ཁ་སང་བོད་མདོ་སྨད་བླ་བྲང་བསང་ཆུ་རྫོང་དུ། རྒྱ་གཞུང་གིས་བོད་མི་ ༦ ལ་ཉེས་འཛུགས་ཁྲིམས་ཐག་བཅད་འདུག
ཁ་སང་ཕྱི་ཟླ་ ༡ ཚེས་ ༣༡ ཉིན། བོད་མདོ་སྨད་བླ་བྲང་བསང་ཆུ་རྫོང་གི་རྒྱ་གཞུང་མི་དམངས་ཁྲིམས་ཁང་གིས། བོད་མི་པདྨ་དོན་འགྲུབ་དང་། སྐལ་བཟང་རྒྱ་མཚོ། པདྨ་འཚོ། ལྷ་མོ་དོན་གྲུབ་བཅས་མི་ ༤ ལ་བསམ་བཞིན་མི་བསད་པའི་ནག་ཉེས་དང་། གདུགས་དཀར་རྒྱལ། གཡང་མོ་སྐྱིད་གཉིས་ལ་བསྙད་འཚོལ་ཟིང་ཆ་བསླངས་པའི་ཉེས་འཛུགས་བཅས་བྱས་ཏེ་བཙོན་འཇུག་ཁྲིམས་ཐག་བཅད་འདུག
དེ་རིང་རྒྱ་གཞུང་ཞིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན། བོད་མི་པདྨ་དོན་འགྲུབ་ལ་ལོ་ ༡༢ བཙོན་འཇུག་ཁྲིམས་ཐག་དང་ལོ་ ༢ ཆབ་སྲིད་ཁེ་དབང་བཙན་འཕྲོག སྐལ་བཟང་རྒྱ་མཚོར་ལོ་ ༡༡ བཙོན་འཇུག་ཁྲིམས་ཐག་དང་ལོ་ ༡ ཆབ་སྲིད་ཁེ་དབང་བཙན་འཕྲོག པདྨ་འཚོར་ལོ་ ༨ བཙོན་འཇུག་ཁྲིམས་ཐག ལྷ་མོ་དོན་འགྲུབ་ལ་ལོ་ ༧ བཙོན་འཇུག་ཁྲིམས་ཐག གདུགས་ཀར་རྒྱལ་ལ་ལོ་ ༤ བཙོན་འཇུག་ཁྲིམས་ཐག གཡང་མོ་སྐྱིད་ལ་ལོ་ ༣ བཙོན་འཇུག་ཁྲིམས་ཐག་བཅས་བཅད་འདུག
སྔར་ལོའི་ཕྱི་ཟླ་ ༡༠ ཚེས་ ༢༣ ཉིན། མདོ་སྨད་བླ་བྲང་བསང་ཆུ་རྫོང་དྲག་ཆས་ཉེན་རྟོག་ཁང་གི་སྒོ་འགྲམ་ཏུ། རྒྱལ་གཅེས་དཔའ་བོ་རྡོ་རྗེ་རིན་ཆེན་ལགས་ཀྱིས་རང་ལུས་མེར་བསྲེགས་ཀྱིས་རྒྱ་གཞུང་གི་དྲག་གནོན་དབང་སྒྱུར་སྲིད་བྱུས་ལ་ངོ་རྒོལ་བྱས་ཏེ་སྐུ་གྲོངས་སྐབས། རྒྱ་གཞུང་ཉེན་རྟོག་དམག་མིས་ཁོང་གི་སྐུ་ཕུང་བཙན་འཁྱེར་བྱེད་རྩིས་བྱས་པར། ས་གནས་བོད་མི་ཚོས་རྒྱ་ལག་ཏུ་ཤོར་མ་བཅུག་པར་འདས་པོ་ཁོང་གི་སྐུ་ཕུང་སོ་སོའི་ཁྱིན་དུ་གདན་འདྲེན་བྱས་ཡོད་སྟབས། རྒྱ་གཞུང་གིས་སྐུ་ཕུང་གདན་འདྲེན་བྱེད་མཁན་བོད་མི་ཚོར་བསམ་བཞིན་མི་བསད་པ་དང་ཟིང་ཆ་བསླངས་སོགས་ཀྱི་ཉེས་འཛུགས་བྱས་ཏེ་བཙོན་འཇུག་ཁྲིམས་ཐག་བཅད་པ་ཞིག་རེད།
ཉེ་སྔོན་རྒྱ་གཞུང་དབུས་ཆེས་མཐོའི་ཁྲིམས་ཁང་དང་ཞིབ་དཔྱོད་ཁང་། དབུས་ཉེན་རྟོག་སྡེ་ཁག་གསུམ་གྱིས་མཉམ་འབྲེལ་ཐོག བོད་ནང་གི་རང་ལུས་མེར་བསྲེགས་ལ་གདུང་སེམས་མཉམ་སྐྱེད་གནང་མཁན་བོད་མི་ཚོར་དྲག་རྡུང་ཁྲིམས་གཅོད་བྱ་ཆེད། རྒྱ་ནག་གི་བཅའ་ཁྲིམས་དང་འགལ་བའི་ཁྲིམས་ཡིག་ཅིག་བཟོས་ཏེ་ས་གནས་ཁག་ཏུ་འགྲེམས་བསྒྲགས་བྱས་ཡོད།
གསར་འགོད་པ། ཚེ་རིང་རྒྱལ།
