འབྲེལ་ཐག་ནི་དྲ་འབུ་ཡོང་སའི་མངལ་སྒོ་ཡིན།

བསྟན་འཛིན་སྒྲོལ་མ།

༼འདི་ནི་ཉེ་ཆར་ང་ལ་འབྱོར་བའི་ཉེན་ཁ་ཅན་གྱི་འབྲེལ་ཐག་ཁག་ཅིག་རེད་ལ། གོ་རྟོགས་གསལ་པོ་ཡོང་ཆེད་འདིར་རྒྱ་ཆེ་བའི་ཀློག་པ་པོ་ཚོར་པར་རིས་ཀྱི་ལམ་ནས་གསལ་སྟོན་བྱས་པ་ཡིན།༽

དྲ་རྒྱའི་སྤྱོད་སྒོ་ཉིན་རེ་བཞིན་ཤུགས་ཆེར་འགྲོ་བཞིན་པའི་ད་ལྟའི་དུས་སྐབས་འདིར། མི་རྣམས་ཀྱིས་ཉིན་རེའི་འཚོ་བའི་ཁྲོད་ཀྱི་བྱ་བཞག་གང་མང་ཞིག་དྲྭ་ཐོག་ནས་སྒྲུབ་བཞིན་ཡོད་ལ། འབྲི་ཀློག་སྦྱོར་གསུམ་ཤེས་མཁན་གྱི་མི་ཞིག་ཡིན་ཚེ་དྲ་རྒྱ་བེད་སྤྱོད་མི་གཏོང་མཁན་ཞིག་མེད་ཅེས་ལབ་ནའང་མ་འགྲིག་པ་མེད། ཡིན་ཡང་། ཉེན་ཁ་ཧ་ཅང་ཆེ་བའི་སྐབས་བབ་ཀྱི་དངོས་ཡོད་གནས་ཚུལ་ཞིག་ནི། ཆེ་ས་ནས་དྲ་ཐོག་ཏུ་གཞུང་གི་ཕྱག་ལས་གལ་ཆེན་ཁག་སྒྲུབ་མཁན་དང་། ཆུང་ས་ནས་སྤྱིར་བཏང་གི་དྲ་ལམ་གླེང་མོལ་ལ་འཇུག་མཁན་གྱི་མི་བུ་དཀྱུས་མའི་ཁྲོད་དུ་དྲ་ཐོག་གི་བདེ་འཇགས་དང་ཉེན་སྲུང་སྐོར་གྱི་ཤེས་བྱ་འདང་ངེས་མེད་པའི་རྒྱུ་མཚན་གྱིས་དྲ་ཐོག་གི་གསང་མྱུལ་བ་དང་ཉེས་ཅན་པ་ཚོས་གོ་སྐབས་དེ་བཟུང་ནས་དྲ་རྒྱ་བེད་སྤྱོད་གཏོང་མཁན་ཚོའི་གློག་ཀླད་སྟེང་གི་ཉེན་སྲུང་གི་ནུས་བ་ཞན་པའི་མ་ལག་ཁག་ལ་འཇབ་རྒོལ་རབ་དང་རིམ་པ་བྱེད་བཞིན་ཡོད་པ་ཚང་མས་མཁྱེན་གསལ་ཡིན་སྟབས། དྲ་རྒྱ་བེད་སྤྱོད་གཏོང་མཁན་ཞིག་ཡིན་ཚེ་དེའི་སྐོར་གྱི་གནས་ཚུལ་ཁག་ལ་གོ་རྟོགས་ངེས་ཅན་དགོས་རྒྱུ་དེ་ཧ་ཅང་གལ་ཆེན་པོ་ཆགས་ཡོད།

