ལ་དྭཊ་མི་མང་བོད་ཡིག་ལ་དོ་སྣང་ཆེ་རུ་འགྲོ་བཞིན་འདུག་ཟེར།

ས་རཱ་མཐོ་སློབ་ཏུ་ཟླ་སྔོན་མའི་ཕྱི་ཚེས་ ༢༠ ནས་ཟླ་འདིའི་ཚེས་ ༣༠ བར། ལ་དྭགས་ཁུལ་གྱི་གཞུང་དང་སྒེར། དགོན་པ་བཅས་ཀྱི་སློབ་གྲྭ་ ༢༠ ཡི་བོད་དགེ་ ༢༣ ཙམ་ལ་བོད་ཡིག་གི་ཟབ་སྦྱོང་ཞིག་སྤྲོད་ཀྱིན་ཡོད་ཅིང་། གསར་འགོད་པས་ས་རཱ་མཐོ་སློབ་ཀྱི་སློབ་སྤྱི་དང་ཟབ་ཞུགས་པ་ཁག་ཅིག་ལ་གླེང་མོལ་བརྒྱུད། ཟབ་སྦྱོང་གི་དགོས་དམིགས་དང་ས་གནས་ཀྱི་གནས་སྟངས་སྐོར་ལ་རྒྱུས་ལོན་བྱས་ཡོད།

            ཕྱི་ཚེས་ ༥ ཉིན་གསར་འགོད་པ་ཆེད་དུ་ས་རཱ་མཐོ་སློབ་ཏུ་བསྐྱོད་དེ། སློབ་སྤྱི་འཇམ་དཔལ་གྲགས་པ་ལགས་སུ་ཟབ་སྦྱོང་དེའི་དགོས་པ་དམིགས་ཡུལ་སྐོར་ལ་བཅར་འདྲི་ཞུས་པར་ཁོང་གིས། ཧི་མ་ལ་ཡའི་རི་རྒྱུད་ནི་ལོ་རྒྱུས་དང་གནས་སྟངས་གང་ཅིའི་ཆ་ནས་བོད་པ་དང་རིག་གཞུང་གཅིག་པ་ཡིན་ཞིང་། ལྷག་པར་དུ་བོད་བརྒྱུད་ནང་བསྟན་ཐོས་བསམ་བྱེད་མཁན་གཅིག་པ་ཡིན་སྟབས། བོད་ས་མ་ཤོར་གོང་ཁོང་ཚོ་བོད་དུ་སློབ་གཉེར་ལ་ཕེབས་ཀྱི་ཡོད་ཀྱང་། བོད་ས་ཤོར་ཏེ་བོད་པའི་རིག་གཞུང་ཉམས་ཆག་ཏུ་ཕྱིན་པ་དང་མཉམ་དུ་ཁོང་ཚོའི་རིག་གཞུང་ལའང་ཤུགས་རྐྱེན་ཆེན་པོ་ཐེབས་ཡོད་སྟབས། རྒྱ་གར་ནང་བོད་པའི་ཆོས་རིག་རྒྱུན་འཛིན་དར་སྤེལ་གྱི་རྨང་གཞི་སྲ་བརྟན་ཆགས་རྗེས་༧གོང་ས་མཆོག་གི་བཀའ་དགོངས་ལྟར། ཧི་མ་ལ་ཡའི་རི་རྒྱུད་ལ་ཆོས་རིག་སློབ་སྦྱོང་གི་གོ་སྐབས་དང་མཐུན་འགྱུར་གནང་མགོ་བཙུགས་ཡོད་པ་དང་། ཁོང་ཚོ་བོད་པ་དང་རིག་གཞུང་གཅིག་པ་ཡིན་པའི་སྟེང་ལ། ས་གནས་མི་མང་ཚོར་ཡང་བོད་ཀྱི་ཆོས་རིག་ལ་དོ་སྣང་ཆེན་པོ་ཡོད་སྟབས། ཐེངས་འདིར་ལ་དྭགས་ཁུལ་གྱི་དགེ་རྒན་ཁག་ཅིག་ལ་ཟབ་སྦྱོང་གོ་སྒྲིག་གནང་གི་ཡོད་པ་དང་། ཧི་མ་ལ་ཡ་རི་རྒྱུད་ཀྱི་ས་གནས་གཞན་དག་ལ་ལོ་མང་རིང་ནས་ལས་གཞི་དེའི་རིགས་སྤེལ་མུས་ཡིན་ཡང་། ལ་དྭགས་ཁུལ་དུ་ ༢༠༠༧ ཙམ་ནས་མགོ་བཙུགས་ཡོད་སྐོར་ངོ་སྤྲོད་གནང་བྱུང་།

