སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་སྐབས་བཅུ་བདུན་པས་མུ་མཐུད་དུ་བོད་དོན་དང་རྒྱལ་སྤྱིའི་རྒྱབ་སྐྱོར་སོགས་འཐོབ་ཆེད་གང་ཐུབ་ཀྱིས་ཞབས་ཕྱི་ཞུ་རྒྱུའི་ཐུགས་འདུན་ཡོད་སྐོར་སོགས་གསུངས་འདུག
སྲིད་སྐྱོང་སྤེན་པ་ཚེ་རིང་མཆོག ༢༠༢༦།༣།༢༦ དབུས་བོད་མིའི་སྒྲིག་འཛུགས་ཀྱི་པར།
ཁ་སང་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་འདི་ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོའི་ཁྲོད། རྒྱ་ཆེའི་མང་ཚོགས་ཀྱིས་རེ་བ་དང་ཡིད་ཆེས་ཆེན་པོའི་ཐོག་ནས་ཁོང་ལ་སྔོན་འགྲོའི་ལས་རིམ་ཁྲོད་འོས་ཤོག་བརྒྱ་ཆ་ ༦༡།༠༢༥ ཐོབ་སྟེ། དངོས་གཞིའི་འོས་བསྡུ་མི་དགོས་པར་སྲིད་སྐྱོང་དུ་འདེམས་ཐོན་བྱུང་བར་བོད་མི་རྣམས་ལ་ཐུགས་རྗེ་ཆེ་ཞུ་བ་དང་སྦྲགས། བོད་མིའི་སྒྲིག་འཛུགས་ཀྱིས་མ་འོངས་པའི་ཕྱག་ལས་གནང་ཕྱོགས་སོགས་གསུངས་འདུག
སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས། ལོ་སར་སྔོན་ཏག་ཏག་དེར་དབུས་འོས་བསྡུ་ལྷན་ཁང་གིས་འོས་བསྡུའི་གྲུབ་འབྲས་གསལ་བསྒྲགས་བསྐྱངས་པའི་རྗེས་འབྲས་སུ། སྲིད་སྐྱོང་གི་འོས་བསྡུ་དེ་མི་མང་མང་པོ་ཞིག་གིས་ཤ་ཚ་དང་རྒྱབ་སྐྱོར་ལ་བརྟེན་ནས་ང་ལ་བརྒྱ་ཆ་དྲུག་ཅུ་ལྷག་ཐོབ་ཡོད་པ་སོང་ཙང་། དངོས་གཞིའི་འོས་བསྡུའི་ལས་རིམ་འགྲོ་མི་དགོས་པའི་ཐོག་ནས་སྔོན་འགྲོ་རང་ནས་ཐག་ཆོད་པའི་གནས་སྟངས་འདི་བྱུང་བ་རེད། སྐབས་དེ་ནས་བཟུང་ད་བར་བརྒྱུད་ལམ་ཁག་གང་ལ་ཡང་དམིགས་བསལ་གྱི་ཡ་ལན་བྱས་མེད། དམིགས་བསལ་དེ་འདྲ་དགའ་སྤྲོ་བྱ་དགོས་རྒྱུའང་ཅི་ཡང་མི་འདུག་ལ། དམའ་འབེབས་ཞེ་དྲགས་བྱས་ནའང་སེམས་སྡུག་དགོས་པའི་གནས་སྟངས་ཀྱང་དེ་འདྲ་ཞེ་དྲགས་མི་འདུག