བོད་མིའི་རང་སྐྱོང་གང་དུ་སླེབས་ཡོད།

རྒྱ་གར་བྱང་ཤར་བྷ་རོ་ཊ་བོད་རིགས་སློབ་ཕྲུག་དང་ས་གནས་སི་ཚོང་བ་ཚོར་དབུ་མའི་ལམ་དང་འབྲེལ་ཏེ་བོད་དོན་འཐབ་རྩོད་གནས་བབ་སྐོར་ལ་གཏམ་བཤད་གནང་ཡོད་འདུག

བཀྲ་ཤིས་རྒྱལ་མཚན་ལགས་ཀྱིས་གནས་ཚུལ་བཏང་འབྱོར་བྱུང་བ་ལྟར་ན། ཟླ་འདིའི་ཕྱི་ཚེས་ ༢༩ ཉིན་རྒྱབ་ཆུ་ཚོད་ ༡།༣༠ སྟེང་རྒྱ་གར་བྱང་ཤར་བྷ་རོ་ཊ་དགུན་ཚོང་རུ་ཁག་གི་ཚོགས་ཁང་དུ། དབུ་མའི་ལམ་མི་མང་ལས་འགུལ་ཁང་གི་ས་གནས་ཚོགས་མི་དབང་འདུས་ཚེ་རིང་མཁར་ལོ་ལགས་ཀྱི་གོ་སྒྲིག་འོག ངྷ་རམ་ས་ལ་དབུས་དབུ་མའི་ལམ་མི་མང་ལས་འགུལ་ཁང་གི་རིག་གཞུང་འགན་འཛིན་བློ་བཟང་ཆོས་འབྱོར་ལག་གདན་ཞུའི་ཐོག ཨེམ་ཡེས་ཡུ་(MSU)གཙུག་ལག་སློབ་གྲྭ་ཆེན་མོར་སློབ་སྦྱོང་བྱེད་བཞིན་པའི་བོད་རིགས་སློབ་ཕྲུག་དང་། དགུན་ཚོང་རུ་ཁག་གི་ཚོགས་མི་བཅས་མི་མང་ ༨༠ ཙམ་ལ། ༼ རྒྱ་ནག་གི་རྩ་ཁྲིམས་འོག་བོད་མིས་རང་སྐྱོང་རྩོད་པའི་གནས་བབ་ད་ལྟ་གང་དུ་སླེབས་ཡོད་དམ། ༽ཅེས་པའི་བརྗོད་གཞིའི་ཐོག་གཏམ་བཤད་གནང་སོང་།

གཏམ་བཤད་མགོ་འཛུགས་ཀྱི་ཐོག་མར་གོ་སྒྲིག་པ་དབང་འདུས་ཚེ་རིང་ལགས་ཀྱིས་མཐོ་རིམ་སློབ་མ་རྣམས་བོད་ཀྱི་མ་འོངས་མགོ་ཁྲིད་པར་ངོས་འཛིན་གནང་གི་ཡོད་པ་ལྟར། སློབ་ཆེན་པ་ཚོས་ད་ལྟ་ང་ཚོས་རང་སྐྱོང་རྩོད་བཞིན་པའི་གནས་བབ་གང་དུ་སླེབས་ཡོད་མེད་དང་། གཞན་ཡང་བོད་རང་བཙན་འཐབ་རྩོད་ཀྱི་ཕྱོགས་གཉིས་ཀྱི་གནས་སྟངས་ཞིབ་ཚགས་མཁྱེན་ཆེད་བགྲོ་གླེང་འདི་གོ་སྒྲིག་ཞུས་པ་ཡིན་ཞེས་ངོ་སྤྲོད་གནང་སོང་།

བློ་བཟང་ཆོས་འབྱོར་ལགས་ཀྱིས་གཏམ་བཤད་སྐབས་དོན་ཚན་ ༦ ཏུ་དབྱེ་སྟེ་གསུངས་རྒྱུར། དང་པོ། རྒྱ་ནག་གི་རྩ་ཁྲིམས་ནང་ས་ཁོངས་རང་སྐྱོང་སྐོར་འགན་ལེན་གང་ཡོད་མེད་དང་། བོད་མིས་རྩོད་བཞིན་པའི་རང་སྐྱོང་གི་སྙིང་དོན་ག་རེ་ཡིན་པ། དེ་ལ་རྒྱ་ཕྱོགས་ནས་ལན་འདེབས་ག་རེ་བྱས་ཡོད་མེད། བོད་མིའི་ཕྱོགས་ནས་ཕྱོགས་གཉིས་ཀྱི་ལྟ་ཚུལ་མི་མཐུན་པ་སེལ་ཐབས་འགྲེལ་བརྗོད་ཅི་བྱས། གཞན་ཡང་། བོད་ཕྱི་ནང་གཉིས་ནས་ད་བར་རང་སྐྱོང་རྩོད་པའི་བྱུང་རིམ། དེ་བཞིན་མི་རིགས་ས་ཁོངས་རང་སྐྱོང་ལག་བསྟར་སྐབས་ས་མཚམས་བསྒྱུར་བཅོས་ཐད་དམིགས་བཀར་གྱིས་ནབཤད་པ་དང་། མཇུག་མཐར་རྒྱ་བོད་ཕྱོགས་གཉིས་ནས་རང་སྐྱོང་ཐོབ་ཐབས་གཟབ་ནན་བྱེད་དགོས་པ་རེ་ཡིན་མིན་བཅས་ཀྱི་གཏམ་བཤད་སྤེལ་སོང་།

