༢༠༣༠ ལོའི་འཛམ་གླིང་གི་འཕེལ་ཕྱོགས་དང་ཨེ་ཤ་ཡའི་འགྱུར་ལྡོག

ཉེ་ཆར་ཨ་རིའི་གསང་བའི་ལྷན་ཚོགས་ཀྱིས་མ་འོངས་པའི་འཛམ་གླིང་འཕེལ་ཕྱོགས་ཐད་ཉམས་ཞིབ་སྙན་ཐོ་ཞིག་བཏོན་ཏེ། ༢༠༣༠ ལོར་སའི་གོ་ལའི་འཕེལ་ཕྱོགས་ནི་གདམ་ག་རང་བཞིན་ཅན་གྱི་འཛམ་གླིང་གཞན་ཞིག་ཡིན་པ་བརྗོད་འདུག

ཟླ་འདིའི་ཕྱི་ཚེས་ ༡༠ ཉིན་ཨ་རིའི་རྒྱལ་ཁབ་གསང་བའི་ལྷན་ཚོགས་ཀྱིས། ཤོག་ངོས་ ༡༦༦ ཅན་གྱི་ ༼༢༠༣༠ སའི་གོ་ལའི་འཕེལ་ཕྱོགས།   གདམ་ག་རང་བཞིན་གྱི་འཛམ་གླིང་གཞན་ཞིག༽ཅེས་པའི་མ་འོངས་འཛམ་གླིང་གི་འཕེལ་འགྱུར་ཐད་ཉམས་ཞིབ་སྙན་ཐོ་ཞིག་བཏོན་འདུག  སྙན་ཐོ་དེ་ནི་ཨ་རིའི་རྒྱལ་ཁབ་གསང་བའི་ལྷན་ཚོགས་ཀྱིས་འདས་པའི་ལོ་ ༤ རིང་འཛམ་གླིང་གི་འཕེལ་ཕྱོགས་ཐད་ཉམས་ཞིབ་བྱས་པ་ཞིག་ཡིན་པ་དང་། ཨ་རིའི་གསང་བའི་སྡེ་ཁག་ ༡༦ ལས་གཞི་འདིའི་ཁྲོད་མཉམ་ཞུགས་བྱས་ཡོད་ལ། རྒྱལ་ཁབ་ ༡༤ ལྷག་གི་རིག་གཞུང་ལས་རིག་དང་ཞིབ་འཇུག་སྡེ་ཚན། སྲིད་འབྱོར་སྡེ་ཁག་གི་དཔོན་རིགས་སོགས་ཀྱིས་རྟོགས་ཞིབ་བརྒྱུད་སྙན་ཐོ་དེའི་གྲུབ་དོན་རྙེད་ཡོད་པ་དང་། འདི་ལོའི་ཨ་རིའི་སྲིད་འཛིན་འོས་བསྡུ་མཇུག་སྒྲིལ་རྗེས་གསར་ཏུ་འདེམས་ཐོན་བྱུང་བའི་སྲིད་འཛིན་ལ་དཔྱད་གཞིའི་ཡིག་ཆའི་ཚུལ་དུ་ཕུལ་ཡོད་འདུག 

སྙན་ཐོ་དེའི་ནང་མ་འོངས་པའི་ལོ་ ༡༨ ནང་། ད་ལྟའི་ཚན་རྩལ་གསར་བ་དང་ཉམས་ཆག་ཏུ་འགྲོ་བཞིན་པའི་རྒྱུ་ཆའི་ཐོན་ཁུངས་དང་། འཕེལ་ཤུགས་མྱུར་བའི་འཛམ་གླིང་གི་མི་འབོར་བཅས་ཀྱིས། མ་འོངས་པར་འཛམ་གླིང་གི་ཆབ་སྲིད་དང་དཔལ་འབྱོར་སྟོབས་ཤུགས་ཀྱི་སྙོམས་སྒྲིག་ལ་གཞི་རྩའི་འགྱུར་ལྡོག་འབྱུང་རྒྱུ་ཡིན་པ་མ་ཟད།  འགྱུར་ལྡོག་དེ་ནི་འགྲོ་བ་མིའི་ལོ་རྒྱུས་ཀྱི་ངོས་ཐད་ནས་བཤད་ན་སྔར་བྱུང་མ་མྱོང་པའི་དཔེ་མཚོན་ཞིག་ཆགས་རྒྱུ་ཡིན་པ་རེད།

