བྱིས་པ་བཀག་འགོག་གི་ཁྲིམས་གཞི།

གཟའ་པ་སངས་ཉིན་རཱ་ཤཱི་ཡའི་སྲིད་འཛིན་པུ་ཊེན་གྱིས། རཱ་ཤཱི་ཡའི་བྱིས་པ་ཚོ་ཨ་རི་བས་གཉོར་སྐྱོང་བུ་ཚབ་ཏུ་ལེན་བཞིན་པ་གཏན་འགོག་བྱ་ཆེད་གྲོས་ཚོགས་ཀྱིས་གྲོས་གཞིར་མཚན་རྟགས་བཀོད་འདུག

ཕྱི་ཚེས་ ༢༨ ཉིན་རཱ་ཤཱི་ཡའི་གྲོས་ཚོགས་ཀྱིས་ཨ་རི་བ་ཚོས་རཱ་ཤཱི་ཡའི་བྱིས་པ་གཉོར་སྐྱོང་བུ་ཚབ་ཏུ་ལེན་བཞིན་པར་འགོག་རྒོལ་གྱི་གྲོས་གཞི་ཞིག་བཏོན་ཡོད་འདུག་ལ། གྲོས་གཞི་དེར་རཱ་ཤི་ཡའི་སྲིད་འཛིན་པུ་ཊེན་ (Vladimir Putin) གྱིས་ཁྲིམས་གཞི་གཏན་འབེབས་ཀྱི་མཚན་རྟགས་བཀོད་འདུག  

གནད་དོན་དེའི་ཐད་ཨ་རི་དང་རཱ་ཤཱི་ཡའི་མི་མང་པོ་ཞིག་གིས་ངོ་རྒོལ་དང་ཁོང་ཁྲོ་ལངས་ཀྱི་ཡོད་འདུག  རྒྱལ་ཚོགས་བྱིས་པའི་ཐོབ་ཐང་སྡེ་ཚན་གྱི་ཚོད་རྩིས་བྱས་པ་ལྟར་ན། རཱ་ཤཱི་ཡར་ཕ་མ་མེད་པའམ་ཡང་ན་ཕ་མས་གསོ་སྐྱོང་བྱེད་ཐུབ་ཀྱི་མེད་པའི་བྱིས་པ་ ༧༤༠༠༠༠ ཙམ་ཡོད་པ་ལས་ ༡༨༠༠༠ ཙམ་གཞན་གྱིས་གཉོར་སྐྱོང་བུ་ཚབ་ཏུ་ལེན་རྒྱུར་རེ་སྒུག་བྱེད་ཀྱི་ཡོད་པ་དང་། རཱ་ཤཱི་ཡའི་བྱིས་པ་ཉམ་ཐག་ཕལ་ཆེ་བ་གཉོར་སྐྱོང་བུ་ཚབ་ཏུ་ལེན་མཁན་ཨ་རི་ཡིན་འདུག འདས་པའི་ལོ་བཅུ་ཕྲག་གཉིས་ཙམ་རིང་རཱ་ཤཱི་ཡའི་བྱིས་པ་ ༦༠༠༠༠ ལྷག་ཨ་རི་བས་གཉོར་སྐྱོང་བུ་ཚབ་ཏུ་བླངས་ཏེ་ཨ་རིར་ཁྲིད་ཡོད་འདུག

ཐེངས་འདིའི་ཁྲིམས་གཞི་དེས་ཨ་རི་བ་ཚོས་རཱ་ཤཱི་ཡའི་བྱིས་པ་བུ་ཚབ་ལ་འཁྲིད་གཏན་ཁེལ་བའི་རིགས་ཀྱང་འགག་འགྲོ་བཞིན་ཡོད་སྟབས། ཨ་རིའི་གཞུང་གིས་དེར་སྐྱོན་བརྗོད་བྱས་ཡོད་འདུག་ལ། རྒྱལ་སྤྱིའི་བྱིས་པའི་ཐོབ་ཐང་སྲུང་སྐྱོབ་སྡེ་ཚན་གྱི་སྐུ་ཞབས་པཱ་ཝེལ་གྱིས། སྐབས་འདིར་རཱ་ཤཱི་ཡའི་བྱིས་པ ་༤༦ ཨ་རི་བ་ཁག་ཅིག་གིས་གཉོར་སྐྱོང་བུ་ཚབ་ཏུ་ལེན་གཏན་ཁེལ་ཡོད་པ་རྣམས་ད་ལྟ་རཱ་ཤཱི་ཡའི་ནང་ལྷག་ཡོད་པས། ཁྲིམས་གཞི་འདི་དངོས་སུ་ལག་བསྟར་བམས་ཚེ་བྱིས་པ་དེ་དག་ཀྱང་འགག་འགྲོ་ངེས་ཡིན་སྐོར་བརྗོད་འདུག