བལྟ་ཀློག་དཀའ་བའི་བཅའ་ཁྲིམས་ཞིག

ཀོ་ལི་སྒ་གཞིས་ཆགས། གཞུང་པ་ཚེ་དབང་བསོ་རྣམ།

༄༅། ། སྔ་ལོ་ ༢༠༡༡ ལོར་༸གོང་ས་མཆོག་ནས་བོད་རྒྱལ་ཁབ་དང་བོད་མི་རིགས་ཀྱི་ཆབ་སྲིད་ཐུགས་འགན་ཆ་ཚང་དམངས་གཙོའི་རྒྱལ་ཁབ་སྤྱིའི་ལམ་ལུགས་ལྟར། ཡུལ་མིའི་རྒྱལ་ཁབ་ཀྱི་ངོ་བོ་མཚོན་ཐབས་སུ་མི་མང་གིས་བདམས་པའི་མགོ་འཁྲིད་ལ་རྩིས་སྤྲོད་གནང་རྗེས། ལོ་ངོ་གསུམ་བརྒྱ་དྲུག་བཅུ་ལྷག་རིང་གི་ལོ་རྒྱུས་བཙན་པོ་ཡོད་པའི་གཟི་བརྗིད་ཆེ་ལ། དོན་སྙིང་ལྡན་པའི་རླབས་ཆེན་བོད་ཀྱི་ཆབ་སྲིད་ལམ་ལུགས་ལ་གནམ་ས་ལྟ་བུའི་འགྱུར་བ་ཆེན་པོ་ཕྱིན་ཏེ། བཙན་བྱོལ་བོད་མིའི་བཅའ་ཁྲིམས་ལའང་ལོ་རྒྱུས་རང་བཞིན་གྱི་བསྐྱར་བཅོས་ཕྱིན་པའི་པར་སྐྲུན་གསར་པ་ཞིག་ལག་སོན་ཡོང་བརྒྱུར་རེ་སྒུག་ཆེན་པོའི་ངང་དུ་ཡོད་པའི་སྐབས་འདིར། ད་ལམ་བཙན་བྱོལ་བོད་མིའི་བཅའ་ཁྲིམས་ཕྱི་ལོ་ ༢༠༡༢ གསལ་བ་དེ་དག་ལག་སོན་བྱུང་བར་དགའ་སྤྲོས་ཁེངས་ཏེ་མགོ་ཐོག་ཏུ་བླངས་ཤིང་། བོད་ཀྱི་དམངས་གཙོའི་ལམ་ལུགས་འདི་བཞིན་ཁྲིམས་ལུགས་ཀྱི་དབང་བརྒྱུར་འོག་ཏུ་ཁྲི་ལོར་བརྟན་པ་ཤོག་ཅེས་སྨོན་ལམ་བཏབས་པ་ཡིན།

ཆེད་བརྗོད་ཀློག་སྐབས་མཇུག་ཏུ་བོད་མིའི་སྒྲིག་འཛུགས་འདི་བཞིན་ཁྲིམས་ལུགས་ཀྱི་དབང་བསྒྱུར་ཐོག་བསྐྱོད་རྒྱུར་ཕན་ཐོགས་ངེས་ཅན་ཞིག་ཡོང་བའི་རེ་འདུན་དང་བཅས་གསལ་འདུག་པ་ནི། ང་ཚོའི་སྤྱི་ཚོགས་ཆུང་ཆུང་འདི་དོན་དངོས་ལག་ལེན་དུ་ཁྲིམས་ཀྱི་དབང་བསྒྱུར་འོག་མུ་མཐུད་ནས་གནས་ཐུབ་པའི་ཆེད་སེམས་དང་འགན་འཁུར་དེ་དབུས་བོད་མིའི་སྒྲིག་འཛུགས་ལ་ཡོད་པའི་ངེས་པ་སྒྲེན་པོ་བརྙེད་དེ་དགའ་བསུ་དང་བཅས་དཀར་ཆགས་ནས་མར་བལྟ་ཀློག་སྐབས། ལེའུ་དང་པོ་གཞི་རྩའི་ལམ་སྟོན། དོན་ཚན་དང་པོའི་ཚབ་ཏུ། དོན་ཚན་ཉེར་ལྔ་པ་བཀའ་བློན་ཁྲི་པ་དང་། བཀའ་བློན་རྣམ་པའི་ལས་འཁུར་དམ་འཇོག་ཅེས་བསལ་འདུག་ན། རེ་ཞིག་ཐེ་འཚོམ་གྱི་ནང་དུ་ལྷག་ནས་ངོ་ཤེས་འབྲེལ་ཆགས་ཁག་ལ་ལག་ཁྱེར་ཁ་པར་བརྒྱུད་བཀའ་འདྲི་ཞུས་པར་མང་པོ་ཞིག་ལ་པར་སྐྲུན་གསར་པའི་བཅའ་ཁྲིམས་ད་སྔ་ལག་སོན་མེད་པ་དང་། འགའ་ཤས་ལ་ལག་སོན་བྱུང་ཡོད་ཀྱང་ཞིབ་བལྟ་བྱེད་ལོངས་མ་བྱུང་བ་སོགས་ཀྱིས་ང་རང་ཐེ་འཚོམ་གྱི་ས་མཚམས་དེ་ནས་བགྲོད་ཐུབ་མ་སོང་།