བྱས་ཙང་གོ་སྐབས་འདི་བརྒྱུད་ནས་བོད་རྒྱ་ཆེ་མི་མང་གིས་བསམ་ཤེས་གནང་ནས་ང་ལ་ཡང་བསྐྱར་ལོ་ལྔའི་འགན་འཁུར་རྒྱུའི་ཡིད་ཆེས་གནང་བ་དང་། འདས་པའི་ལོ་ལྔ་མ་ཟིན་ཙམ་ལ་བཀའ་ཤག་སྐབས་བཅུ་དྲུག་པས་ལས་དོན་སྒྲུབ་པའི་སྐབས་ལ། ང་ཚོས་ངོས་ནས་གང་ཐུབ་ཅི་ཐུབ་ཀྱི་ཞབས་འདེགས་ཞུ་རྒྱུའི་འབད་བརྩོན་གནང་ཡོད་ལ། མང་ཚོགས་ཀྱི་ངོས་ནས་ཀྱང་བཟང་ཕྱོགས་ནས་རྣམ་འགྱུར་མང་པོ་ཞིག་སྟོན་གྱི་འདུག ཅེས་གསུངས་འདུག
ཡང་སྲིད་སྐྱོང་མཆོག་གིས། ང་ཚོས་ཁ་ནས་ཆིག་སྒྲིལ་དང་ཆིག་སྒྲིལ་ཞེས་མང་པོ་བཤད་བསྡད་པ་ལས། འགན་འཁྱེར་བའི་སྐབས་ལ་ད་ལྟ་ཤོད་མཁན་འདི་སྲིད་སྐྱོང་གི་འོས་མིར་ལང་བའི་སྐབས་སུ་བསྒྲགས་ཚིག་གསུམ་སྒྲོག་གིན་ཡོད་རེད། སྤྱི་སྙོམས་དྲང་བདེན་ཞེས་ང་ཚོ་ཚང་མ་ཆོལ་ཁ་དང་ཆོལ་བརྒྱུད་སོགས་དབྱེ་བ་གང་ཡང་མེད་པའི་ཐོག་ནས་ཚང་མར་སྤྱི་སྙོམས་ཤིག་གང་འདྲ་ཡོང་དགོས་མིན་དང་། ཕན་ཐོགས་ཡ་ཞིག ལས་འགུལ་ག་རེ་སྤེལ་བ་ཡིན་ཡང་འཕྲལ་ཕུགས་རྒྱང་གསུམ་ལ་བསམ་བློ་བཏང་ནས་ཐབས་ཇུས་དང་ལྡན་པའི་ཐོག་ནས་ལས་ཀ་བྱ་རྒྱུ་དེ་གལ་ཆེན་པོ་ཞིག་རྩིས་ནས་ལས་ཀ་བྱས་པ་དང་། བོད་མིའི་སྒྲིག་འཛུགས་ཀྱི་ལས་འགན་གལ་ཆེན་པོ་གཅིག་ནི་བོད་དོན་བདེན་མཐའ་གསལ་རྒྱུ་དེ་རེད། བོད་དོན་བདེན་མཐའ་གསལ་ཆེད་དབུ་མའི་ལམ་གྱི་སྲིད་ཇུས་བཟུང་པའི་ཐོག་ནས་ཐབས་ཇུས་ལ་འགྱུར་བ་བཏང་ནས་མཐའ་གཉིས་ལ་ངོས་ལེན་ཡོང་རྒྱུར་འབད་བརྩོན་ཞུས་པ་དེས། ང་ཚོའི་བོད་མིའི་སྤྱི་ཚོགས་མཉམ་དུ་འཁྲིད་ཐུབ་རྒྱུ་དང་། རྒྱལ་སྤྱིའི་ནང་དུ་ང་ཚོར་ཞུ་སའི་ལམ་ཁ་ཡོད་པའི་ཐོག་ནས་མ་འོངས་པར་སྒོ་མང་པོ་ཞིག་འབྱེད་ཀྱིན་ཡོད་པའི་གནས་སྟངས་ཤིག་ཡོང་གི་ཡོད་དུས། བོད་མི་ཚང་མ་མཉམ་རུབ་ཀྱི་ཐོག་ནས་ནུས་པ་མཉམ་སྤུངས་དང་། ལས་ཀ་ག་རེ་བྱས་ནའང་མདུན་སྐྱོད་དེ་གལ་ཆེན་པོ་ཞིག་ཏུ་རྩིས་ནས་མི་ལོ་ལྔའི་རིང་ལ་ལས་ཀ་བྱས་པ་རེད་ལ། ཞབས་ཕྱི་ཞུས་པའི་ཁུལ་ཡང་རེད། ཅེས་གསུངས་འདུག
