ཤར་ཕྱོགས་ཁུག་རྟ།
༄༅།། ཤེས་རིག་ལས་ཁུངས་ནས་གོ་སྒྲིག་ཞུས་པའི་འཚོགས་མ་ཐག་པའི་བོད་རིགས་དགེ་རྒན་གྱི་ཚོགས་ཆེན་ཐེངས་དང་པོའི་ཚོགས་ཆུང་རེ་རེའི་སྙན་ཐོ་སོགས་མིག་སོན་མ་བྱུང་ཡང་། དུས་བབ་གསར་འགོད་པས་གནད་འགག་ལ་དོ་འཁུར་ཆེན་པོས་ཚོགས་ཆེན་དང་པོའི་གནས་ཚུལ་སྐོར་གསར་འགྱུར་འཐུས་ཚང་གསུམ་བཟོས་པ་དེར་ལྟ་སྐབས། བཙན་བྱོལ་བོད་མིའི་ཤེས་རིག་གི་གཞུང་ལམ་ཉིད་ནི་གཏན་འབེབས་གྲུབ་པའི་ཤེས་ཡོན་སྲིད་བྱུས་གསར་པར་ཕལ་ཆེར་སྤྱི་མོས་ཡོད་པ་འདྲ་བའི་ཚོར་སྣང་བྱུང་། ལྷག་དོན་ཚོགས་ཆུང་རེ་རེའི་ཚོགས་གཙོ་རྣམས་ཀྱི་ལན་འདེབས་ལ་བལྟས་ན་ཤེས་རིག་གི་སྲོག་འཛིན་དགེ་རྒན་རྣམས་པ་དེ་བས་ཀྱང་སྲིད་བྱུས་དེར་མོས་མཐུན་ཡོད་པ་དངོས་ར་གསལ་འཕྲོད་བྱུང་།
ཁོ་བོར་མཚོན་ན་སྔ་མོ་ནས་ཤེས་ཡོན་སྲིད་བྱུས་ལ་རྒྱུས་མངའ་བྱས་པའི་དུས་རིམ་ནང་། ཤེས་ཡོན་སྲིད་བྱུས་ལག་བསྟར་དང་འབྲེལ་བའི་གནས་ཚུལ་ཆེ་ཕྲ་མང་པོར་ཉན་ཞིབ་བྱེད་སྐལ་བྱུང་བ་ནི་བཙན་བྱོལ་བོད་མིའི་བོད་ཀྱི་ཤེས་རིག་མདུན་ལམ་དང་། ཉམས་ང་བའི་སྐད་ཡིག་གི་གནས་བབ་ཅུང་ཙམ་གོམ་པ་མདུན་བསྐྱོད་བྱས་ན་བསམས་པ་དེ་ཡིན་པས། རྒྱལ་ཡོངས་ཚོགས་ཆེན་ཐེངས་དང་པོའི་སྐབས་ཤེས་རིག་བཀའ་བློན་ཐུབ་བསྟན་ལུང་རིགས་དང་། བོད་ཁྱིམ་དབུ་འཛིན་ཚེ་དབང་ཡིེ་ཤེས་གཉིས་ལ་ཤེས་ཡོན་སྲིད་བྱུས་ལག་བསྟར་ཐད་འཕྲད་པའི་དཀའ་ངལ་མཐའ་དག་སྦ་གསང་མེད་པར་གསུངས་དགོས་པའི་དྲི་བ་བཏོན་པ་ཡིན། དྲི་བ་དེ་ཚོགས་ཆུང་གི་ཚོགས་གཙོས་ངོས་ལེན་དང་ཚོགས་མི་རྣམས་ཀྱི་སྤྱི་མོས་འོག་བརྙན་འཕྲིན་ལའང་ཕབས་ཐུབ་པ་བྱུང་། ༼ བརྙན་འཕྲིན་མི་མང་ནང་བཀྲམས་ཐུབ་མེད། ༽ངའི་འཁྲིས་སུ་ཡོད་པའི་སམ་བྷོ་ཊའི་སྤྱི་ཁྱབ་དབུ་འཛིན་ཀརྨ་ཆུང་བདག་མཆོག་གིས་སྲིད་བྱུས་ལག་ལེན་གྱི་ཉམས་མྱོང་རང་སྟེང་ནས་ཕྱོགས་སྟོན་བྱས་པའི་སྙིང་དོན་རྣམས། སྐབས་དེར་ཚགས་ཤོག་སོགས་སུ་དྲིལ་བསྒྲགས་དང་རྩོམ་ཡིག་གི་ལམ་ནས་བསམ་ཚུལ་ཤུགས་ཆེར་སྤེལ་ཡོད།