དེར་བརྟེན། འདིར་ཕྲན་གྱིས་ཁ་ཚ་དགོས་གཏུག་གི་དྲ་རྒྱའི་བདེ་འཇགས་དང་འབྲེལ་བའི་ཤེས་བྱ་ཐུང་ངུ་ཞིག་རིགས་མཐུན་བོད་མི་ཡོངས་ལ་སེམས་གཏམ་གྱི་ཚུལ་དུ་བརྗོད་འདོད་བྱུང་། ཁྱེད་རང་ནམ་རྒྱུན་དྲ་ལམ་ལ་མྱུལ་དུས་སོ་སོའི་གློག་འཕྲིན་དང་ངོ་དེབ། ཁྱེའུ་འཕྲིན་ (QQ) ཡང་ན་པོད་ཕྲན(weibo)སོགས་བརྒྱུད་ནས་འབྲེལ་ཐག་དང་ལྷན་དུ་སྦྱར་བའི་འཕྲིན་ཐུང་ཁྱད་མཚར། ཁྱེད་ཀྱི་བརྙན་པར་ཁྱད་མཚར་བོ་ཞིག་དྲ་ཐོག་ཏུ་ཤུགས་ཆེར་ཁྱབ་བཞིན་པ་དེ་མཐོང་བྱུང་ངམ། དཔེར་ན།  ཀྲུང་གོ་དང་ཉི་ཧོང་བར་གྱི་རྩོད་རྙོག་དང་འབྲེལ་བའི་གནས་ཚུལ་གསར་བ་དེ་ཀློག་རོགས། ཨ་རིའི་སྲིད་འཛིན་འོས་འདེམས་སྐོར་གྱི་གསར་འགྱུར་ཀློག་རོགས། སོགས་འབྱོར་མྱོང་ཡོད་དམ།

གནས་སྟངས་དེ་འདྲའི་སྐབས་སུ་ཁྱེད་ཀྱིས་རང་ཉིད་ཀྱི་འདོད་བློ་ལྟར་བསམ་བློ་སྣ་གཅིག་མ་བཏང་བར་ཡིད་གཉིས་ཐེ་ཚོམ་གང་ཡང་མེད་པའི་ཐོག་ནས་འབྲེལ་ཐག་དེ་དག་གི་སྟེང་དུ་ཐད་ཀར་བསྣུན་རྐྱང་བྱེད་ཀྱི་ཡོད་དམ། དོན་དངོས་ཐོག་བྱེད་ལས་དེ་འདྲའི་རིགས་ཀྱིས་རང་ཉིད་གཅིག་པུ་ཙམ་མ་ཡིན་པར་རང་ཉིད་ཀྱི་ཉེ་འཁོར་གྲོགས་པོ་དང་། རང་ཉིད་འཚོ་གནས་བྱེད་སའི་སྤྱི་ཚོགས་ཧྲིལ་པོའི་བདེ་འཇགས་ལ་དོ་ཕོག་གཏོང་གི་ཡོད། གང་ཡིན་ཞེ་ན། འབྲེལ་ཐག་དེ་འདྲའི་རིགས་ཕལ་ཆེ་བ་ཞིག་ནི་མུན་ནག་གི་ལྭ་བ་གྱོན་མཁན་གྱི་གསང་མྱུལ་བ་གནག་སེམས་ཅན་དེ་ཚོས་བསྐུར་ཡོང་གི་ཡོད་ལ། ཁོང་ཚོས་ཉེན་སྲུང་མེད་པའི་ང་ཚོའི་གློག་ཀླད་ཀྱི་མ་ལག་སྟེང་དུ་འཇབ་རྒོལ་བྱེད་པའི་ངན་ཇུས་འཐེན་གྱི་ཡོད་སྟབས། ཟུར་སྣོན་དང་འདྲ་བར་འབྲེལ་ཐག་དེ་དག་གིས་ཀྱང་ཉེན་ཚབས་ཅན་གྱི་ནད་འབུའི་རིགས་ཁུར་ཡོང་སྟེ། ག་དུས་ཡིན་ཡང་ང་ཚོར་གནོད་འཚེ་གཏོང་སྲིད་པ་ཚང་མས་ཧ་གོ་དགོས།

འོན་ཀྱང་ཁྱེད་ཀྱིས་ཚམ་ཚོམ་མེད་པར་འབྲེལ་ཐག་འབྱོར་ཚད་ཚང་མའི་སྒང་ལ་བསྣུན་རྐྱང་བྱས་ན། དེ་ནི་ཁྱེད་ཀྱིས་གསང་མྱུལ་བ་རང་ཉིད་ཀྱི་གློག་ཀླད་དུ་མགྲོན་འགུག་བྱས་པ་དང་གཅིག་མཚུངས་ཡིན་པས། འབྲེལ་ཐག་གི་ལམ་ཁ་དེ་བརྒྱུད་ནས་མི་གཞན་པས་རང་ཉིད་ཀྱི་གློག་ཀླད་ལ་སྟངས་འཛིན་བྱས་ཏེ། སོ་སོའི་སྒེར་གྱི་གསང་བའི་གནས་ཚུལ་ཆ་ཚང་བརྐུ་འགྲོ་བ་རེད། དེའི་སྐོར་གྱི་གནས་ཚུལ་གསལ་པོ་ཧ་གོ་འདོད་ཚེ་བརྙན་པར་ཐུང་ཐུང་འདི་ལ་ངེས་པར་དུ་གཟིགས་དགོས་ https://www.youtube.com/watch?v=zT_mqi3GJPg&feature=plcp

