མཚོ་ལྷོའི་སློབ་ཕྲུག་ཚོར་ཁྲིམས་ར་ཚོགས་འདུག

ཁ་སང་གཟའ་པ་སངས་ཉིན་བོད་མདོ་སྨད་མཚོ་ལྷོ་ཁུལ་དུ་སློབ་ཕྲུག་ཚོར་ཁྲིམས་ཐག་གཅོད་སྐབས། ཁྲིམས་རའི་ནང་མང་ཚོགས་ཀྱིས་སྐད་འབོད་ངོ་རྒོལ་བྱས་མཐར་ཁྲིམས་ར་གྲོལ་དགོས་བྱུང་འདུག

ཁ་སང་ཕྱི་ཟླ་ ༢ ཚེས་ ༡ ཉིན། མཚོ་སྔོན་ཞིང་ཆེན་མཚོ་ལྷོ་ཁུལ་མི་དམངས་ཁྲིམས་ཁང་གིས་ཁྲིམས་ར་ཚོགས། མཚོ་ལྷོ་ཁུལ་ལས་རིགས་ལག་རྩལ་སློབ་གྲྭའམ་གསོ་རིག་སློབ་གྲྭའི་སློབ་ཕྲུག་ ༨ དང་། འཁྱམ་རུ་དགོན་པའི་གྲྭ་བ་ ༢ བཅས་ཁྲིམས་ཐག་གཅོད་རྩིས་བྱས་ཡོད་ཀྱང་།  ཁྲིམས་རའི་ནང་ས་གནས་བོད་རིགས་མང་ཚོགས་ཀྱིས་ངོ་རྒོལ་སྐད་འབོད་བྱས་པར་བརྟེན་ནས།  ཉིན་དེར་ཁྲིམས་ཐག་གཅོད་མ་ཐུབ་པར་ཁྲིམས་ར་གྲོལ་དགོས་བྱུང་ཡོད་འདུག 

བཀྲ་ཤིས་ལེགས་ཀྱིས་འདི་གར་གནས་ཚུལ་ཁུངས་ལྡན་བརྗོད་པ་ལྟར་ན།  ལོ་སྔོན་མའི་ཕྱི་ཟླ་ ༡༡ ཚེས་ ༢༦ ཉིན་བོད་མདོ་སྨད་མཚོ་ལྷོ་ཁུལ་གྱི་སྲིད་འཛིན་ལྟེ་གནས་གྲོང་ཁྱེར་ཆབ་ཆ་རུ་ཁུལ་གསོ་རིག་སློབ་གྲྭའམ་ལས་རིགས་ལག་རྩལ་སློབ་གྲྭའི་སློབ་མས་ཞི་བའི་ངོ་རྒོལ་ཁྲོམ་སྐོར་བྱུང་རྗེས།  རྒྱ་གཞུང་ཉེན་རྟོགས་པའི་སྔ་ཕྱིར་མཚོ་ལྷོ་ཁུལ་གྱི་རྫོང་ཁག་ལྔའི་སློབ་ཕྲུག་ ༢༠ ལྷག་འཇུ་བཟུང་བཙན་ཁྲིད་ཀྱིས་གཅར་རྡུང་འདྲི་བརྩད་བྱས་རྗེས།  སློབ་ཕྲུག་ ༡༦ ལ་མུ་མཐུད་བཀག་བསྐྱིལ་འདྲི་གཅོད་བྱས་མཐར།  དེའི་ཁྲོད་ཀྱི་སློབ་ཕྲུག་ ༨ དང་འཁྱམ་རུ་དགོན་པའི་གྲྭ་བ་ ༢ བཅས་ལ་ཁྲིམས་ཐག་གཅོད་རྒྱུ་གཏན་ཁེལ་བྱས་ཡོད་འདུག

ཁ་སང་ཕྱི་ཟླ་ ༢ ཚེས་ ༡ ཉིན་མཚོ་ལྷོ་ཁུལ་མི་དམངས་ཁྲིམས་ཁང་དུ་ཁྲིམས་ར་ཚོགས་གཏན་ཁེལ་ཡོད་སྟབས།   ཁྲིམས་ཐག་འཆར་གྱི་སློབ་ཕྲུག་ ༨ དང་འཁྱམ་རུ་དགོན་པའི་གྲྭ་བ་ ༢ བཅས་ཀྱི་ནང་མི་ཉེ་འབྲེལ་དང་།  དེ་བཞིན། མཚོ་ལྷོ་ཁུལ་གྱི་ཁོངས་གཏོགས་གསེར་ཆེན་དང་ཁྲི་ཀ།  མང་ར། འབའ། བྲག་དཀར་བཅས་རྫོང་ཁག་ལྔའི་ས་གནས་བོད་རིགས་ཡུལ་མི་མང་པོ་ཁྲིམས་ཐག་གཅོད་སར་འཛོམས་ཡོད་པ་དང་།   ས་གནས་རྒྱ་གཞུང་གིས་ཁྲིམས་རའི་ནང་ཉེན་རྟོག་པ་མང་པོ་བཀྲམས་ཏེ་ཟུར་ཉན་བོད་རིགས་མང་ཚོགས་ཚོར་པར་དང་བརྙན་སོགས་ལེན་མི་ཆོག་པའི་བཀག་སྡོམ་ནན་བྱས་ཡོད་མ་ཟད། ཁྲིམས་རའི་ཕྱི་ལོགས་སུའང་ཉེན་རྟོག་པ་འབོར་ཆེན་འགྲེམས་འཇོག་གིས་ལྟ་རྟོགས་བྱས་ཡོད་འདུག 

