ་ལུས་ལ་མནབ་པའི་དུས་སུ་གོས་ཚགས་འཆོས་སྟངས་དང་ཉམས་སྟོན་གྱི་ཆ་ནས་ཀྱང་གཞན་ཡིད་དབང་མེད་དུ་འགུག་ནས། རང་ཉིད་ཀྱང་ཁོང་ཚོ་ནང་བཞིན་གྱི་ལུས་ལ་ངུར་སྨྲིག་བགོ་ཞིང་སེམས་ཀྱི་ཞི་བདེ་འཚོལ་མཁན་ཞིག་བྱ་དགོས་སྙམ་པའི་ཚོར་བ་སྟེར་ནུས་དགོས་པ་ལས། གཟན་ཤམ་གྱོན་སྟངས་མཐོང་བ་ཙམ་གྱིས་སྐྱུག་བྲོ་འགྲོ་བ་ནི་སངས་རྒྱས་བསྟན་པའི་ཞབས་འདྲེན་དུ་འགྲོ་པས་ངེས་པ་གཟབ་པར་འཚལ། སྐབས་འདིར་གཙོ་བོ་ལུས་ངག་གཉིས་ཀྱི་གནད་དོན་ལ་རག་ལས་ཤིང་། དེ་དག་ཀྱང་ཉེས་པའི་དྲི་མ་ཙམ་ཡང་མེད་པ་གཙང་སེང་ངེ་བ་ཞིག་གིས་གཞན་གྱི་རྒྱུད་ལ་ཐར་པ་དང་ཐམས་ཅད་མཁྱེན་པའི་ས་བོན་འཇོག་པར་དགོས་སོ།།

དེང་སང་ནི་སྐྱ་བོ་ཞིག་གིས་གང་བྱས་ཀྱང་ཆོས་འཇིག་རྟེན་གཉིས་ཀ་ནས་གུ་ཡངས་ཡིན་ཞིང་གྲྭ་བཙུན་ཞིག་གིས་གང་བྱས་ཀྱང་ཆོས་འཇིག་རྟེན་གཉིས་ཀ་ནས་ནག་ཉེས་ཡིན་པའི་དུས་ཀྱི་མར་ཤམ་འདིར། གཟབ་ནན་དང་སྤྱང་གྲུང་ལྡན་པའི་སྒོ་ནས་སངས་རྒྱས་ཀྱི་བསྟན་པ་འཛིན་སྐྱོང་བྱེད་བཞིན་ཐར་འདོད་ཀྱི་སྐྱེ་བོ་རྣམས་གཞན་གྱི་ལྟ་ཕྱོགས་དང་ཐོས་ཕྱོགས་མ་ནོར་མ་འཁྲུལ་བར་མདུན་གྱི་ཐང་ཆེན་པོ་ལ་ཚམ་ཚོམ་མེད་པར་འཁྲིད་དགོས། ཡུལ་ཡར་ཀླུང་ན་བསྡད་ན། ལྷ་ཡར་ལྷ་ཤམ་པོ་བསྟེན་དགོས་ཟེར་བ་བཞིན་ཤཱཀྱ་ཐུབ་པའི་རྩ་ཁྲིམས་ཀྱི་ནང་ལ་འཛུལ་ཚར་རྗེས་ཁྲིམས་དེ་ལས་མ་འདའ་བར་དུ་རྩ་ཁྲིམས་དེ་ལ་གཞི་བཟུང་བྱ་དགོས་པ་ནི་ལམ་དང་ལུགས་སྲོལ་དང་། འགྲོ་སྟངས་དང་འདུག་སྟངས་ཤིག་ཀྱང་རེད། དེ་ལ་ཕྱི་བཤོལ་དང་འཛེམས་དོགས་མེད་པར་བཀའ་མདོ་རྒྱུད་དང་ལུང་མན་ངག་ནས་གང་གསུང་བ་དེ་དག་ཚད་མར་བཀུར་ནས་འདི་བདེ་ཕྱི་སྐྱིད་ཀྱི་ལམ་ལ་ཆས་ན་མི་མཛེས་སམ།།

༢༠༡༢།༡༢།༣། སཱ་ར་བོད་ཀྱི་མཐོ་སློབ་ནས་ཤར་མར་བྲིས་སོ།།

༼ རྩོམ་པ་པོའི་ཟིན་བྲིས་ལས་བདམས་བཀོད་བྱས། ༽