ཀུ་ཤུ་ལྔ་བ་དང་གློག་རྒྱུག

ཁ་སང་གཟའ་པ་སངས་ཉིན་ཨ་རིའི་མངའ་སྡེ་མཱ་སེ་ཆིའུ་སེ་ནང་ཀུ་ཤུ་རྟགས་ཅན་གྱི་ཁ་པར་ཉོ་འཚོང་གི་གནས་ཚུལ་ཁྲོད། རྒྱ་རིགས་བུད་མེད་ཅིག་ལ་ཉེན་རྟོག་པས་གློག་རྒྱུག་བཙུགས་ཏེ་རྨས་སྐྱོན་བཟོས་འདུག

ཁ་སང་ཕྱི་ཚེས་ ༡༤ ཉིན་ཨ་རིའི་མཱ་སེ་ཆིའུ་སེ་མངའ་སྡེའི་ནང་དབྱིན་སྐད་ཚིག་གཅིག་ཀྱང་མི་གོ་བའི་རྒྱ་རིགས་བུད་མེད་ལི་ཞའོ་འབོད་པ་ཞིག་ལ། ཉེན་རྟོག་པས་གློག་རྒྱུག་བཙུགས་ཏེ་ལུས་པོར་རྨས་སྐྱོན་བཟོས་ཡོད་འདུག་ལ། དེ་ནི་ཉེ་བའི་ཆར་ཀུ་ཤུ་རྟགས་ཅན་གྱི་ཁ་པར་ལྔ་པ་བསླེབས་ཏེ་ཟླ་ཤས་ལས་འགོར་མེད་པ་དང་། རྒྱལ་སྤྱིའི་ཁྲོམ་རྭར་ཚོང་འགྲེམས་ཀྱི་ཚད་ཉུང་དུ་བཏང་སྟེ། ཨ་རིའི་མཛད་སྤྱོད་པར་དུས་ཐོག་མ་རག་པ་དང་མཁོ་འདོན་མི་ཐུབ་པའི་གནས་སུ་གྱུར་ཡོད་སྟབས། ཉེ་ལམ་ཀུ་ཤུ་ཁེ་ལས་ཀྱིས་རྒྱལ་སྤྱིའི་ཁྲོམ་རྭར་རྒྱ་སྐྱེད་དུ་འགྲེམས་མགོ་ཚུགས་པ་མ་ཟད། ཟླ་འདི་ནས་བཟུང་ཨ་རིར་ཆོད་གན་མི་དགོས་པར་ཀུ་ཤུ་ལྔ་པ་འཚོང་རྒྱུ་དང་། མི་གཅིག་ལ་ཁ་པར་གཉིས་ཡན་བཙོང་མི་ཆོག་པའི་སྒྲིག་གཞི་གཏན་འབེབས་བྱས་ཏེ་བཙོང་མགོ་བརྩམས་ཡོད་འདུག་མོད། ཁ་སང་རྒྱ་ནག་ཧྲང་ཧེ་གྲོང་ཁྱེར་ནས་ཡིན་པའི་རྒྱ་རིཊ་བུད་མེད་ལི་ཞའོ་འབོད་པས། དེ་སྔོན་ཀུ་ཤུ་རྟགས་ཅན་གྱི་ཁ་པར་གཉིས་ཉོས་པ་དང་། སླར་ཡང་ཀུ་ཤུ་ཚོང་རྭར་ཁ་པར་ཉོ་སྐབས། ཚོང་གཉེར་པས་མོའི་ངོ་བྱང་ (ID) ལ་ཞིབ་བཤེར་བྱས་རྗེས་ཁ་པར་བཙོང་མེད་པ་རེད།

