ཅཱང་ཧུའུ་གཉིས་ཀྱི་འགལ་བ་དེ་ཅཱང་ཞིས་གཉིས་བར་གྱི་འཐབ་རྩོད་དུ་འགྱུར་བཞིན་འདུག
ཟླ་འདིའི་ཕྱི་ཚེས་ ༢༡ ཉིན་རྒྱ་ནག་གཞུང་འབྲེལ་གསར་ལམ་ཁག་ཏུ། རྒྱ་གཞུང་དབུས་དམག་དོན་ལྷན་ཁང་གི་དྲུང་ཆེ་གཞོན་པ་ཟུར་པ་ཡཱང་པའེ་པེན་གྱི་དུར་མཆོད་མཛད་སྒོའི་གནས་ཚུལ་སྤེལ་སྐབས། ཅཱང་ཙེ་མཱེན་གྱི་མིང་རིམ་དེ་རྒྱ་གཞུང་དབུས་ཆབ་སྲིད་ལྷན་ཁང་གི་རྒྱུན་ལས་རྣམས་ཀྱི་ཆེས་མཐའ་མར་བཞག་ཡོད་སྟབས། ཅཱང་ཙེ་མཱེན་རྒྱ་གཞུང་གི་ཆབ་སྲིད་གར་སྟེགས་ལས་མར་དབབ་རྒྱུའི་རྣམ་འགྱུར་ཞིག་ཡིན་མིན་ཐད། རྒྱལ་ཁབ་ཕྱི་ནང་གི་གསར་ལམ་ཁག་ཏུ་ཚོད་བགམ་དང་གླེང་སློང་སྣ་ཚོགས་བྱུང་ཡོད།
དེ་བཞིན། ཕྱི་ཚེས་ ༢༢ ཉིན་རྒྱ་གཞུང་ཞིན་ཧྭ་གསར་ཁང་གིས་གནས་ཚུལ་སྤེལ་ཏེ། “ཚོགས་ཆེན་བཅོ་བརྒྱད་པའི་རྗེས་སུ། ཅཱང་ཙེ་མཱེན་གྱིས་དབུས་གཞུང་ལ་རེ་བ་བཏོན་ཏེ། རྗེས་ཕྱོགས་དམར་ཤོག་ཚོགས་པ་དང་རྒྱལ་ཁབ་ཀྱི་མགོ་ཁྲིད་ཚོའི་མིང་རིམ་སྒྲིག་སྐབས། ཁོ་རང་མགོ་ཁྲིད་རྒན་རབས་པ་དང་མཉམ་དུ་འཇོག་དགོས་པ་བརྗོད་ཡོད་ལ། དེ་ཡིས་དམར་ཤོག་རིང་ལུགས་པའི་ཡ་རབས་གཞུང་བཟང་དང་བློ་རྒྱ་ཆེན་པོ་མཚོན་ཡོད།” ཅེས་བཀོད་འདུག
ཅང་ཙེ་མཱེན་གྱི་མིང་ཐོབ་གོ་རིམ་འགྱུར་ལྡོག་ཐད། ཧོང་ཀོང་གསར་ལམ་ཁག་གིས་ཅཱང་དངོས་སུ་རྒྱ་གཞུང་གི་ཆབ་སྲིད་གར་སྟེགས་ལས་མར་དབབ་རྒྱུའི་སྔོན་བརྡ་ཞིག་ལ་ངོས་འཛིན་བྱས་ཡོད་ཀྱང་། ཆབ་སྲིད་དཔྱད་བརྗོད་པ་ལིག་རིས་ཧྲོ་ཡིས་དེ་ལས་ལྡོག་སྟེ། “ཅཱང་ཙེ་མཱེན་གྱི་ཆབ་སྲིད་ཤུགས་རྐྱེན་འབྱུང་འགྱུར་དུས་ཡུན་ངེས་ཅན་ཞིག་གི་རིང་མུ་མཐུད་གནས་རྒྱུ་རེད” ཅེས་བརྗོད་ལ། སྐབས་དོན་དབྱེ་ཞིབ་པ་ཁག་ཅིག་གིས་ཀྱང་། ཅཱང་གིས་མུ་མཐུད་དུ་ཞིས་ཡི་སྲིད་བྱུས་ལ་ཐེ་གཏོགས་བྱས་པར་བརྟེན། ཞིས་ཡིས་ཉེ་ཆར