ང་ཚོར་འབྱོར་བའི་འབྲེལ་ཐག་དེ་དག་གིས་ཇི་ལྟར་གནོད་འཚེ་གཏོང་གི་རེད་ཟེར་ན། སྤྱིར་བཏང་ནས་དོགས་གཞི་ཅན་དང་ཉེན་ཚབས་ཅན་གྱི་འབྲེལ་ཐག་གང་མང་ཞིག་ང་ཚོས་ཡིད་ཆེས་བཅོལ་འོས་པའི་ཚོགས་པ་དཔེར་ན་མཚོ་སྔོན་བོད་སྐད་རླུང་འཕྲིན་གྱི་དྲ་ཚིགས་ http://www.qhtb.cn/ ཀྱི་ངོ་བོར་བརྫུས་ནས་ཡོང་གི་རེད་ལ། ཡང་ཁ་ཤས་ཤིག་ནི་བོད་ཀྱི་རྩོམ་རིག་དྲ་བ་ http://www.sangdhor.com/ སོགས་ཀྱི་ངོ་བོའི་ཐོག་ཡོང་སྟེ་ང་ཚོ་དྲ་ཐག་དེ་དག་ལ་མྱུལ་བའི་སྐུལ་མ་བྱས་ཏེ་མཚམས་རེར་ང་ཚོ་མགོ་བོ་རྨོངས་སུ་འཇུག་གི་ཡོད།

གནས་སྟངས་དེ་འདྲའི་འོག་ཏུ་ང་ཚོས་ཀྱང་འབྲེལ་ཐག་དེ་དག་གི་སྟེང་དུ་བསྣུན་ནས་གནས་ཚུལ་གསར་བ་དང་རྩོམ་ཡིག་གསར་བ་ཁག་ལ་ལྟ་ཀློག་བྱེད་པའི་གོམས་གཤིས་ངན་པ་འཇགས་ཡོད། ཡིན་ཡང་། བརྒྱུད་རིམ་དེའི་ཁྲོད་དུ་ཉེན་ཚབས་ཅན་གྱི་འབྲེལ་ཐག་དེ་དག་གིས་ང་ཚོ་དྲ་ངོས་གཞན་ཞིག་ལ་ཁྲིད་ནས་དེ་རུ་ང་ཚོའི་གློག་ཀླད་ལ་ནད་ཡམས་སྤེལ་གྱི་ཡོད་སྟབས། འབྲེལ་ཐག་ལའང་ཟུར་སྣོན་དང་གཅིག་མཚུངས་ཀྱི་ཉེན་ཁ་ཡོད་པ་ཚང་མས་ངེས་པར་དུ་ཡིད་འཛིན་བྱེད་དགོས། འབྲེལ་ཐག་ནི་རང་ཉིད་ཀྱི་གློག་ཀླད་ནང་གི་གནས་ཚུལ་བརྐུ་འཁྱེར་བྱེད་པའི་བརྒྱུད་ལམ་གཙོ་བོ་ཞིག་ཡིན་ན། འབྲེལ་ཐག་སྐོར་གྱི་ཉེན་ཁ་ལ་གཡོལ་བའི་ཐབས་ལམ་འཚོལ་རྒྱུ་ནི་ང་ཚོ་ཚང་མས་སྣང་མེད་དུ་འཇོག་མི་ཉན་པའི་དོན་དག་གལ་ཆེན་ཞིག་རེད། གལ་ཏེ་གཤམ་དུ་འཁོད་པའི་ལམ་སྟོན་ཁག་གི་རྗེས་སུ་འཇུག་པ་ཡིན་ན། ཁྱེད་ཀྱིས་སོ་སོའི་དྲ་ཐོག་གི་བདེ་འཇགས་བརྟན་སྲུང་བྱེད་ཐུབ།

