དེ་རིང་ཨོ་སི་ཊིར་ལེ་ཡར་གནས་སྡོད་བོད་མི་སྐོར་ཞིག་གིས་བོད་ཕྱི་ནང་གི་རྒྱལ་གཅེས་དཔའ་བོ་དཔའ་མོ་དག་གི་ཞལ་ཆེམས་ས་གནས་མི་མང་ལ་བརྒྱུད་བསྒྲགས་གནང་མགོ་བཙུགས་ཡོད།
དེ་རིང་ཕྱི་ཚེས་ ༢༦ ཉིན་གྱི་ཞོགས་པའི་ཆུ་ཚོད་ ༩ པའི་ཐོག་ནས་མགོ་འཛུགས་ཀྱིས། ཨོ་སི་ཊིར་ལེ་ཡར་གནས་བཞུགས་བོད་མི་མདའ་བཞིའི་ཕུན་ཚོགས་དང་བསྟན་འཛིན་ཆོས་རྒྱལ། འབྲུ་རི་བློ་བཟང་གསུམ་གྱི་སྣེ་ཁྲིད་འོག་བོད་མི་སྐོར་ཞིག་གིས་མཉམ་རུབ་ཐོག བོད་བསྟན་སྲིད་མི་རིགས་ཆེད་རང་ལུས་མེར་བསྲེགས་གནང་མཁན་བོད་ཕྱི་ནང་གཉིས་ཀྱི་རྒྱལ་གཅེས་དཔའ་བོ་དཔའ་མོ་དག་གི་ཞལ་ཆེམས་དང་རེ་འདུན། བོད་ནང་གི་ཛ་དྲག་གནས་སྟངས་སོགས་དབྱིན་ཡིག་དང་རྒྱ་ཡིག་ནང་བཀོད་པའི་ཡིག་ཆ་མང་པོ་ཞིག ཨོ་སི་ཊིར་ལེ་ཡའི་ས་གནས་མན་ལེ་དང་། སེ་ཌི་ནེ་གྲོང་ཁྱེར། དེའི་ཉེ་འཁྲིས་སུ་ཡོད་པའི་སྐད་གྲགས་ཆེ་བའི་ལྷ་མོའི་ཚོགས་ཁང་གི་མདུན་བཅས་ཀྱི་མི་མང་ཁྲོད་བརྒྱུད་བསྒྲགས་དང་འགྲེམ་སྤེལ་བྱས་སོང་།
ལས་འགུལ་འདི་དེ་རིང་ནས་མགོ་འཛུགས་ཀྱིས་བདུན་ཕྲག་གཅིག་རིང་སྤེལ་རྒྱུ་ཡིན་པ་དང་། གཟའ་འཁོར་རྗེས་མའི་གཟའ་ལྷག་པའི་ཉིན་འདི་གའི་སེ་ཌི་ནེ་མཉམ་འབྲེལ་རྒྱལ་ཚོགས་ཡན་ལག་ལས་ཁུངས་མདུན་དུ། ཉིན་གཅིག་ཟས་བཅད་ངོ་རྒོལ་དང་རྒྱལ་ཚོགས་ལ་ཞུ་སྙན་ཕུལ་ཏེ་ལས་འགུལ་མཇུག་བསྡུ་རྒྱུ་ཡིན་འདུག
ལས་འགུལ་སྤེལ་བ་དེ། ཡག་པོ་རེད། ད་དུང་ང་ཚོ་ལས་འགུལ་གཙོ་ཕལ་མ་ནོར་བའི་ཐོག་མུ་མཐུད་དེ་སྤེལ་དགོས།། རྗེས་སུ་ཡི་རང་ཞུའོ།། བཙན་བྱོལ་བ་ཚང་མ་ལོངས་ཤོག