ཡང་སྲིད་སྐྱོང་སྤེན་པ་ཚེ་རིང་མཆོག་གིས། ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་འོས་བསྡུའི་སྐབས་ལའང་འགྲན་རྩོད་ནང་འགྲོ་མི་དགོས་པར། སྤྱི་ཚོགས་འཁྲུག་གཞི་དང་སྤྱི་ཚོགས་ལ་གྲུབ་འབྲས་ངན་པ་མི་འཐོན་རྒྱུའི་ཐག་གཅོད་ཅིག་ཀྱང་བྱས་པ་རེད། ད་ལན་ཡང་འོས་བསྡུའི་དྲིལ་བསྒྲགས་རྩ་བ་ནས་མ་བྱས་པ་དང་། འདས་པའི་ལས་ཀ་བྱས་པ་དེ་དག་ལ་བལྟས་ནས་མི་མང་གིས་ཐག་གཅོད་གནང་དགོས་པ་ལས། ང་ཚོས་ཁ་ནས་ཁས་ལེན་མང་པོ་ཞིག་བྱས་ནས་ཕན་ཐོགས་མེད་པ་ཞིག་ལ་ངོས་འཛིན་བྱས་པ་རེད། དེ་འདྲ་ཡིན་དུས་ད་ལན་སྤོབས་པའི་སྒང་ནས་ཞུ་ཐུབ་པ་ཞིག་ལ། ད་ལན་གྱི་འོས་བསྡུའི་བརྒྱུད་རིམ་ནང་ལ་ངས་ངོས་ནས་སྤྱི་ཚོགས་དུམ་བུར་འགྲོ་རྒྱུའི་རྒྱུ་རྩ་བ་ནས་བསྐྲུན་མེད་ཅེས་སྤོབས་པའི་ཐོག་ནས་ཞུ་ཐུབ་ཡ་ཞིག་རེད། མ་འོངས་པར་ང་ཚོའི་མང་གཙོའི་ལམ་སྲོལ་དེ་རྒྱུན་གནས་ཐུབ་རྒྱུ་དེ་ང་ཚོའི་གནས་བབ་དང་འཚམ་པ་ཞིག་བྱ་དགོས་རྒྱུ་དེ་གལ་ཆེན་པོ་ཡིན་པ་དེ་སྨྲོས་མེད་རེད་ལ། ད་ལན་གྱི་འོས་བསྡུའི་ལས་རིམ་དང་གསལ་བསྒྲགས་ཟིན་པའི་ཐོག་ནས་བར་ལམ་བྱུང་བའི་གནས་ཚུལ་ཁ་ཤས་ཤིག དཔེར་ན། འདས་པའི་ལོ་གཅིག་ནང་ལ་གལ་ཆེ་ཤོས་གཅིག་དེ་ཕྱི་ལོ་ ༢༠༢༥ ལོར་བོད་རྒྱའི་དཀའ་རྙོག་གསལ་རྒྱུའི་དང་འབྲེལ་བའི་ཨ་རིས་གྲོས་ཚོགས་གཉིས་ཀྱིས་ཁྲིམས་ཡིག་གཏན་འབེབས་བྱ་རྒྱུ་དང་། སྲིད་འཛིན་གྱི་མཚན་བཀོད་རྒྱག་བཞག་པ་དེ་ང་ཚོའི་ལོ་རྒྱུས་ཀྱི་ཐོག་ནས་གནད་འགག་ཅིག་ཆགས་ཀྱི་ཡོད་རེད་ལ། ཉེ་བའི་ཆར་ཕྱི་ལོ་ ༢༠༢༦ ལོའི་ཨ་རིའི་སྔོན་རྩིས་གཏན་འབེབས་བྱས་པའི་བརྒྱུད་རིམ་ནང་། ལས་གཞི་གང་གི་སྒང་ལ་དངུལ་འབོར་ག་ཚོད་གཏོང་གིན་ཡོད་མེད་ཀྱི་ཤོག་ལྷེབ་བཞི་ཡོད་རེད། དེ་བེད་སྤྱོད་གཏོང་སྟངས་དང་འབྲེལ་བའི་ཐོག་ནས་འགྲེལ་བརྗོད་ཀྱི་ཤོག་ལྷེབ་དེའི་ནང་། སྔོན་རྩིས་གཏན་འབེབས་ཀྱི་ཁྲིམས་ཡིག་ལག་བསྟར་བྱས་པའི་ནང་བོད་མིའི་སྒྲིག་འཛུགས་དེ་བཙན་བྱོལ་བོད་གཞུང་ལ་ངོས་འཛིན་བྱེད་ཀྱི་ཡིན་ཞེས་གོམ་པ་ཆུང་ཆུང་རྒྱག་ཐུབ་པའི་གནས་སྟངས་ཤིག་ཆགས་ཡོད། ཅེས་གསུངས་འདུག
