དེ་རིང་ཕྱི་ཚེས་ ༢༨ ནས་ཉིན་ལྔའི་རིང་ཉི་ཧོང་ཨེ་ཤ་ཡའི་མིག་ནད་བརྟད་དཔྱད་ཚོཊ་པས། ངྷ་ས་བདེ་ལེཊ་སྨན་ཁང་དུ་བོད་མི་དང་རྒྱ་གར་ཡུལ་མི་ཚོར་རིན་མེད་ཐོག་མིག་གཤག་བཅོས་བྱེད་མགོ་བཙུཊ་འདུག
བོད་མིའི་སྒྲིག་འཛུགས་བདེ་ལེགས་སྨན་ཁང་དང་ཉི་ཧོང་ཨེ་ཤ་ཡའི་མིག་ནད་བརྟག་དཔྱད་ཚོགས་པ་གཉིས་མཉམ་འབྲེལ་ཐོག ལོ་རེའི་ཡེ་ཤུའི་འཁྲུངས་སྐར་གྱི་གུང་གསེང་སྐབས་ཉི་
ཧོང་ནས་མིག་ནད་ཆེད་མཁས་སྨན་པ་ཁག་ཅིག་ངྷ་སར་ཡོང་སྟེ། བོད་མི་དང་རྒྱ་གར་ཡུལ་མི་བཅས་ལ་རིན་མེད་ཐོག་མིག་ནད་བརྟག་དཔྱད་དང་མིག་གི་སྐྱ་འགྲིབ་གཤག་བཅོས་ཀྱི་ཞབས་ཞུ་བསྒྲུབས་ཀྱིན་པ་ལྟར།དེ་རིང་ཕྱི་ཚེས་༢༨ཉིན་གྱི་ཞོགས་པའི་ཆུ་ཚོད་༡༠།༠༠ཡས་མས་སུ། ཧི་མ་ཅཱལ་མངའ་སྡེའི་ཀཱང་ར་རྫོང་ཉེན་རྟོག་སྐོར་སྲུང་སྤྱི་ཁྱབ་སྐུ་ཞབས་ཞི་བཱ (Shi va) ལགས་ཀྱིས། མིག་ནད་བརྟག་དཔྱད་ཁང་དང་གཤག་བཅོས་ཁང་བཅས་དབུ་འབྱེད་གནང་སོང་ལ།དེར་བདེ་ལེགས་སྨན་ཁང་འགན་འཛིན་དང་རོ་ཁྲི་རེ་ ( Rotery Club) ཚོགས་པའི་ཚོགས་མི།ཉི་ཧོང་ནས་ཕེབས་པའི་སྨན་པ་དང་ལས་བྱེད་བཅས་དང་།བོད་མི་དང་རྒྱ་གར་ཡུལ་མི་བཅས་འཛོམས་འདུག
ཉི་ཧོང་ཨེ་ཤ་ཡའི་མིག་ནད་བརྟག་དཔྱད་ཚོགས་པའི་ཐེངས་འདིའི་སྣེ་འཁྲིད་པ་སྐུ་ཞབས་ཨཱ་ཀེ་ལཱ་ཨོ་ཀཱ་ངྷ་ལགས་ཀྱིས་གསར་འགོད་པ་བརྗོད་དོན་ལྟར་ན། ཉི་ཧོང་ཨེ་ཤ་ཡའི་མིག་ནད་བརྟག་དཔྱད་ཚོགས་པ་དང་བདེ་ལེགས་སྨན་ཁང་མཉམ་འབྲེལ་གྱི་ལས་གཞི་འདིའི་དམིགས་ཡུལ་གཙོ་བོ། བོད་དང་ཉི་ཧོང་གི་མཐུན་ལམ་ཡར་རྒྱས་དང་བོད་པའི་སྤྱི་ཚོགས་ཁྲོད་ཀྱི་མིག་ནད་བྱུང་བའི་རིགས་ལ་ཞབས་ཞུ་བསྒྲུབ་ཆེད་ཡིན་འདུག་ལ། ལས་གཞི་འདི་ཕྱི་ལོ་༢༠༠༠ལོ་ནས་བཟུང་མགོ་འཛུགས་གནང་སྟེ་ད་རེས་ཐེངས་ ༡༣ པ་ཆགས་ཡོད་ཅིང་། ཐེངས་འདིར་ཉི་ཧོང་ནས་སྣེ་ཁྲིད་པ་ ༡ དང་མིག་ནད་ཆེད་མཁས་སྨན་པ་ ༨ ། ནད་གཡོག་དང་རོགས་པ་བྱེད་མཁན་བཅས་ཁྱོན་མི་ ༡༦ བསླེབས་འདུག ཉིན་ལྔའི་རིང་ཁོང་ཚོས་མིག་གི་འགོས་ནད་དང་མི་ཤུགས་སྐྱོ་བོ་ཡིན་པའི་རིགས་ལ་བརྟག་དཔྱད་སྨན་བཅོས་དང་། ལོ་ན་མཐོ་བའི་དབང་དང་ཉི་འོད། བརྡབ་སྐྱོན། ན་ཚ་གཞན་པའི་དབང་གིས་ཡོང་བའི་མིག་གི་སྐྱ་འགྲིབ་ཀྱི་རིགས་ལ་གཤག་བཅོས་བཅས་གནང་རྒྱུ་ཡིན་འདུག
གསར་འགོད་པས་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས་སུ། ལོ་ ༡༣ རིང་གི་མིག་ནད་བརྟག་དཔྱད་དང་སྨན་བཅོས་ཀྱིས་བོད་པའི་
སྤྱི་ཚོགས་ལ་ཕན་འབྲས་གང་འདྲ་བྱུང་ཡོད་མེད་དྲིས་པར་ཁོང་གིས། “ ད་ལྟའི་བར་བདེ་ལེགས་སྨན་ཁང་གི་མཐུན་འགྱུར་རོགས་རམ་འོག མིག་ནད་བརྟག་དཔྱད་ཚོགས་པས་བོད་པའི་སྤྱི་ཚོགས་ཀྱི་ནད་པ་མང་པོ་ཞིག་ལ་མིག་ནད་སྨན་བཅོས་དང་བཤག་བཅོས་ཐོག་ཕན་ཐོགས་ཆེན་པོ་བྱུང་སྟབས། ཐེངས་ ༡༠ བའི་སྐབས་སུ་༸གོང་ས་མཆོག་གིས་སྨན་པ་ཚོར་དམིགས་བསལ་མཇལ་ཁ་གནང་སྟེ་བསྔགས་བརྗོད་ཀྱང་གནང་ཡོད་ལ། ང་ཚོ་མི་སྒེར་བ་ཞིག་གིས་མིག་བཤག་བཅོས་བྱ་དགོས་ཚེས་ཉུང་མཐར་སྒོར་སྟོང་ཕྲག་ ༢༠ ལྷག་འགྲོ་གི་ཡོད། ཡིན་ནའང་། ད་ལྟའི་བར་ཁོང་ཚོས་རིན་མེད་ཐོག་བརྟག་དཔྱད་བྱས་མཐར་ད་ཆར་བོད་མི་ནད་པ་རེ་ཟུང་ལས་མང་ཆེ་བ་རྒྱ་གར་ཡུལ་མི་རེད། ད་རེས་བོད་པ་ཁག་ཅིག་དང་རྒྱ་གར་ཡུལ་བཅས་ཁྱོན་མི་ ༥༠༠ ཡས་མས་ཤིག་བསླེབས་འདུག དེའི་ནང་ནས་ནད་པ་ ༢༠ ལྷག་ལ་བཤག་བཅོས་གནང་རྒྱུ་རེད། མ་འོངས་པར་ང་ཚོའི་ངོས་ནས་ཁོང་རྣམ་པར་མཐུན་འགྱུར་གང་ཐུབ་གནང་སྟེ། མིག་ནད་བརྟག་དཔྱད་དང་བཤག་བཅོས་ཀྱི་ལས་གཞི་རྒྱུན་འཁྱོངས་གནང་འཆར་ཡོད། ” ཅེས་བརྗོད་བྱུང་།
དེ་རིང་ཉིན་གཅིག་རིང་སྨན་པ་ཚོས་མིག་ནད་ཀྱི་རིགས་ལ་བརྟག་དཔྱད་གནང་རྒྱུ་ཡིན་འདུག་ལ། སང་ཉིན་ནས་བོད་མི་དང་རྒྱ་གར་ཡུལ་མི་ནད་པ་ཚོར་མིག་གི་སྐྱ་འགྲིབ་གཤག་བཅོས་གནང་རྒྱུ་ཡིན་འདུག