བོད་རྒྱལ་ཁབ་དང་བོད་མི་རིགས་ཀྱི་ལས་དབང་དུ་འཕྲིན་པའི་བོད་ཀྱི་ཆབ་སྲིད་ལམ་ལུགས་ལ་གནམ་ས་ལྟ་བུའི་ལོ་རྒྱུས་ཀྱི་འགྱུར་བ་ཕྱིན་པ་དང་མཉམ་དུ་བཅའ་ཁྲིམས་དཔར་སྐྲུན་པའང་ལོ་རྒྱུས་ཀྱི་འགྱུར་བ་ཞིག་གི་ཆེད་དུ་བཏང་བ་ཡིན་ན་ལས། དེ་མིན་བཙན་བྱོལ་བོད་མིའི་བཅའ་ཁྲིམས་ཕྱི་ལོ་ ༢༠༡༢ དཔར་སྐྲུན་བཞི་པ། དཔར་བསྐྲུན་གྱི་བདག་དབང་བོད་མི་མང་སྤྱི་འཐུས་ལྷན་ཚོགས་ལ་ཡོད་ཟེར་བའི་བཅའ་ཁྲིམས་དེ་དག་ཤོག་གྲངས་བང་རིམ་དུ་མེད་པ་དང་། དོན་ཚན་ཡར་འཁྲུག་མར་འཁྲུག་མང་བ་སོགས་བལྟ་ཀློག་མ་བདེ་བས་འབྲེལ་ཡོད་ཚོགས་དྲུང་ལས་ཁུངས་ལ་ཞལ་པར་ཐེངས་གཉིས་ཕུལ་བས་ལེན་མཁན་མེད་པས། ད་ལམ་དམངས་གཙོའི་ཀ་བ་བཞི་པ་རང་དབང་ཅན་གྱི་གསར་ཤོག་གི་བརྒྱུད་ལམ་ལ་ཁ་ཕྱོགས་ནས་གང་ཟག་སྒེར་ལ་བསམ་ཚུལ་དང་མཐོང་ཚུལ་ཉམས་མྱོང་སོགས་དཀའ་ཚེགས་གང་འཕྲད་པ་དེ་འདི་གར་གསལ་སྟོན་ཞུ་རྒྱུ་ཡིན།

བཅའ་ཁྲིམས་ནི་ཇི་སྲིད་བོད་མི་གཞིས་བྱེས་གཉིས་རང་ཡུལ་དུ་མཉམ་འཛོམས་མ་ཐུབ་བར་དེ་སྲིད་དུ་བོད་མི་བཙན་བྱོལ་བའི་སྒྲིག་འཛུགས་འདི་དམངས་གཙོ་དང་། ཁྲིམས་ཀྱི་དབང་བསྒྱུར་འོག་ཏུ་གནས་ཐུབ་པའི་ལམ་སྟོན་གྱི་ཁྲིམས་ཡིག་བླ་ན་མེད་པ་དེ་ཡིན་པ་ལས་བཅའ་ཁྲིམས་ལ་མཐོང་ཆུང་དང་། སྣང་མེད་དུ་ནམ་ཡང་འཇོག་མི་ཉན་པ་ནི། བཅའ་ཁྲིམས་དོན་ཚན་བཅུ་གསུམ་ནང་དུ་གསལ་བའི་བོད་ཀྱི་ཡུལ་མིའི་ལས་འགན་ཆེ་ཤོས་དེ་ཡིན་པ་དབུས་བོད་མིའི་སྒྲིག་འཛུགས་དང་ཁྱབ་ཆེ་བའི་རྒྱ་ཆེ་མང་ཚོགས་བཅས་ནས་གསལ་པོ་མཁྱེན་ཐུབ་པའི་གསལ་འདེབས་སུ།         །