་དམར་ཤོག་དཔོན་རིགས་ཀྱི་སྤྱོད་ལམ་ཐད་ཀྱི་སྒྲིག་གཞི་ཚན་པ་བརྒྱད་བཏོན་པ་དང་། ཅཱང་ཤོག་ཁག་གིས་དེར་ཁ་གཏད་གཅོག་ཆེད་ལྷོ་ཕྱོགས་གཟའ་མཇུག་གསར་ཁང་གི་དོན་རྐྱེན་བསླངས་ཡོད་ལ། ད་ལྟ་ཅཱང་གི་མིང་རིམ་མར་ཕབ་དང་ཞིན་ཧྭ་གསར་ཁང་གིས་དེ་ལ་གསལ་བཤད་འཕར་མ་སྐྱོན་པ་བཅས་ཕྱི་ཚུལ་གྱི་རྣམ་འགྱུར་དག་གིས། འདས་པའི་ལོ་བཅུའི་རིང་གི་ཅཱང་ཧུའུ་གཉིས་བར་གྱི་དབང་ཤུགས་འཐབ་རྩོད་ཀྱི་འགལ་བ་དེ། ད་ལྟའི་ཆར་ཅཱང་ཞིས་གཉིས་བར་གྱི་དབང་ཤུགས་འཐབ་རྩོད་ཀྱི་ངོ་བོར་འགྱུར་བཞིན་པ་བརྗོད་འདུག
ཚོགས་ཆེན་བཅོ་བརྒྱད་པའི་སྔོན་དེ། ཕྱི་ཟླ་ ༡༡ ཚེས་ ༢༧ ཉིན་རྒྱ་ནག་གཞུང་འབྲེལ་བརྒྱུད་ལམ་ཁག་ཏུ། རྒྱ་གཞུང་སྲིད་གྲོས་ཀྱི་དྲུང་ཆེ་གཞོན་པ་ཟུར་པ་ཏེན་ཀུང་ཞོན་གྱི་དུར་མཆོད་གནས་ཚུལ་སྤེལ་སྐབས། ཧུའུ་དང་ཞིས་གཉིས་རྗེས་ཀྱི་མིང་རིམ་གསུམ་པར་ཅཱང་བཞག་ཡོད་ལ། ཚོགས་ཆེན་བཅོ་བརྒྱད་པའི་ཐོག་ཅཱང་ཤོག་ཁག་གི་མཐུན་གྲོགས་ཀྲང་ཏིག་ཅཱང་དང་། ཡུས་ཀྲིན་ཧྲིན། ཀྲང་ཀོ་ལིན། ལིག་ཡོན་ཧྲན་བཅས་རྒྱ་གཞུང་དབུས་ཆབ་སྲིད་ལྷན་ཁང་གི་རྒྱུན་ལས་མི་བདུན་ཁྲོད་བདམས་སྒྲིག་བྱུང་ཡོད་སྟབས། གསར་ལམ་ཁག་གིས་ཅཱང་ཙེ་མཱེན་གྱི་ཆབ་སྲིད་ཤུགས་རྐྱེན་མུ་མཐུད་གནས་རྒྱུ་ཡིན་པའི་ངོས་འཛིན་བྱས་ཡོད་པ་རེད།
ཅཱང་ཙེ་མཱེན་ནི་ད་ལྟ་ལོ་ ༨༦ ཡིན་ལ། ༢༠༠༢ ལོར་རྒྱ་གཞུང་དམར་ཤོག་དྲུང་ཆེ་དང་སྲིད་འཛིན་གྱི་ལས་གནས་དང་། ༢༠༠༤ ལོར་རྒྱ་གཞུང་དབུས་དོན་ལྷན་ཁང་གི་ལས་གནས་བཅས་རིམ་པར་ཕྱི་ཚུལ་ནས་ཧུའུ་ཅིན་ཐའོ་ལ་རྩིས་སྤྲོད་བྱས་རྗེས། ཧུའུ་ཝུན་གཉིས་ཀྱིས་རྒྱ་གཞུང་གི་སྲིད་འགན་ཁུར་པའི་ལོ་ ༡༠ དུས་ཡུན་རིང་ཅཱང་གིས་དངོས་ཤུགས་བརྒྱུད་གསུམ་ནས་ཐེ་ཇུས་བྱས་ཡོད་པ་རེད།
གསར་འགོད་པ། ཚེ་རིང་རྒྱལ།