ཡང་ཁོང་གིས། ཨ་རིའི་གཞུང་གིས་རྒྱལ་སྤྱིའི་ཁྱོན་ཡོངས་ལ་རོགས་དངུལ་དེ་མཚམས་བཞག་པ་རེད། ང་ཚོ་བོད་པ་གཅིག་པུ་མ་རེད། ཡིན་ཡང་། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་ང་ཚོས་ཨ་རིའི་གྲོས་ཚོགས་གོང་འོག་གཉིས་དང་གྲོས་ཚོགས་ཀྱི་ཆབ་སྲིད་ཚོགས་པ་གཉིས་ཀའི་ཚོགས་མིས་རྒྱབ་སྐྱོར་ཡོད་པ་དང་། ཕྱི་སྲིད་ལས་ཁུངས་དང་འབྲེལ་ཡོད་མི་སྣ་མང་པོ་ཞིག་གི་རྒྱབ་སྐྱོར་ལ་བརྟེན་ནས། སྔོན་མ་སྔོན་རྩིས་ནང་བཀའ་འཁྲོལ་ཡོད་པ་ལས་ཕྱེད་ཀ་ལྷག་ཅིག་ཚུར་རག་བསྡད་ཡོད་རེད། གཞན་དེ་མང་པོ་ཞིག་ལ་བསྐྱར་གསོ་བྱས་ཐུབ་ཡོད་མ་རེད། དེ་བཞིན་ཨ་རིའི་གཞུང་གི་ཨ་རིའི་རོགས་དངུལ་གྱི་ལས་བྱེད་མང་པོ་ཞིག་མེད་པར་བཟོས་པ་དང་། ཕྱི་སྲིད་ལས་ཁུངས་ཀྱི་ལས་བྱེད་བརྒྱ་ཆ་ཉི་ཤུ་ཞིག་ཉུང་དུ་བཏང་བའི་རྒྱུ་མཚན་ལ་བརྟེན་ནས། ལས་གཞི་བསྐྱར་གསོ་བྱས་པ་དེའི་སྒང་ལ་སྟངས་འཛིན་བྱེད་སྟངས་དང་བཀའ་འཁྲོལ་སྤྲོད་སྟངས་སོགས་འཛིན་སྐྱོང་གི་བརྒྱུད་རིམ་བསྐྱར་གསོ་བྱ་དགོས་དུས་དེ་དག་ལ་དུས་ཚོད་ཡུན་རིང་འགོར་བ་རེད་ལ། ད་ལྟའང་དེ་བཟོས་དང་བཟོ་བཞིན་པའི་གནས་སྟངས་ཤིག་རེད། ད་ལྟ་བཀའ་འཁྲོལ་ཡོད་པའི་དངུལ་ནས་གཞན་པ་སུའང་མ་ཐོབ་པ་ཞིག་ང་ཚོ་ལ་ཕྱེད་ཀ་ལྷག་ཅིག་རག་ཟིན་པ་དེའང་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བྱུང་བ་ཞིག་དང་། ལོ་རྗེས་མའི་སྔོན་རྩིས་ནང་ཡིན་ནའང་བོད་ཕྱི་ནང་གཉིས་ལ་ཨ་སྒོར་ས་ཡ་ ༢༣ ལྷག་ཅིག་བླུགས་ཐུབ་པ་བྱུང་བ་འདི། ལོ་ལྟར་དཀའ་ལས་རྒྱག་ནས་བྱ་དགོས་པ་ཞིག་རེད་མ་གཏོགས། ལོ་གཅིག་ལ་རོགས་དངུལ་རག་པའི་རྒྱུ་མཚན་ལ་བརྟེན་ནས་ལོ་རྗེས་མར་རོགས་དངུལ་རང་བཞིན་གྱིས་རག་གི་ཡོད་པའི་ཁྱབ་ཀྱིས་མ་རེད། ཅེས་གསུངས་སོང་།
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། པདྨ་མཚོ།
