ཁ་སང་ཕྱི་ཚེས་ ༡༢ ཉིན་མདོ་སྨད་བླ་བྲང་ཨ་མཆོག་ཏུ་རང་ལུས་མེར་བསྲེགས་ཀྱིས་གཏོང་མཁན་རྒྱལ་གཅེས་ དཔའ་བོ་ཚེ་རིང་བཀྲ་ཤིས་ལེགས་ཀྱི་སྐུ་ཕུང་། རྒྱ་གཞུང་གི་བཙན་པོ་དབང་ཡོད་ཀྱིས་མདང་དགོང་རང་ལ་ཞུགས་འབུལ་བྱེད་བཅུག་ཡོད་པ་ མ་ཟད། སྐུ་ཕུང་ཞུགས་འབུལ་བྱེད་སར་མི་མང་པོ་འགྲོ་མ་བཅུག་པར་བཀག་འགོག་བྱས་ཡོད་འདུག
ཨ་རིར་གནས་བཞུགས་ཚེ་རིང་སྐྱིད་ལགས་ཀྱིས་གནས་ཚུལ་བཏང་འབྱོར་བྱུང་བ་ལྟར་ན། རྒྱལ་གཅེས་དཔའ་བོ་ཚེ་རིང་བཀྲ་ཤིས་ལགས་ཀྱིས་ཁ་སང་རང་ལུས་མེར་བསྲེགས་གནང་སྟེ་འདས་གྲོངས་སུ་སོང་མ་ཐག མཐའ་འཁོར་གྱི་བོད་མི་ཚོས་སྐུ་ ཕུང་ཨ་མཆོག་སྐྱིད་ནང་སྡེ་བའི་རང་ཁྱིམ་དུ་གདན་འདྲེན་ཞུ་ཐུབ་ཡོད་ཀྱང་། དེའི་རྗེས་ཉེན་རྟོག་པ་དང་སྤྱི་བདེ་མི་སྣའི་རླངས་འཁོར་མང་པོས་སྡེ་འདབས་ཡོངས་ སུ་བསྐོར་ཏེ། འདས་པོར་བསྔོ་སྨོན་གནང་བར་ཕེབས་མཁན་གྱི་ཨ་མཆོག་དགོན་པའི་དགེ་མདུན་པ་དང་ གདུང་སེམས་མཉམ་སྐྱེད་བྱེད་དུ་ཡོང་མཁན་རི་སྡེ་ཚོ་བའི་མི་རྣམས་བཀག་འགོག་བྱེད་ ཡོད་འདུག
དེའི་རྗེས་ཚོ་བའི་ཚོ་དཔོན་བར་དུ་བཏང་ནས་སྐུ་ཕུང་མགྱོགས་མྱུར་ཞུགས་འབུལ་བྱ་དགོས་པའི་བཀའ་བཏང་ཡོད་འདུག མེར་བསྲེགས་གཏོང་མཁན་ཚེ་རིང་བཀྲ་ཤིས་ཀྱི་ནང་མི་ཚོས་བོད་ མིའི་སྲོལ་རྒྱུན་ལྟར་སྐུ་ཕུང་ཞུགས་འབུལ་ཐད་བླ་མར་ཞུ་དགོས་པ་དང་། ལྷག་པར་དུ་རི་སྡེ་ཚོ་བར་མཆོད་སྦྱིན་ལེགས་འགྲུབ་མ་གནང་བར་སྐུ་ཕུང་ཞུགས་འབུལ་ཞུ་སྲོལ་མེད་ལུགས་བཤད་ཀྱང་། དེ་མ་ཐག་བསང་ཆུ་རྫོང་གི་སྤྱི་བདེ་ཉེན་རྟོག་ཚན་པའི་མགོ་བ་སོགས་ཀྱིས་བླ་བྲང་དགོན་པའི་བླ་མ་དབལ་མང་ཚང་ཨ་མཆོག་དགོན་པར་ཁྲིད་ཡོང་ནས། སྡེ་བ་ཚོ་བའི་མགོ་ཁྲིད་ཚོ་སྐོང་འགུག་བྱས་ཏེ་གང་མགྱོགས་སྐུ་ཕུང་ཞུགས་འབུལ་བྱ་དགོས་པ་དང་། གལ་ཏེ་གནས་ཚུལ་མ་ལེགས་པ་བྱུང་བ་ཡིན་ན་འགན་ཡོད་ཚད་ཁྱེད་ཅག་གིས་འཁུར་དགོས་སྐོར། ལྷག་པར་དུ་སྤྱི་བདེ་ཉེན་རྟོག་མགོ་བ་དེས་མ་གཞི་ནས་ཁྱིམ་ཚང་དེ་ནི་ཏཱ་ལའི་ཁ་བྲལ་བ་དང་འབྲེལ་བ་དམ་པོ་ཡོད་མཁན་ཞིག་ཡིན་སྐོར་སོགས་བཤད་དེ་ཅོག་ཙེ་སྟེང་ལ་ཁུ་ཚུར་གྱིས་གཞུས་པ་སོགས་ཀྱི་འཇིགས་སྐུལ་བྱས་ཏེ། ཚེ་རིང་བཀྲ་ཤིས་ཀྱི་ཕ་གདུགས་དཀར་སྐྱབས་ཀྱིས་དོན་དག་ཆེན་པོ་བྱུང་ཚེ་སྡེ་བ་ཚོ་བར་དཀའ་ལས་བཟོ་བའི་བསམ་ཤེས་ཐོག་བླ་མ་དབལ་མང་ཚང་གི་བཀའ་བཀོད་ལྟར་ཚེས་ ༡༢ ཉིན་གྱི་མཚན་མོ་དེ་རང་ལ་སྐུ་ཕུང་བླ་རི་གུང་སྔོན་ཕྱོགས་ཀྱི་དུར་སར་ཞུགས་འབུལ་བྱེད་ཡོད་འདུག་ལ། སྐུ་ཕུང་ཞུགས་འབུལ་བྱེད་པར་ཡང་མི་ཁ་ཤས་ཤིག་ལས་བཏང་ཡོད་མི་འདུག སྐབས་དེར་ཚེ་རིང་བཀྲ་ཤིས་ཀྱི་ཨ་མས་སྐུ་ཕུང་ཞུགས་འབུལ་གྱི་བཙན་དབང་གི་བཀའ་དེ་གོ་ནས་དྲན་པ་བརྒྱལ་བ་དང་སྐར་མ་ཁ་ཤས་ལ་དབུགས་ཆད་པ་སོགས་ཀྱིས་སྨན་ཁང་དུ་སྐྱེལ་བའི་ལམ་བར་དུ་དྲན་པ་སོས་པ་སོགས་ཀྱི་གནས་ཚུལ་བྱུང་ཡོད་འདུག
ཚེ་རིང་བཀྲ་ཤིས་ནི་བོད་མདོ་སྨད་བསང་ཆུ་རྫོང་ཨ་མཆོག་སྐྱིད་སྡེ་བའི་ཕ་གང་སེང་ཚང་གདུགས་དཀར་སྐྱབས་དང་མ་ཚེ་རིང་སྒྲོལ་མ་གཉིས་ཀྱི་བུ་གཅིག་པུ་ཡིན་ལ། ལོ་ན་༢༢ཡིན་པའི་ཚེ་རིང་བཀྲ་ཤིས་ལགས་ཀྱི་ཆུང་མའི་མིང་ལ་ཡུམ་མཚོ་སྐྱིད་ཟེར་གྱིན་ཡོད་པ་རེད། ཚེ་རིང་བཀྲ་ཤིས་ཀྱིས། ཚེས་༡༢་ཉིན་རང་ཁྱིམ་ནས་བོད་ལྭ་གཙང་མ་ཞིག་གྱོན་ཏེ། ཕྱུགས་རྫི་བྱེད་པའི་སྐབས་ཕྱུགས་རྣམས་རྫི་རོགས་ཚོར་བཅོལ་ཏེ། ཨ་མཆོག་གྲོང་བརྡལ་གྱི་སྲང་ལམ་ནས། ཉིན་གུང་ཆུ་ཚོད་གཉིས་པ་གཡས་གཡོན་དུ། རང་ལུས་ལྕགས་སྐུད་ཀྱིས་བསྡམས་ཏེ། ཀཱི་ཧོ་ཧོ། ༧རྒྱལ་བ་བསྟན་འཛིན་རྒྱ་མཚོ་ཞེས་སྐད་འབོད་བྱེད་ཞོར་དུ་མེ་ལྕེ་ཁྲ
ཚེ་རིང་བཀྲ་ཤིས་ནི་རྒྱུན་དུ་ནས་མི་ཚང་དེའི་མི་རྒྱུད་ཀྱི་ཁྲོད་དུ་གཤིས་བཟང་ཡ་རབས་ཀྱི་བུ་ཆུང་གཅིག་པུ་དེ་ཡིན་པ་དང་། ཆུང་མ་ཡུམ་མཚོ་སྐྱིད་དང་མཉམ་དུ་ཁྱིམ་གྱི་ལས་ཀར་ཧུར་བརྩོན་བྱེད་མཁན་ཞིག་ཡིན་པ་མ་ཟད། ཆུང་དུས་ནས་རྟ་ནོར་ལུག་གསུམ་ལ་སེམས་གཏིང་ནས་དགའ་ཞིང་། ཆུང་དུས་ནས་རྟ་རྩལ་འགྲན་སྡུར་ཁྲོད་ཡང་ཡང་དུ་ཨང་དང་པོ་ལེན་མྱོང་མཁན་ཞིག་ཀྱང་ཡིན། ད་དུང་ཁོང་གི་སེམས་ནས་གཅེས་པའི་མདོ་རིག་རྟ་བོ་ཞིག་ཡོད་པ་དེ་སྔ་ཕྱི་རུ་རྫོང་རིམ་པ་དང་ཁུལ་རིམ་པར་ཨང་དང་པོ་ལེན་མྱོང་ཡོད་འདུག ཚེ་རིང་བཀྲ་ཤིས་ཀྱི་ཁྱིམ་དུ་ཕ་མ་གཉིས་དང་ཆུང་མ་ལས་མེད་པ་དང་། ཁྱིམ་ཚང་གི་འབྱོར་བ་སོགས་ཡག་པོ་ཡོད་པ་མ་ཟད། ཁོང་གི་ཕ་གང་སེང་ཚང་གདུགས་དཀར་སྐྱབས་ནི་ལོ་མང་རིང་སྡེ་དཔོན་གྱི་ཕྱག་ལས་གནང་མྱོང་མཁན་ཞིག་ཡིན།
གསར་འགོད་པ། དོན་འགྲུབ་བཀྲ་ཤིས།