ཕྱིས་སུ་མོས་རྒྱབ་ཁུག་ནང་གི་ཤོག་སྒོར་བསྟན་ཏེ་ཁོ་མོར་སྒོར་མོ་ཡོད་ཚུལ་དང་། གལ་སྲིད། མོར་བཙོང་བ་ཡིན་ན་སྒོར་མོ་འཐོལ་པ་སྤྲད་ཆོག་པའི་བརྡ་བསྟན་པ་མ་ཟད། ཚོང་གཉེར་བས་འགྲེལ་བཤད་ག་ཚོད་བརྒྱབ་ཀྱང་ཨུ་ཚུགས་ཀྱིས་བསྡད་སྟབས། ཚོང་གཉེར་བས་ཉེན་རྟོག་པ་སྐད་བཏང་ཡོད་པ་དང་། ཉེན་རྟོག་པས་ཁོ་མོས་གསལ་བཤད་ལ་མ་ཉན་པ་དང་། ཁུག་མའི་ནང་དུ་ཤོག་སྒོར་ཕོན་ཆེན་པོ་བཟུང་ཡོད་པ། ཚོང་ཁང་ཕྱི་ལ་ཐོན་དགོས་ལུགས་བཤད་སྐབས་ཉེན་རྟོག་པར་ཕུད་རྒྱག་བཏང་བ། ཕྱིས་སུ་ཉེན་རྟོག་པས་མོ་རང་ནག་འཚོང་རྒྱག་མཁན་ཡིན་པར་དོགས་ཏེ་ཕྱིར་འཁྲིད་རྩིས་བྱས་སྐབས་འབྲོ་རྩིས་བྱས་པ་སོགས་ཀྱིས། ཉེན་རྟོག་པས་མོའི་རྐང་ལག་བཞི་བོར་གློག་རྒྱུག་བཙུགས་ཏེ་རྨས་སྐྱོན་བཟོས་ཡོད་པ་རེད།

གནས་ཚུལ་འདིའི་ཐད་མོའི་མ་འོངས་པའི་ཁྱོ་ག་ཨ་རི་བ་རྗོན་ཧུའི་གྷོའི་གསར་འགོད་པའི་བཅར་འདྲི་སྐབས། ཐེངས་འདིར་ཉེན་རྟོག་པ་ཚོས་ཁྲིམས་འགལ་བྱས་ཡོད་སྟབས། ཁོས་ངེས་པར་དུ་ཁྲིམས་གཏུགས་བྱས་ཏེ་ཉེན་རྟོག་ལས་ཁུངས་ཀྱིས་ཁོའི་མ་འོངས་པའི་བཟའ་ཟླར་དགོངས་སེལ་ཞུ་རུ་འཇུག་གི་ཡིན་ཞེས་དང་།  མོའི་ལག་ཏུ་དངུལ་ལོར་སྟོང་ཕྲག་ཁ་ཤས་ཁྱེར་དོན་དང་ཀུ་ཤུ་ཁ་པར་མང་པོ་ཉོ་དགོས་དོན་ནི། མོའི་ནང་མི་ཚོ་རྒྱ་ནག་ལ་ཡོད་པ་དང་། རྒྱ་ནག་ཏུ་ཀུ་ཤུ་ཁ་པར་རག་ཁག་པ་མ་ཟད། རྒྱ་ནག་ནང་འཚོང་བཞིན་པའི་ཀུ་ཤུ་ལྔ་བ་མང་ཤོས་རྫུན་མ་ཡིན་པའི་དབང་གིས་ཨ་རི་ནས་ཉོ་ཐབས་བྱས་པ་ཡིན་སྐོར་སོཊ་བརྗོད་ཡོད་འདུག  

ཉེ་བའི་ཆར་ཉེན་རྟོག་ལས་ཁུངས་ཀྱིས་གནས་ཚུལ་དེའི་ཐད་གསལ་བཤད་བྱས་མེད་པ་མ་ཟད། ཁྲིམས་ཁང་དུ་གཏུག་བཤེར་བྱས་མིན་གྱི་གནས་ཚུལ་གསལ་བོ་གང་ཡང་མེད་པར་ལྷག་ཡོད་འདུག