ཤེས་ཡོན་སྲིད་བྱུས་ཡོངས་སུ་ལག་བསྟར་འབྱུང་མིན་གྱི་གནས་ཚུལ་ལ་ཞིབ་འཇུག་བྱས་པ་ཡིན་ན། ཕྱི་ལྤགས་ཙམ་ལ་ཆ་འཇོག་བྱེད་པའི་བཙན་བྱོལ་སྤྱི་ཚོགས་ནང་གི་རིན་ཐང་ངོས་འཛིན་གྱི་གླེན་གཤིས་དེ་མཐོང་ངེས་པ་རེད། ཉེ་སྔོན་བརྒྱུད་ལམ་ཞིག་ནས་ཉི་མ་ཁ་དཀར་ངོ་དཀར་ལ་བོད་ཕྱི་ནང་གཉིས་སུ་སྐུའི་གཅུང་མོའི་མི་ལོ་ ༤༠ ལྷག་གི་སློབ་གསོའི་ལས་དོན་ཞེས་འུར་བསྟོད་ཚད་ལས་བརྒལ་བ་བྱས་སོང་། ཤེས་ཡོན་སྲིད་བྱུས་ལག་བསྟར་དང་ཁྱད་པར་དུ་བོད་ཀྱི་རིག་གནས་སློབ་ཕྲུག་གི་སེམས་ལ་འཇགས་ཐུབ་ཀྱི་སློབ་གསོའི་ལམ་སྲོལ་དང་ལྷག་བསམ་གང་ཐད་ནས་ཞུས་ཀྱང་། རྗེ་བཙུན་པད་མར་དེ་འདྲའི་འུར་བསྟོད་ཅིག་འབབ་ཀྱི་མེད་པ་ལོང་པས་བལྟས་ཀྱང་རྒྱལ་ཁམས་ཀྱི་དཔེ་ལ་སོང་གཤིས། རང་དབང་ལྡན་པའི་དགེ་རྒན་ཚོགས་ཆེན་གྱི་རྣམ་པ་འདིས་མི་ལོ་མང་པོའི་རིང་འཁྱོག་ལམ་དུ་སོང་བའི་བཙན་བྱོལ་བོད་མིའི་ཤེས་རིག་གི་མདུན་ལམ་ལ་རེ་བ་ཅུང་ཙམ་འབུས་སྲིད་པ་འདྲ། ང་ཚོས་སྦ་གསང་དང་འཛེམ་དོགས་མེད་པར་སྐད་ཆ་ཞིག་བཤད་དགོས་དབང་དུ་བཏང་ན། སྐུའི་གཅུང་མོ་དང་དེའི་འོག་གི་བོད་ཁྱིམ་འགན་འཛིན་ལྷན་ཚོགས་ལ་ཤེས་ཡོན་སྲིད་བྱུས་ལག་བསྟར་བྱེད་འདོད་མེད་པའི་རྣམ་འགྱུར་ཙམ་ལ་ནག་འདེད་བྱེད་རྒྱུ་མིན་པར། བོད་ཁྱིམ་སློབ་གྲྭ་རང་ཉིད་ཀྱི་སྒྲོམ་གཞིར་འགྱུར་བ་བཏང་སྟེ་ཤེས་རིག་ལས་ཁུངས་ཀྱི་སྟངས་འཛིན་འོག ཁྲིམས་ཀྱིས་བསྒྱུར་བའི་སློབ་གསོའི་མ་ལག་ཚད་ལྡན་ཅན་གྱི་སློབ་གླིང་ཞིག་ཏུ་བསྒྱུར་དགོས་པ་བཙན་བྱོལ་སྤྱི་ཚོགས་ནང་གི་གསར་བརྗེ་བྱེད་ཡུལ་གཙོ་བོ་གཅིག་རེད་ཅེས་བཤད་ཆོག་པ་འདི་རེད།
ད་ལྟ་མེས་དབོན་གཙུག་ལག་དཔེ་སྟོན་སློབ་གྲྭ་ཙམ་དུ་མ་ཟད་སམ་བྷོ་ཊའི་ཁྱབ་ཁོངས་ཡོངས་ལ་ཤེས་ཡོན་སྲིད་བྱུས་ལག་བསྟར་བྱས་པའི་ཉམས་མྱོང་ནི། རེ་བ་ཙམ་མིན་པར་མཐོང་བ་མངོན་གྱུར་གྱིས་བཙན་བྱོལ་ནང་གི་བོད་སྐད་ཡིག་ལ་ལྗང་མདོག་རྒྱས་བཞིན་པ་རེད། ཡིན་ནའང་། སློབ་དེབ་སྒྲིག་སྟངས་ནི་ད་དུང་རྗེས་ལུས་ཀྱི་རྣམ་པར་ལུས་ཡོད། སློབ་ཕྲུག་རྣམས་ལ་སློབ་གསོའི་རིམ་པ་གསུམ་ལྡན་གྱི་སློབ་དེབ་བཀོད་སྒྲིག་བྱེད་ཐུབ་མེད་པ་ནི་མིའི་དཀའ་ངལ་ཀྱང་ཡིན་སྲིད། ང་ཚོའི་བུ་གུ་ཚོར་སློབ་གྲྭར་འབྱོར་ཉིན་ནས་རང་ཉིད་མི་ཡིན་པ་དང་། བོད་མི་ཡིན་པ་སློབ་ཀྱི་མེད་པར། རང་ཉིད་ཆོས་པ་ཡིན་པར་སློབ་ཀྱི་ཡོད་པས། རང་ཉིད་མི་ཡིན་པ་དང་མི་ཐུན་མོང་གི་རིན་ཐང་གི་འདུ་ཤེས་ཡག་པོ་ཞིག་