གདུང་སེམས་མཉམ་སྐྱེད་ཀྱི་ལས་འགུལ་འདིས་རྒྱ་གཞུང་ལ་བརྡ་ལན་གསལ་བོ་ཞིག་སྤྲད་ཡོད།

བོད་མིའི་གདུང་སེམས་མཉམ་སྐྱེད་ལས་འགུལ་གྱི་ཉིན་མཐའ་མར་རྒྱ་གར་གྱི་གྲོས་ཚོགས་འཐུས་མི་དང་ཆབ་སྲིད་ཚོགས་པ་ཁག་གི་མི་སྣ་སུམ་ཅུ་ལྷག་གིས་བོད་དོན་ཐོག་གཏམ་བཤད་དང་། སྤྱི་འཐུས་ཚོགས་གཞོན་དང་སྲིད་སྐྱོང་བློ་བཟང་སེང་གེ་རྣམ་གཉིས་ཀྱིས་མཇུག་བསྡོམས་གཏམ་བཤད་བཅས་གནང་སྟེ་ལས་འགུལ་མཇུག་སྒྲིལ་ཡོད།

དེ་རིང་ཕྱི་ཚེས་ ༢ ཉིན་ཏེ། བཀའ་སྤྱི་ཐུན་མོང་གི་གོ་སྒྲིག་གནང་བའི་བོད་མིའི་གདུང་སེམས་མཉམ་སྐྱེད་ཀྱི་ཉིན་མཐའ་མར། སྲིད་སྐྱོང་མཆོག་གཙོས་པའི་བཀའ་བློན་རྣམ་པ་དང་། སྤྱི་འཐུས་ཚོགས་གཙོ་གཞོན་གཉིས་ཀྱིས་དབུས་པའི་སྤྱི་འཐུས་རྣམ་པ། ཕྱོགས་མཐའ་ཁག་ནས་ཕེབས་པའི་སྐྱ་སེར་བོད་མི་  ༦༠༠༠ ལྷག་དང་། རྒྱ་གར་བོད་དོན་རྒྱབ་སྐྱོར་བ་ ༡༥༠༠ ལྷག་བཅས་ཁྱོན་མི་མང་ ༧༥༠༠ བརྒལ་བ་ཇན་ཏིར་མན་ཊིར་ས་གནས་སུ་འདུ་འཛོམས་གནང་སྟེ། རྒྱ་གར་གྱི་ཕྱི་སྲིད་དང་དཔལ་འབྱོར་བློན་ཆེན་ཟུར་པ་དང་། བྷེ་ཇེ་པེ་ཚོགས་པའི་ཆབ་སྲིད་མགོ་ཁྲིད་བགྲེས་པོ་སྐུ་ཞབས་ཡཱ་ཝན་སེན་ (Yaswant Sinha) མཆོག་དང་། རྒྱ་གར་གྱི་བྷེ་རྗེ་པེ་ཆབ་སྲིད་ཚོགས་པའི་མགྲིན་ཚབ་པ་གཙོ་བོ་སྐུ་ཞབས་རཱ་ཝེན་ཤཱང་ཀེར་ (Ravi Shakar) མཆོག རྒྱ་གར་གྱི་ཅཱན་ལོ་ཁི་ཞཱ་ཊེ་ཆབ་སྲིད་ཚོགས་པའི་ཚོགས་གཙོ་སྐུ་ཞབས་རཱན་ཝེ་ལཱ་པ་ཝན་ (Ranvillas Pawan) མཆོག རྒྱ་གར་གྱི་གྲོས་ཚོགས་འཐུས་མི་ཨེན་ཊར་སེན་ནཱམ་ངྷ་རོ་ (Inder Singh Namdari) མཆོག རྒྱ་གར་བོད་དོན་རྒྱབ་སྐྱོར་ཚོགས་པའི་དབུས་འབྲེལ་མཐུད་པ་ཊོག་ཊར་ཨེན་ཊེ་ཀེར་ (Dr.NK Trikha) མཆོག་བཅས་རྒྱ་གར་གྱི་ཀང་རི་སི་དང་བྷེ་རྗེ་པེ་ཆབ་སྲིད་ཚོགས་པ་ཆེ་ཁག་གཉིས་གཙོས་པའི་ཆབ་སྲིད་ཚོགས་པ་ཁག་ ༧ དང་། རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པ་དང་ཧིན་བོད་མཛའ་འབྲེལ་ཚོགས་པའི་གཙོས་པའི་བོད་དོན་རྒྱབ་སྐྱོར་ཚོགས་པ་ཁག་ ༡༠ བཅས་ཀྱི་གནད་ཡོད་མི་སྣ་ ༣༠ ལྷག་གིས་གཏམ་བཤད་གནང་སོང་ལ། མཇུག་ཏུ་སྤྱི་འཐུས་ཚོགས་གཞོན་མཆོག་དང་སྲིད་སྐྱོང་མཆོག་རྣམ་གཉིས་ཀྱིས་མཇུག་བསྡོམས་གསུང་བཤད་དང་། བོད་ཀྱི་ཟློས་གར་ཚོགས་པའི་སྣེ་འཁྲིད་འོག་བདེན་ཚིག་སྨོན་ལམ་གསུང་འདོན་དང་འཕགས་བོད་རྒྱལ་ཁབ་གཉིས་ཀྱི་རྒྱལ་གླུ་གྱེར་འདོན་བཅས་གནང་སྟེ་ལས་འགུལ་མཇུག་སྒྲིལ་གནང་སོང་།

དེ་རིང་གི་གཏམ་བཤད་སྐབས་རྒྱ་གར་གྱི་ཕྱི་སྲིད་དང་དཔལ་འབྱོར་བློན་ཆེན་ཟུར་པ་དང་། བྷེ་ཇེ་པེ་ཆབ་སྲིད་ཚོགས་པའི་མགོ་ཁྲིད་བགྲེས་པོ་སྐུ་ཞབས་ཡཱ་ཞི་ཝན་སེན་མཆོག་གིས། རྒྱ་ནག་གཞུང་གིས་བོད་པའི་ངོ་བོ་རྩ་མེད་གཏོང་ཆེད་བོད་ནང་གི་བོད་མི་ཚོར་སྡུག་སྦྱོང་མནར་གཅོད་དང་དྲག་གནོན་གྱི་སྲིད་ཇུས་འདྲ་མིན་ལག་བསྟར་བྱེད་ཀྱི་ཡོད་ནའང་། སྡུག་རྩུབ་དང་འཐབ་རྩོད་དེ་མཐའ་ཡོད་པ་ཞིག་ཡིན་སྟབས། བོད་མི་ཚོ་སེམས་ཤུགས་མ་ཆགས་པར་མུ་མཐུད་འཐབ་རྩོད་རྒྱུན་འཁྱོངས་གནང་དགོས་པ་དང་། དེ་ལྟར་གནང་བ་ཡིན་ན། ནམ་ཞིག་རྒྱ་མིའི་བོད་གཡུག་ཏེ་ཕྱིར་རང་སར་ལོག་འགྲོ་བའི་ཉི་མ་ཤར་སྲིད་པར་ཁོང་ཉིད་ལ་ཡིད་ཆེས་ཡོད་སྐོར་གསུངས་བྱུང་བ་མ་ཟད། ཁོང་ཉིད་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་འབྲེལ་མཐུད་པ་ཡིན་པའི་ངོས་ནས། འདི་ལོའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་རྒྱ་གར་གྲོས་ཚོགས་ཀྱི་ཚོགས་གཙོར་བཀའ་འཁྲོལ་ཞུས་ཏེ། རྒྱ་གར་གྲོས་ཚོགས་ནང་བོད་ནང་གི་གནས་སྟངས་གླེང་སློང་བྱས་ཡོད་པ་དང་། མ་འོངས་པར་རྒྱ་གར་གྱི་བརྒྱུད་ལམ་ཁག་བརྒྱུད་དེ་འཛམ་གླིང་ནང་བོད་དོན་དྲིལ་བསྒྲགས་ཆེད་འབད་བརྩོན་བྱ་རྒྱུ། འཆར་ཟླའི་ནང་༸གོང་ས་མཆོག་རྒྱ་གར་གྲོས་ཚོགས་ནང་སླར་ཡང་གདན་ཞུ་བྱ་ཆེད་འབད་བརྩོན་བྱེད་ཀྱི་ཡོད་པའི་གཏམ་བཤད་གནང་སོང་ལ།  དེ་བཞིན། རྒྱ་གར་གྱི་གྲོས་ཚོགས་གོང་འོག་གཉིས་ཀྱི་འཐུས་མི་དང་ཆབ་སྲིད་ཚོགས་པ་འདྲ་མིན་གྱི་སྐུ་ཚབ་ཚོས་རྒྱ་གར་གྲོས་ཚོགས་ཀྱི་ནུས་པའི་ཐོག་བོད་ལ་རྒྱབ་སྐྱོར་གནང་ཐབས་བྱ་རྒྱུ་དང་། མ་འོངས་པར་གྲོས་ཚོགས་ནང་བོད་རང་བཙན་ཡིན་པ་དང་། བོད་དེ་ལོ་རྒྱུས་ཐོག་རང་བཙན་ཡིན་པའི་གྲོས་ཆོད་འཇོག་རྒྱུ། རྒྱ་ནག་གིས་བོད་ཀྱི་ཁོར་ཡུག་ལ་གཏོར་བཅོམ་བཏང་བ་དེས་རྒྱ་གར་གྱི་འཐུང་ཆུ་སོགས་ལ་དཀའ་ངལ་འཕྲད་སྲིད་སྟབས། རྒྱ་གར་མི་མང་བོད་པའི་ཕྱོགས་སུ་ལངས་ཏེ་རྒྱ་ནག་ལ་ངོ་རྒོལ་བྱ་དགོས་པའི་སྐོར་སོགས། འབྱུང་འགྱུར་རྒྱ་གར་གཞུང་མང་གཉིས་ནས་བོད་ཀྱི་གནད་དོན་སེལ་ཐབས་དང་། བོད་ཀྱི་གནད་དོན་རྒྱལ་སྤྱིའི་སྟེང་ཁྱབ་བསྒྲགས་བྱ་ཆེད་ལ་འབད་བརྩོན་གནང་དགོས་པའི་གཏམ་བཤད་གནང་སོང་།

དེའི་རྗེས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས། ཐེངས་འདིའི་ཉིན་གྲངས་བཞིའི་རིང་གི་གཞུང་མང་མཉམ་རུབ་ཐོག་སྤེལ་བའི་བོད་མིའི་གདུང་སེམས་མཉམ་སྐྱེད་ཀྱི་ལས་འགུལ་དེ་ཐོག་མའི་འཆར་གཞི་ལས་ལྷག་པའི་གྲུབ་འབྲས་ཐོན་པར་བསྔགས་བརྗོད་དང་འབྲེལ། མ་འོངས་པར་བཙན་བྱོ་བོད་མི་མི་རེ་ངོ་རེ་ནས་འགན་འཁུར་ཏེ་བོད་ཀྱི་རྩ་དོན་ལ་ཕན་པའི་ལས་འགུལ་སྤེལ་ཕྱོགས་ཐད། “ བོད་ནང་རང་སྲོག་བློས་གཏོང་གནང་མཁན་དེ་དག་ནི། བོད་མི་རིགས་ཀྱི་རིག་གཞུང་དང་མི་རིགས་ཀྱི་ལ་རྒྱ་ཡོད་མཁན།  