དབུ་མའི་ལམ་གྱི་མདུང་ཁ་ནང་ལ་མ་གཏོད།

གཞུང་པ་ཚེ་དབང་བསོད་ནམས།    

བོད་གཞུང་དམངས་གཉིས་ནས་དམངས་གཙོའི་ཁྲིམས་ལུགས་བརྒྱུད་ནས་གཏན་ལ་ཕབ་པའི་དབུ་མའི་ལམ་གྱི་སྲིད་བྱུས་ལ་དབུས་བོད་མིའི་སྒྲིག་འཛུགས་ཀྱི་ངོས་ནས་བོད་རྒྱའི་དཀའ་རྙོག་སེལ་ཐུབ་པའི་འགན་འཁུར་བཞེས་དགོས་པ་ལས། དབུ་མའི་ལམ་གྱི་སྲིད་བྱུས་དེ་དག་གཞུང་འབྲེལ་མ་ཡིན་པའི་ཚོགས་པ་སྒྲིག་འཛུགས་ཀྱི་མི་སྣའི་ལག་ཏུ་གསོ་སྐྱོང་བྱས་ཏེ། བོད་མི་ནང་ཁུལ་དུ་མདུང་རྩེ་ཁ་གཏོད་བྱ་རྒྱུའི་ཆབ་སྲིད་ཀྱི་ལག་ཆར་ནམ་ཡང་ཁ་ཕྱོགས་མི་ཉན།

དབུ་མའི་ལམ་གྱི་ཉིན་མོ་སྲུང་གཙི་ཞུ་རྒྱུ་དེ་དག་གལ་འགངས་ཆེ་བའི་ཆབ་སྲིད་ཀྱི་གནད་དོན་གལ་ཆེན་ཞིག་ལ་དབུས་བོད་མིའི་སྒྲིིག་འཛུགས་དང་རྒྱ་ཆེ་པའི་མང་ཚོགས་ཚོས་ངོས་འཛིན་གནང་གི་ཡོད་ན། ཁྲིམས་བཟོ་སྤྱི་འཐུས་གྲོས་ཚོགས་ནས་དམངས་གཙོའི་ལམ་ལུགས་དང་མཐུན་པའི་ཁྲིམས་ལུགས་བརྒྱུད་ནས་གཏན་འབེབས་ཐོག གཞུང་འབྲེལ་གྱི་དུས་ཆེན་ལ་གཞུང་དམངས་གཉིས་ནས་སྲུང་གཙི་ཞུ་ཐུབ་པའི་འགན་འཁུར་བཞེས་དགོས་པ་ལས་གཞུང་འབྲེལ་མ་ཡིན་པའི་ཚོགས་པ་སྒྲིག་འཛུགས་ཀྱི་ལམ་སྟོན་འོག་ཏུ་དབུས་བོད་མིའི་སྒྲིག་འཛུགས་དང་། ཞི་བའི་མི་མང་མཉམ་བཞུགས་གནང་རྒྱུ་དེ་དག་ཁྲིམས་མཐུན་ཞིག་ལ་ནམ་ཡང་ངོས་འཛིན་ཞུ་མི་ཐུབ་པ་མ་ཟད། ཁྲིམས་མཐུན་ཞིག་ཏུ་ཁ་ཡང་བསྒྱུར་མི་ཐུབས་དེ་ཡང་གསལ་པོ་མཁྱེན་དགོས།

