ཉེ་ཆར་ལྕམ་ཞཱིན་ན་ལགས་ཀྱིས་སྐུ་ཞབས་ཧཱ་ཏཱ་ཕྱི་རྒྱལ་དུ་ལེན་དགོས་པའི་འབོད་སྐུལ་ཞུས་འདུག
ཉེ་ཆར་ལྕམ་ཞིན་ནཱ་ལགས་ཀྱིས་ཁོ་མོ་དང་ཁོ་མོའི་སྐྱེས་པ་ལྷོ་སོག་པའི་རང་དབང་འཐབ་རྩོད་པ་ཧཱ་ཏཱ་གཉིས་གང་མགྱོགས་ཕྱིའི་རྒྱལ་ཁབ་ཏུ་འགྲོ་རྩིས་བྱེད་བཞིན་པའི་སྐོར། འབྲེལ་ཡོད་ཀྱི་མི་ཞིག་བརྒྱུད་དེ་པའོ་ཞོན་གསར་ཁང་ལ་བརྗོད་ཡོད་ལ། འབྲེལ་ཡོད་མི་དེས་བརྗོད་པ་ལྟར་ན། ལྕམ་ཞིན་ནཱ་ལགས་ཀྱིས་ “ ང་ཚོས་འདི་གར་མུ་མཐུད་དུ་འཆི་ལམ་ཁོ་ནར་སྒུག་ནས་སྡོད་མི་རུང་། ཁོ་ཚོའི་(རྒྱ་གཞུང་ཉེན་རྟོག་པ) གནག་སེམས་དང་དྲག་སྤྱོད་ནི་བློ་ཡིད་ལ་ཤོངས་དཀའ་བ་ཞིག་རེད། ཁོ་ཚོས་ཧཱ་ཏཱ་ལགས་དྲན་ཤེས་ཅི་ཡང་མེད་པའི་རིག་འཚོ་མི་ཐུབ་མཁན་ཞིག་ཏུ་བསྒྱུར་ཏེ། མ་འོངས་པའི་ལོ་འགའི་ནང་རིམ་གྱིས་འཆི་ལམ་དུ་འདེད་རྩིས་བྱེད་བཞིན་འདུག” ཅེས་བརྗོད་ཡོད་པ་མ་ཟད། ཧཱ་ཏཱ་ལགས་མུ་མཐུད་ནད་མེད་བདེ་ཐང་ངང་འཚོ་སྡོད་གནང་ཐུབ་རྒྱུ་གལ་ཆེན་པོ་ཡིན་པས། རྒྱལ་སྤྱིའི་སྤྱི་ཚོགས་ཀྱིས་རོགས་རམ་མཐུན་འགྱུར་གནང་སྟེ་ཁོང་གང་མགྱོགས་རྒྱལ་ཁབ་གཞན་ཞིག་ཏུ་ལེན་ཐབས་གནང་དགོས་པའི་འབོད་སྐུལ་ཞུས་ཡོད་འདུག
དེ་སྔོན་ལྷོ་སོག་པོའི་རང་དབང་འཐབ་རྩོད་པ་ཧཱ་ཏཱ་ལགས་ཀྱིས། “ དུས་ནམ་ཡང་ལྷོ་སོག་པའི་ས་ཆ་དང་ཁ་བྲལ་རྒྱུའི་བསམ་བློ་གཏོང་གི་མེད། འདི་ནི་ང་རང་གི་ཕ་ས་ཕ་ཡུལ་གཅིག་པུ་དེ་ཡིན ” ཞེས་བརྗོད་དེ། འདས་པའི་ལོ་ ༡༥ ལྷག་གི་རིང་བཙོན་འཇུག་མནར་གཅོད་ཇི་ལྟར་བཏང་ཡང་། རང་ཉིད་ཀྱི་ལངས་ཕྱོགས་བརྟན་པོར་བཟུང་སྟེ་ལྷོ་སོག་པོའི་རང་དབང་འཐབ་རྩོད་གནང་ཡོད་པ་རེད།
ལོ་སྔོན་མའི་ཕྱི་ཟླ་ ༡༠ པའི་ནང་ལྕམ་ཞཱིན་ནཱ་ལགས་ཀྱིས་གསར་ལམ་ཁག་ཏུ་གནས་ཚུལ་བརྗོད་སྐབས། རྒྱ་གཞུང་ཉེན་རྟོག་པས་ཧཱ་ཏཱ་ལགས་ལ་བཙན་གྱིས་སྨན་བླུད་པ་དང་། ཡང་ན། ཟ་མའི་ནང་དམིགས་བསལ་གྱི་སྨན་རྫས་རིགས་བཏབ་པ་བརྟེན་ནས། ཁོང་གི་དྲན་ཤེས་བརྟན་པོ་མེད་པ་ཆགས་ཏེ། སྐད་ཆ་ཅི་ཡང་མི་བཤད་པར་དུས་ཡུན་རིང་པོར་ཁེར་རྐྱང་དུ་གཅེར་ནས་སྡོད་ཀྱི་ཡོད་སྟབས། ཁོང་རིག་འཚོ་མི་ཟིན་པ་ཞིག་ཏུ་འགྱུར་ཉེན་ཐད། ཁོ་མོར་སེམས་ཁྲལ་ཆེན་པོ་འབྱུང་གི་ཡོད་སྐོར་བརྗོད་མྱོང་ཡོད་པ་རེད།