རྙེད་མེད་ཁར། བོད་མི་ཡིན་པ་དང་བོད་མི་ཡིན་པའི་རྒྱུ་མཚན་ཡིད་བཅངས་ཀྱི་ལར་ཞེན་ཡང་ལྡོག་ཏུ་མེད་པ་ཞིག་ཅི་ལྟར་རྙེད། དེ་བཞིན་བོད་མི་ཡིན་པའི་ཁྱད་ཆོས་སྒྲུབ་ཐུབ་པ་དང་གཞན་གྱི་ཤེས་རིག་སློབ་པའི་གོམ་པ་གསུམ་པ་དེ་དེ་བས་ཀྱང་འཐུས་ཚང་ཞིག་མེད་པས། སྤྱི་ཡོངས་ནས་ཞུས་ན་སྐར་ལྔའི་དར་དམར་འོག་གི་བོད་མི་ཚོར་ཤིན་ཏུ་ནས་ངོ་ནོངས་དགོས་པ་ཞིག་ཆགས་ཡོད་པ་ནི་ཞོར་འཕྲོས་ཙམ་ཡིན།
བཙན་བྱོལ་སྤྱི་ཚོགས་ལ་དམངས་གཙོའི་ཕྱི་ལྤགས་ལ་དགའ་མདོག་བྱེད་པ་ལས་ཀྱང་གལ་ཆེ་བ་ནི། བོད་མིའི་ངོ་རྟགས་སྲུང་འཛིན་དང་གོམས་གཤིས་རྒྱུད་འཛིན་བྱེད་པ་དེ་རེད། ང་ཚོར་ཤེས་ཡོན་སྲིད་བྱུས་མེད་པ་ནས་ཡོད་པར་གྱུར་ཀྱང་། ཚོགས་སྒེར་སུས་ཀྱང་འདིའི་ཐད་རང་ཁེ་དོར་བའི་གཅེས་སྤྲས་ཤིག་བྱེད་ཐུབ་ཀྱི་མེད་པ་ནི། ཤེས་ཡོན་སྲིད་བྱུས་ལག་ལེན་ཐད་སྐུའི་གཅུང་མོར་དེའི་འོག་གི་འགན་འཛིན་ལྷན་ཚོགས་ནས་ངར་ཤུགས་བླུགས་ཏེ། བཀའ་ཤག་ཏུ་ཆེད་ཕེབས་ཀྱིས་སྐད་གསེང་མཐོན་པོས་”ཤེས་ཡོན་སྲིད་བྱུས་ལག་ལེན་བསྟར་གྱི་མིན་”ཞེས་པའི་རྣམ་འགྱུར་འདི་ལྟ་བུའི་མཚོན་མི་ཐུབ་པ་ག་ལ་སྲིད།
ཤེས་ཡོན་སྲིད་བྱུས་ལ་དགག་གཞག་ཚ་ནན་གྱིས་རིག་པའི་ལམ་ནས་ལག་བསྟར་དོན་འཁྱོལ་མི་ཡོང་བའི་རྒྱུ་མཚན་འདྲེན་པ་ནི། དངོས་གནས་སློབ་གསོའི་མངའ་བདག་ཏུ་གྱུར་བའི་ཕ་མ་ཞིག་གི་གནང་སྟངས་ཡིན་ཡང་། དཀའ་ངལ་ཆུང་ཙག་མ་གཏོགས་དེ་འདྲ་ཡོང་རེ་མེད་པ་ནི་གཏན་འབེབས་བརྒྱུད་རིམ་ཐེངས་ ༡༥ རིང་རྣམ་དཔྱོད་རྩལ་དཀྲུགས་ཀྱི་བྱུང་བས་གསལ་ཁ་བྱས་འདུག་བསམས། ད་ལྟ་མཁས་དབང་ལྷན་ཚོགས་འཚོགས་ན་འདྲ། དབུ་འཛིན་ལྷན་ཚོགས་འཚོགས་ན་འདྲ། དེ་བཞིན་དགེ་རྒན་ལྷན་ཚོགས་འཚོགས་ནའང་། ཤེས་རིག་ལས་ཁུངས་ཀྱིས་གསལ་སྟོན་ཐུབ་དགོས་པ་ཞིག་ནི། བཙན་བྱོལ་བོད་མིའི་ཤེས་རིག་མདུན་ལམ་ཐད་དགེ་ལས་སློབ་ཕྲུག་ཚོར་རང་དབང་གིས་བསམ་འཆར་བཤད་ཆོག་པའི་ཁོར་ཡུག་ཅིག་དང་། ཁོང་ཚོར་དབང་བསྒྱུར་གྲལ་རིམ་གྱི་བསྟི་གནས་མིན་པར་སློབ་གྲྭ་རང་སྟེང་གི་ཁྱད་ཆོས་རྫོགས་པ་ཞིག སེམས་ཚོར་དང་དངོས་ཡོད་གཉིས་ཀར་གང་མགྱོགས་བསྐྲུན་རྒྱུ་ནི་གལ་ཆེར་འདོད་ཅིང་། བཙན་བྱོལ་བོད་མིའི་ཤེས་རིག་མདུན་ལམ་ནི་རྒྱུ་མཚན་རང་སྟེང་ནས་ཐག་གིས་གཅོད་རྒྱུ་མ་གཏོགས། གང་ཟག་འཚོ་ཐབས་རུ་ཁག་གི་དམངས་གཙོ་བེད་སྤྱོད་ཀྱི་བརྒྱུད་ལམ་རྫུན་མས་ཐག་གཅོད་གནང་མི་ཉན་པ་དེ་རེད་ལ། དེ་ནི་བཀའ་ཤག་གི་ལྟ་གྲུབ་ནང་གི་ཐབས་ལམ་གསར་པ་གཙོ་བོ་ཡིན་པའི་གསར་གཏོད་ཀྱི་གྲས་སུའང་ཚུད་པ་ཡིན།
