ཉེ་ཆར་རྒྱ་གཞུང་གིས་འཛམ་གླིང་འཇིག་རྒྱུ་ཡིན་པའི་དཀྲོགས་གཏམ་སྤེལ་བའི་ཉེས་མིང་འོག་མི་ ༩༠༠ ལྷག་འཇུ་བཟུང་བྱས་འདུག
༢༠༡༢ ལོའི་ཕྱི་ཟླ་ ༡༢ ཚེས་ ༢༡ ཉིན་ནི་མཱ་ཡཱ་ལི་ཐོ་(Mayan Long Count calendar) མཇུག་རྫོགས་ཡོད་པའི་ཁར། དེ་སྔོན་ཨ་རིའི་ཧོ་ལའེ་ཝོས་ ༼༢༠༡༢ ༽ཞེས་པའི་གློག་བརྙན་དེ་བཏོན་པ་བཅས་ལ་བརྟེན་ནས། འཛམ་གླིང་མི་མང་ཁྲོད་ཉིན་དེར་ས་འགུལ་དང་མཚོ་ཡོམ་ཆེན་པོས་འཛམ་གླིང་འཇིག་ཉེན་འབྱུང་རྒྱུ་ཡིན་པའི་གླེང་སློང་ཞིག་བསླེབས་ཡོད་ལ། ལྷག་པར་དུ་རྒྱ་ནག་ནང་སྐད་ཆ་དེ་ཤུགས་ཆེན་པོ་ཁྱབ་སྟེ། མི་མང་ཁྲོད་དངངས་སྐྲག་བྱེད་མཁན་དང་སོ་སོར་ཐར་ལམ་གྱི་ཐབས་ཤེས་འཚོལ་མཁན་མང་པོ་བསླེབས་ཡོད་འདུག
ནེའུ་ཡུག་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ཉེ་ཆར་རྒྱ་གཞུང་གིས་འཛམ་གླིང་འཇིག་ཉེན་དྲིལ་བསྒྲགས་བྱས་པའི་ཉེས་མིང་འོག རྒྱ་ནག་གི་ཞིང་ཆེན་ཁག་ ༩ ནང་འཛམ་གླིང་འཇིག་ཉེན་ལ་ཡིད་ཆེས་བྱེད་མཁན་ཆོས་རྒྱུད་བྱེ་བྲག་པ་ཞིག་གི་དད་ལྡན་མི་སྣ་ ༩༠༠ ལྷག་འཇུ་བཟུང་བྱས་ཡོད་པ་དང་། དེའི་ཁྲོད་ཀྱི་དད་ལྡན་མི་སྣ་ ༤༠༠ ལྷག་མཚོ་སྔོན་ཞིང་ཆེན་གྱི་ཁོངས་ནས་ཡིན་འདུག
རྒྱ་གཞུང་གིས་འཛམ་གླིང་འཇིག་ཉེན་དྲིལ་བསྒྲགས་བྱེད་མཁན་ཆོས་རྒྱུད་དེར་༼བླུན་ཆོས་༽ཞེས་བརྗོད་དེ་མཐའ་གཅིག་ཏུ་དྲག་གནོན་བཀག་སྡོམ་བྱེད་བཞིན་ཡོད་འདུག ཆོས་རྒྱུད་དེའི་དད་ལྡན་པ་རྣམས་ཀྱིས་མཚན་མོ་ཁང་ཁྱིམ་ཕྱི་ལོགས་ནས་སྐྱབས་འཇུག་སྨོན་ལམ་ཚོགས་པ་དང་། འཛམ་གླིང་འཇིག་རྒྱུ་ཡིན་པའི་ཉེན་བརྡའི་ཡི་གེ་སོགས་བཀྲམས་ཏེ། ཁོ་ཚོའི་ཆོས་རྒྱུད་ནང་འཛུལ་ཞུགས་བྱས་ན་ཐར་ལམ་ཐོབ་རྒྱུ་ཡིན་པ་དང་། ཆོས་དད་མེད་མཁན་གྱི་མི་རྣམས་ཐར་ལམ་མེད་པའི་དྲིལ་བསྒྲགས་བྱས་ཡོད་པར་བརྗོད།
