ཇོན་ཀེ་རའེ་ཡིས་དངོས་སུ་ལས་འཁུར།

ཕྱི་ཟླ་ ༢ ཚེས་ ༡ ཉིན། ཇོན་ཀེ་རའེ་ཡིས་དངོས་སུ་ཨ་རིའི་རྒྱལ་དོན་དྲུང་ཆེ་ལས་འཁུར་ཞུ་རྒྱུ་ཡིན་འདུག

ཕྱི་ཚེས་ ༢༨ ཉིན་ཨ་རིའི་གྲོས་ཚོགས་གོང་མའི་ཕྱི་འབྲེལ་ཚོགས་ཆུང་གིས། ཉེ་སྔོན་སྲིད་འཛིན་ཨོ་བྷ་མས་ཧེ་ལཱ་རེའི་ཚབ་ཏུ་གྲོས་ཚོགས་འཐུས་མི་ཇོན་ཀེ་རའེ་(John Kerry) ཨ་རིའི་རྒྱལ་དོན་དྲུང་ཆེར་མིང་འདོན་བྱས་ཡོད་པ་དང་། མཐའ་མའི་ཐག་གཅོད་ནི་གྲོས་ཚོགས་ནང་བྱ་དགོས་པ་ལྟར།  ཕྱི་ཚེས་ ༢༩ ཉིན་གྱི་ཨ་རིའི་གྲོས་ཚོགས་ར་བའི་ནང་ཇོན་ཀེ་རའེ་ཨ་རིའི་རྒྱལ་དོན་དྲུང་ཆེར་མང་མོས་རྒྱབ་སྐྱོར་ཐོབ་ཡོད་ལ། ཕྱི་ཟླ་ ༢ ཚེས་ ༡ ཉིན་ཨ་རིའི་རྒྱལ་དོན་དྲུང་ཆེ་ཧེ་ལཱ་རེ་(Hillary Clinton) ཡི་ལས་ཁུར་རྫོགས་ཏེ། གསར་དུ་འདེམས་ཐོན་བྱས་པའི་རྒྱལ་དོན་དྲུང་ཆེ་ཇོན་ཀེ་རའེ་ཡིས་དངོས་སུ་ལས་འཁུར་ཞུ་རྒྱུ་ཡིན་འདུག 

རང་ལོ་ ༦༩ སོན་པ་ཇོན་ཀེ་རའེ་ནི་ཝེ་ཊི་ནམ་དམག་འཁྲུག་ལ་ཞུགས་པའི་ཤུལ་རྗེས་ཅན་གྱི་དམག་མི་ཟུར་པ་དང་། ལོ་ ༢༨ རིང་ཨ་རིའི་ཕྱི་འབྲེལ་ཚོགས་ཆུང་གི་ཚོགས་མི་དང་འདས་པའི་ལོ་ ༤ རིང་ཕྱི་འབྲེལ་ཚོགས་ཆུང་གི་མགོ་གཙོའི་འགན་ཁུར་ཡོད་པ་དང་། ༡༩༨༥ ནས་གྲོས་ཚོགས་གོང་མའི་ནང་གི་དམངས་གཙོ་ཚོགས་པའི་གྲོས་ཚོགས་འཐུས་མི་དང་། ༢༠༠༤ ལོའི་དམངས་གཙོ་ཚོགས་པའི་སྲིད་འཛིན་འོས་མི་བཅས་བྱས་མྱོང་ཡོད་ཅིང་། ཁོང་ལ་ཨ་རིའི་རྒྱལ་ཡོངས་སུ་དོ་སྣང་སླེབས་གཞི་གཙོ་བོ་ནི། ཝེ་ཊི་ནམ་ནང་གི་ཨ་རིའི་དམག་འཁྲུག་ཁྲོད་ཁོང་ནི་ཤུལ་རྗེས་གཟེངས་སྟོན་ཐོབ་མཁན་གྱི་དམག་མི་དཔའ་ངར་ཅན་ཞིག་ཡིན་ཡང་། དམག་འཁྲུག་ནས་ཕྱིར་ལོག་རྗེས་ཁོས་ཨ་རིའི་དམག་འཁྲུག་ལ་མཐའ་གཅིག་ཏུ་ངོ་རྒོལ་བྱས་པ་ལ་བརྟེན་ནས་སྐད་གྲགས་ཆགས་པ་མ་ཟད་རིམ་བཞིན་གྲོས་ཚོགས་སུ་བསླེབས།

ཨ་རིའི་རྒྱལ་དོན་དྲུང་ཆེ་གསར་པ་ཇོན་ཀེ་རའེ་ཡིས་ལས་ཁུར་དམ་འབུལ་གྱི་གཏམ་བཤད་སྐབས། འཛམ་གླིང་ཁོར་ཡུག་དང་གནམ་གཤིས་འགྱུར་ལྡོག་གི་གནད་དོན་ནི་མིའི་རིགས་ཀྱི་འཚོ་གནས་ལ་འཕྲད་བཞིན་པའི་འཇིགས་ཉེན་ཞིག་ཡིན་པ་དང་། གནད་དོན་དེར་ཨ་རིས་གཙོ་འགན་འཁུར་དགོས་པ་དང་། ཁོང་རང་ཉིད་ཀྱིས་ཀྱང་གནད་དོན་དེར་ཤུགས་གནོན་རྒྱག་འཆར་ཡོད་སྐོར་བརྗོད་འདུག་ལ། རྒྱལ་སྤྱིའི་ཁོར་ཡུག་སྲུང་སྐྱོབ་པ་དང་ཆེད་མཁས་ཚོས་ཁོང་ལ་རེ་བ་ཆེན་པོ་ཞིག་བྱེད་ཀྱི་ཡོད་འདུག

གསར་འགོད་པ། བནྡེ་སྐྱབས།