ལུང་ཚན་ཤོག་སྒྲིལ་དང་ཕྱོགས་གཏོགས་ཆབ་སྲིད་ལ་འགན་འཁུར་ཆེ་བའི་ཚོགས་པ་སྒྲིག་འཛུགས་ཀྱི་ལམ་སྟོན་འོག་ཏུ་གསོ་སྐྱོང་བྱེད་བཞིན་པའི་སྐབས་འཚོལ་རིང་ལུགས་པ་ཁག་ནས་ང་ཚོ་དབུ་མའི་ལམ་དང་། ཁོ་ཚོ་རང་བཙན་ཟེར་བའི་ཆབ་སྲིད་ཀྱི་གོ་རྟོགས་རང་སྐྱ་མ་ཐུབ་པའི་མི་སྣ་ཁག་ནས་འདྲེ་ཤར་གྱི་ཕྱོགས་སུ་གནས་པ་ལས་གླུད་ནུབ་སྒོར་གཏོང་བ་དོན་རེ་ཆུང་ཟེར་བའི་དཔེ་ལྟར། བོད་རྒྱལ་ཁབ་དང་བོད་མི་རིགས་ཀྱི་ཕྱི་ནང་གི་སྣོད་བཅུད་ཡོངས་རྫོགས་མེད་པ་བཟོ་མཁན་གྱི་དགྲ་བོ་ལ་ཐལ་བ་སྦར་བ་གང་གཏོར་མ་ཐུབ་པར། བོད་མི་ནང་ཁུལ་དུ་ཁྱོད་ཚོ་དང་ང་ཚོ་ཟེར་བའི་དགོས་མེད་ཀྱི་གླེང་གཞི་སྤེལ་བཞིན་པ་དེ་དག དབུས་བོད་མིའི་སྒྲིག་འཛུགས་བཀའ་ཤག་གི་ལྟ་གྲུབ་གསུམ་གྱི་ཡ་གྱལ་ “ཆིག་བསྒྲིལ” ཟེར་བའི་ཁ་གསང་ཆེན་པོའི་གཏམ་དེ་ཚོ་དང་ཡང་འགལ་བ་ལྟག་སྤྲོད་དུ་གྱུར་ཡོད་པ་སྨོས་ཀྱང་ཅི་དགོས།  

ཉེ་ལམ་ཚོགས་ཆེན་གྱི་མཇུག་ཏུ་སྲིད་སྐྱོང་མཆོག་གིས་བཀའ་སློབ་ཕེབས་པའི་ནང་། ༸གོང་ས་མཆོག་ཐུགས་ཕམ་ཡོང་དེ་རང་བཙན་དང་དབུ་མའི་ལམ་གྱི་གནད་དོན་མ་རེད་ཅེས་ཐུགས་ཐག་ཆོད་པོས་བཀའ་ཕེབས་པ་མ་ཟད། དབུ་མའི་ལམ་དང་རང་བཙན་བགྲོ་གླེང་ཡོང་དགོས་ཀྱི་རེད། འོན་ཀྱང་དེའི་བར་ལ་གནས་ཚུལ་ཞིག་ཆགས་ཀྱི་ཡོད་པ་གོ་རྒྱུ་འདུག རྣམ་པ་ཚོ་ཕྱོགས་མཐའ་ཁག་ལ་ཕེབས་སྐབས་གནད་དོན་དེ་དག་མི་ཡོང་རྒྱུར་འབད་བརྩོན་གནང་རོགས་ཅེས་བཀའ་ནན་ཕེབས་པ་ནས་ངོ་སྤྲོད་གསལ་པོ་ཆགས་རྒྱུ་དང་། ཉེ་ལམ་ངྷ་སར་ཆབ་སྲིད་༼ དཔྱད་གླེང་༽ ཟེར་བའི་དབུ་མའི་ལམ་མི་མང་ལས་འགུལ་ཁང་ནས་འགྲེམས་སྤེལ་བྱེད་བཞིན་པའི་གསར་ཤོག་ཅིག་ཀྱང་བཙན་བྱོལ་སྤྱི་ཚོགས་ནང་གསར་དུ་འཁྲུངས་འདུག་པ་འདི་དག་ལ་ཞིབ་ཏུ་དཔྱད་སྐབས་ལོ་རབས་བརྒྱད་ཅུ་དང་། དགུ་བཅུའི་ནང་ལྡི་ལིར་༼ མ་ཁྱོག་དྲང་ཐིག ༽ཟེར་བ་དང་། ངྷ་སར་མང་༼ གཙོའི་གསར་ཤོག ༽ཟེར་བ་དེ་དག་ལ་མང་ཚོགས་ཀྱི་ཁྲོད་དུ་བལྟ་ཀློག་གི་འགྲོ་རྒྱུག་ཡོད་ནའང་། སྐྱེས་མ་ཐག་ཏུ་འཚར་ལོངས་མ་ཐུབ་པར་གཙང་ཆུ་དྭངས་མ་བཞིན་དུ་རྒྱུག་མ་ཐུབ་པར་རྫིང་ཆུ་རྙོག་མ་བཞིན་དུ་འཁྱིལ་ནས་ཞི་བར་གཤེགས་པའི་ལོ་རྒྱུས་ལ་དཔྱད་སྐབས། ད་ལྟའི་ཆབ་སྲིད་དཔྱད་གླེང་ཟེར་བའི་གསར་ཤོག་འདིའི་སྐུ་ཚེ་ཚད་དང་འགྲོ་དོན་གྱི་དཔྱད་གླེང་ཇི་ཙམ་གནང་ཐུབ་མིན་ལའང་ཐེ་ཚོམ་གྱི་རང་བཞིན་ཆགས་འདུག