སྐབས་འདིར་ཡིད་ཧ་ཅང་མུག་པ་ཞིག་ནི་བཙན་བྱོལ་བོད་མིའི་ཤེས་རིག་དང་སྐད་ཡིག་གི་མདུན་ལམ་ཆེད་ད་བར་ངོ་རྒོལ་བྱེད་མཁན་གཅིག་ཀྱང་མ་བྱུང་བ་དེ་རེད་ལ། ཐ་ན་ཤེས་ཡོན་སྲིད་བྱུས་ལག་བསྟར་མི་བྱེད་པའི་ཧམ་ཤེད་ལ་ཤེས་ལྡན་པ་གཅིག་གིས་ཀྱང་ངོ་རྒོལ་བྱེད་ཐུབ་ཀྱི་མེད་པ་ནི། ང་ཚོའི་སྤྱི་ཚོགས་ནང་བྲན་གཡོག་གི་བསམ་གཤིས་ཡོད་པ་དང་། རང་མི་རིགས་ཀྱི་འཚོ་ཐབས་ལ་ལས་དོན་ཅི་ལྟར་བྱེད་དགོས་པའི་སྤོབས་པ་དང་ཤེས་ཚད་གཉིས་ཀྱིས་མ་འདང་བ། ༧གོང་ས་སྐྱབས་མགོན་ཆེན་པོ་དང་བོད་མི་དཀྱུས་མའི་བར་རྒྱང་ཐག་ཧ་ཅང་རིང་བོ་ཡོད་པ་མཚོན་པ་མ་ཟད། དབུ་ལས་རྣམས་ཀྱིས་བོད་མི་དཀྱུས་མ་ཚོ་དང་བུ་རབས་ཚ་བརྒྱུད་ལ་ཅི་ཙམ་ཤ་ཚ་ཡོད་མེད་གསལ་བཤད་བྱས་འདུག་བསམས། ད་དུང་མུ་མཐུད་འདི་ལྟར་ཕྱིན་ན་འདིའི་མཇུག་འབྲས་ཀྱང་ཞེད་སྣང་ཚ་བོ་ཡོང་གི་རེད་ལ། བོད་ཀྱི་ཤེས་རིག་དང་སྐད་ཡིག་མི་གཙོ་བའི་བོད་མིའི་སྤྱི་ཚོགས་ཤིག་ལས་བོད་ཀྱི་ཤེས་རིག་དང་སྐད་ཡིག་གང་འཚམ་བསླབ་ཆོག་ལ། དེའི་ཁོར་ཡུག་ཀྱང་ཡོད་པའི་སྤྱི་ཚོགས་ཤིག་བདམས་ངེས་པ་ནི་བོད་ཀྱི་རྣམ་ཤེས་ཡོད་པའི་མི་རབས་གསར་པ་ཚོའི་ཕུགས་བསམ་རེད་འདོད།།
༢༠༡༣། ༡། ༩།། བཙན་བྱོལ་བོད་རིགས་དགེ་རྒན་ཚོར་བོད་ཀྱི་ཤེས་རིག་མདུན་ལམ་ཆེད་སྐད་ཆ་བཤད་རྒྱུའི་རང་དབང་ཐོབ་པའི་ཚོགས་ཆེན་ཐེངས་དང་པོར་ཡི་རངས་ཀྱི་ཚུལ་དུ་ཤར་མར་བགྱིས།།
ཁ་སང་ཁ་ཉིན་ཤར་ཕྱོགས་ཁུག་རྟའི་རྩོམ་ཡིག་ཅེས་ཤུབ་ཤུབ་གླེང་མོལ་བྱེད་པའི་དགེ་རྒན་ཁ་ཤས་ཀྱི་སྐད་སྒྲ་ཐོས། སྐབས་དེར་རྩོམ་ཡིག་འདི་བཀླགས་རྒྱུ་རེག་སོང། དངོས་གནས་བྱས་ན། བོད་ཁྱིམ་སློབ་གྲྭར་དགེ་རྒན་རྣམས་པར་སྨྲ་བརྗོད་རང་དབང་མེད་པ་དང། མང་ཆེ་བ་ལྟག་སྒོ་བརྒྱུད་དེ་སླེབས་པ་རྐྱང་རྐྱང་ཡིན། ཁོང་ཚོ་མང་དག་ཅིག་གིས་སྒང་ནས་ཅི་གསུངས་ལ་ལགས་སོ་ལགས་སོ་ཞུ་རྒྱུ་ལས། སློབ་ཕྲུག་གི་མདུན་ལམ་ཐད་སློབ་གསོའི་བཅོས་བསྒྱུར་གྱི་བསམ་ཚུལ་འདོན་མི་ཐུབ་ལ། འདོན་ཐུབ་རྒྱུའི་ཤེས་ཚད་མེད་པ་རྐྱང་རྐྱང་ཡིན་སྟབས་གོང་རིམ་བློ་བདེ་བོར་བཞུགས་ཡོད་པ་ད་ལྟའི་ཆར་ཚང་མས་གསལ་མཁྱེན་ལྟ་བུ་རེད། བོད་ཀྱི་རིག་གནས་དང་སློབ་གསོར་ཤ་ཚ་ཞིང་ཤེས་ཚན་ལྡན་པ་ཞིག་དགེ་རྒན་བྱེད་རྒྱུ་ཧ་ཅང་ཁག་པོ་ཡིན། དགེ་རྒན་བྱས་ནའང་ཡུན་རིང་གནས་ཐབས་མེད་པའི་ལོ་རྒྱུས་མང་པོ་བྱུང་ཚར་བ་རེད། དགེ་རྒན་ཚོས་སློབ་མ་ཚོ་འདི་ལྟར་ཕྱིན་ན་གཞི་རྩའི་ཆར་བོད་མི་རིགས་ཀྱིས་ཤེས་ཡོན་ཐད་ཁུངས་མི་འཁྱོལ་བ་ཤེས་ཀྱི་ཡོད། ཡིན་ནའང། བོད་ཁྱིམ་སློབ་གྲྭའི་འཛིན་རིམ་འཕར་རྒྱུའང་བཙན་འདེད་དང་མིང་ཙམ། རྫུན་བཟོ་རྐྱང་རྐྱང་གིས་སློབ་ཕྲུག་ལོ་ཁ་བཀང་ཐུབ་དང་གྲོད་ཁོག་ལ་ལྟོ་སྤྲད་པ་ཙམ་གཙོ་ཆེར་འཛིན་པ་ལས་གཞན་ཞེ་དྲག་འཇོན་གྱི་མེད་པ་གསལ་བོ་རེད། ངའི་གྲོགས་པོ་མང་དག་ཅིག་བོད་ཁྱིམ་འགྲིམས་པའི་བཙན་བྱོལ་ནང་སྐྱེ་བའི་ཕོ་མོ་རྣམས་ཡིན། ཁོང་རྣམས་ལ་བོད་ཡིག་མ་ཤེས་པའི་ཐད་སྒྲུང་སྙན་མོ་ཞིག་བཤད་ཡ་ཡོད། བོད་ཡིག་བསླབ་དུས་ཁོང་ཚོར་འབྲི་ཀློག་གཉིས་ལ་དཀའ་ལས་ཞེ་དྲག་བྱུང་གི་ཡོད་ཟེར། དགེ་རྒན་གྱིས་ཀྱང་ཉོབ་སྣང་དེས་བོད་ཡིག་གི་དང་བ་དེ་བས་ཀྱང་བརླག་འགྲོ་ཟེར། ཁོང་ཚོས་མཚམས་རེར་ནང་གི་ཕ་མར་ཡི་གེ་གཏོང་དགོས་ཟེར། ཡི་གེ་གཏོང་སྐབས། བཀའ་དྲིན་གཞལ་མཐའ་མེད་པའི་ཞེས་དགེ་རྒན་གྱིས་ནག་པང་སྟེང་འབྲི་ཡི་རེད་ཟེར། བྲིས་ནས་མཇུག་ཏུ་སླེབས་མཚམས་རང་རང་གི་མིང་འབྲི་སར་དགེ་རྒན་གྱིས་རང་མིང་འབྲི་རྒྱུ་ནོར་ཡོད་མེད་རེ་རེ་བཞིན་ཞིབ་ལྟ་བྱེད་ཀྱི་རེད་ཟེར། ཉིན་གཅིག་སློབ་ཕྲུག་ཅིག་གིས བསྐུར་མཁན་གྱི་མིང་འབྲི་སར་དགེ་རྒན་གྱིས་ནག་པང་སྟེང་བསྒྱུར་རྟགས་བྲིས་ཡོད་པ་དེ་ག་རང་བྲིས་པས་གཅར་རྡུང་རག་ཅེས་བཤད་སོང། ཁོང་ཚོས་དེང་སང་ཕྱིར་ལྟ་བྱེད་སྐབས། སྔོན་མའི་སློབ་དགེ་དགེ་བཤེས་དང་རྒན་པོ་དེ་ཚོ་བརྡ་སྤྲོད་དང་སུམ་རྟགས་ཡག་པོ་ཞིག་མཁྱེན་གྱི་ཡོད་ས་མ་རེད་ཟེར། ཀློག་པ་པོ་ཚོ་ང་ཚོ་འདི་ལྟར་མགོ་བསྐོར་དང་རྣམ་གཡེང། སྒྱུད་ལུགས་ཀྱི་དབང་དུ་ལོ་ངོ་མང་པོ་ཕྱིན་ཚར་བ་རེད། ད་དོན་དངོས་གོང་དུ་ཞབས་མཆན་པ་ཞིག་གིས་གསུངས་པ་ལྟར་བོད་མི་རིགས་འདི་སྐྱོབ་ཀྱི་ཡིན་ནམ་མིན་ཞེས་པ་དེ་བསམ་བློ་གཏོང་དགོས་པ་རེད་འདོད།།།
