ཉིས་སྟོང་བཅུ་གཉིས་ལོར་བོད་མི་ ༢༧༩ འཇུ་བཟུང་བྱས་ཡོད་ཟེར།

དེ་རིང་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ ༢༠༡༢ ལོའི་བོད་ནང་གི་འགྲོ་བ་མིའི་ཐོབ་ཐང་སྐོར་གྱི་ལོ་འཁོར་སྙན་ཐོ་ཕྱིར་བསྒྲགས་དང་འབྲེལ་ཏེ། རྒྱ་གཞུང་གིས་ཉིས་སྟོང་བཅུ་གཉིས་ལོར་བོད་ནང་གི་བོད་མི་ ༢༩ ལ་ཁྲིམས་ཐག་བཅད་ཡོད་ཟེར།

དེ་རིང་སྔ་དྲོ་ཆུ་ཚོད་ ༡༡ ཐོག་ངྷ་ས་བོད་ཁྱིམ་ཉིན་སློབ་ཚོགས་ཁང་དུ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། ༢༠༡༢ ལོའི་བོད་ནང་གི་འགྲོ་བ་མིའི་ཐོབ་ཐང་གནས་སྟངས་སྐོར་གྱི་ལོ་འཁོར་སྙན་ཐོ་ཞིག་བོད་དབྱིན་གཉིས་ནང་པར་སྐྲུན་ཕྱིར་བསྒྲགས་བྱས་ཡོད་ལ། དབྱིན་ཡིག་གི་སྙན་ཐོ་དེར་ཤོག་གྲངས་ ༡༠༨ དང་བོད་ཡིག་གི་སྙན་ཐོ་དེར་ཤོག་གྲངས་ ༨༠ ། དེ་བཞིན་ ༢༠༡༢ ལོའི་བོད་ནང་གི་ཆོས་དད་རང་དབང་གི་དམ་དྲག་སྐོར་ལ་དབྱིན་ཡིག་ཐོག་ཤོག་གྲངས་ ༡༤༨ ཅན་གྱི་དམིགས་བསལ་སྙན་ཐོ་ཞིག་ཀྱང་བཏོན་ཡོད།

ལོ་འཁོར་སྙན་ཐོའི་ནང་ ༡༽སྤྱི་དམངས་དང་ཆབ་སྲིད་ཐོབ་ཐང་། ༢༽གང་བྱུང་འཇུ་བཟུང་དང་བཀག་ཉར། གར་སོང་ཆ་མེད། ༣༽མནར་གཅོད། ༤༽ དྲང་བདེན་མིན་པའི་ཁྲིམས་ཆད། ༥༽ཆོས་དད་རང་དབང་སོགས་ལ་ཞིབ་འཇུག་བྱས་པའི་སྙན་ཐོ་ཞིག་ཡིན་འདུག་ལ། ཆོས་དད་རང་དབང་ལ་དམ་དྲག་སྐོར་གྱི་དམིགས་བསལ་སྙན་ཐོ་དེ་ཕྱི་ཚེས་ ༡༤ ཉིན་རྒྱལ་ཚོགས་ཀྱི་ཆོས་དད་རང་དབང་གི་དམིགས་བསལ་སྐུ་ཚབ་ལ་ཕུལ་ཡོད་པའི་ཐད་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་ “སྙན་ཐོ་ཕུལ་རྗེས་དམིགས་བསལ་སྐུ་ཚབ་ཀྱིས་སྙན་ཐོ་ལག་འབྱོར་བྱུང་ཡོད་ཚུལ་དང་། སྙན་ཐོ་དེ་ཕུལ་བར་ཐུགས་རྗེས་ཆེ། ང་ཚོས་སྙན་ཐོའི་ཐོག་ལག་ལེན་བསྟར་ངེས་ཞེས་གསུངས་བྱུང་” ཟེར།