ཁྲིམས་ར་ཚོགས་ཏེ་ཁྲིམས་གཅོད་སྟ་གོན་བྱེད་སྐབས།  ཁྲིམས་རའི་ནང་གི་བོད་རིགས་མང་ཚོགས་རྣམས་ཀྱིས་མཉམ་གཅིག་ཏུ་སྐད་བརྒྱབ་སྟེ།  སློབ་ཕྲུག་དང་གྲྭ་བ་དེ་དག་གིས་ཁྲིམས་ཐག་གཅོད་པའི་ནག་ཉེས་གང་ཡང་བསགས་མེད་ལ། གལ་སྲིད་ཁོ་ཚོར་ཁྲིམས་ཐག་བཅད་པ་ཡིན་ན། རྫོང་ཁག་ལྔའི་ས་གནས་བོད་རིགས་ཡུལ་མི་ཚོས་མུ་མཐུད་ངོ་རྒོལ་བྱ་རྒྱུ་ཡིན་སྐོར་བརྗོད་དེ།  ཁྲིམས་རའི་ནང་གི་ཁྲིམས་ཞིབ་པ་དང་ཉེན་རྟོག་པ།  ས་གནས་བོད་རིགས་མང་ཚོགས་བཅས་ཀྱི་བར་ཁ་འཛིང་ཤོར་ཏེ་ཟིང་ཆ་བྱུང་བར་བརྟེན།  ཉིན་དེར་ཁྲིམས་ཐག་གཅོད་ཐུབ་མེད་པ་མ་ཟད།  མ་འོངས་པར་བསྐྱར་དུ་ཁྲིམས་ར་འཚོགས་རྒྱུ་ཡིན་མིན་སོགས་གསལ་ཁ་གང་ཡང་མ་བྱས་པར་ཁྲིམས་ར་གྲོལ་ཡོད་འདུག 

རྒྱ་གཞུང་གིས་ཁྲིམས་རར་ཁྲིད་ཡོང་བའི་སློབ་ཕྲུག་བརྒྱད་དང་གྲྭ་བ་གཉིས་ཀྱི་མིང་དང་ལོ་ཚད་སོགས་གསལ་བོ་ཤེས་རྟོགས་བྱུང་མེད་ཅིང་།  སློབ་ཕྲུག་བརྒྱད་པོའི་ཁྲོད་རྫོང་ཁག་ལྔའི་སློབ་ཕྲུག་ཚུད་ཡོད་འདུག 

ཉེ་སྔོན་སུད་སིར་གནས་བཞུགས་ཤ་བོ་རྡོ་རྗེ་ལགས་སུ་བོད་ནས་གནས་ཚུལ་འབྱོར་བ་ལྟར་ན།  སྔར་ལོའི་ཕྱི་ཟླ་ ༡༢ ཚེས་ ༥ ཉིན་རྒྱ་གཞུང་ཉེན་རྟོག་པས་སློབ་ཕྲུག་རབ་བརྟན་དང་དབང་འདུས་ཚེ་རིང་། བྱམས་པ་ཚེ་རིང་། ཆོས་སྐྱོང་། བཀྲ་ཤིས་ཀུན་བཟང་། རྡོ་ལ་ཚེ་རིང་། སངས་རྒྱས་དོན་གྲུབ། ཀུན་བཟང་འབུམ་བཅས་ལ་ལོ་ལྔ་རེའི་བཙོན་འཇུག་ཁྲིམས་ཐག་གཅོད་རྒྱུ་ཡིན་སྐོར་བརྗོད་ཡོད་པ་རེད། དེ་བཞིན། མཚོ་ལྷོ་ཁུལ་གྱི་སློབ་མའི་ངོ་རྒོལ་གནས་ཚུལ་ཕྱིར་བསྒྲགས་བྱས་པའི་ཉེས་མིང་འོག་འཁྱམ་རུ་དགོན་པའི་གྲྭ་གསུམ་སྔ་ཕྱིར་འཇུ་བཟུང་བྱས་ཡོད་རྣམས་ནི།  གྲྭ་བཟང་གྲགས་དང་ཡེ་ཤེས་བཟང་པོ། གསུང་རབ་རྒྱ་མཚོ་གསུམ་ཡིན་པ་རེད།

གསར་འགོད་པ། ཚེ་རིང་རྒྱལ།