ཉེ་ལམ་གནས་མཆོག་རྡོ་རྗེ་གདན་དུ་བོད་མི་སེར་སྐྱ་སྟོང་ཕྲག་ལྷག་འདུ་འཛོམས་ཐོག བོད་ནང་རང་སྲེག་གཏོང་མཁན་རྣམས་ཀྱི་ཆེད་མར་མེ་ཁྲོམ་སྐོར་དང་མཆོད་འབུལ་སྨོན་ལམ་གསུངས་འདུག
ཟླ་འདིའི་ཕྱི་ཚེས་ ༡༩ ཉིན་རྒྱ་གར་བྱང་ཕྱོགས་སྐོར་སྐྱོད་སྤྱི་འཐུས་རྣམ་པས་བྷི་ཧར་མངའ་སྡེའི་གྲོས་ཚོགས་འཐུས་མི་གཙོས་འབྲེལ་ཡོད་ས་གནས་དཔོན་རིགས་ཁག་ཅིག་ལ་མཇལ་འཕྲད་ཀྱིས་བོད་དོན་ཞུ་གཏུག་གནང་ཡོད་ཅིང་། ཉིན་རྒྱབ་གནས་མཆོག་རྡོར་གདན་མཱ་ཧཱ་ཡཱ་ན་མགྲོན་ཁང་དུ་གསར་འགོད་པར་གསར་འགོད་གསལ་བསྒྲགས། དགོང་དྲོ་སྤྱི་འཐུས་རྣམ་པས་སྣེ་ཁྲིད་འོག་རྡོར་གདན་བོད་རིགས་སེར་སྐྱ་བརྒྱ་ཕྲག་མང་པོ་འདུ་འཛོམས་ཐོག་རྡོར་གདན་རྣམ་རྒྱལ་གྲྭ་ཚང་དགོན་པ་ནས་བྱང་ཆུབ་མཆོད་རྟེན་ཆེན་མོའི་བར་མར་མེ་ཁྲོམ་སྐོར་གནང་ཡོད་འདུག
དེ་བཞིན་བྱང་ཕྱོགས་སྤྱི་འཐུས་རྣམ་པའི་གོ་སྒྲིག་འོག ཕྱི་ཚེས་ ༢༠ ཉིན་རྡོར་གདན་མཆོད་རྟེན་ཆེན་མོའི་ནང་སྔ་འགྱུར་རྙིང་མའི་སྨོན་ལམ་ཆེན་མོ་ཐེངས་༢༤ པ་འཚོགས་སྐབས་དང་བསྟུན། སྟག་ལུང་རྩེ་སྤྲུལ་རིན་པོ་ཆེ་མཆོག་དང་ཞི་ཆེན་རབ་འབྱམས་རིན་པོ་ཆེ། སྨན་གླིང་མཁན་རྩེ།རྣམ་གྲོལ་གླིང་ཇོ་ཀོང་རིན་པོ་ཆེ་སོགས་དབུ་བཞུཊ་ཐོག་ཆོས་ལུགས་རིས་མེད་ཀྱི་དགེ་འདུན་པ་ ༨༠༠༠ བརྒལ་བས། ད་བར་བོད་ནང་རང་ལུས་མེར་བསྲེགས་གཏོང་མཁན་རྒྱལ་གཅེས་དཔའ་བོ་དཔའ་མོ་རྣམས་ཀྱི་ཆེད་མཆོད་འབུལ་སྨོན་ལམ་གསུངས་ཡོད་འདུག
སྐབས་དེར་རྡོར་གདན་ཆོས་ལུགས་ལྷན་ཚོགས་ཀྱི་དྲུང་ཆེ་སྐུ་ཞབས་ཁན་ལགས་ཀྱིས། བོད་མི་ཚོར་གདུང་སེམས་མཉམ་སྐྱེད་གཏམ་བཤད་དང་རྒྱ་གཞུང་གིས་བོད་ཐོག་འཛིན་པའི་དྲག་གནོན་སྲིད་བྱུས་ལ་སྐྱོན་བརྗོད་གནང་ཡོད་འདུག
གསར་འགོད་པ། དཔལ་ལྡན།
