རྒྱ་གཞུང་གིས་རང་ལུས་མེར་བསྲེཊ་གནས་ཚུལ་ལ་འབྲེལ་བ་ཡོད་པའི་ཉེས་འཛུགས་འོག བོད་མདོ་སྨད་བླ་བྲང་ཨ་མཆོག་རྔ་རྒོད་སྡེ་བའི་བོད་མི་ཞིག་འཛིན་བཟུང་བྱས་ཡོད་འདུག
ཨ་འཇམ་ལགས་ཀྱིས་འདི་གར་གནས་ཚུལ་བཏང་འབྱོར་ལྟར་ན། རྒྱ་ནག་གཞུང་གིས་འདི་ལོའི་ཕྱི་ཟླ་ ༡༠ ཚེས ༢༦ ཉིན་བོད་མདོ་སྨད་བླ་བྲང་ཨ་མཆོག་སྐེད་སྡེ་བའི་རྒྱལ་གཅེས་དཔའ་བོ་ལྷ་མོ་ཚེ་བརྟན་ལགས་ཀྱིས། རང་ལུས་མེར་བསྲེཊ་གནང་སྐབས་ཁོང་གི་སྐུ་ལུས་འབར་འཕྲོའི་སྟེང་དུ་ས་སྣུམ་བླུག་རོགས་ཞེས་བརྗོད་པར་བསྙད་དེ། ཕྱི་ཟླ ༡༢ ཚེས ༤ ཉིན་གྱི་ཞོགས་པར་ཨ་མཆོག་རྔ་རྒོད་ཀྱི་རང་ལོ་ ༥༧ ཡིན་པའི་རྒད་པོ་ཨ་འཕགས་སམ་འཕགས་པ་སྐྱབས། འདྲི་གཅོད་བྱ་རྒྱུར་ཁ་གཡར་ཏེ་སྡེ་དཔོན་གཉིས་ཀྱིས་ཨ་མཆོག་གྲོང་རྡལ་གྱི་ཉེན་རྟོག་ཁང་དུ་ཁྲིད་དེ་ད་ཆར་ཁོང་གི་གནས་ཚུལ་གསལ་ཁ་མེད་པར་ལྷག་ཡོད་འདུག
རྒད་པོ་འཕགས་པ་སྐྱབས་ལགས་ནི། མི་དྲང་ཚུགས་ལྡན་པ་ཞིག་ལས་གང་བྱུང་དུ་གནས་ཚུལ་འདྲ་མིན་བཟོ་རྒྱུ་དགའ་བ་ཞིག་མིན་པ་དང་། ཁོང་གློ་བུར་དུ་འཛིན་བཟུང་བྱས་རྗེས་ནང་མི་ཚང་མ་དཀའ་ངལ་གྱི་གནས་སུ་ལྷུང་ཡོད་འདུག
ཉེ་ལམ་སྡེ་མི་ཚོ་མཉམ་འཛོམས་ཀྱིས་ཡུལ་ཚོའི་སྲིད་གཞུང་སྒོ་ཁར་འགྲོ་རྒྱུར་གྲོས་བྱས་ཡོད་ཀྱང་། ཡང་འདི་ལྟར་གྲོས་མགོ་འདོན་མཁན་སུ་ཡིན་སོགས་ཀྱི་གསང་བ་ཕྱི་གྱར་ལ་འཇིགས་ཏེ་འགྲོ་མ་ཐུབ་པ་ལྷག་སྟབས། ད་ཆར་ཁོང་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག
གཞན། ཨ་འཇམ་ལགས་ཀྱིས་བརྗོད་པ་ལྟར་ན་རྒྱ་གཞུང་གིས་འདི་ལོ་བླ་བྲང་དུ་རྒྱལ་གཅེས་དཔའ་བོ་རྡོ་རྗེ་རིན་ཆེན་ལགས་ཀྱིས་རང་ལུས་མེར་བསྲེཊ་ཀྱི་ལས་འགུལ་སྤེལ་སྐབས་སྐུ་ཕུང་བདག་ཉར་བྱས་པའི་ཉེས་འཛུགས་འོག བུད་མེད་གཡང་སྐྱིད་འབོད་པ་ཞིག་འཛིན་བཟུང་བྱས་ཏེ་ཟླ་གཅིག་ཙམ་འགྲོ་བཞིན་ཡོད་འདུག་ལ། དམེ་ཤུལ་ས་ཆའི་ཕོ་གསར་ཞིག་ཀྱང་དེ་ལྟར་བཙོན་འཇུག་བཀག་ཉར་བྱས་པ་སོགས་རྒྱ་ནག་གཞུང་གིས་ད་ཆར་བོད་ནང་གི་མེར་བསྲེཊ་གནས་ཚུལ་ལ་རྐྱེན་བྱས་ཏེ་མི་མང་དཀྱུས་མ་མང་པོ་ཞིག་མི་མངོན་པའི་ཚུལ་གྱིས་བཙོན་འཇུག་ཁྲིམས་ཆད་གཏོང་བཞིན་ཡོད་འདུག
གསར་འགོད་པ། དོན་གོ