སྐད་ཆ་འདི་རིགས་ཁ་རྒྱགས་པའི་འོལ་ཚོད་དང་རྨོངས་གཏམ་གང་ཡང་མིན་པར་འགན་འཁུར་ཡོད་པའི་ཐོག་བཤད་ཀྱི་ཡོད་སྟབས། བློ་བཟང་བསྟན་འཛིན་རིན་པོ་ཆེར་ལན་འདེབས་ཞུ་འདོད་བྱུང།
༡ ངེད་ལ་དོགས་པ་ཡོད། དེའི་ཐད་༧གོང་ས་མཆོག་གིས་ཀྱང་ཨིན་བོད་གཉིས་ཀྱི་བསྐུར་ཡིག་ཚད་ལྡན་ཅིག་འབྲི་ཤེས་མཁན་དཀོན་ཚུལ་ཕེབས་པའི་བཀའ་སློབ་དེས་འཐུས་བར་སེམས།
༢ བྱས་ཙང། ང་འཐོམས་གཞི་དེ་རེད། གཅིག་བྱས་ན་བོད་ཀྱི་རིག་གནས་སོགས་ཀྱི་སྐོར་སློབ་སྦྱོང་མེད་པས་ཡིན་སྲིད། བཀའ་ཤག་སར་ཆེད་ཕེབས་གནང་སྐོར་བརྙན་འཕྲིན་ནང་ཤེས་རིག་བཀའ་བློན་གྱིས་གསུངས་པ་དེ་ངས་གཙང་ཉར་བྱས་ཡོད། ཤེས་རིག་བཀའ་བློན་ལ་རེ་འདུན་བཏོན་པ་བཞིན་ཧ་ཅང་ཞལ་གསང་པོ་གནང་ཡོད་པ་རེད། ངའི་ཚོགས་ཆུང་གི་ཚོགས་མི་ཚང་མར་ཧ་ཅང་ཞིབ་ཆ་ངེས་ཡོད་བསམས།
༣ ད་ལྟའི་ཆར་ངོ་ནོངས་དགོས་པ་ཞིག་ཡོད་པ་རེད་འདོད། དེ་ཁས་མི་ལེན་རང་ལེན་རེད།
དེ་ཙམ་ཞུ།།
རྣམ་པ་ཚོའི་ཚད་མཐོའི་བགྲོ་གླེང་གནང་སྟངས་ལ་དགའ་བསུ་ཡོད། དྲི་བར་ལན་འདེབས་ཞུ་ངེས་ཡིན།།
ད་དུང་༧གོང་ས་མཆོག་གིས་བསྟོད་པ་མི་ལ་གཏོང་དུ་ཆུགས། ནོར་འཁྲུལ་དང་འཐུས་ཤོར་ཉེན་ཚབས་ཆེ་རིགས་རང་གིས་བརྗོད་དགོས་ཞེས་བཀའ་ཕེབས་པ་དེ་དང་ཤིན་ཏུ་མཐུན།། གང་ལྟར་འདི་ནི་གསང་མི་ཐུབ་པའི་གསང་བ་རང་རེད་འདོད།
ཤར་ཕྱོགས་པར་དྲི་བ་འགའ་དང་བསམ་ཚུལ་ཞིག་ཡོད།
༡ བོད་ཁྱིམ་སློབ་གྲྭ་བོད་ཀྱི་སྐད་ཡིག་རིག་གནས་ཐད་བཀའ་དྲིན་ཆེན་པོ་རེད་དམ།
༢ སྐུའི་གཅུང་མོས་ཤེས་ཡོན་སྲིད་བྱུས་ལ་སྡང་ཟུག་བྱེད་དོན་ཅི་ཞིག་རེད།
བོད་ཁྱིམ་འགན་འཛིན་དཔུང་ཁག་གིས་རྗེ་བཙུན་པདྨ་དེ་ལྟར་བེད་སྤྱོད་གནང་བ་བདེན་པ་རེད་དམ།
༣ བཙན་བྱོལ་བོད་མི་ཚོར་སྐར་ལྔའི་དར་དམར་འོག་གི་བོད་མི་ཚོ་ངོ་ནོངས་མི་དགོས་པ་ཞིག་བྱེད་དགོས་པ་ན་དང་པོར་བོད་སྐད་ཡིག་རིག་གནས་ཐད་ཤོར་བའི་འཐུས་ཤོར་ཚབས་ཆེའི་ཆེད་དགོངས་སེལ་ཞུ་དགོས་སམ།
ངས་བལྟས་ན་ངེས་པར་དུ་དགོངས་སེལ་ཞུས་པའི་ཐོག་ནས། ད་ལྟའི་སློབ་གྲྭ་འདིའི་སྒེར་བདག་ཅན་ནམ་ཕྱོགས་ཁག་འཚོ་ཐབས་ཟེར་བའི་ལམ་སྲོལ་མེད་པར་བཟོས་ཏེ། སྤྱི་ཡོངས་ལ་བསྒྱུར་བཅོས་ཆེན་པོ་གཏོང་དགོས་པའི་ཤར་ཕྱོགས་པའི་དགོངས་ཚུལ་འདིར་རྒྱབ་སྐྱོར་བརྒྱ་ཆ་བརྒྱ་ཡོད།