གཅིག ཁྱེད་ལ་འབྲེལ་ཐག་རིགས་འབྱོར་སྐབས་ངེས་པར་དུ་འབྲེལ་ཐག་གཏོང་མཁན་གྱི་མི་དེ་སོ་སོའི་ངོ་ཤེས་ཡིན་མིན་རྩད་གཅོད་གཏོང་དགོས་ལ། གལ་སྲིད་ངོ་མི་ཤེས་ན་མི་དེས་བསྐུར་བའི་འབྲེལ་ཐག་སྟེང་གང་འདོད་མིན་བསྣུན་པར་རང་སོར་འཇོག་དགོས། གལ་ཏེ་ངོ་ཤེས་གྲོགས་པོ་ཞིག་གི་མིང་ཐོག་ནས་འབྱོར་ཡོད་པ་དང་། ཁྱེད་ཀྱིས་འབྲེལ་ཐག་དེ་ཁ་ཕྱེ་འདོད་ཚེ། སོ་སོའི་གྲོགས་པོར་དངོས་སུ་འབྲེལ་བ་བྱས་ནས་འབྲེལ་ཐག་དེ་དོན་དངོས་ཐོག་ཁོང་གིས་བཏང་བ་ཡིན་མིན་ཁག་ཐེག་བྱེད་དགོས།

གཉིས། གལ་སྲིད་ཁྱེད་ལ་འབྱོར་བའི་འབྲེལ་ཐག་དེ་དག་ནམ་རྒྱུན་ལྟ་བུར་མངོན་གྱི་ཡོད་རུང་། སོ་སོའི་བདེ་འཇགས་ལ་དོ་ཕོག་མ་འགྲོ་བའི་ཕྱིར་དུ་ག་དུས་ཡིན་ཡང་བརྟག་དཔྱད་གཏོང་རྒྱུ་ནམ་ཡང་བརྗེད་མི་ཉན། གློག་འཕྲིན་ནང་འབྱོར་བའི་འབྲེལ་ཐག་གི་རིགས་ཡིན་ན། དྲ་རྒྱའི་ཁ་བྱང་ངོ་མ་དེ་མདའ་རྩེའི་རྩིབ་ཀྱི་ཡིག་སྒམ་ནང་མངོན་གྱི་རེད། ལྗཱི་མེལ་(gmail)དང་གློག་འཕྲིན་དྲ་བྱང་གཞན་པའི་ཁྲོད་དུ། དྲ་རྒྱའི་ཁ་བྱང་ངོ་མ་དེ་ཁྱེད་ཀྱི་བཤེར་ཆས་འོག་གི་གཡོན་ཕྱོགས་ཀྱི་ཟུར་ངོས་སུ་ཡོད་པའི་(statusBar)ནང་དུ་མངོན་གྱི་ཡོད། ཁྱེད་ཀྱི་གློག་འཕྲིན་ནང་འབྱོར་བའི་འབྲེལ་ཐག་ཁ་ཤས་

http://v.youku.com/v_show/id_XNDc0MzEzMDcy.html དང་། http://www.tudou.com/programs/view/7r9BxARlBoI/?fr=rec2 ལྟ་བུའི་ངོ་བོར་བརྫུས་ནས་ཡོང་གི་རེད། ཡིན་ཡང་གོང་དུ་ཞུས་ཟིན་པ་ལྟར། འབྲེལ་ཐག་དེ་རིགས་ཀྱིས་ཁྱེད་རང་དྲ་བྱང་གཞན་ཞིག་གི་ངོས་སུ་ཁྲིད་ནས་དེ་རུ་སྒེའུ་ཁུང་རྟགས་ཅན་གྱི་བཤེར་ཆས་(windows browser) དཔེར་ན། (Explorer, Safari, Chrome)སོགས་བརྒྱུད་ནས་གནོད་འཚེ་ཅན་གྱི་དྲ་འབུ་རིགས་ཁྱེད་ཀྱི་གློག་ཀླད་དུ་འཛུལ་བར་སྒུག་ནས་བསྡད་ཡོད།

གསུམ། ཁྱེད་དང་མཉམ་དུ་བགོ་བཤའ་བརྒྱབ་པའི་གནས་ཚུལ་དང་གསར་འགྱུར་རིགས་ཐད་ཀར་འབྲེལ་ཐག་བརྒྱུད་ནས་བཙལ་བ་ཡིན་ན། ཉེན་ཁ་ཧ་ཅང་ཆེ་བས། འབྲེལ་ཐག་སྒང་ལ་ཐད་ཀར་མ་བསྣུན་པར། དེའི་ཚབ་ཏུ་འཚོལ་ཞིབ་འཕྲུལ་ཆས་བརྒྱུད་ནས་འབྲེལ་ཐག་དེ་དང་འབྲེལ་བའི་གནས་ཚུལ་སྐོར་གྱི་བརྗོད་གཞི་འཚོལ་ཞིབ་བྱེད་དགོས།

