སྤྲང་བོའི་ཧམ་ཤེད་ཀྱི་མགྱོགས་བྲིས།

མིག་མི་འཛུམ།

ང་ལ་ཧམ་པ་གཞན་ལས་ཆེ་བ་ཞིག་ཡོད་ཀྱང་སྲིད། ངས་རང་གི་ཧམ་མགོ་མ་གནོན་སྟབས་ཧམ་པའི་ཤེད་ཀྱིས་འདི་ལྟར་འབྲི་དགོས་འཁེལ་བ་ཡིོན་ཡང་སྲིད། གང་ལྟར་ཆོས་ཁྲིམས་ཀྱིས་མ་ཁོག་པའི་སྐད་ཆའི་རིགས་བཤད་རྒྱུར་ཉེན་ཁ་ཚ་བོ་ཡིན་པ་ངས་སྔ་བོ་ནས་ཤེས་ནའང་། སྐབས་འདིར་བདག་གིས་ཉེན་ཁ་དང་ཧམ་པ་གཉིས་ལས་ཧམ་པ་དེ་བདམས་པ་ཡིན།
མི་ཞིག་ལ་མཚོན་ནས་བཤད་ན། ང་ཚོ་ནི་སུས་ཀྱང་མི་འདོད་པའི་ཧ་ཅང་ཉམ་ང་ཞིང་དཀའ་སྡུག་སྣ་ཚོགས་ཀྱི་དཀྱིལ་ལ་ལྷུང་ཡོད། འདི་ལས་ལྷག་གི་སྡུག་བསྔལ་བ་ཞིག་དང་དམའ་སར་འབབ་ས་མེད་པ་དེ་ཚང་མའི་སེམས་ལ་ཁྲིག་ཁྲིག་ཡིན། འོན་ཀྱང་འུ་ཅག་གི་མི་མང་བོ་ཞིག་གིས་ད་དུང་སེམས་གཙོའི་ལྟ་བུའི་སྒང་ནས་བཙན་རྒོལ་རྒྱལ་སྐྱོབ་བྱེད་ཀྱི་ཡོད། དེའི་དཔེ་མཚོན་ནི། དགྲ་བོའི་མེ་མདའ་ཚུར་ཐོད་པར་བཙུགས་ཀྱང་རང་གི་ལག་གཉིས་ཕར་ཐལ་མོ་སྦྱར་ནས་མིག་ བཙིམ་ཞིང་བྱང་ཆུབ་ཀྱི་སེམས་ཁོ་ན་སྒོམ་ནས་སྡོད་པ་དེ་ཡིན། དེ་ལྟར་བྱས་པའི་ཉེར་ལེན་གྱིས་རང་རེའི་ས་ཐོག་ལ་༼ས་ཆ་གང་ལེགས༽ཐོག་ལ་ལས་སླ་བོར་མི་སེར་སྤེལ་གྱི་ཡོད་པ་དང་། མི་སེར་སྤེལ་བའི་གོམ་སྟབས་ཀྱང་ཧ་ཅང་མགྱོགས་པོ་ཡིན།

མི་རིགས་ཤིག་དང་རྒྱལ་ཁབ་ཅིག་གི་འཐབ་རྩོད་ཀྱི་ངོས་ནས་བཤད་ན། ལས་དང་རྒྱུ་འབྲས་ཀྱི་ཚངས་ཐིག་འོག་ཡིབ་སྡོད་པའི་སེམས་གཙོའི་ལྟ་བ་དེས་གཏན་ནས་ཡོང་མི་ཐུབ་པ་ནི་འཛམ་གླིང་གི་ལོ་རྒྱུས་ཀྱི་ངོས་ནས་ཚུར་ར་འཕྲོད་པ་ཡིན། དཔེར་ན་རྒྱ་ནག་གི་ལོ་ལྔའི་འཆར་གཞི་བཅུ་བའི་ནང་(༢༠༠༡____༢༠༠༥)བོད་ཤར་ཕྱོགས་ཨ་མདོ་ནས་དབུས་ཀྱི་རྒྱལ་ས་བར་དུ་ལྕགས་ལམ་བཟོས་ནས་གྲུབ་པ་རེད། དུས་འདི་ནས་བོད་ཀྱི་ས་ཐོག་ལ་མི་སེར་སྤེལ་བའི་མྱུར་ཚད་ཇེ་མགྱོགས་ལ་སོང་ཡོད་ པ་མ་ཟད། ད་ལྟའི་ཚོད་དཔག་ལྟར་ན། ལྷ་ས་གྲོང་ཁྱེར་གཅིག་པུའི་ནང་རྒྱ་མི་ས་ཡ་གཉིས་མ་ཟིན་ཙམ་ཞིག་བསླེབས་ཡོད་པར་ངོས་འཛིན་བྱེད་ཀྱི་ཡོད། དཔེ་དེ་དང་བསྡུར་ན། དུས་རབས་གོང་མའི་ལོ་རབས་ལྔ་ཅུ་བ་ནས་ཐད་ཀར་བོད་ཀྱི་ཤར་ཕྱོགས་ཨ་མདོའི་ཁུལ་དུ་ལྕགས་ལམ་བཟོ་སྐྲུན་གྲུབ་པ་ནས་མི་སེར་སྤེལ་བའི་གྲངས་འབོར་ཧ་ལས་ཤིང་ཧོན་འཐོར་བ་བྱུང་ཡོད་པ་མ་ཟད། ད་ལྟའི་དུས་སུ་བོད་རང་གི་ས་ཐོག་ཏུ་བོད་མི་གྲངས་ཉུང་མི་རིགས་ཆགས་གྲབས་ཡོད་པ་གསལ་བོ་ཡིན།