རྒྱ་གཞུང་ཤིན་ཧྭ་གསར་ཁང་གི་གནས་ཚུལ་སྤེལ་བའི་ནང་། ཆོས་རྒྱུད་ཚོགས་པ་དེས་སོ་སོའི་མིང་ལ་ ༼ཐམས་ཅད་ནུས་པའི་ལྷ ༽ ཞེས་འབོད་པ་དང་། ཆོས་རྒྱུད་དེ་ནི་ཡེ་ཤུ་ཆོས་ལུགས་བེད་སྤྱོད་དང་ལོག་འབྲེལ་བྱས་པ་ལ་བརྟེན་ནས་བྱུང་བ་ཞིག་ཡིན་ཚུལ་དང་། ཆོས་རྒྱུད་དེ་ནི་༼བླུན་ཆོས་༽ཤིག་ཡིན་པ་མ་ཟད། ཆོས་རྒྱུད་དེའི་སྲོལ་གཏོད་པ་ནི་རྒྱ་ནག་ཧེ་ལུང་ཅཱང་གི་ཡུལ་མི་ཀྲའོ་ཝེ་ཧྲན་ཡིན་པ་དང་། རྒྱ་གཞུང་ཆོས་དོན་ལྷན་ཁང་གིས་སྔ་མོ་ནས་ཆོས་རྒྱུད་དེའི་ངོ་བོ་རྩད་གཅོད་ཀྱིས་༼བླུན་ཆོས་༽ཀྱི་གྲས་སུ་ཐོ་འགོད་བྱས་ཡོད་ལ། ད་ལྟའི་ཆར་ཁྲིམས་ལྟར་ཆོས་རྒྱུད་དེར་དྲག་རྡུང་བྱ་རྒྱུ་ལག་བསྟར་བྱེད་བཞིན་ཡོད་སྐོར་བརྗོད་པ་རེད།
པེ་ཅིན་གྱི་བཟོ་གྲྭ་ཞིག་གི་ལས་བཟོ་བ་ལཱིག་ཧྭ་ཟེར་བ་ཞིག་གིས་ནེའུ་ཡོག་དུས་བབ་ལ་བརྗོད་དོན། ཁོས་ལྷ་ས་གྲོང་ཁྱེར་ཉེ་འདབས་ཀྱི་རི་སྒང་དུ་ཉེན་སྐྱོབ་སྦུབས་ཁང་ཞིག་བསྐྲུན་ཡོད་པ་དེར། སྦུབས་ཁང་དེར་མི་རེའི་རྒྱ་སྒོར་ཁྲི་ ༥ རེ་སྤྲོད་དགོས་པ་དང་། ད་ལྟ་འདུག་སྡོད་བྱེད་མཁན་གྱི་མིས་ཁེངས་ཡོད་འདུག ཡང་རྒྱ་ནག་ཀྲེ་ཅང་གི་ཚོང་བ་ཞིག་གིས་ལྕགས་དང་ཤེལ་གྱིས་གྲུབ་པའི་ཉེན་སྐྱོབ་ལྒང་བུ་མང་པོ་བཟོས་ཡོད་པ་དང་། ལྒང་བུ་རེའི་ནང་མི་ ༩ ཤོང་གི་ཡོད་པ་མ་ཟད། སྲོག་རླུང་རྫ་མ་དང་ཉི་ནུས་གློག་འོད། བཟའ་ཆས་སོགས་ཟླ་འགར་འཚོ་སྡོད་ཐུབ་པའི་མཐུན་རྐྱེན་སྒྲིག་ཡོད་ལ། ད་ལྟ་ཉེན་སྐྱོབ་ལྒང་བུ་ ༢༦ བཙོང་ཟིན་པ་དང་། ཉེན་སྐྱོབ་ལྒང་བུ་ཡག་ཤོས་གཅིག་གི་རིན་གོང་རྒྱ་སྒོར་ཁྲི་ ༥༠༠ རེ་ཡིན་འདུག
འདས་པའི་ལོ་ ༢༠ ཡར་སྔོན་ནས་རྒྱ་ནག་ནང་དར་ཁྱབ་བྱུང་བའི་ཆོས་འཁོར་རྩ་རླུང་སྒོམ་སྒྲུབ་པ་རྣམས་ལ་རྒྱ་གཞུང་གིས་བཀག་སྡོམ་བྱས་པ་ལ་བརྟེན་ནས། ༡༩༩༩ ལོར་པེ་ཅིན་དུ་ཆོས་འཁོར་སྒོམ་སྒྲུབ་པ་ཁྲི་ ༡ ལྷག་གིས་གཞི་རྒྱ་ཆེ་བའི་ཞི་བའི་ངོ་རྒོལ་བྱུང་ཡོད་ལ། སྐབས་དེར་རྒྱ་གཞུང་གིས་དད་ལྡན་པ་ཕོན་ཆེན་པོ་དྲག་གནོན་དམར་གསོད་དང་བཙན་ཁྲིད་འཇུ་བཟུང་བྱས་ཡོད་པ་རེད།
རྒྱ་ནང་གི་༼ཐམས་ཅད་ནུས་པའི་ལྷ༽ཞེས་པའི་ཆོས་རྒྱུད་དེ་ནི། འདས་པའི་ལོ་ ༢༠ སྔོན་ནས་བྱུང་ཡོད་པ་དང་། ད་ལྟའི་ཆར་དད་ལྡན་ཚོགས་མི་ཁྲི་ ༡༠༠ ལྷག་ཡོད་པར་བཤད།
གསར་འགོད་པ། ཚེ་རིང་རྒྱལ།
ལྒིང་བུ་ ལྒིང་བུ་ ལྒིང་བུ་ ཅི་ཞིག་རེད།