ཐེངས་འདིའི་གསར་འགོད་གསལ་བསྒྲགས་སྟེང་། ༢༠༡༢ ལོ་ནི་བོད་ཀྱི་ལོ་རྒྱུས་ཐོག་བྱུང་མྱོང་མེད་པའི་བོད་མིའི་འཐབ་བརྩོད་ཀྱི་ལོ་ཞིག་དང་། རྒྱ་གཞུང་གིས་སྒོ་ཀུན་ནས་དམ་དྲག་དང་ལྷག་པར་དུ་ཆབ་སྲིད་ཐད་དམ་དྲག་དོ་དམ་ཤུགས་ཆེ་རུ་བཏང་སྟེ། རྡུང་རྡེག་ཚ་ནན་གཏོང་པའི་ཐབས་ལམ་དང་བྱ་ཐབས་སྤྱད་ནས་སྤྱི་ཚོགས་བརྟན་བརླིང་དང་། གནས་ཚུལ་ཆེ་འབྲིང་ཆུང་གསུམ་མི་ལྷག་པའི་རྩ་དོན་སྟེང་བོད་མི་ཕར་འགྲོ་ཚུར་འོང་ཐད་བཀག་སྡོམ་ཉེན་ཟོན་དམ་དྲག་ཞིབ་བཤེར་སོགས་དྲག་ཆས་ཉེན་རྟོག་དང་སྤྱི་བདེ་ཉེན་རྟོག་པའི་སྐོར་སྲུང་འོག་བོད་མི་རྣམས་འགྲོ་སྡོད་སྤྱོད་ལ་རང་དབང་མེད་པར་གྱུར་ཡོད་སྐོར་བརྗོད་སོང་།

འགན་འཛིན་ཚེ་རིང་མཚོ་མོ་ལགས་ཀྱིས། ༢༠༠༩ ལོ་ནས་ད་བར་བོད་ནང་བོད་མི་ ༩༥ དང་ལྷག་པར་དུ་ ༢༠༡༢ ལོར་བོད་མི་ ༨༢ ཀྱིས་རྒྱ་གཞུང་གི་མཁྲེགས་འཛིན་སྲིད་ཇུས་ལ་ངོ་རྒོལ་གྱིས་རང་ལུས་མེར་བསྲེགས་བཏང་ཡོད་པ་ནི་འདས་པའི་ལོ་རྒྱུས་ནང་བྱུང་མྱོང་མེད་པ་ཞིག་དང་། དེའི་རྒྱུ་རྐྱེན་ནི་རྒྱ་གཞུང་གིས་བོད་ཐོག་འཛིན་པའི་སྲིད་ཇུས་དང་བྱ་ཐབས་རྣམས་བོད་ཀྱི་དངོས་ཡོད་གནས་སྟངས་དང་མི་འཚམ་པ། བོད་མིའི་མངོན་འདོད་དང་མི་མཐུན་བཞིན་དུ་བཙན་འགེལ་བྱེད་པ་ལས་བྱུང་པ་ཞིག་དང་། མི་དམངས་ལ་འགན་མི་འཁུར་པ་དང་ཚེ་སྲོག་ལ་རིན་ཐང་མི་བརྩི་བའི་རྒྱ་ནག་གཞུང་གིས། བོད་མིར་གཅར་རྡུང་དང་དྲག་ཤུགས་ཀྱིས་ཁ་གཏད་བཅག་ཅིང་། རང་ལུས་མེར་བསྲེགས་གཏོང་མཁན་འདས་པོ་ཚོའི་ཕུང་པོ་ཡང་ཐར་པ་མི་གཏོང་བར་བཙན་འཕྲོག་གིས་ནང་མི་གཉེན་ཉེ་ལ་མི་སྤྲོད་པར་བཙན་ཁྱེར་གྱིས་མེད་པར་བཟོ་བཞིན་པ་སོགས་མི་ཆོས་ལས་འགལ་བའི་བྱ་སྤྱོད་སྤེལ་གྱི་ཡོད་པའི་སྐྱོན་བརྗོད་བྱས་ཡོད།