གསར་འགོད་པས་ཟབ་སྦྱོང་དེར་ཞུགས་མཁན་ལ་དྭགས་ལྡུམ་ར་བདེ་སྐྱིད་ལམ་སྒྲོན་དཔེ་གསར་སློབ་གྲྭའི་བོད་དགེ་ཚེ་རིང་ཆོས་སྒྲོན་ལགས་དང་གླེང་མོལ་བྱས་སྐབས། མོ་རང་ལ་དྭགས་གཞུང་གི་སློབ་གྲྭ་ནས་འཛིན་རིམ་བཅུ་གཉིས་ཐོན་རྗེས་ས་རཱ་མཐོ་སློབ་ཏུ་ལོ་གསུམ་རིང་བོད་ཡིག་སྦྱངས་ཡོད་པ་དང་། དེའི་རྗེས་ཕྱིར་ལ་དྭགས་ལ་ཕྱིན་ཏེ་སྒེར་གཉེར་སློབ་གྲྭ་དེའི་དགེ་རྒན་གནང་བཞིན་ཡོད་འདུག སྔོན་ཆད་མོ་རང་གཞུང་གི་སློབ་གྲྭར་སྐྱོད་སྐབས་འཛིན་རིམ་བཅུ་བའི་བར་བོད་ཡིག་ཡོད་ཀྱང་། ས་རཱ་མཐོ་སློབ་ཏུ་ཞུགས་རྗེས་བསྐྱར་ཏུ་ཀ་ཁ་ནས་སྦྱངས་ཡོད་འདུག དེ་ནི། སྐབས་དེར་ལ་དྭགས་སྤྱི་ཡོངས་ནང་བོད་ཡིག་ལ་དོ་སྣང་མེད་པ་དང་། ལྷག་པར་དུ་གཞུང་གི་སློབ་གྲྭའི་ནང་བོད་ཡིག་སློབ་ཁྲིད་ཚགས་ཚུད་མེད་པས་ཡིན་འདུག དེང་སྐབས་ལ་དྭགས་ཁུལ་གྱི་སློབ་གྲྭ་ཁག་ནང་བོད་ཡིག་ལ་དོ་སྣང་ཆེ་རུ་འགྲོ་བཞིན་ཡོད་པ་དང་། ལྷག་པར་དུ་སྒེར་གྱི་སློབ་གྲྭ་ཁག་ཏུ་བོད་ཡིག་སློབ་ཁྲིད་ཐོག་ཤུགས་སྣོན་རྒྱག་གི་ཡོད་འདུག

གྲྭ་བསྟན་འཛིན་ཆོས་གྲགས་ལགས་ལ་དྭགས་ནུབ་ར་ས་གནས་ཀྱི་དགའ་ལྡན་བཀྲ་ཤིས་ཆོས་གླིང་དགོན་སློབ་ཀྱི་དགེ་རྒན་ཡིན་པ་དང་། ཁོང་གིས་བརྗོད་པ་ལྟར་ན། དགོན་པ་དེར་བོད་ཡིག་ལ་དོ་སྣང་ཆེན་པོ་ཡོད་པ་མ་ཟད། ས་གནས་དེ་ཁུལ་གྱི་མི་མང་ཚོ་ལའང་བོད་ཡིག་ཐོག་དོ་སྣང་གསར་པ་སླེབ་ཀྱི་ཡོད་འདུག དེ་ནི་བོད་ཡིག་བོད་སྐད་དེ་སོ་སོའི་རིག་གཞུང་ཡིན་པ་ངོ་ཤེས་ཀྱི་ཡོད་པ་དང་། ལྷག་པར་དུ་བོད་བརྒྱུད་ནང་བསྟན་ལ་སློབ་གཉེར་བྱེད་མཁན་ཞིག་ཡིན་ན་བོད་ཡིག་བོད་སྐད་མེད་ཐབས་མེད་པ་ཞིག་ཆགས་ཡོད་པས་ཡིན་སྐོར་བརྗོད་བྱུང་། ཁོས་བརྗོད་དོན། “ སྔོན་མ་ཡིན་ན་བོད་ཡིག་ནང་ཆོས་སྦྱོང་བྱེད་ཙམ་ལས། ཕྱི་རོལ་བ་ཚོས་བོད་ཡིག་ལ་དོ་སྣང་བྱེད་ཀྱི་མེད་ཀྱང་། དེང་སྐབས་བོད་ཡིག་བོད་སྐད་དེ་ལ་དྭགས་པ་སོ་སོའི་སྐད་ཡིག་ཡིན་པ་ར་འཕྲོད་དེ། ནང་པ་དང་ཕྱི་རོལ་བ་ཚང་མས་དོ་སྣང་བྱེད་ཀྱི་འདུག ཁ་ཆེ་སློབ་གྲྭ་ཁག་ཏུའང་བོད་ཡིག་སློབ་ཁྲིད་བྱེད་ཀྱི་འདུག” ཅེས་བརྗོད་བྱུང་།