ད་ཡིན་ད། བོད་ནང་ནས་ཡར་ལང་མ་གནང་ན་ལོས་བཟང་། བདེ་འཇག་གལ་ཆེ། བོད་ཡུལ་རྒྱ་ཡུལ་དུ་མི་འགྱུར་བ་དང་། བོད་མི་རྒྱ་ལ་མི་འགྱུར་བའི་ཐབས་ཤེས་འཐེན་རྒྱུ་དེ་བོད་མི། རེ་རེ་ལ་འགན་ཡོད་པ་ཞིག་རེད། ད་ལྟའི་གནས་སྐབས་རིང་བོད་ནང་ནས་དཔའ་བོ་དོན་ན་འབྲས་བུ་ཆེ་པོ་ཞིག་སྨིན་རྒྱུ་མེད་པ་དེ་མངོན་གསལ་རེད། ཆབ་སྲིད་དྲིལ་བསྒྲོགས་བྱེད་རྒྱུ་དེ། ང་ཚོ་ཕྱི་སྡོད་བོད་མིའི་འགན་གཡོལ་དུ་མེད་པ་དང་། ཕྲག་ཏུ་བབ་པའི་འོས་འགན་རེད།།
བོད་ནང་དུ་དཔའ་ཁེར་རྒྱུག་གཉིས་རྒྱུག་གིས་རང་ལུས་མེར་སྲེག་གཏོང་གི་འདུག ཆབ་སྲིད་ལས་འགུལ་སྤེལ་ཏེ་བཙོན་ཁང་ལ་འགྲོ་བཞིན་འདུག སྔོན་ཆད་བཙན་བྱོལ་ནས་ཚོགས་པ་སྒྲིག་འཛུགས་ཤིག་གིས་གོ་སྒྲིག་དང་སྣེ་འཁྲིད་མ་བྱས་ཚེ། མི་སྒེར་རེ་རེས་རྩ་དོན་ལ་འགན་འཁུར་ཏེ་ལས་འགུལ་སྤེལ་མཁན་ཧ་ཅང་ཉུང་ཉུང་ཡིན་མོད། དེང་སྐབས་བཙན་བྱོལ་ནང་དང་ནུབ་ཕྱོགས་རྒྱལ་ཁབ་ཁག་གི་བོད་པ་ཚོའི་ཁྲོད་དུའང་དཔའ་ཁེར་རྒྱུག་གཉིས་རྒྱུག འགན་ཁྱོས་འཁུར་ངས་འཁུར་གྱིས་བོད་པའི་རྩ་དོན་ཆབ་སྲིད་ཀྱི་ལས་འགུལ་སྤེལ་མཁན་གཅིག་རྗེས་གཉིས་མཐུད་དུ་ཡོང་གི་འདུག
ཉེ་སྔོན་ཕྱི་ཚེས་ ༢༣ ་ཉིན་སུད་སིའི་བོད་པ་སྐོར་ཞིག་གིས་དགུན་འཁྱག་བ་མོའི་ཁྲོད་ནས་ལུས་པོ་གཅེར་བུར་བུད་དེ་བོད་དོན་ཁྱབ་བསྒྲགས་ཀྱི་ལས་འགུལ་རྣམ་པ་མ་འདྲ་བ་ཞིག་སྤེལ་སོང་། དེ་རིང་ཨོ་སི་ས་ཊི་ལེ་ཡ་རུ་བོད་པ་ལ་ཞེན་ཅན་སྐོར་ཞིག་གིས་བོད་ཕྱི་ནང་གཉིས་སུ་སྐུ་ལུས་མཆོད་འབུལ་གནང་ཟིན་པའི་རྒྱལ་གཅེས་དཔའ་རྒོལ་ཚོའི་ཤུལ་བཞག་ཁ་ཆེམས་ནུབ་གླིང་བ་ཚོར་བརྒྱུད་སྒྲོག་གནང་གི་འདུག འདི་བོད་པའི་འཐབ་རྩོད་ཀྱི་གནས་ཚད་མཐོན་པོར་སླེབས་བཞིན་པའི་རྟགས་མཚན་སྤོབས་པ་སྐྱེ་འོས་པ་ཞིག་རེད།