དེ་ལྟར་བོད་ཡུལ་སྟོད་སྨད་བར་གསུམ་མི་སེར་སྤེལ་ཡུལ་དུ་གྱུར་ཡོད་པ་མ་ཟད། བོད་ཀྱི་རིན་ཆེན་སྣ་ཚོགས་ཀྱི་གཏེར་ཁ་དག་རྒྱ་ནག་གིས་སྔོག་གི་ཡོད་ལ། གཙང་བོ་དང་ཆུ་བོ་དག་ལ་གློག་མཛོད་ཀྱང་རྒྱ་ནག་གིས་རྒྱག་གི་ཡོད། བོད་ཀྱི་རང་བྱུང་ཁོར་ཡུག་འབག་བཙོག་བཟོ་བ་དང་། ཡུལ་སྐོར་ལྟེ་བ་བཙུགས་ནས་ཁེ་བཟང་ཆ་ཚང་རྒྱ་ནག་གིས་ལེན་གྱི་ཡོད། དེ་ལྟར་གོམ་པ་རིམ་སྤོ་བྱས་ནས་བོད་ཡུལ་གྱི་ཁྱབ་ཁོངས་ཚང་མ་རྒྱ་ནག་ཅན་དུ་ཆགས་པར་བྱས་ཏེ། བོད་ཀྱི་ཆོས་དང་རིག་གཞུང་ཚང་མ་ལ་ཚད་བཀག་བྱུང་བ་དང་། སློབ་གྲྭ་ཁག་གི་སློབ་དེབ་ཀྱང་རྒྱ་ཡིག་ཅན་དུ་སྒྱུར་གྱི་ཡོད། དེའི་སྟབས་ཀྱིས་ན་ནིང་རེབ་གོང་དང་མཚོ་སྔོན་གྱི་ས་ཁུལ་མང་པོ་ཞིག་ནས་དགེ་རྒན་དང་གཞོན་སྐྱེས་ཚོས་གཞི་རྒྱ་ཆེ་བའི་ངོ་རྒོལ་བྱས་ཡོད་པ་མ་ཟད། ད་ལྟའི་འགྲོ་བཞིན་པའི་རང་ལུས་མེར་བསྲེགས་ཀྱི་ལས་འགུལ་འདི་ཡང་བསྟུད་མར་འབྱུང་གི་ཡོད་པ་རེད།

རྣམ་པ་དེ་ནི་རྒྱ་ནག་ཁོ་རང་ཚོར་ཡང་“རི་ཀྲུང་རོགས་སྐྱོར་” གྱི་ལས་འགུལ་ལ་བརྟེན་ནས་ཉི་ཧོང་གིས་རྒྱ་ནག་ལ་སིམ་འཛུལ་བྱས་པ་དེ་དང་། དེའི་ཡར་སྔོན་གྱི་མན་ཇུ་སྲིད་གཞུང་མགོ་རྟིང་སློག་པ་དང་སོག་པོའི་མི་རིགས་རྒྱ་མི་ཅན་དུ་བསྒྱུར་ཏེ་ད་ལྟ་ཤུལ་མེད་ཆགས་པ་སོགས་ཉམས་མྱོང་ཕུན་སུམ་ཚོགས་པོ་བླངས་ཡོད། དེ་འདྲའི་འཇིགས་སུ་རུང་བའི་ལོ་རྒྱུས་ཀྱི་ངོས་ནས་བསམ་ན། ད་ནི་འུ་ཅག་གི་ངོས་ནས་བྱང་ཆུབ་ཀྱི་སེམས་སྒོམ་ནས་ཁ་རོག་གེར་འདུག་པའམ། དགྲ་བོའི་བཀའ་དང་དགོངས་པ་ཐམས་ཅད་ལ་བསྟུན་ནས་འགྲོ་བའི་སྲིད་ཇུས་འདི་ཧ་ཅང་གི་གཉན་འཕྲང་ཅན་ཞིག་ཏུ་མཐོང་།

བདག་གི་བསམ་ཚུལ་སྔ་གཞུག་ཚང་མར་གསལ་བ་ལྟར། འུ་ཅག་གི་ངོས་ནས་རྒྱ་ནག་ལ་འཛིན་པའི་སྲིད་བྱུས་མཁྲེགས་པོ་ཞིག་དང་སྐད་ཆ་ཡང་ཕར་ཕྱོགས་ནས་རྔ་བོ་ཇི་ལྟར་བརྡུང་བ་དེ་བཞིན་དུ་བྲོ་ཞིག་འཁྲབ་རྒྱུ་ལས། ཕར་སྐུ་ཚབ་ཡིན་ཟེར་ནས་གལ་ཆེན་དོན་ཆེན་གྱིས་བཏང་བའི་མི་ལ་དགྲ་བོས་ལྟ་སྐོར་བའི་མིང་དུ་བཏགས་ནས་ཞིང་ཆེན་རིམ་པའི་དཔོན་རིགས་རེ་གཉིས་ལས་སུ་གང་ལའང་ཐུག་ཐུབ་ཀྱི་མེད་བཞིན་དུ། ད་དུང་རྣམ་འགྱུར་ཡག་རབས་དང་རེ་བ་ཆེ་རབས་བཤད་ན་ཕན་པ་ལས་གནོད་དུ་འགྲོ་ངེས་ཡིན།

༢༠༡༢ ། ༡༢ ། ༢༨ ལ་བྲིས།