ཁྱུང་མཆུ་རྫོང་དུ་རང་ལུས་མེར་བསྲེཊ།

མེ་ཀླུང་གི་དཔའ་སྐད་ཚ་བོ།

མྱེ་ཞགས་ཤིག རི་རྩེ་ནས་མཚོ་གཞུང་བར་དུ་མཆེད་དེ། རི་ཆུ་ཚ་རླབས་ཀྱིས་བསྐྱོམས་ཤིང་བསྲོས་པ། སྐལ་བ་འཇིག་ཁའི་མེ་དེ་མིན་ཡང་། གཅིག་རྗེས་གཉིས་མཐུད་ཀྱིས་བསྲེགས་ཏེ། བདག་དབང་གི་བོད་སའི་གྲུ་ཟུར་རེ་རེ་སྐོར་ནས། མིའི་སེམས་སུ་དམར་ལམ་ལམ་གྱི་སྲོག་དབུགས་ཀྱིས་བདེན་པ་བརྡར་གྱིན་ཡོད།

རང་བཙན་གྱི་ངར་སྐད་སྒྲོག་གིན། ཞི་བདེ་ཡི་ཁ་གཡང་འབོད་ཀྱིན། མེ་ལུམས་ཀྱི་འགད་སྒྲ་གཅིག་གིས་གློ་སྙིང་བྲང་གསུམ་ཚལ་བར་གཏོར་ཏེ། ཕ་ས་དམར་པོ་དེར་ཚེ་མཐའི་ཤི་སྔས་བཞག

སྦྱིན་བསྲེག་ལ་ཕུལ་བའི་མི་ལུས་རིན་པོ་ཆེ་ཆུ་ཤུར་ཐར་རེ་ངའི་སྔས་འགྲམ་དང་མིག་སྔུན་ལ་ལྷུང་། དེའི་ཚེ་དམར་དམག་གི་མེ་མདའི་སྐག་སྒྲ་དང་། ཡུལ་མི་ཚོའི་ངུ་སྐད་ཀྱི་ འབོད་སྒྲ། འུར་འུར་ཆེམ་ཆེམ་གྱིས་འཁྲིགས་པའི་ཚིག་དྲི་དེས་ ཤ་འཁོན་ཁྲི་ཕྲག་གི་ཚ་གཟེར་ཁྱེར་ནས་ཆས་བྱུང་།

གཡུལ་འགྱེད་ཀྱི་བློ་སྒོ་ཕྱེས་ཏེ། དཔའ་རྟགས་ཀྱིས་གཤེགས་ལམ་རེ་ན། སྒང་བ་བོད་པའི་བླ་སྲོག་དང་ལོ་རྒྱུས་ཡོད། བཟོད་བསྲན་གྱི་སྤྱན་ཟུང་ཟུམ་སྟེ། མཆོད་སྦྱིན་གྱི་བློས་བཏང་རེ་ན། ཆོས་ལྡན་ཞིང་གི་རེ་སྨོན་དང་ཐུགས་སྐྱེད་ཡོད།
རང་དབང་གི་འཚོ་གཞིས་བསྐྲུན་ཕྱིར། དཀའ་སྡུག་གི་དོང་ལ་ལྕེབས་སོང་། རྒྱལ་ཁབ་ཀྱི་དར་ཆ་ཕྱར་ཕྱིར། གཅེས་སྲོག་དེ་མེ་ལ་སྦར་སོང་། མེ་འབར་གྱི་ངར་ཁ་བཙན་པའི་ལོ་སར་ཞིག་ཚེས་སོང་། ངའི་ལུས་སེམས་ཐལ་བར་བསྲེགས་སོང་།

སྤྱི་ཚེས་༢༠༡༢/༢/༢ཉིན་རྡ་རམ་ས་ལར་བྲིས་སོ།

དེ་རིང་སྐུ་གཤེགས་མ་ཐག་པའི་དཔའ་བོ་ཚེ་རིང་ཕུན་ཚོགས་ལགས་ཀྱིས་ཉེར་ཆར་རྒྱ་གཞུང་གིས་ཁྱབས་བསྒྲགས་རྫུན་མ་བཟོ་མཁན་དེ་དག་ལ་འགྲམ་ལྕག་མེ་འབར་བ་གཅིག་གཞུས་ནས་བདེན་པ་འདི་ཡིན་གསུངས་པ་རེད།

དཔའ་ངལ་ཞུམ་མེད་ཀྱི་རྒྱལ་གཅེས་དཔའ་བོ་ཆེ་རིང་ཕུན་ཚོགས་ལ་གདུང་སེམས་མཉམ་སྐྱེད་དང་རླབས་ཆེན་གྱི་བྱ་བ་ལ་ཡི་རངས་ཞུ།་་དཔའ་བོ་ཁོང་གི་འདོད་དོན་མྱུར་འགྲུབ་ཤོག།