བོད་
ཕྱི་ཟླ་དང་པོའི་ཚེས་ཉེར་ལྔ་ཉིན་ནི་ཀུན་གཟིགས་པཎ་ཆེན་སྐུ་ཕྲེང་བཅུ་བ་མཆོག་དགོངས་པ་རྫོགས་པའི་ཉིན་མོ་རེད། བཞུགས་སྒར་ངྷ་རམ་ས་ལར་ཀུན་གཟིགས་མཆོག་ལ་དྲན་གསོའི་བགྲོ་གླེང་དང་། ཁོང་གི་མཛད་འཕྲིན་དང་དགོངས་བཞེད་སྐོར་ལ་ཞིབ་འཇུག་གི་དཔེ་དེབ་དབུ་འབྱེད་བྱེད་ཀྱི་འདུག ཀུན་གཟིགས་པཎ་ཆེན་སྐུ་ཕྲེང་བཅུ་བ་མཆོག་བོད་མི་རིགས་དང་ཁ་བྲལ་བའི་གྱོང་གུད་དེ་བགྲོ་གླེང་དང་ཞིབ་འཇུག་གིས་གསབ་ཐུབ་པ་ཞིག་མིན། ང་དགུ་ལོར་རྒྱ་གཞུང་གིས་བོད་སར་བཙན་འཛུལ་བྱས་ཏེ་བོད་པའི་ཕྱི་ཡི་རང་བཙན་ཤོར་ཡོད་པ་དང་། གྱ་དགུ་ལོར་ཀུན་གཟིགས་པཎ་ཆེན་རིན་པོ་ཆེ་མཆོག་དགོངས་པ་རྫོགས་ཏེ་བོད་པའི་ནང་གི་རང་བཙན་ཤོར་ཡོད། འདི་ངས་བཤད་འདོད་པའི་བགྲོ་གླེང་དེའི་བརྗོད་གཞི་ཡིན།
བོད་མིའི་ཁོག་པའི་སྙིང་དང་དཔྲལ་བའི་མིག་ཀུན་གཟིགས་པཎ་ཆེན་སྐུ་ཕྲེང་བཅུ་བ་མཆོག་དགོངས་པ་གཞན་དོན་དུ་གཤེགས་ཏེ་ལོ་ངོ་ ༢༤ ཕྱིན་སོང་། པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་ནང་འཁོར་དང་བཅས་པ་རྒྱ་ནག་གི་བཙོན་མུན་དུ་བཅུག་སྟེ་ལོ་ངོ་ ༡༨ ཕྱིན་སོང་། གུང་ཁྲན་གཞུང་གི་གཅེས་བའི་བུ་ཕྲུག་རྒྱལ་མཚན་ནོར་བུས་ཆོས་སྲིད་ཀྱི་མཛད་འཕྲིན་ཨུ་ཚུགས་ཀྱིས་བསྐྱངས་ཏེ་ལོ་ངོ་ ༡༧ ཕྱིན་སོང་། ཀུན་གཟིགས་མཆོག་དགོངས་པ་རྫོགས་ཏེ་ལོ་ངོ་ཉེར་བཞི་འདས་པའི་དེ་རིང་། ང་ཚོས་ཁོང་གི་མཛད་འཕྲིན་ལ་ཡི་རངས་བསྔགས་བརྗོད་ཞུས་ཏེ་སྡོད་པ་ལས་ཁོང་གི་མི་རིགས་སྙིང་སྟོབས་རྒྱུན་འཛིན་དང་སྐད་ཡིག་སྙིང་སྟོབས་སློབ་སྦྱོང་ལ་འབད་འབུང་བྱེད་དགོས།
ཉིས་སྟོང་བརྒྱད་ལོའི་ཞི་རྒོལ་སྐབས་བོད་ནང་གི་མཐོ་རིམ་སློབ་ཕྲུག་ཚོས་“བོད་མིའི་སྐྱིད་སྡུག་མཉམ་མྱོང་”ཞེས་པའི་རླབས་ཆེན་གྱི་འབོད་ཚིག་ཅིག་བསྒྲགས་ཡོད། དེ་ནི་ཀུན་གཟིགས་པཎ་ཆེན་རིན་པོ་ཆེ་མཆོག་གི་མི་རིགས་སྙིང་སྟོབས་བོད་རིགས་མཐོ་རིམ་སློབ་མའི་བྲང་གཞུང་ནས་སླར་ཡང་འཕར་ལྡིང་བྱས་པའི་རྡིག་སྒྲ་རེད། རྡིག་སྒྲ་འདི་བཙན་བྱོལ་ནང་གི་གཞོན་སྐྱེས་ཚོའི་བྲང་གཞུང་ནས་ཀྱང་གྲག་དགོས་ཀྱི་འདུག