ཉེ་ལམ་བལ་ཡུལ་མཆོད་རྟེན་བྱ་རུང་ཁ་ཤོར་སྐོར་ལམ་དུ་བལ་གཞུང་གིས་བགྲོ་གླེང་ཚོཊ་འདུ་ཞིག་བསྐངས་ཏེ། མ་འོངས་པར་མཆོད་རྟེན་སྐོར་ལམ་དུ་ཆབ་སྲིད་ཀྱི་ལས་འགུལ་རིཊ་སྤེལ་མི་ཆོག་པའི་ཉེན་བརྡ་བཏང་འདུག
ཉེ་ལམ་བལ་ཡུལ་རྒྱལ་ས་ཀ་ཐཱ་མན་གྲུའི་མཆོད་རྟེན་བྱ་རུང་ཁ་ཤོར་སྐོར་ལམ་དུ། མ་འོངས་པར་༼མཆོད་རྟེན་ཉེ་འཁོར་དུ་ཆབ་སྲིད་ལས་འགུལ་སྤེལ་མཁན་ཚོར་དོགས་ཟོན་བྱེད་ཐབས༽སྐོར་གྱི་བགྲོ་གླེང་ཚོགས་འདུ་ཞིག་ཚོགས་ཡོད་ཅིང་། ཚོགས་འདུ་དེར་མཆོད་རྟེན་ཉེ་འཁོར་གྱི་ཉེན་རྟོག་མགོ་བ་མཱ་ནོར་ཆི་ཀུ་མུར་དང་། ཀ་ཐཱ་མན་གྲུ་ཁུལ་གྱི་ཉེན་རྟོག་མགོ་བ་སོ་བྷེ་ཊི་གཙོས་མཆོད་རྟེན་བྱ་རུང་ཁ་ཤོར་ཉེ་འཁོར་གྱི་གཞུང་དང་གཞུང་འབྲེལ་མིན་པའི་ཚོགས་པ་ཁག་གི་མགོ་ཁྲིད་ཁག་ཅིག་ཞིག་བཅར་ཡོད་འདུག
དེ་བཞིན་ཉིན་དེའི་བགྲོ་གླེང་ཐོག་མཆོད་རྟེན་ཉེ་འཁོར་གྱི་ཉེན་རྟོག་མགོ་བ་མཱ་ནོར་ཆི་ཀུ་མུར་ལགས་ཀྱིས་ཀྱང་། ང་ཚོས་སྐབས་རེར་མཆོད་རྟེན་ཆེན་མོའི་སྐོར་ལམ་དུ་དྲག་ཆས་ཐོགས་པའི་དམག་མི་དང་ཉེན་རྟོག་པ་འགྲེམས་འཇོག་བྱེད་པ་དེའི་རྐྱེན་པས། ཕྱི་རྒྱལ་ཡུལ་སྐོར་བ་དང་ས་གནས་མང་ཚོགས་ཀྱི་སེམས་ལ་ཕོག་ཐུག་འགྲོ་བཞིན་པ་དངོས་ཡོད་གནས་ཚུལ་ཆགས་ཡོད་ཀྱང་། མི་ཉུང་ཤས་ཤིག་གིས་མཆོད་རྟེན་སྐོར་ལམ་བེད་སྤྱོད་ལོག་པར་གཏོང་བཞིན་ཡོད་སྟབས་ང་ཚོས་དེ་ལྟར་མ་བྱེད་ཐབས་མེད་ཆགས་ཡོད་ཚུལ་དང་། མ་འོངས་པར་མཆོད་རྟེན་སྐོར་ལམ་དུ་ཆབ་སྲིད་ལས་འགུལ་རིགས་གང་ཡང་མི་འབྱུང་ཆེད།ཟླ་ཕྱེད་ནང་མཆོད་རྟེན་ཉེ་འཁོར་ཇཱ་པེལ་ནས་ཇོ་པཱ་ཌེ་ས་གནས་བར་གྱི་གཞུང་ལམ་གཡས་གཡོན་དུ། གློག་མིག་འཕྲུལ་ཆས་ཆེད་འཛུགས་ཀྱིས་སྤྱི་ཚོགས་བདེ་འཇགས་ཐད་སོ་ལྟ་ཅི་ཐུབ་བྱ་རྒྱུ་ཡིན་སྐོར་གསལ་བསྒྲགས་བྱས་འདུག
གསར་འགོད་པ། དཔལ་ལྡན།
