ད་ལྟ་རང་གནས་ཚུལ་འབྱོར་གསལ་ལ། དེ་རིང་སྔ་དྲོའི་བོད་ནང་གི་ཆུ་ཚོད་ ༡༠།༣༠ ཡས་མས་སྟེང་། དཀར་མཛེས་ཁུལ་གསེར་རྟ་རྫོང་སྟག་རྩ་ཡུལ་ཚོ་རྐང་ཚ་སྡེ་བའི་རང་ལོ་ ༢༢ ཡིན་པའི་གྲྭ་ཀུན་མཁྱེན་ཞུ་བ་ཞིག་གིས། གསེར་རྟ་རྫོང་ཐོག་གི་གསེར་རྟའི་ཐང་ཆེན་དུ་རྒྱ་གཞུང་ལ་ངོ་རྒོལ་སྐད་འབོད་གནང་སྟེ། རྒྱ་གཞུང་གི་ཉེན་རྟོག་པས་འཛིན་བཟུང་བྱས་ཡོད་འདུག
ངྷ་སར་གནས་སྡོད་ལྷ་མོ་སྐྱབས་ལགས་ཀྱིས་བརྗོད་པ་ལྟར་ན། གྲྭ་ཀུན་མཁྱེན་ལགས་ཀྱིས་ངོ་རྒོལ་གནང་སྐབས་“རྒྱལ་དབང་ཡིད་བཞིན་ནོར་བུ་ཁྲི་ལོར་བརྟན་པར་ཤོག”ཅེས་འབོད་ཚིག་བསྒྲགས་པ་དང་། རླུང་རྟ་དགུང་ལ་གཏོར་བཞིན་སྐད་འབོད་གནང་ཡོད་འདུག་ལ། དེ་མ་ཐག་རྒྱ་གཞུང་གི་ཉེན་རྟོག་པ་ ༣༠ ལྷག་དང་། ཉེན་རྟོག་པའི་སྒྲིག་ཆས་གྱོན་མེད་པ་དེ་ལས་མང་བ་ཞིག་བཅས་འབྱོར་ཏེ། ཁོང་འཛིན་བཟུང་བཙན་འཁྲིད་བྱས་ཡོད་འདུག
ཤེས་གསལ་ལྟར་ན། གྲྭ་ཀུན་མཁྱེན་ལགས་སུ་ན་ཚ་ཞིག་གི་དབང་གིས་སྨན་ཁང་དུ་ཕྱིན་ཏེ་ཁ་སང་ཕྱི་དྲོར་གསེར་རྟ་རྫོང་ཐོག་ཏུ་འབྱོར་ཡོད་པ་དང་། དེ་རིང་ཕྱིར་རང་ཁྱིམ་དུ་ལོག་རྩིས་ཡོད་ཅིང་། ནང་མི་ཚོ་ཁོང་ལེན་དུ་ཡོང་ཡོད་པའི་ཁ་ཐུག་ལ་གནས་ཚུལ་དེ་བྱུང་ཡོད་འདུག
གྲྭ་ཀུན་མཁྱེན་ལགས་ནི་བཀྲ་ཤིས་དགེ་འཕེལ་གླིང་དགོན་པའི་གྲྭ་བ་ཡིན་པ་དང་། ཁོང་གི་ཕ་མིང་ལ་བློ་ཤེར་དང་མ་མིང་ལ་ཕྱུག་པོ་ཞུ་བཞིན་ཡོད་འདུག
གསར་འགོད་པ། དོན་འགྲུབ་བཀྲ་ཤིས།
གནས་ཚུལ་འདིའི་སྐོར་ཞིབ་ཏུ་མཁྱེན་འདོད་ཡོད་རིགས་ཚོས་ཁ་པར་ཨང་ ༩༧༣༦༣༣༤༤༤༨ འདི་ལ་འབྲེལ་བ་གནང་རོགས།
དཔའ་བོ་ཁྱོད་ཀྱི་སྙིང་དུ་བོད་སྡུག་པ།།
བོད་མི་ས་ཡ་དྲུག་གིས་ཁྱེད་ཉིད་གཅེས།།
དཔའ་བོ་ཁྱོད་ཀྱིས་བསྟན་འཛིན་རྒྱ་མཚོར་བཏུད།
བསྟན་འཛིན་རྒྱ་མཚོས་ཁྱོད་ཉིད་བརྩེ་བས་གཟིཊ།།