འཛམ་གླིང་ཧྲིལ་བོར་འགྱུར་བ་ཐེབས་བྱེད་ཀྱི་ཐོལ་བརྒལ་རང་བཞིན་གྱི་འཕེལ་འགྱུར་བཞི་ནི།  ཨ་རིས་རྒྱལ་སྤྱིའི་ཁྱོན་ལ་སྒེར་སྡོམ་སྟངས་འཛིན་གྱི་གནས་བབ་མཇུག་སྒྲིལ་རྒྱུ་ཡིན་པ། མི་སྒེར་ཁེ་དབང་གིས་རྒྱལ་ཁབ་ཀྱི་སྒྲོམ་གཞིར་འགྲན་སློང་བ།  མུ་མཐུད་འཕར་སྣོན་འབྱུང་བཞིན་པའི་འབྱོར་འབྲིང་གྲལ་རིམ་གྱི་དགོས་མཁོ་ཡིས་སྲིད་གཞུང་དག་ལ་འགྲན་སློང་བ། ཆུ་དང་བཟའ་ཆས། ནུས་ཁུངས་ཧ་ཅང་དཀོན་པོར་འགྱུར་བཞིན་པ་བཅས་ཡིན་འདུག

གཏན་ཁེལ་རང་བཞིན་ཅན་གྱི་རྒྱུ་རྐྱེན་མཐའ་དག་གི་ཁྲོད་ནས་ཆེས་ཤུགས་རྐྱེན་ལྡན་ཤོས་ནི། འགས་གཏོར་རང་བཞིན་གྱི་ཉེན་འཚབ་འབྱུང་སླ་བའི་འཛམ་གླིང་གི་དཔལ་འབྱོར་མ་ལག་ཆགས་ཡོད་ལ། དེ་བཞིན། ཚོད་དཔག་དཀའ་བའི་རྒྱུ་རྐྱེན་གཙོ་བོ་དག་ནི་རྒྱལ་སྤྱིའི་འཁྲུག་ཟིང་དང་སྤྱི་ཚོགས་གཡོ་འགུལ། དེར་མ་ཟད་རྒྱལ་ཁབ་དང་རྒྱལ་ཁབ་ཀྱི་དཔལ་འབྱོར་མ་ལག་བར་གནས་པའི་ཧེ་བག་ཆེན་པོ་བཅས་ཡིན་འདུག

འདས་པའི་ལོ་བཅུ་ཕྲག་རིང་ཚན་རྩལ་གསར་བ་དར་སྤེལ་དང་། མི་སེར་གནས་སྤོར། དམག་འཁྲུག་བཅས་ནི་དེ་སྔོན་འཛམ་གླིང་གནས་བབ་ལ་འགྱུར་ལྡོག་སློང་བྱེད་ཀྱི་གཙོ་ཁྲིད་སྟོབས་ཤུགས་ཡིན་ཡང་། དུས་རབས་འདིའི་ཐོག་མའི་ལོ་ ༢༥ ནང་། སྒྲིག་གཞི་རང་བཞིན་ཅན་ ༧ གྱི་འཕེལ་འགྱུར་སྟོབས་ཤུགས་ཀྱིས་འཛམ་གླིང་གི་འཕོ་འགྱུར་ལ་སྟངས་འཛིན་བྱས་ཡོད། དེ་དག་ནི་འབྱོར་འབྲིང་གྲལ་རིམ་གཞི་རྒྱ་ཆེ་རུ་ཕྱིན་པ།  འཛམ་གླིང་མི་མང་གིས་དཔེ་གསར་ཅན་གྱི་ཚན་རྩལ་ཐོན་དངོས་བེད་སྤྱོད་ལས་སླ་བར་གྱུར་པ། དཔལ་འབྱོར་གྱི་ནུས་སྟོབས་ཁྱབ་ཁོངས་གནས་སྤོ། མི་འབོར་རྒན་གོག་ཅན་དུ་འགྱུར་བཞིན་པ།  འཛམ་གླིང་གྲོང་ཁྱེར་ཅན་དུ་གྱུར་བ། ཆུ་དང་བཟའ་ཆས་ཀྱི་དགོས་མཁོ་མུ་མཐུད་ཇེ་ཆེར་འགྲོ་བཞིན་པ། ཨ་རིའི་ནུས་ཁུངས་རང་རྐྱ་ཅན་དུ་གྱུར་བ་བཅས་ཡིན་འདུག