རིན་ཐང་ཅན་གྱི་ཆབ་སྲིད་དཔྱད་གླེང་གནང་རྒྱུ་ཡིན་དང་། རང་ཕྱོགས་འགེབ་སྲུང་དང་གཞན་ཕྱོགས་ལ་སྡང་སེམས་དང་མཐོང་ཆུང་བྱ་རྒྱུའི་ཕྱོགས་གཏོགས་ཆབ་སྲིད་ཀྱི་དཔྱད་གླེང་ཞིག་ཡིན་དེ་ཡང་བཤད་ཚོད་ཐུབ་དཀའ་བའི་གནས་སུ་གྱར་ཡོད། རང་དབང་ཅན་གྱི་གསར་ཤོག་གང་མང་ང་ཚོའི་སྤྱི་ཚོགས་ནང་སྐྱེད་སྲིང་ཐུབ་པའི་འགན་དེ་བསམ་ཡོད་བློ་ལྡན་བོད་མི་ཚང་མས་ངེས་པར་དུ་བཞེས་དགོས་པ་ལས། ཚོགས་པ་སྒྲིག་འཛུགས་ཀྱི་ལམ་སྟོན་འོག་ཏུ་གསོ་སྐྱོང་བྱེད་བཞིན་པའི་གསར་ཤོག་དང་། དུས་དེབ་སོགས་ཀྱི་དྲང་བདེན་གྱི་གནས་ཚུལ་དང་། ཁུངས་ཐུབ་ཀྱི་ལོ་རྒྱུས་སྤྱི་ཚོགས་འཚོ་བའི་ལོ་རྒྱུས་ནང་། ནམ་ཡང་འཇོག་མི་ཐུབ་པ་དེ་ཡང་གསལ་པོ་མཁྱེན་དགོས་པ་བཅས། དབུ་མའི་ལམ་གྱི་སྲིད་བྱུས་དེ་དག་བོད་རྒྱའི་དཀའ་རྙོག་ཞི་བའི་ཐོག་ནས་སེལ་ཐུབ་པའི་བླ་ན་མེད་པའི་ཆབ་སྲིད་ཀྱི་ཐབས་ལམ་ཞིག་ཡིན་པ་ལས་ཚོགས་པ་སྒྲིག་འཛུགས་དང་མི་སྒེར་གྱི་མཁས་གྲགས། རང་དོན་སྒྲུབ་རྒྱུའི་ཆབ་སྲིད་ལ་ཁ་ཕྱོགས་ཏེ་བོད་མི་ནང་ཁུལ་དུ་མདུང་རྩེ་ཁ་གཏོད་བྱ་རྒྱུའི་སྲིད་བྱུས་ཤིག་མིན་པ་དེ་ཡང་གསལ་པོ་མཁྱེན་ཐུབ་པའི་གསལ་འདེབས་ཞུ་འདོད་བྱུང་། །

ཕྱི་ལོ་ ༢༠༡༢ ཟླ་ ༡༡ ཚེས་ ༢༥།