སུད་སི་གནས་སྡོད་ཀླུ་རྒྱལ་དོན་འགྲུབ་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། ཟླ་འདིའི་ཕྱི་ཚེས་ ༤ ཉིན་ནས་སུད་སི་ལཱོ་ཚན་ས་གནས་གནས་སྡོད་པ་སྟག་ཚང་དཀོན་མཆོག་དང་ཀརྨ། ཆོས་ལྡན་བཅས་ཀྱིས། བོད་ནང་གི་ཛ་དྲག་གི་གནས་སྟངས་ལ་གདུང་སེམས་མཉམ་སྐྱེད་ཆེད། བོད་དོན་གོམ་བགྲོད་ཀྱི་ལས་འགུལ་ཞིག་མགོ་འཛུགས་གནང་ཡོད་པ་ལྟར། ཟླ་འདིའི་ཕྱི་ཚེས་ ༡༠ ཉིན་གོམ་བགྲོད་པ་ ༡༡ སུད་སི་རྒྱལ་ས་བྷན་དང་འཇི་ནེ་ཝའི་བར་གྱི་ཀེ་ལོ་མི་ཊར་ ༡༢༣ ལྷག་གི་ལམ་བར་དུ། དགུན་དུས་ཀྱི་གནམ་གཤིས་ལ་མ་འཛེམས་པར་བོད་ནང་གི་ཛ་དྲག་གི་གནས་སྟངས་ངོ་སྤྲོད་ཀྱི་ཡིག་ཆ་འགྲེམས་སྤེལ་དང་། ས་གནས་ཀྱི་གསར་འགོད་པར་ལན་འདེབས་བཅས་གནང་སྟེ་ཞི་བའི་གོམ་བགྲོད་ཀྱི་ལས་འགུལ་མཇུག་སྒྲིལ་ཡོད་པ་མ་ཟད། འཇི་ནེ་ཝར་ཡོད་པའི་འགྲོ་བ་མིའི་ཐོབ་ཐང་ལས་ཁུངས་དང་མཉམ་འབྲེལ་རྒྱལ་ཚོགས་བཅས་སུ་དོན་ཚན་ལྔ་ཅན་གྱི་འབོད་སྐུལ་ཞུ་ཡིག་ཅིག་ཀྱང་ཕུལ་ཡོད་འདུག
དེ་བཞིན། ཉིན་དེར་འཛམ་གླིང་ཡུལ་གྲུ་གང་སར་ཡོད་པའི་བོད་མི་ཚོས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་སྲུང་གཙི་དང་། བོད་ནང་གི་ཛ་དྲག་གནས་སྟངས་ཐད་གདུང་སེམས་མཉམ་སྐྱེད་ལས་འགུལ་སྤེལ་ཡོད་པ་ལྟར། ཉིན་དེར་སུད་སི་དང་སི་པན། ཨོ་སི་ཁྲོ་རི་ཡ། ཧྥ་རན་སི། ནོར་ཝེ། འཇན་མན་བཅས་རྒྱལ་ཁབ་ནས་ཕེབས་པའི་བོད་མི་དང་བོད་དོན་རྒྱབ་སྐྱོར་བ་བཅས་མི་གྲངས་ ༡༠༠༠ བརྒལ་བ་འདུ་འཛོམས་ཀྱིས། སུད་སིའི་གྲོང་ཁྱེར་འཇི་ནེ་ཝའི་འགྲོ་བ་མིའི་ཐོབ་ཐང་ལྷན་ཁང་དང་། རྒྱལ་ཚོགས་ལས་ཁུངས་མདུན་དུ་བོད་དོན་གཏམ་བཤད་དང་སྐད་འབོད་ཁྲོམ་སྐོར་གྱི་ལས་འགུལ་ཞིག་ཀྱང་སྤེལ་ཡོད་པ་མ་ཟད། ཡུ་རོབ་སྤྱི་འཐུས་ཐུབ་བསྟན་དབང་ཆེན་ལགས་དང་སྐུ་ཚབ་དོན་གཅོད་ཚེ་བརྟན་བསམ་འགྲུབ་ལགས་བཅས་ཀྱིས། ཡུ་རོབ་ཁུལ་གྱི་བདེན་པའི་མེ་ལྕེ་སྐོར་སྐྱོད་ལས་འགུལ་སྐབས་ཀྱི་མཚན་རྟགས་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་ཀྱི་འཇི་ནེ་བའི་འགན་འཛིན་ལྕམ་ལོ་ར་ཊེ་ཕོ་ལགས་སུ་ཕུལ་ཡོད་འདུག
གསར་འགོད་པ། དོན་གོ