ད་ལྟའི་ཆར་སྣ་མང་རང་བཞིན་ཅན་གྱི་འཛམ་གླིང་དཔལ་འབྱོར་དེ་ནི་ལས་དོན་ཡག་པོ་ཞིག་ཡིན་མིན་བཤད་དཀའ་བ་དང་། དཔའ་བྱོར་གྱི་ལྟེ་བ་མང་པོ་ཞིག་ལ་མ་འོངས་པར་འཛམ་གླིང་དཔལ་འབྱོར་གྱི་གཡོ་འགུལ་ཇེ་ཆུང་དུ་གཏོང་བའི་ནུས་པ་ལྡན་ཡོད་མོད།  ཡིན་ནའང་།  རྒྱལ་ཁབ་ཕན་ཚུན་བར་ཧེ་བག་ཧ་ཅང་ཆེན་པོ་ལྡན་པའི་འཕེལ་ཚད་ཇེ་མགྱོགས་དང་། དཔའ་འབྱོར་འཕེལ་ཕྱོགས་སྔར་བས་ཐག་གཅོད་དཀའ་བའི་རང་བཞིན་ཅན་དུ་གྱུར་བ་བཅས་ཀྱིས་འཛམ་གླིང་ལ་སྔར་ལས་ལྷག་པའི་གཡོ་འགུལ་ཐེབས་འཇུག་སྲིད་པ་རེད། 

ཕྱི་ལོ་ ༢༠༣༠ ལོར་འཛམ་གླིང་མི་འབོར་དུང་ཕྱུར་ ༨༣ འཕར་སྣོན་དང་། འཛམ་གླིང་གི་འབྱོར་འབྲིང་གྲལ་རིམ་གྱི་མི་འབོར་དུང་ཕྱུར་ ༢༠ འཕར་སྣོན་འབྱུང་རྒྱུ། སློབ་གསོའི་ཁྱབ་ཁོངས་ཀྱིས་མ་འོངས་པའི་ལོ་ ༡༨ ནང་གཏན་འཇགས་རང་བཞིན་གྱི་ནུས་པ་འཐོན་རྒྱུ་ཡིན་པ་བཅས་ལ་བརྟེན་ནས།  ༢༠༣༠ ལོར་འཛམ་གླིང་སྟེང་མི་འབོར་གྱི་བརྒྱ་ཆ་ ༦༠ གྲོང་ཁྱེར་ནང་གནས་སྡོད་བྱ་རྒྱུ་ཡིན་པ་དང་། མི་འབོར་དེ་དག་གིས་བཟའ་ཆས་ཀྱི་ཟད་གྲོན་ནུས་ཚད་ཤུགས་ཆེན་པོ་འཕར་སྣོན་འབྱུང་རྒྱུ་ཡིན་ལ། སྐབས་དེར། འཛམ་གླིང་གི་བཟའ་ཆས་ཀྱི་ཟད་གྲོན་ནུས་ཚད་བརྒྱ་ཆ་ ༣༥ འཕར་སྣོན་འབྱུང་རྒྱུ་དང་། ཆུའི་དགོས་མཁོ་བརྒྱ་ཆ་ ༤༠ འཕར་སྣོན། བཟའ་ཆས་དང་ཆུའི་དགོས་མཁོ་ཇེ་ཆེར་ཕྱིན་པ་དེས། འཛམགླིང་སྒང་ཐོན་ཁུངས་འཕྲོག་རྩོད་ཀྱིས་དམག་འཁྲུག་སློང་སྲིད་སྟབས།  ཐོན་ཁུངས་ཀྱི་འཕྲོག་རྩོད་ནི་མ་འོངས་པར་འཛམ་གླིང་ཧྲིལ་བོར་གཡོ་འགུལ་འབྱུང་བྱེད་ཀྱི་རྒྱུ་རྐྱེན་གཙོ་བོའི་གྲས་ཀྱི་གཅིག་ཆགས་རྒྱུ་ཡིན་འདུག  

ཚན་རྩལ་གྱི་འཕེལ་རྒྱས་ཇེ་མགྱོགས་སུ་འགྲོ་བཞིན་པའི་ཁྲོད། བརྡ་འཕྲིན་བརྒྱུད་སྤྲོད་ཀྱི་མྱུར་ཚད་ཀྱིས་འཛམ་གླིང་གི་ཆབ་སྲིད་ནུས་སྟོབས་ཀྱི་སྙོམས་སྒྲིག་ལ་འགྱུར་བ་གཏོང་བཞིན་ཡོད་པ་ལྟར། གལ་སྲིད་རྒྱལ་ཁབ་གང་ཞིག་གི་རྒྱལ་ནང་ཐོན་སྐྱེད་སྤྱི་འབོར་ (GDP) ཚད་མཐོན་པོར་བསླེབས་པ་དང་མི་འབོར་གྱི་རྨང་གཞི་རྒྱ་ཆེན་པོ་ཡོད་ནའང་། བརྡ་འཕྲིན་དྲ་རྒྱའི་བཀོལ་སྤྱོད་ནུས་ཤུགས་འདང་ངེས་མེད་པའི་རྒྱལ་ཁབ་དེ་རིགས་ཀྱིས་སྣ་མང་རང་བཞིན་ཅན་གྱི་འཛམ་གླིང་སྒང་ནུས་ཤུགས་ཆེན་པོ་འདོན་མི་ཐུབ་ལ།  མ་འོངས་པར་སྲིད་གཞུང་གིས་མི་མང་ལ་ཅི་ཞིག་མཁོ་བ་དང་མི་མང་གིས་ཅི་ཞིག་བྱེད་བཞིན་པ་ཤེས་རྟོགས་ཀྱི་ནུས་པ་ལྡན་པ་ཡིན་ནའང་། མ་འོངས་པར་མི་མང་གི་སྟོབས་ཤུགས་ཀྱིས་སྤྱི་ཚོགས་སྙོམ་སྒྲིག་གི་འདེགས་ཤིང་དེ་མི་མང་རང་ཕྱོགས་སུ་སྟངས་འཛིན་བྱ་ངེས་ཡིན། 