བོད་མིས་ཡ་དྲུག་གི་ཆེད་དུ་བློས་གཏོང་གནང་ཐུབ་མཁན། བོད་མི་ས་ཡ་དྲུག་གི་ཁེ་ཕན་དང་འབྲེལ་བའི་ཐོག་ནས་དམིགས་ཡུལ་ངེས་ཅན་ཡོད་མཁན་ཆགས་ཡོད་པ་རེད། ང་ཚོ་བཙན་བྱོལ་ནང་ལ་མཚོན་ན་བོད་ནང་ལས་བསམ་བློ་དང་ཁོར་ཡུག སྨྲ་བརྗོད་སོགས་ཀྱི་རང་དབང་ཡོད་སྟབས། བོད་མི་ཚོ་གདུང་སེམས་མཉམ་སྐྱེད་བྱེད་རྒྱུ་དང་རྒྱལ་སྤྱིའི་ཐོག་ནས་རྒྱབ་སྐྱོར་འཚོལ་ཐབས་གནང་རྒྱུ་དེ་ང་ཚོའི་ལས་འགན་ཆགས་ཡོད་པ་རེད། ད་ལྟའི་བར་ང་ཚོ་སྐབས་དང་དུས་ལ་མ་གཏོགས་ཡོང་གི་མེད་ཀྱང་།  མ་འོངས་པར་བོད་མི་ཚོ་ས་གནས་གང་དུ་ཡོད་ཀྱང་རང་ངོས་ནས་མི་རིགས་ཀྱི་སྐད་ཡིག་དང་རིག་གཞུང་། གོམས་གཤིས་སོགས་རྩ་དོན་དང་འབྲེལ་བའི་ལས་འགུལ་སྤེལ་ཏེ། འཆི་གསོན་ལས་སྐྱོབ་ཐུབ་པའི་འབད་བརྩོན་གནང་དགོས་པ་རེད།  ལས་འགུལ་འདི་བརྒྱུད་དེ་ང་ཚོའི་ཕུགས་ཀྱི་དམིགས་ཡུལ་གཙོ་བོ། ༸གོང་ས་མཆོག་བོད་ལ་གདན་འདྲེན་ཞུ་རྒྱུ་དང་། བོད་ལ་རང་དབང་ཐོབ་རྒྱུ་དེ་རེད། འཕྲལ་གྱི་དམིགས་ཡུལ་༸པཎ་ཆེན་ཆུང་སྲིད་རིན་པོ་ཆེ་གཙོས་པའི་ཆབ་སྲིད་བཙོན་པ་ཀློད་གྲོལ་དང་། བོད་ཀྱི་ཁོར་ཡུག་གཏོར་བཅོམ་མཚམས་འཇོག འབྲོག་པ་གནས་སྤོར་གྱི་སྲིད་ཇུས།  ཆོས་ལུགས་དད་མོས་ཀྱི་རང་དབང་། བོད་ཀྱི་སྐད་ཡིག་གནས་སྟངས་སོགས་སྐྱོབ་ཐབས་གནང་དགོས་སྟབས། མ་འོངས་པར་བོད་མི་མི་རེ་ངོ་རེ་ནས་ང་ཚོའི་ཕུགས་ཀྱི་རེ་བ་འགྲུབ་ཐབས་ལ་འགན་འཁུར་ཐུབ་རྒྱུ་གལ་ཆེན་པོ་རེད། ” ཅེས་གསུངས་བྱུང་།

མཇུག་ཏུ་སྲིད་སྐྱོང་བློ་བཟང་སེང་གེ་མཆོག་གིས། འཛིན་སྐྱོང་བཀའ་ཤག་གིས་ ༢༠༡༣ ལོ་དེ་གདུང་སེམས་མཉམ་སྐྱེད་ཀྱི་ལོ་ཡིན་པའི་གསལ་བསྒྲགས་གནང་བ་ལྟར། སྔར་ལོ་འགྲོ་བ་མིའི་ཐོབ་ཐང་གི་ཉིན་མོ་ཨ་རིའི་གྲོང་ཁྱེར་ནེའུ་ཡོག་ཏུ་ལས་འགུལ་སྤེལ་ཏེ། མཉམ་འབྲེལ་རྒྱལ་ཚོགས་དང་གནད་ཡོད་མི་སྣར་ཐུག་འཕྲད་ཀྱིས་ལས་འགུལ་ཡག་པོ་བྱུང་བ་དང་། ད་རེས་ཀྱི་ལས་འགུལ་དེ་ཡང་ཐོག་མའི་བསམ་ཚོད་ལས་ལྷག་པའི་ལེགས་འགྲུབ་བྱུང་ཡོད་སྟབས། ཐེངས་འདིར་གོ་སྒྲིག་གནང་མཁན་ཡོངས་དང་མི་མང་། རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུས་གནང་སོང་ལ། འདི་ལོའི་ལོ་སར་གྱི་སྐོར་ནས་འཛིན་སྐྱོང་བཀའ་ཤག་གིས་དེ་སྔོན་ནས་བཀོད་ཁྱབ་གནང་བ་ལྟར། ལོ་སར་སྐབས་ཆོས་ཕྱོགས་ཀྱི་བྱེད་སྒོ་ལས་རྒྱས་སྤྲོས་ཀྱི་རྣམ་པ་མེད་པའི་ཐོག་གནང་དགོས་པའི་འབོད་སྐུལ་གནང་སོང་།

ཡང་ཐེངས་འདིའི་ལས་འགུལ་དེ་རྒྱལ་སྤྱིའི་གསར་ལམ་ཁག་ཏུ་ཁྱབ་བསྒྲགས་ཅི་བྱུང་དང་རྒྱ་ནག་གཞུང་ལ་བརྡ་ལན་ག་རེ་སྤྲད་ཡོད་མེད་ཐད་སྲིད་སྐྱོང་མཆོག་གིས།  “ ད་རེས་ཀྱི་ལས་འགུལ་ལ་མཚོན་ན། དེ་རིང་ཉིན་མཐའ་མ་མ་གཏོགས་འདས་པའི་ཉིན་གསུམ་རིང་འཛམ་གླིང་གི་སྙན་གྲགས་ཅན་གྱི་གསར་ལམ་ཁག་དང་། རྒྱ་གར་གྱི་བརྙན་འཕྲིན་དང་ཚགས་པར་ཁང་སོགས་སུ་གསར་འགོད་གསལ་བསྒྲགས་དང་བཅར་འདྲིའི་གནང་བ་ལྟར། གནས་ཚུལ་གང་འཚམས་ཐོན་ཐུབ་པ་བྱུང་འདུག  ང་ཚོ་བདེན་པ་ཡོད་པ་དེ་ཁྱབ་བསྒྲགས་བྱ་རྒྱུ་གལ་ཆེན་ཡིན་སྟབས། ལས་འགུལ་སྤེལ་བ་དེ་མི་ས་ཡ་མང་པོར་ཁྱབ་བསྒྲགས་ཐུབ་པ་བྱ་རྒྱུ་གལ་ཆེན་པོ་རེད་ལ། དེ་བཞིན། ང་ཚོའི་ངོས་ནས་རྒྱལ་སྤྱིའི་སྤྱི་ཚོགས་དང་རྒྱ་གར་ལ་དམངས་གཙོ་རྩ་ཆེན་ཡིན་པ་དང། དེ་ལག་བསྟར་བྱ་དགོས་ཚུལ་དང་།  དམངས་གཙོ་དང་ཞི་བར་རྒྱབ་སྐྱོར་གནང་དགོས་པའི་རེ་འདུན་ཞུས་པ་ལྟར། ད་ལྟའི་བར་ངོས་ལེན་བྱེད་མཁན་མང་པོ་བྱུང་ཡོད།

