འོད་ཟེར་གྱིས་བརྩམས། ནགས་ཤོད་སད་མིས་བསྒྱུར།
ཕྱི་ལོ་ ༢༠༡༢ ལོར་བོད་ཀྱི་གྲོང་དང་གྲོང་རྡལ། ཤང་དང་གྲོང་གསེབ་ཡོངས་སུ་སྐུ་གཟུགས་མེ་ལྕེས་འཁྱུད་པ་དང་ལུས་སྲོག་མེ་རུ་བསྒྲོན་པའི་ལོ་རེད། འདི་འདྲ་བ་ཕལ་ཆེར་བོད་ཀྱི་ལོ་རྒྱུས་ཁྲོད་དང་། ལྷག་པར་ཉེ་རབས་བོད་ཀྱི་ལོ་རྒྱུས་ནང་གཏན་ནས་མཐོང་རྒྱུ་ཡོད་པ་མ་རེད། ཏག་ཏག་ཕྱི་ཕྱོགས་གསར་འགྱུར་བརྒྱུད་ལམ་པས་བརྗོད་པ་ལྟར་( བོད་འབར་བཞིན་འདུག) ཟེར་བ་ལྟར་རེད། ཟླ་བ་ ༡ པོ་ནས་ ༡༢ བར་བོད་མི་ ༨༥ ཙམ་གྱིས་གཅིག་རྗེས་གཉིས་མཐུད་དུ་རང་སྲེག་བྱས་པ་རེད། དེ་དག་ལས་ ༨༤ བོད་ནང་གི་བོད་མི་རེད། མི་ ༡ བོད་ནས་རྒྱ་གར་ནང་བཙན་བྱོལ་ལ་སོང་བའི་གྲས་རེད།
དོན་དམ་དུ། ལོ་དེའི་ནང་ཟླ་རེར་འཆར་ཅན་ལྟར་རང་སྲེག་གི་མེ་ལྕེ་མཆེད་པ་རེད། ལྷག་པར་དུ་ཟླ་བ་ ༡༡ པའི་ནང་གྲངས་ཀ་ཆེས་མཐོ་ཤོས་རེད། བོད་མི་གཅེན་གཅུང་ ༢༨ ལས་གྲྭ་བཙུན་ཁོ་ན་ཙམ་མ་རེད། མང་ཆེ་བ་འབྲོག་པ་རེད། དེ་མིན་ཟླ་བ་ ༣ པའི་ནང་བོད་མི་ ༡༡ ཁྲོད་ ༦ དགེ་འདུན་པ་རེད། ད་དུང་སློབ་འབྲིང་སློབ་མ་དང་ཕྲུ་གུའི་ཨ་མ་བཅས་ཡོད། ཅིའི་ཕྱིར་དུ་ཟླ་བ་འདི་གཉིས་ནང་རང་སྲེག་ཁ་གྲངས་རྩེ་མོར་སོན་པ་རེད་དམ། དེ་ནི་( ཚོར་རྣོན་ཟླ་བ ) འཁེལ་བས་རེད་ལ། ཚིག་བརྗོད་འདི་མིག་སྔའི་རྒྱ་ནག་ཏུ་དར་ཁྱབ་ཆེ་བའི་ཤོད་སྲོལ་ཞིག་རེད།
གསལ་པོ་བཤད་ན། ཟླ་བ་ ༣ པ་ནི་བོད་ཀྱི་ལོ་རྒྱུས་ནང་ཆེས་ཚོར་བ་རྣོ་བའི་ཟླ་བ་རེད། ཟླ་བ་ ༣ པའི་ཚེས་ ༥ ནི་ཕྱི་ལོ་ ༡༩༨༩ ལོར་ལྷ་སར་གྱེན་ལངས་ངོ་རྒོལ་བར་དྲག་གནོན་བྱས་པའི་དུས་དྲན་ཉིན་མོ་རེད། ཟླ་བ་ ༣ པའི་ཚེས་ ༡༠ ནི་ཕྱི་ལོ་ ༡༩༥༩ ལོར་བོད༌ཀྱི་གྱེན་ལངས་ངོ་རྒོལ་དུས་དྲན་ཉིན་མོ་རེད། ཟླ་བ་ ༣ པའི་ཚེས་ ༡༤ ནི་ཕྱི་ལོ་ ༢༠༠༨ ལོར་བོད་ཀྱི་ངོ་རྒོལ་ཉིན་མོ་དང་། ཟླ་བ་ ༣ པའི་ཚེས་ ༡༦ ནི་རྔ་པ་རྫོང་ངོ་རྒོལ་མི་དམངས་ཚོར་མེ་མདའ་བརྒྱབ་པའི་དུས་དྲན་ཉིན་མོ་རེད། ཟླ་བ་ ༣ པའི་ཚེས་ ༢༨ ནི་ཕྱི་ལོ་ ༢༠༠༩ ལོར་རྒྱ༌ནག་གུང་ཁྲན་གྱིས་གཏན་པ་ཕབ་པའི་ཡར་ལངས་ཞིང་བྲན་བཅིངས་འགྲོལ་ཐོབ་པའི་ཉིན་མོ་རེད་ཟེར། མི་ལོ་བཅུ་ཕྲག་མང་པོའི་རིང་གི་ལོ་རེའི་ཟླ་བ་ ༣ པའི་ནང་དབང་སྒྱུར་བ་ཚོས་ཚབས་ཆེའི་དགྲ་བོ་ཞིག་གདོང་གཏོད་དགོས་ཀྱི་ཡོད་ལ་ལྟར་བྱེད་ལ། དབང་སྒྱུར་ཕོག་སའི་ངོས་ནས་ངོ་རྒོལ་བྱེད་པ་ཕུད། ཚོར་བ་རྣོ་བའི་ཟླ་ངོ་དེ་ཡང་གདོང་ལེན་བྱ་དགོས་ཀྱི་ཡོད།
དེ་མིན་ཡང་། ཟླ་བ་ ༡༡ ནི་རྒྱ་གུང་ཁྲན་པའི་ཚོགས་ཆེན་བཅོ་བརྒྱད་དང་འབྲེལ་བ་ཡོད་པ་རེད་ལ། ཚོགས་ཆེན་བཅོ་བརྒྱད་པའི་སྔ་ཉིན་དང་། ཉིན་བདུན་གྱི་ཚོགས་ཆེན་རིང་བོད་ས་རུ་ཉིན་ལྟར་རང་སྲེག་བྱེད་མཁན་བྱུང་ཡོད། ཐ་ན། མི་ ༩ ཡིས་རང་སྲེག་བྱས་ཏེ་མཐོ་ཚད་ཅན་གྱི་གྲངས་ཀ་འདི་ཟིན་པ་རེད། འདིས་གསལ་པོར་མཚོན་པ་ནི་བོད་མིའི་རང་སྲེག་འདི་ཆབ་སྲིད་ངོ་རྒོལ་ཞིག་ཡིན་པ་བསྟན་པ་རེད། རྒྱ་གུང་ཁྲན་ཚང་གི་བརྒྱུད་ལམ་ནས་ཚོགས་ཆེན་བཅོ་བརྒྱད་སྐོར་ལས་བོད་མིའི་རང་སྲེག་གནད་དོན་གཡོལ་བ་རེད། དེ་ལས་ལྡོག་སྟེ་བཙན་བྱོལ་བོད་མི་ཚོས་ཟླ་བ་ ༩ པའི་ནང་ངྷ་སར་ཚོགས་པའི་དམིགས་བསལ་ཚོགས་ཆེན་ཐེངས་གཉིས་པ་དང་འབྲེལ་བ་ཡོད་པ་བཤད་ལ། ད་དུང་ངན་ཇུས་ཉེས་འགེལ་གྱིས་བར་མ་ཆད་པའི་བོད་མིའི་རང་སྲེག་འདི་ཏཱ་ལའི་རུ་ཚོགས་ཀྱིས་ཇུས་འགོད་ངན་སྐུལ་བྱས་སོང་ཡང་ཟེར།
མ་ཟད། རྒྱ་གུང་ཁྲན་གྱི་མཐོ་རིམ་བོད་དཔོན་ནས་གསར་འགོད་གསལ་བསྒྲགས་སྐབས་ངོ་ཚ་མེད་པའི་སྒོ་ནས་སྐྱག་རྫུན་བཤད་རྒྱུར། མི་རྣམས་ཀྱིས( ཤིས་ཙང )འབར་བཞིན་ཡོད་པ་རེད་ཟེར། ངས་ནི( ཤིས་ཙང )འབར་གྱི་ཡོད་པ་མ་རེད་ལབ་ཀྱི་ཡོད། (ཤིས་ཙང)དུ་རང་སྲེག་ཐེངས་ཤིག་བྱུང་བ་དེའང་དཔེ་མཚོན་ཅན་གྱི་ཕྱི་མི་ནང་འཛུལ་རང་སྲེག་རེད་ཟེར། འདི་ནི་དོན་དངོས་འཁྱོག་བརྗོད་དང་གཡོ་སྒྱུ་ཆེ་བའི་འབྲུ་རྩེད་རེད་དམ། དོན་དམ་དུ་ཤིས་ཙང་ཟེར་བ་འདི་ནི་བོད་མདོ་དབུས་ཁམས་གསུམ་ས་ཁུལ་ཡོངས་རྫོགས་ཀྱི་ས་མིང་ཡིན་པ་འདིར། རྒྱ་ཁྱོན་ཧ་ཅང་ཆུང་དུ་བཏང་ནས་ད་ལྟའི་བོད་རང་སྐྱོང་ལྗོངས་ཟེར་བ་དེ་ཁོ་ནར་བོས་པ་རེད། ཁོའི་བརྗོད་དོན་ལྟར་ན། བོད་ཀྱི་ས་ཁུལ་གཞན་དུ་ལྷག་པའི་རང་སྲེག་དོན་རྐྱེན་རྣམས་རྩིས་རྒྱག་མི་དགོས་ཟེར་བ་དང་། སྤྱིར་རང་སྲེག་དོན་རྐྱེན་དེ་འདྲའི་མང་པོ་ལྷག་ཡོད་ནའང་ང་ཚོའི་བོད་རང་སྐྱོང་ལྗོངས་དང་འབྲེལ་བ་ཅི་ཡོད་ཟེར་བ་རེད། རེད་དེ། དོན་དམ་དུ་བོད་རང་སྐྱོང་ལྗོངས་གཅིག་པུའི་ནང་དུའང་རང་སྲེག་དོན་རྐྱེན་ཐེངས་ ༨ ལྷག་པ་རེད། དེའི་ཁྲོད་ ༦ ནི་ཆབ་མདོ་རྫོང་དང་། འདམ་གཞུང་རྫོང་། འབྲི་རུ་རྫོང་བཅས་ཀྱི་ཞིང་འབྲོག་མི་སེར་ཆགས་ཡོད།
རང་དབང་འཐབ་རྩོད་བྱེད་པའི་དབྱིན་ཡིག་གླུ་གཞས་ཤིག་ལོ་མང་དར་ཁྱབ་སོང་བ་སྟེ། དེའང་བོད་འབར་གྱིན་ཡོད་ཅེས་པ་འདིའི་སྐོར་རེད། དེའི་ཚིག་དོན་ལས། ཁྱོད་ཀྱིས་བཞུ་མར་གསོད་ཐུབ་མོད། འོན་ཏེ་ཁྱོད་ཀྱིས་མེ་ལྕེ་གསོད་མི་ཐུབ། མེ་ལྕེ་གྱེན་དུ་འབར་བའི་ཚེ། རླུང་བུས་ཅི་ཙམ་དེད་ཀྱང་འབར་ཤུགས་ལྷག་པར་ཆེ་ཟེར་བ་ལྟར་རོ།།
ཡིན་ནའང་ང་རང་གི་ངོས་ནས་བཤད་ན། ད་ལྟའི་བར་རང་སྲེག་དོན་རྐྱེན་ཐེངས་ ༩༧ ལྷག་བྱུང་ཡུལ་གྱི་རྔ་པ་རྫོང་དང་། འབར་ཁམས་རྫོང་། མཛོད་དགེ་རྫོང་། འཛམ་ཐང་རྫོང་། རྟའུ་རྫོང་། དཀར་མཛེས་རྫོང་། དར་མདོ་རྫོང་། གསེར་རྟ་རྫོང་། ལྷ་ས། ནག་ཆུ། འདམ་གཞུང་རྫོང་། ཆབ་མདོ་རྫོང་། འབྲི་རུ་རྫོང་། དར་ལག་རྫོང་། པད་མ་རྫོང་། རེབ་གོང་རྫོང་། གཅན་ཚ་རྫོང་། རྩེ་ཁོག་རྫོང་། ཡུལ་ཤུལ་རྫོང་། ཁྲི་འདུ་རྫོང་། ཐེམ་ཆེན་རྫོང་། ཡ་རྫི་རྫོང་། ཆིག་སྒྲིལ་རྫོང་། བསང་ཆུ་རྫོང་། རྨ་ཆུ་རྫོང་། ཀླུ་ཆུ་རྫོང་བཅས་ལས་ས་ཁུལ་གསུམ་བཞི་ཞིག་འགྲོ་མྱོང་མེད། འགྲོ་མྱོང་བའི་ས་ཆ་དེ་དག་ཏུ་འགྲོག་འདྲིས་ཀྱི་གྲོགས་པོ་ཡོད། མ་གཞི་ང་དང་ངོ་ཤེས་མིན་པའི་དབང་དུ་བཏང་ནའང་འཕྲད་མ་ཐག་མཛའ་བཤེས་ལྟ་བུའི་ཚོར་སྣང་སྐྱེ་ཡོང་གི་ཡོད། དེས་རྐྱེན་པས་སེམས་སྡུག་དཔེ་མེད་ཆེ། ངས་བྱེད་ཐུབ་པ་གཅིག་རང་ཡོད་པ་ནི། རང་སྲེག་བྱ་མཁན་མི་རེ་ངོ་རེ་ཟིན་ཐོའི་ཡིག་ཐོག་ཏུ་འབེབས་རྒྱུ་དེ་རེད་ལ། རྡོ་ལ་རི་མོ་བརྐོས་པ་ལྟར་མི་བརྗེད་པ་བྱ་དགོས།
ལོ་འདིའི་ནང་གནས་ཚུལ་ཧ་ཅང་མང་པོ་ལྷག་པ་རེད། དཔེར་ན། བོད་ཀྱི་རྩོམ་པ་པོ་མང་པོ་ཞིག་གིས་དྲག་གནོན་བྱེད་མཁན་གྱི་གདོང་རིས་ཐེར་འདོན་བྱས་པས་འཛིན་བཟུང་ཐེབས་པ་དང་། ཁྲིམས་གཅོད་བྱས་པ། གར་སོང་ཆ་མེད་དུ་བཏང་བ་རེད། དེ་དག་ནི་སྐལ་བཟང་ཚུལ་ཁྲིམས། (རྨ་ཆུ་རྫོང་གི་མི) གངས་སྐྱེས་སྦྱིན་པ་སྐྱབས (གསེར་རྟ་རྫོང་གི་མི ) ཟླ་བ་རྡོ་རྗེ (འབྲི་རུ་རྫོང་གི་མི) ཚེ་རིང་ནོར་བུ (དཔལ་ཡུལ་རྫོང་གི་མི) སོགས་དང་། ད་དུང་དམངས་ཁྲོད་སྒྱུ་རྩལ་པ་མང་དག་ཅིག་གིས་བོད་མིའི་སེམས་ནང་གི་སྐད་ཆ་ཕྱིར་ཕྱུང་བའི་སྟབས་ཀྱིས་འཛིན་བཟུང་བྱས་པ་དང་ཁྲིམས་ཐག་བཅད་པ། ཡང་ན་བོར་བརླགས་སོང་བ་བཅས་རེད། དེ་དག་ལས་ཆོས་མགོན། (འཇོ་མདའ་རྫོང་གི་མི) ཨ་གྲགས (ལི་ཐང་རྫོང་གི་མི) ཨོ་རྒྱན་བསྟན་འཛིན། (ནང་ཆེན་རྫོང་གི་མི) བློ་བློ (ཡུལ་ཤུལ་རྫོང་གི་མི) ཕུལ་བྱུང་། (དམར་ཐང་གི་མི) མཆོག་གསལ། (འབྲི་རུ་རྫོང་གི་མི) སོག་ཕྲུག་ཤེས་རབ། (མཚོ་སྔོན་སོག་རྫོང་གི་མི) བཅས་རེད།
དེ་ལས་མང་བའི་བོད་ཀྱི་ས་ཁུལ་སོ་སོ་ན་ཤུགས་རྐྱེན་ཡོད་པའི་སྐྱེས་ཆེན་བླ་མ་དང་དགེ་འདུན་པ། བཙུན་མ་སོགས་འཛིན་བཟུང་བྱས་པ་དང་བོར་བརླགས་ཕྱིན་པ། དཔེར་ན། བསང་ཆུ་རྫོང་བླ་བྲང་དགོན་པའི་གྲྭ་འཇིགས་མེད། གྲྭ་མགོ་ལོག་འཇིགས་མེད། ཆབ་མདོ་ཀརྨ་དགོན་པའི་མཁན་པོ་བློ་གྲོས་རབ་གསལ། མཁན་པོ་རྣམ་སྲས་བསོད་ནམས། དཀར་མཛེས་རྫོང་གི་བཙུན་མ་འཆི་མེད། དེ་བཞིན། ལྷ་ས་འབྲས་སྤུངས་དགོན་པའི་དགེ་འདུན་པ་མང་པོ་བཅས་ཡོད་པ་རེད། ངོ་མ་བྲིས་ན་མིང་ཐོ་འདི་ཚོ་ཧ་ཅང་རིང་པོ་རིང་པོ་ཆགས་རྒྱུ་རེད།
བོད་ལ་སྐད་ཆ་འདི་འདྲ་ཞིག་ཡོད། དེའི་མིང་ལ་སྙིང་གི་རུས་པ་ཟེར། གོང་དུ་བརྗོད་མ་ཐག་པའི་བོད་ཀྱི་མི་འདི་དག་ཡོངས་སུ་རྫོགས་པ་གངས་ལྗོངས་ས་མཐོའི་སྙིང་གི་རུས་པ་རྐྱང་རྐྱང་རེད། དེས་ན། དཀའ་སྡུག་ཅན་གྱི་བོད་འདིའི་ལས་དབང་བརྗེད་ཐབས་ག་ལ་ཡོད།
༢༠༡༣ ། ༡ ། ༡
