ལ་ལའི་ཆོས་སྐྱབས་འཇུ་བཟུང་།

གཟའ་མིག་དམར་ཉིན་གྱི་དགོང་མོར་མགོ་ལོག་པདྨ་རྫོང་ཐོག་ནས་ལ་ལའི་ཆོས་སྐྱབས་འཇུ་བཟུང་བྱས་འདུག

ཟླ་འདིའི་ཕྱི་ཚེས་ ༤ ཉིན་གྱི་དགོང་མོར་རང་ལོ་ ༤༥ ཡས་མས་ཡིན་པ་ལ་ལའི་ཆོས་སྐྱབས་ལགས་མགོ་ལོག་པདྨ་རྫོང་ཐོག་ནས་འཇུ་བཟུང་བྱས་ཡོད་འདུག་ལ། ཁོང་འཇུ་བཟུང་བྱེད་དགོས་དོན་གྱི་གནས་ཚུལ་གསལ་ཁ་བྱུང་ཐུབ་མེད་ཀྱང་།  ཕྱི་ཚེས་ ༣ ཉིན་ཀྱི་མཚན་མོར་ཝ་ཤུལ་རྡོར་བྲུག་ལགས་འཇུ་བཟུང་བྱས་ཡོད་པ་ལྟར། ཕྱི་ཚེས་ ༤ ཉིན་ལ་ལའི་ཆོས་སྐྱབས་ལགས་རྫོང་ཉེན་རྟོག་ཁང་དུ་ཝ་ཤུལ་རྡོར་བྲུག་ལགས་ལ་ནག་ཉེས་ཅི་ཡང་མེད་པས་གློད་གྲོལ་གཏོང་དགོས་པའི་ཞུ་གཏུགས་ཆེད་ཕྱིན་ཡོད་སྟབས།  ཁོང་གི་ནང་མི་དང་ས་གནས་བོད་མི་ཚོས་རྒྱུ་རྐྱེན་དེ་ཁག་བཞག་སྟེ་འཇུ་བཟུང་བྱས་པ་ཞིག་ཡིན་པར་ངོས་འཛིན་བྱེད་བཞིན་ཡོད་འདུག

ཚང་དབྱངས་ལགས་ཀྱིས་འདི་གར་གནས་ཚུལ་བརྗོད་པ་ལྟར་ན། ལ་ལའི་ཆོས་སྐྱབས་ཀྱི་ནང་མི་སྤུན་མཆེད་ཚོས་ཁ་སང་སྟེ་ཕྱི་ཚེས་ ༥ ཉིན་ཡར་མར་ལ་འབྲེལ་བ་གང་མང་བྱས་མཐར།  ཁོང་མགོ་ལོག་ཁུལ་ཐོག་གི་བཙོན་ཁང་དུ་ཡོད་པ་ཤེས་རྟོགས་བྱུང་ཡོད་འདུག་ལ། ཁོང་གི་ནང་མི་ཚོས་ཁོང་ལ་བཟའ་ཆས་སོགས་སྐྱེལ་བར་མགོ་ལོག་ཁུལ་ཐོག་ཏུ་ཕྱིན་ཡོད་ཀྱང་། ཁོང་དང་ཐུག་འཕྲད་བྱེད་བཅུག་མེད་པ་མ་ཟད། ཁོང་འཇུ་བཟུང་བྱེད་དགོས་དོན་ཅི་ཡིན་སྐོར་འགྲེལ་བརྗོད་གང་ཡང་བྱས་མེད་པ་རེད།

ལ་ལའི་ཆོས་སྐྱབས་ལགས་ནི་མགོ་ལོག་པདྨ་རྫོང་རྡོ་གོང་མ་ཡུལ་ཚོའི་གཉི་མདའ་སྡེ་བའི་ཡུལ་མི་ཡིན་པ་དང་། ད་སྐབས་ཁོང་མགོ་ལོག་པདྨ་རྫོང་ཐོག་ཏུ་རྒྱུན་སྡོད་བྱེད་བཞིན་ཡོད་པ་རེད། ཁོང་ནི་ནམ་རྒྱུན་བོད་པ་ནང་ཁུལ་མི་མཐུན་པའི་རིགས་བྱུང་སྐབས་གཟི་བཤད་མཁན་གྱི་མི་སྣ་གལ་ཆེན་ཞིག་ཡིན་པ་དང་། ཁོང་གི་ཕའི་མིང་ལ་ལའི་ཐོས་པ་(སྐུ་གྲོངས་ཟིན) དང་མ་མིང་ལ་དོན་སྐྱིད་ཟེར་ཞིང་། ཁོང་གི་ཁྱིམ་དུ་ཆུང་མ་དང་ཕྲུ་གུ་འགའ་བཅས་ཡོད་འདུག

གསར་འགོད་པ། ཚེ་རིང་རྒྱལ།