གཏམ་བཤད་གྲུབ་མཚམས་སློབ་ཕྲུག་ཚོས་དབུ་མའི་ལམ་གྱི་སྐོར་ལ་དོགས་གཅོད་དང་། བོད་ཀྱི་ལོ་རྒྱུས་ཀྱི་གནས་བབ་སོགས་ཕྱོགས་ཡོངས་ནས་དྲི་བ་དྲིས་ལན་ཆུ་ཚོད་ ༣ ཙམ་རིང་གནང་རྗེས། སིལ་ཚོང་ཚོགས་པའི་ཚོགས་གཙོས་ཐུགས་རྗེ་ཆེ་ཞུས་པ་དང་སྦྲགས། དེ་རེབ་ཀྱི་གཏམ་བཤད་དེ་བརྒྱུད་ནས་དབུ་མའི་ལམ་གྱི་སྐོར་ལ་དོགས་པ་རྣམ་རྟོག་མང་པོ་ཞིག་སེལ་ཐུབ་སོང་ཚུལ་བརྗོད་བྱུང་།

ཕྱི་ཚེས་ ༣༠ ཉིན་གྱི་ཕྱི་དྲོར་སླར་ཡང་དོ་སྣང་ཅན་གྱི་སློབ་ཕྲུག་སྐོར་ཞིག་གིས་དབུ་མའི་ལམ་གྱི་སྐོར་དང་རྒྱ་ནག་གི་རྩ་ཁྲིམས་སྐོར་ལ་དོགས་འདྲི་གནང་བ་དང་། སྐབས་དེར་བློ་བཟང་ཆོས་འབྱོར་ལགས་ཀྱིས་རྒྱ་ནག་གིས་རྩ་ཁྲིམས་ཀྱི་སྒྲོམ་གཞི་དང་། རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་འགན་དབང་ལས་དོན་གནང་སྒོ་ཁག མི་རིགས་ས་ཁོངས་རང་སྐྱོང་ལ་ཆ་རྐྱེན་ག་རེ་བསྐྲུན་མིན། ཡུལ་མིའི་འགན་དབང་བཅས་ཀྱི་སྐོར་གོ་རྟོགས་སྤེལ་སོང།

གསར་འགོད་པས་རྒྱལ་རབས་ཆེད་སྦྱོང་བ་སློབ་ཕྲུག་རྟ་མགྲིན་ཚེ་དབང་ལགས་སུ། དེ་རིང་གི་བགྲོ་གླེང་སྐོར་ལ་བསམ་ཚུལ་གང་ཡོད་དྲིས་པར། རང་ཉིད་དབུ་མའི་ལམ་ལ་རྒྱབ་སྐྱོར་དང་ཡིད་ཆེས་བྱེད་མཁན་ཞིག་ཡིན་ཡང་། དེ་རིང་ལས་ལྷག་ཅིག་དབུ་མའི་ལམ་གྱི་བྱུང་རིམ་དང་། ནང་དོན། འཐབ་རྩོད་བྱ་ཕྱོགས་བཅས་ཀྱི་ཐད་གོ་རྟོགས་གསལ་བོ་མ་བྱུང་། དེ་རིང་གི་བགྲོ་གླེང་འདིས་གནད་དོན་མང་པོ་ཤེས་རྟོགས་བྱེད་བཅུག་སོང་བས་དབུ་མའི་ལམ་ནས་རང་སྐྱོང་རྩོད་པ་རེ་བ་གསར་བ་ཞིག་གནང་སོང་ཞེས་སོགས་བརྗོད་བྱུང་།

ཐེངས་འདིར་སིལ་ཚོང་བ་སློབ་ཕྲུག་འགའ་རེས་དབུ་མའི་ལམ་གྱི་ཚོགས་མིའི་ཁོངས་སུ་ཞུགས་འདོད་ཡོད་སྐོར་བཤད་སྐབས། བློ་བཟང་ཆོས་འབྱོར་ལགས་ཀྱིས་ལས་འགུལ་ཁང་འདིའི་དམིགས་ཡུལ་ནི་ཚོགས་མིའི་གྲངས་ཚད་སྤར་རྒྱུ་དེ་མིན་པར། གཙོ་བོ་སོ་སོའི་ངོས་ནས་རྒྱུ་མཚན་གསལ་བོ་ར་འཕྲོད་པའི་ཐོག་ནས་རང་འགན་རང་འཁུར་གནང་རྒྱུ་དེ་གལ་ཆེན་ཡིན་སྐོར་བརྗོད་བྱུང་།