ང་ཚོས་དོན་དམ་བོད་མི་རིགས་སྐྱོབ་དང་མི་སྐྱོབ་ཞེས་པ་གལ་ཆེན་རེད། དེ་གསལ་བོ་བཟོས་ན་མ་འོངས་པར་ག་རེ་བྱེད་དགོས་མིན་ཡང་གསལ་བོ་ཆགས་ཀྱི་རེད། སྤྱི་སྨན་རྣག་ཐོག་ཁབ་གཙགས་ཀྱི་གཏིང་ལོན་པའི་དགོངས་ཚུལ་རྒྱབ་སྐྱོར་ཡོད་ལགས།།
སྐུའི་གཅུང་མོ་རྗེ་བཙུན་པདྨར་ངོ་རྒོལ་བྱེད་དགོས་ཟེར། སྐར་ལྔའི་དར་དམར་འོག་ན་འོད་ཟེར་ཡོད་ཟེར། བོད་ཁྱིམ་སློབ་གྲྭའི་འགྲོ་སྟངས་ནི་བྲན་གཡོག་ལམ་ལུགས་རེད་ཟེར། བོད་ཁྱིམ་སློབ་གྲྭ་འདི་དབང་སྒྱུར་གྲལ་རིམ་མ་ཡིན་པ་ཞིག་ལ་བསྒྱུར་དགོས་ཟེར། ཤེས་ཡོན་པ་དག་གིས་བོད་ཁྱིམ་ལ་ངོ་རྒོལ་མི་བྱེད་པ་ནི་ང་ཚོའི་སྤྱི་ཚོགས་འདི་བྲན་གཡོག་ལམ་ལུགས་ཀྱི་འོན་ཡོད་རབས་ཟེར། དྲན་ཆེན་ལ་དྲིན་ལོག་རང་རེད།
དངོས་གནས་དྲང་གནས་བཙན་བྱོལ་ནང་བཅོས་བསྒྱུར་གཏོང་དགོས་པ་མང་པོ་ཡོད་པ་བདེན་པ་རེད། བོད་སྐད་ཡིག་དང་རིག་གནས་ཤེས་ཚད་ཀྱི་གནས་བབ་ཕལ་ཆེར་དགོན་པ་ཁག་མེད་ན་ཤི་ཚར་བ་རེད་ཅེས་ན་མི་འགྲིག་པ་མི་འདུག ད་ང་ཚོས་དངོས་གནས་དྲང་གནས་བོད་དོན་ལས་རྒྱུ་ཡིན་ནམ་མིན། བོད་ཀྱི་བུ་རབས་ཚ་རྒྱུད་ལ་བསམ་བློ་གཏོང་གི་ཡིན་དང་མིན། ༧གོང་ས་མཆོག་ཅེས་ལབ་དུས་ཐལ་མོ་སྦྱར་ལྕེ་ནར་ནར་བྱེད་པའི་འཁྲབ་སྟངས་དེ་བཞག་ནས། དྲང་པོ་དྲང་བཞག་དང་༧གོང་ས་མཆོག་གི་བཀའ་དགོངས་ཧུར་ཐད་འབད་ཐག་གིས་བརྩིས་ཏེ་ཅི་བཞིན་སྒྲུབ་ཀྱི་ཡིན་ནམ་མིན་ཞེས་པ་དེ་རེད་འདོད། ད་ང་ཚོ་དུས་ཚོད་མང་པོ་ཡོད་པ་མ་རེད། སྲིད་འགན་རྩིས་སྤྲོད་ལམ་ལྷོང་བྱུང་རྒྱུའི་དུས་ཡུན་འདི་ནི་བཙན་བྱོལ་བོད་མི་ཚོས་རང་ཁ་རང་གསོ་ཐུབ་མིན་གྱི་དུས་ཚོད་གནད་འགག་ཅན་ནམ། ཚོད་ལྟའི་དུས་ཚོད་ཅིག་རེད་འདོད། གལ་སྲིད་ད་དུང་ང་ཚོས་ལེགས་བཅོས་སྤྱི་ཕན་དོན་དམ་པ་ཞིག་མ་སྒྲུབ་ན་ཕལ་ཆེར་བཙན་བྱོལ་བོད་མི་ཚོ་སྐུ་ཚེ་རིང་པོ་མེད་པ་ནི་ཚོད་དཔག་ཐུབ་པ་ཞིག་རེད། དེས་ན་ཚང་མས་ལམ་ནོར་ལྡོག་ཤེས་བྱེད་རྒྱུ་གལ་ཆེན་རེད་བསམས།།།