༼༢༠༣༠ སའི་གོ་ལའི་འཕེལ་ཕྱོགས།   གདམ་ག་རང་བཞིན་གྱི་འཛམ་གླིང་གཞན་ཞིག༽ ཞེས་པའི་ནང་ཨ་རིའི་འཛམ་གླིང་སྒང་ཐེབས་སྲིད་པའི་ཤུགས་རྐྱེན་ཐད་ཀྱི་ཚོད་རྩིས་སྐོར་ནས་གསལ་འདོན་བྱས་མེད་པ་རེད། ཕྱི་ལོ་ ༡༩༤༥ ནས་བཟུང་ཨ་རིའི་གཙོ་ཁྲིད་བྱས་པའི་གཅིག་གྱུར་རང་བཞིན་གྱི་འཛམ་གླིང་དེ་མགྱོགས་མྱུར་མཇུག་སྒྲིལ་བཞིན་པ་བརྗོད་ཡོད་པ་རེད། མ་འོངས་པར་འཛམ་གླིང་གི་སྟོབས་ཤུགས་ཏེ་བྱང་ཨ་རི་དང་ཡུ་རོབ་གླིང་ནས་ཨེ་ཤ་ཡའི་གླིང་དུ་སྤོ་འགྱུར་བྱ་རྒྱུ་ཡིན་པ་དང་།  རྒྱལ་ནང་གི་ཐོན་སྐྱེད་སྤྱི་འབོར་ (GDP) དང་མི་གྲངས། དམག་དོན་འགྲོ་གྲོན་གང་ཐད་ནས་ཨེ་ཤ་ཡ་ས་ཁུལ་རྣམས་ཨ་རི་དང་ཡུ་རོབ་གླིང་ལས་བརྒལ་རྒྱུ་ཡིན་པ་རེད།

ཨ་རིའི་རྒྱལ་ཁབ་གསང་བའི་ལྷན་ཚོགས་ཀྱི་ཚོགས་གཙོ་ཆའེ་རེ་སི་ཌོ་ཧྥར་(Christopher Kojm) གྱིས་ཀྱང་། ང་ཚོ་ནི་འགྲོ་བ་མིའི་ལོ་རྒྱུས་ཀྱི་འགག་རྩའི་དཀྱོགས་འཚམས་ཤིག་ལ་བསླེབས་ཡོད་ལ། མ་འོངས་པར་བགྲོད་སྲིད་པའི་ལམ་ཕྱོགས་ལ་གཅིག་བྱས་ན་ཧེ་བག་ཆེན་པོ་འབྱུང་སྲིད་པ་བརྗོད་ཡོད་པ་རེད།  

ཡིན་ནའང་། ༢༠༣༠ རྗེས་ལའང་ཨ་རི་ནི་སྔར་བཞིན་རྒྱལ་ཁབ་ཆེན་པོ་སྐོར་ཞིག་གི་གྲས་ཀྱི་གཙོ་ཤོས་གཅིག་ཡིན་པ་མ་ཟད།  མ་འོངས་པར་ཨ་རིས་རང་ཉིད་གཅིག་པུས་འཛམ་གླིང་ལ་སྣེ་ཁྲིད་བྱེད་དཀའ་ནའང་།  འཛམ་གླིང་སྒང་རྒྱལ་ཁབ་སུ་གང་གིས་ཀྱང་ཨ་རི་ནང་བཞིན་རྒྱལ་སྤྱིའི་ལས་དོན་མཐུན་འགྲིག་བྱེད་ཐུབ་མཁན་གཞན་སུ་གང་རྙེད་མི་སྲིད་པའི་ངོས་འཛིན་བྱས་ཡོད་པ་རེད།

གསར་འགོད་པ། ཚེ་རིང་རྒྱལ།