རྒྱ་ནག་གཞུང་ལ་མཚོན་ནའང་། ད་རེས་ཀྱི་ལས་འགུལ་འདི་བརྒྱུད་དེ་ང་ཚོ་བཀའ་སྤྱི་གཉིས་ཀ་མདུན་ལ་ཐོན་ཏེ་དཀའ་ལས་རྒྱག་གི་ཡིན་ཞེས་བརྡ་ལན་སྤྲད་ཡོད་པ་རེད། ཉེ་ཆར་རྒྱ་ནག་གཞུང་གིས་བོད་མི་གཅིག་ལ་མེར་བསྲེཊ་དང་འབྲེལ་བ་ཡོད་པའི་ཉེས་འཛུགས་འོག་སྲོག་ཁྲིམས་དང་། བོད་མི་ ༧ ལ་ལོ་མང་པོའི་ཁྲིམས་ཐག་བཅད་འདུག ད་རེས་ང་ཚོའི་ལས་འགུལ་སྤེལ་བཞིན་པའི་སྐབས་འདི་དང་བསྟུན་ཏེ་ང་ཚོར་བརྡ་ལན་སྤྲོད་ཀྱི་ཡོད་པ་རེད་བསམ་གྱི་འདུག གལ་སྲིད། ང་ཚོའི་དུས་ཚོད་འདི་དང་སྟབས་བསྟུན་ཏེ་ཁྲིམས་ཐག་བཅད་པ་ཡིན་ན། ང་ཚོ་གཞུང་མང་མཉམ་རུབ་ཀྱིས་ལས་འགུལ་སྤེལ་བའི་བརྡ་ལན་ཕར་འཕྲོད་པ་ལ་བརྟེན་ནས་ཁྲིམས་ཐག་བཅད་པ་རེད་བསམ་གྱི་འདུག དེ་ལྟར་ཡང། བོད་ནང་གི་བོད་མི་ཚོས་འདས་པའི་ལོ་ལྔ་བཅུ་ལྷག་གི་རིང་སེམས་ཤུགས་མ་ཆགས་པའི་ཐོག་རྣམ་པ་བསྟན་ཡོད་ལ། མ་འོངས་པར་ཡང་མུ་མཐུད་རྣམ་པ་སྟོན་གི་རེད་བསམ་གྱི་འདུག ” ཅེས་གསུངས་བྱུང་བ་མ་ཟད། ཁོང་གིས་རྒྱ་གཞུང་གིས་༸པཎ་ཆེན་ཆུང་སྲིད་གཙོས་པའི་ཆབ་སྲིད་བཙོན་པ་རྣམས་ཀློད་གྲོལ་མ་ཐོབ་བར་དང་། བོད་པའི་བདེན་མཐའ་མ་སེལ་བར་ང་བདེན་པ་ང་ཚོ་ཡོད་པ་དང་། ད་ཆར་ཨ་རི་ཕྱི་དྲིལ་ལས་ཁུངས་དང་འགྲོ་བ་མིའི་ཐོབ་ཐང་ཚོགས་པ་གཙོས་པའི་རྒྱལ་སྤྱིའི་གཞུང་མང་པོས་བོད་མིའི་བདེ་དོན་ལ་རྒྱབ་སྐྱོར་གྱི་རྣམ་པ་བསྟན་ཡོང་གི་ཡོད་སྟབས། མ་འོངས་པར་བོད་ནང་རང་ལུས་མེར་བསྲེཊ་གནང་མཁན་རྣམས་ཀྱི་མངོན་འདོད་ལྟར། བོད་མི་ཚོ་མཐུན་སྒྲིལ་རྡོག་རྩ་ཆིག་སྒྲིལ་དང་གཞུང་མང་མཉམ་རུབ་བྱ་རྒྱུ་དང་། འཛིན་སྐྱོང་བཀའ་ཤག་གི་ངོས་ནས་མུ་མཐུད་བོད་དོན་འཐབ་རྩོད་ལ་འབད་བརྩོན་གནང་སྟེ། ༸གོང་ས་མཆོག་བོད་ནང་གདན་འདྲེན་ཞུ་རྒྱུ་དང་གཞིས་བྱེས་ལྷན་འཛོམས་ཡོང་ཐབས་གནང་རྒྱུ་ཡིན་ཞེས་གསུངས་བྱུང་།

གསར་འགོད་པ་དོན་གོས་རྒྱ་གར་རྒྱལ་ས་ལྡི་ལི་ནས་སྤེལ།