            ཡང་ཁོང་གིས། འདས་པའི་ལོ་འགའི་རིང་ནས་ལ་དྭགས་མི་མང་ཚོས་བོད་ཡིག་ནི་རྒྱ་གར་གྱི་རྩ་ཁྲིམས་ནང་འཇོག་རྒྱུར་འབད་བརྩོན་བྱེད་ཀྱི་ཡོད་པ་དང་། དེ་ནི་མང་ཚོགས་ཙམ་མ་ཡིན་པར་རྫོང་དཔོན་སོགས་མཐོ་རིམ་མི་སྣ་ཚོས་ཀྱང་རྒྱ་གར་དབུས་གཞུང་ལ་བོད་ཡིག་རྒྱ་གར་གྱི་རྩ་ཁྲིམས་ནང་འཇོག་དགོས་པའི་སྙན་ཞུ་རིམ་པར་ཕུལ་ཡོད་པ་མ་ཟད། སྲིད་བློན་སོགས་དབུས་གཞུང་གི་དཔོན་རིགས་ས་གནས་ལ་གཟིགས་སྐོར་དུ་ཕེབས་སྐབས་ཀྱང་། ས་གནས་མང་ཚོགས་ཀྱི་དགོས་འདུན་ཡིག་ཐོག་ཏུ་བཀོད་པ་དག་ལས་གཅིག་ནི་བོད་ཡིག་རྒྱ་གར་གཞུང་གི་རྩ་ཁྲིམས་ནང་འཇོག་རྒྱུ་དེ་ཆགས་ཡོད་ཟེར།

ལ་དྭགས་མཱུ་ཌི་(Mudh) ས་གནས་མངའ་སྡེ་གཞུང་སློབ་གྲྭའི་དགེ་རྒན་གྲྭ་བློ་གྲོས་རབ་རྒྱས་ལགས་ཀྱིས་བརྗོད་པ་ལྟར་ན། ད་ཆར་གཞུང་གི་སློབ་གྲྭ་ཁག་ཏུ་འཛིན་རིམ་བརྒྱད་པའི་བར་བོད་ཡིག་ངེས་པར་དུ་སྦྱོང་དགོས་པ་དང་། འཛིན་རིམ་བརྒྱད་པ་ཡན་ཆད་ནང་གདམ་ཀའི་སློབ་ཚན་དུ་བཞག་ཡོད་འདུག དཀའ་ངལ་ཆེ་ཤོས་ཤིག་ནི་གཞུང་གི་སློབ་གྲྭ་ ༡༠༠ ལྷག་ལ་བོད་ཡིག་དགེ་རྒན་ ༣༠ ཙམ་ལས་མེད་སྟབས། དགེ་རྒན་མ་འདང་པ་དང་སློབ་ཚན་རྣམས་ཚགས་ཚུད་ཡོང་གི་མེད་པ་དེ་ཡིན་འདུག ཁོང་གིས་ “ད་ཆར་ལ་དྭགས་ཙམ་མ་ཟད། ཇ་མོ་ཀ་ཤི་མིར་ནང་སོགས་སུ་བོད་ཡིག་ལ་དོ་སྣང་ཆེན་པོ་སླེབ་ཀྱི་ཡོད་པ་མ་ཟད། གཞུང་གི་སློབ་གྲྭ་ཚང་མའི་ནང་འཛིན་རིམ་ ༡༢ བར་བོད་ཡིག་སློབ་ཚན་གཏན་འབེབས་བྱ་རྒྱུར་ཤུཊ་རྒྱག་གི་ཡོད་པ་རེད”ཅེས་བརྗོད་བྱུང་།

            ད་རེབ་ཀྱི་ཟབ་སྦྱོང་འདིའི་ཕན་ཐོགས་གང་འདྲ་འབྱུང་མིན་དྲིས་པར་ཁོང་གིས“ ཕན་ཐོགས་ཆེན་པོ་ཡོང་གི་རེད་དྲན་ཡོད། སྔོན་མ་ང་ཚོས་ག་རེ་བསླབས་ཀྱང་ཁུངས་བཙན་པོ་ཡོད་མ་རེད། ད་རེབ་ཀྱི་ཟབ་སྦྱོང་བརྒྱུད་དེ་མ་འོངས་པར་སོ་སོས་གང་བསླབས་པ་དེ་ཁུངས་བཙན་པོ་ཡོད་པ་ཞིག་བཟོ་ཐུབ་སོང་བསམ་ཡོད”ཅེས་བརྗོད་བྱུང་།

གསར་འགོད་པ། བནྡེ་སྐྱབས། 

༼ བོད་ཀྱི་དུས་བབ་ཚགས་པར་ལས་འདིར་བཀོད། ༽