བཀའ་ཤག་སྔོན་མར་ཤེས་ཡོན་སྲིད་བྱུས་སྐོར་ལ་འཚོགས་ཆེན་སྐོང་ནས་བཙན་བྱོལ་བོད་མིའི་ཤེས་ཡོན་སྒྲོམ་གཞི་ལ་གཏན་འབེབས་གསར་པ་གང་ལེགས་གནང་ཡོད་ཀྱང་། ལག་ལེན་དང་དུས་ཚོད་ཀྱིས་མ་ལྡང་སྟེ་བཀའ་ཤག་སྔོན་མའི་འདོད་བློ་ཁེངས་མེད་པ་དང་། ལྷག་པར་དུ་བོད་ཁྱིམ་སློབ་གྲྭར་བཀའ་ཤག་སྔོན་མའི་གཏན་འབེབས་བྱས་པའི་ཤེས་ཡོན་སྲིད་བྱུས་དེ་ལག་བསྟར་བྱེད་ཐུབ་མེད་རེད། དེ་ཡང་རྒྱུ་རྐྱེན་སྣ་ཚོགས་ཤིག་མཆིས་མོད་ཀྱང་། ངས་བལྟས་ན་བཙན་བྱོལ་བོད་མའི་ཤེས་ཡོན་སྲིད་བྱུས་གཏན་འབེབས་བྱེད་མཁན་གྱི་མཁས་དབང་ཚོས་གང་གཏན་ལ་ཕབ་པ་དེ་མ་འགྲིག་པ་མ་ཡིན་པར་བཙན་བྱོལ་བོད་མིའི་སྤྱི་ཚོགས་དེ་མ་འགྲིག་པ་རེད་སྙམ། མདོར་བསྡུས་ནས་བཤད་ན་བཙན་བྱོལ་སྤྱི་ཚོགས་ནང་ཤེས་ཡོན་ལས་སྒོར་མོ་དང་། ནུབ་ཕྱོགས་ལ་དགའ་མཁན་མང་དྲགས་པས་རེད། དེ་ལས་ཀྱང་ཧང་སང་དགོས་པ་ཞིག་ལ་བོད་རང་གི་སྐད་ཡིག་དེ་སྐད་ཡིག་གཉིས་པར་རྩི་རྒྱུ་འདུག་པ་དེ་རེད། གལ་སྲིད་ཁྱེད་རང་བོད་རང་གི་སྐད་ཡིག་ལ་དགའ་མཁན་ཞིག་དང་བོད་དྲི་བྲོ་མཁན་ཞིག་ཡིན་ཚེ་བོད་ཀྱི་སྐད་ཡིག་ལ་སློབ་སྦྱོང་བྱེད་ན་དེ་ཙམ་གྱིས་དཀའ་ངལ་གང་ནང་འཕྲད་སྲིད། དོ་སྣང་མེད་པའི་སྤྱི་ཚོགས་དང་། ཕྲུ་གུ་ཚོས་སོ་སོའི་རང་གི་སྐད་ཡིག་ལ་མཁས་པའི་གོ་འཕང་གང་ནས་ཐོབ་ཡོང་། དོ་སྣང་མ་བྱས་པའི་རྒྱུ་རྐྱེན་གང་ལ་ཐུག་འདུག འགོ་འཇུག་མེད་པའི་ང་ཚོའི་སྤྱི་ཚོགས་འདིའི་ཕྲུ་གུ་ཚོར་དབྱིན་ཡིག་དང་བོད་ཡིག་ལས་གང་སྦྱངས་པར་དཀའ་ལས་ཁག་པོ་འདུག་བཅས་དྲིས་ཚེ། ཐེ་ཚོམ་གང་ཡང་མེད་པར་བོད་ཡིག་སྦྱངས་པར་དཀའ་ལས་ཁག་པོ་འདུག་པར་བཤད། བོད་ཡིག་དཀའ་ལས་ཁག་དགོས་པའི་རྒྱུ་མཚན་གང་ལ་ཐུག་འདུག་པ་དེ་མཁས་པ་ཚོས་ཞིབ་འཇུག་བྱེད་དགོས་ཀྱི་འདུག དེ་ཡང་ཤེས་ཡོན་གྱི་སྒྲོམ་གཞི་མ་འགྲིག་པས་ལེ་ཡིན། དེ་མིན་ན་ཅི་ཞིག་རེད། རྣམ་པ་ཚོས་སོམས་དང་། ངས་བལྟས་ན་ང་ཚོའི་ཤེས་ཡོན་ལམ་སྟོན་དེ་ཏག་ཏག་ཅིག་བསྡད་མེད་པ་དེ་གསལ་བོ་རེད། ལོ་ངོ་ཉི་ཤུ་ནང་གི་གྲུབ་འབྲས་ཐོག་ལ་གནའ་ཉིན་༸གོང་ས་མཆོག་ཡང་ཐུགས་ཕམ་བྱུང་བཅུགས་ཡོད། གང་ལྟར་ངན་ཡོད་ཚད་གང་ཟག་སྒར་གཅིག་གི་སྒང་ལ་གཡོགས་ན་འགྲིག་གིན་མི་འདུག ད་གང་དྲག དཀོན་མཆོག་མཁྱེན།
རྩོམ་ཡིག་འདིའི་ནང་དོན་ཟབ་ཡང་ཁ་བྱང་དེ་བློ་ངོར་བབ་མ་སོང་བས་དགོངས་དག་ཞུ། སྐར་ལྔའི་དར་དམར་འོག་ན་ང་ཚོར་ནམ་ཡང་འོད་སྣང་མེད་དོ།།