བཞི། རང་ཉིད་ལ་འབྱོར་བའི་འབྲེལ་ཐག་ཁག་ལ་བརྟག་དཔྱད་གཏོང་ཕྱིར། འབྲེལ་ཐག་དེ་ངོ་བཤུས་བརྒྱབ་ནས་https://www.virustotal.com/#url ཡི་ངོས་ཀྱི་བར་སྟོང་དེར་བླུགས་རྗེས། འབྲེལ་ཐག་གང་དེར་དྲ་འབུ་ཡོད་མེད་ཀྱི་ལན་ལ་བསྒུག་དགོས། འོན་ཀྱང་། ཡིད་འཇོག་བྱེད་དགོས་པའི་དོན་གནད་གལ་ཆེན་ཞིག་ནི་(virustotal) ཡིས་དྲ་འབུ་འགོག་སྲུང་གི་མཉེན་ཆས་མ་ལག་ ༡༤ ལྷག་བེད་སྤྱོད་བཏང་ནས་ཞིབ་བཤེར་དང་བརྟག་དཔྱད་གཏོང་གི་ཡོད་ཀྱང་། དེས་གནོད་པ་ཅན་གྱི་ཡིག་ཆ་དང་འབྲེལ་ཐག་ཡོད་ཚད་ངོས་འཛིན་ཐུབ་ཀྱི་མེད་ལ། ལྷག་པར་དུ་ཚོགས་པ་དང་མི་སྡེ་གང་རུང་ལ་དམིགས་འབེན་དུ་བཟུང་བའི་དྲ་འབུ་གསར་བའི་རིགས་དེ་བས་ཀྱང་ངོས་འཛིན་ཐུབ་རྒྱུ་ཁག་པོ་ཡིན་སྟབས། འབྲེལ་ཐག་འདྲ་མིན་འབྱོར་སྐབས། མ་བསྣུན་སྔོན་ལ་བསམ་བློ་གཏོང་རྒྱུ་དེ་ཁྱེད་ཀྱི་འདམ་ག་ཡག་ཤོས་དེ་ཡིན། དེ་ལྟར་བྱས་ན་ཁྱེད་ཀྱིས་དྲ་ཐོག་གི་ཉེན་ཁའི་རིགས་འགོག་སྲུང་བྱེད་ཐུབ་པ་ཡིན་ལ། མི་གཞན་པས་ཁྱེད་ཀྱི་གློག་ཀླད་རྩ་བ་ཉིད་ནས་སྟངས་འཛིན་བྱེད་མི་ཐུབ་པས་དྲ་ཐོག་གི་བདེ་འཇགས་ཁྱེད་ལ་དབང་ངེས་ཡིན།

གསལ་བཤད།
གལ་ཏེ་ཁྱེད་རང་གིས་དྲ་ཐོག་གི་བདེ་འཇགས་སྐོར་གྱི་གནས་ཚུལ་སྐོར་ལ་ཞིབ་ཕྲ་མཁྱེན་འདོད་ཚེ། ངོ་དེབ་ནང་(Tibet Action Institute)ཡི་དྲ་ངོས་དེར་(like)གཞུས་ན། རྗེས་སུ་ཁྱེད་ལ་དུས་བསྟུན་ཁ་གསབ་བྱེད་བཞིན་པའི་དྲ་རྒྱ་དང་ཁ་པར་སོགས་ཀྱི་བདེ་འཇགས་དང་འབྲེལ་བའི་ཤེས་བྱ་གསར་བ་ཁག་འབྱོར་ཡོང་གི་རེད་ལ། དྲ་རྒྱའི་བདེ་འཇགས་སྐོར་གྱི་དྲི་བ་སོགས་ཡོད་ཚེ་གོང་དུ་ཞུས་ཟིན་པའི་བོད་དོན་ལས་འགུལ་བསྟི་གནས་ཁང་གི་ངོ་དེབ་དྲ་ངོས་སུ་བོད་རྒྱ་དབྱིན་གསུམ་གང་རུང་གི་ཐོག་ནས་དྲི་བ་དྲིས་དང་། ང་ཚོས་དུས་ཐོག་ཏུ་ཁྱེད་ཀྱི་དོགས་གཞི་ཁག་གཙང་སེལ་བྱེད་ངེས་ཡིན།