ཁོང་གིས་མུ་མཐུད་རྒྱ་ནག་གཞུང་གི་ཁྲིམས་སྒྲིག་ཕལ་ཆེ་བར་མིང་སྙན་པོ་དང་འདྲ་ཆགས་པོ། ལྷག་པར་དུ་བོད་དང་གྲངས་ཉུང་མི་རིགས་ཐད་གཏན་འབེབས་བྱས་པའི་ཁྲིམས་སྒྲིག་དག་ཕྱི་ཕྱོགས་ལ་སྤྱི་ཚོགས་འཕེལ་རྒྱས་དང་སྤྱི་དམངས་ཁེ་ཕན་ཆེད་ཡིན་པར་བསྒྲགས་ཀྱི་ཡོད་ཀྱང་། དོན་དངོས་ཐོག་ “རྒྱ་ནག་གི་ཁྲིམས་མང་པོ་ཞིག་ཁྲིམས་འགལ་ཆགས་འདུག ”ཅེས་དང་། ཐེངས་འདིའི་སྙན་ཐོའི་ནང་རྒྱ་ནག་གི་ཁྲིམས་སྒྲིག་གི་ཐོབ་ཐང་དང་ལག་ལེན་གྱི་གནས་སྟངས། དེ་དག་རྒྱལ་སྤྱིའི་ཁྲིམས་དང་ཇི་ལྟར་འགལ་གྱི་ཡོད་པ་གཤིབ་བསྡུར་ཁ་གསལ་བཟོས་ཡོད་པར་བརྗོད་སོང་།

ཡང་ཚེ་རིང་མཚོ་མོ་ལགས་ཀྱིས། རྒྱ་ནག་གཞུང་གིས་བོད་མི་རང་ལུས་མེར་བསྲེགས་གཏོང་མཁན་ཚོ་འཇིགས་སྐུལ་བ་ཡིན་པར་བརྗོད་བསྡད་ན་དུས་ནམ་ཡང་དཀའ་རྙོག་སེལ་ཐབས་མེད་པས། དེ་ལས་རང་ལུས་མེར་བསྲེགས་ཀྱི་རྒྱུ་རྐྱེན་དངོས་ལ་རྒྱ་གཞུང་གིས་ཞིབ་འཇུག་ཡག་པོ་བྱས་ཏེ། དཀའ་རྙོག་སེལ་ཐབས་བྱ་དགོས་པའི་འབོད་སྐུལ་ཞུས་སོང་།

གསར་འགོད་གསལ་བསྒྲགས་སྐབས། ༢༠༡༢ ལོར་བོད་ནས་བཙན་བྱོལ་དུ་ཡོང་མཁན་བོད་མི་ ༣༧༤ ལས་བྱུང་མེད་པ་དང་། དེ་ནི་ལོ་སྔོན་མ་དང་བསྡུར་ན་ལྡབ་གཅིག་ལྷག་ཉུང་དུ་ཕྱིན་ཡོད་ཅིང་། དེ་ཡི་རྒྱུ་མཚན་གཙོ་བོ་ལོ་རེ་བཞིན་བོད་ནང་དམ་དྲག་ཆེ་རུ་འགྲོ་པར་བརྟེན་བལ་བོད་ས་མཚམས་སོགས་ལའང་དམ་དྲག་ཆེ་རུ་བཏང་རྐྱེན། བོད་མི་བྲོས་བྱོལ་དུ་ཡོང་མཁན་ཚོར་སྔར་བས་དཀའ་ངལ་ཆེན་པོ་ཆགས་ཀྱི་ཡོད་པ། བྲོས་བྱོལ་དུ་ཡོང་མཁན་མང་པོ་ཞིག་ས་མཚམས་ཁག་ནས་འཇུ་བཟུང་དང་བཙོན་འཇུག་བཀག་ཉར་བྱེད་ཀྱི་ཡོད་པ་བཅས་ལ་བརྟེན་བོད་མི་བཙན་བྱོལ་དུ་འབྱོར་མཁན་ཧ་ཅང་ཉུང་ཉུང་ལས་ཐར་ཐུབ་ཀྱི་མེད་སྐོར་བསྒྲགས་སོང་།

ལྟེ་གནས་ཁང་གིས་སྤེལ་པའི་སྙན་ཐོའི་ནང་། ད་སྔ་བོད་མི་ཆབ་སྲིད་བཙོན་པ་ ༩༨༨ བཙོན་འོག་ཏུ་ཡོད་པ་དང་། ༢༠༡༢ ལོ་གཅིག་པུའི་ནང་བོད་མི་ ༢༧༩ འཇུ་བཟུང་འོག་ཚུད་པ་ལས་བོད་མི་ ༢༩ ལ་ཁྲིམས་ཐག་བཅད་ཡོད་པ་ཤེས་རྟོགས་ཐུབ་ཡོད་པར་གསལ་འདུག

གསར་འགོད་པ། བནྡེ་སྐྱབས།