ཕྱི་ལོ་ ༡༩༩༥ ཟླ་ ༡༢ ཚེས་ ༡༠ ཉིན་ལྷོ་སོག་པོའི་རང་དབང་འཐབ་རྩོད་པ་ཧཱ་ཏཱ་ལགས་ལ། རྒྱ་གཞུང་གིས་རྒྱལ་ཁབ་མགོ་རྟིང་སློག་མཁན་གྱི་ཉེས་མིང་འོག་ལོ་ ༡༥ བཙོན་འཇུག་ཁྲིམས་བཅད་པ་དང་། ༢༠༡༠ ཕྱི་ཟླ་ ༡༢ ཚེས་ ༡༠ ཉིན་བཙོན་འཇུག་དུས་བཅད་རྫོགས་ཏེ་བཙོན་ཁང་ནས་ཕྱིར་ཕུད་རྗེས། རྒྱ་གཞུང་ཉེན་རྟོག་པས་ས་གནས་ངེས་མེད་དུ་ཁོང་མུ་མཐུད་བཀག་ཉར་བྱས་ཏེ་གར་སོང་ཆ་མེད་དུ་གྱུར་བ་མ་ཟད། ཁོང་གི་ཆུང་མ་ལྕམ་ཞཱིན་ནཱ་དང་བུ་ཝེ་ལིག་སཱི་གཉིས་ཀྱང་སྔ་རྗེས་འཇུ་བཟུང་བྱས་ཏེ་འདས་པའི་ལོ་གཅིག་ལྷག་རིང་བཀག་ཉར་བྱས་རྗེས་ཕྱིར་གློད་ཡོད་པ་རེད། ད་ལྟ་ཧ་ཏཱ་ལགས་རྒྱ་གཞུང་གིས་ལྟ་རྟོགས་འདྲི་གཅོད་འོག་རང་ཁྱིམ་དུ་བཀག་ཉར་བྱས་ཡོད་འདུག
ལྷོ་སོག་པོའི་རང་དབང་འཐབ་རྩོད་པ་སྐུ་ཞབས་ཧཱ་ཏཱ་ལགས་ནི་ཕྱི་ལོ་ ༡༩༥༤ ལོར་སྐྱེས་ཤིང་། ༡༠༩༨ ལོར་ལྷོ་སོག་ཐཱུང་ལའོ་དགེ་ཐོན་སློབ་ཆེན་དུ་སོག་ཡིག་ཆེད་སྦྱོང་གིས་སློབ་མཐར་ཕྱིན་རྗེས། ལྷོ་སོག་པའི་མི་དམངས་པར་སྐྲུན་ཁང་དུ་ལོ་ ༦ རིང་རྩོམ་སྒྲིག་གི་ཕྱག་ལས་གཉེར་པ་དང་། སླར་ཡང་མཐོ་སློབ་དེར་གར་མཱ་ཁི་སི་མཚན་ཉིད་རིག་ཆེད་སྦྱོང་བྱས་ཏེ་འབུམ་རབས་ཞིབ་འཇུག་པ་ཐོན་པ་མ་ཟད། ༡༩༩༢ ལོར་ལྷོ་སོག་དམངས་གཙོ་མཐུན་ཚོགས་གསར་འཛུགས་ཀྱིས་ཚོགས་གཙོའི་འགན་འཁུར་མྱོང་ཡོད་པ་རེད། ༡༩༩༥ ལོར་ལྷོ་སོག་དམངས་གཙོ་མཐུན་ཚོགས་ཀྱི་སྣེ་ཁྲིད་དེ། སོག་པའི་ཤེས་ལྡན་པ་དང་དགེ་རྒན། སློབ་ཕྲུག་རྣམས་འདུ་འཛོམས་ཐོག རྒྱ་གཞུང་གི་རྩ་ཁྲིམས་ནང་གཏན་ལ་ཕབ་ཡོད་པའི་འགྲོ་བ་མིའི་ཐོབ་ཐང་དང་། མི་རིགས་ཀྱི་ཁེ་དབང་སྤྲོད་པའི་ངོ་རྒོལ་ཁྲོམ་སྐོར་གྱི་ལས་འགུལ་བྱུང་རྗེས། ཁོང་ལ་རྒྱལ་ཁབ་མགོ་རྟིང་སློབ་མཁན་གྱི་ཉེས་མིང་བཏགས་ཏེ་བཙོན་འཇུག་མནར་གཅོད་འོག་ཚུད་ཡོད་པ་རེད།
གསར་འགོད་པ། ཚེ་རིང་རྒྱལ།