ལས་ལ་བརྩོན་ཞིང་དཔའ་ངར་ལྡན་པའི་བོད་མི་རིགས་ཀྱི་བུ་རབས་ཚ་རྒྱུད་ཀྱི་མཚན་སྙན་ལ་གནོད་པའི་ཤུལ་རྗེས་ཕྲ་མོ་ཙམ་ཡང་ངའི་མི་ཚེ་ནང་མི་འཇོག་པའི་དམ་བཅའ་བཞག་ཡོད་ཅེས་པའི་གད་རྒྱངས་དེ་བོད་པའི་མི་རབས་གསར་པ་ཚོ་དང་། ལྷག་པར་དུ་ནུབ་ཕྱོགས་ཡུལ་གྲུ་ཁག་གི་བོད་རིགས་གཞོན་སྐྱེས་ཚོའི་སྙིང་ཁམས་སུ་སྒྲོག་དགོས་ཀྱི་འདུག
ཉིས་སྟོང་ལོ་ཡས་མས་ནས་བོད་ཡུལ་མདོ་དབུས་ཁམས་གསུམ་ནང་ཕ་སྐད་གཙང་མའི་འགྲན་བསྡུར་ཞིག་དང་། ཐ་སྙད་གསར་བསྒྱུར་གྱི་རླབས་ཕྲེང་ཞིག་འཕྱུར་ཡོད། ཉིས་སྟོང་བཅུ་ལོའི་ཟླ་བ་དགུ་བར་རེབ་གོང་གི་སློབ་ཕྲུག་ཚོས། “མི་རིགས་འདྲ་མཉམ། སྐད་རིགས་རང་དབང་།”ཞེས་འབོད་ཚིག་བསྒྲགས་ཡོད། འདི་པཎ་ཆེན་སྐུ་ཕྲེང་བཅུ་བའི་སྐད་ཡིག་སྙིང་སྟོབས་ལ་དུས་རབས་ཉེར་གཅིག་པའི་ནང་སླར་ཡང་གསོན་ཤུགས་རྒྱས་པའི་གད་རྒྱངས་རེད། བྱེས་གྱར་བོད་རིགས་གཞོན་སྐྱེས་ཚོའི་ཁྲོད་སྙིང་སྟོབས་འདི་དར་སྤེལ་གཏོང་དགོས་ཀྱི་འདུག “ཁྱོད་ཚོས་བོད་སྐད་བཤད་པར་ངོ་ཚ་ན་མ་བཤད་ན་ཆོག་ལ། ཁྱོད་ཚོས་བོད་ལྭ་གྱོན་པར་ངོ་ཚ་ན་དེ་ཡང་མ་གྱོན་ན་ཆོག འོན་ཀྱང་ཁྱོད་ཚོའི་ཤ་དང་རུས་པ་ཇི་ལྟར་བྱ་རྒྱུ་ཡིན” ཞེས་པའི་པཎ་ཆེན་སྐུ་ཕྲེང་བཅུ་བའི་སྐད་ཡིག་སྙིང་སྟོབས་འདི་བཞེངས་སྐྲུན་བྱེད་དགོས་ཀྱི་འདུག
པཎ་ཆེན་སྐུ་ཕྲེང་བཅུ་བའི་ཞུམ་པ་མེད་པའི་མི་རིགས་སྙིང་སྟོབས་དང་སྐད་ཡིག་སྙིང་སྟོབས་གཉིས་བོད་པའི་མི་རབས་གསར་པ་ཚོ་དང་། ལྷག་པར་དུ་ནུབ་ཕྱོགས་ཡུལ་གྲུ་ཁག་གི་བོད་མི་གཞོན་སྐྱེས་ཚོར་བརྒྱུད་སྤྲོད་བྱེད་དགོས་ཀྱི་འདུག རང་ཉིད་ཀྱི་རིགས་རུས་བོད་རིགས་ཤིག་ཡིན་པ་དང་ཕ་སྐད་བོད་སྐད་ཡིན་པའི་སྤོབས་པ་དང་སྙིང་སྟོབས་གསར་བཞེངས་བྱེད་དགོས་ཀྱིན་འདུག མདོར་བསྒྲིལ་ན་བོད་པའི་མི་རབས་གསར་པ་རྣམས་ལ་ཀུན་གཟིགས་པཎ་ཆེན་ཨེར་ཏེ་ནི་མཆོག་གི་མི་རིགས་སྙིང་སྟོབས་དང་སྐད་ཡིག་སྙིང་སྟོབས་གསར་བཞེངས་བྱེད་དགོས་ཀྱི་འདུག
