རྒྱ་གཞུང་གིས་ཁམས་ནགས་ཤོད་འབྲི་རུ་རྫོང་གི་བོད་མི་ཤེས་ཡོན་པ་དང་རྩོམ་པ་པོ་དྲུག་འཛིན་བཟུང་བྱས་ཡོད་པ་ལྟར། ཉེ་སྔོན་ས་གནས་མི་མང་གི་རེ་སྐུལ་དང་ཞུ་གཏུག་ཐེངས་མང་ཞུས་མཐར་མི་བཞི་ཀློད་གྲོལ་བཏང་འདུག
རྒྱ་གར་ལྷོ་ཕྱོགས་སེར་ལྷོ་དར་ལྕེ་ཟད་པོ་ལགས་ཀྱིས་གནས་ཚུལ་བཏང་འབྱོར་ལྟར་ན། སྔར་ལོའི་ཕྱི་ཟླ་ ༢ དང་ ༣ པའི་ནང་རྒྱ་གཞུང་གིས་སྔ་ཕྱིར་ཁམས་ནགས་ཤོད་འབྲི་རུ་རྫོང་ཁོངས་ཀྱི་སྨན་པ་ཨོ་རྒྱན་བསྟན་འཛིན་ལགས་དང་མིག་ནད་གཤག་བཅོས་སྨན་པ་བསོད་ནམས་དགྲ་འདུལ་ལགས། སྒེར་གཉེར་སློབ་གྲྭའི་དགེ་རྒན་བསྟན་འཛིན་ཐབས་མཁས་ལགས། རྩོམ་སྒྲིག་པ་ཟླ་བ་རྡོ་རྗེ་བཅས་བོད་མི་ཤེས་ཡོན་པ་དང་རྩོམ་པ་པོ་ ༦ སྤྱི་ཚོགས་ནང་དཀྲོག་གཏམ་སྤེལ་བའི་ཉེས་མིང་འོག་འཛིན་བཟུང་བྱས་ཏེ། ལོ་གཅིག་ཙམ་གྱི་རིང་ལྷ་སའི་གྲྭ་བཞི་བཙོན་ཁང་དུ་བཙོན་འཇུག་བཀག་ཉར་བྱས་ཡོད་པ་ལྟར། ཉེ་སྔོན་ས་གནས་མི་མང་གིས་བོད་ལྗོངས་ཆེས་མཐོའི་ཁྲིམས་ཁང་ལ་སྨན་པ་མེད་ཚེ་ས་གནས་ཀྱི་ནད་པར་བརྟག་དཔྱད་དང་སྨན་སྟེར་མཁན་མེད་པའི་དཀའ་ངལ་དང་། སློབ་གྲྭའི་དགེ་རྒན་མེད་ཚེ་སློབ་མའི་སློབ་སྦྱོང་ལ་འཐུས་ཤོར་དུ་འགྲོ་བཞིན་པའི་དཀའ་ངལ་དང་གནས་ཚུལ་ཁག་ཞུ་གཏུག་དང་རེ་སྐུལ་ཐེངས་མང་ཞུས་མཐར། ཟླ་འདིའི་ཕྱི་ཚེས་ ༢ ཉིན་ཁྲིམས་རྭ་ཚོགས་ཐེངས་གཉིས་པ་ཚོགས་མ་དགོས་པར་ཁོང་ཚོའི་ཁྲོད་ཀྱི་མི་ ༤ ཀློད་གྲོལ་བཏང་ཡོད་འདུག
སྨན་པ་ཨོ་རྒྱན་བསྟན་འཛིན་ལགས་ནི། ཁམས་འབྲི་རུ་རྫོང་བོམ་ཕན་ཤང་གཡམ་པ་གྲོང་ཚོའི་མི་ཡིན་ཞིང་། ༡༩༩༠ ཙམ་ནས་བཟུང་མཁས་དབང་ཁྲོ་རུ་ཚེ་རྣམ་མཆོག་དང་ཚུལ་ཁྲིམས་རྒྱལ་མཚན་སོགས་སློབ་དཔོན་དུ་བསྟེན་ཏེ་གསོ་བ་རིག་པ་གཙོ་བོ་གྱུར་བའི་བོད་ཀྱི་རིག་གནས་སྤྱི་སྦྱངས་པ་བྱས་ཏེ་བསླབ་པ་མཐར་སོན་ཡོད་པ་དང་། བོད་ལྗོངས་ནང་བསྟན་ཞིབ་འཇུག་དང་། གངས་ལྗོངས་ཤེས་རིག་ཀུན་བཏུས་སོགས་སུ་ཁོང་གི་རྩོམ་ཡིག་མང་པོ་སྤེལ་མྱོང་བ་མ་ཟད། ༼རྒྱལ་མོ་རྔུལ་ཆུའི་རླབས་སྒྲ༽ཞེས་པའི་རྩོམ་རིག་དེབ་ཅིག་ཀྱང་པར་བསྐྲུན་བྱས་ཡོད་འདུག
བསོད་ནམས་དགྲ་འདུལ་ལགས་ནི། ཁམས་ནགས་ཤོད་འབྲི་རུ་རྫོང་བོམ་ཕན་ཤང་གསེར་གཞོང་གྲོང་ཚོའི་མི་ཡིན་ཞིང་། བོད་ལྗོངས་གསོ་རིག་སློབ་ཆེན་མཐར་ཕྱིན་རྗེས་ཕྱི་རྒྱལ་ཡུལ་གྲུ་ཁག་ཏུ་ཕྱི་ལུགས་ཀྱི་མིག་ནད་གཤག་བཅོས་སྐོར་ལ་སློབ་སྦྱོང་གནང་མྱོང་བ་དང་། ཕྱི་ནང་གི་སྨན་བཅོས་རིག་གཞུང་ཟུང་འབྲེལ་ཐོག་ཨ་རི་དང་ཁེ་ཎ་ཌ་རྒྱལ་ཁབ་གཉིས་མཉམ་འབྲེལ་ཐོག་ལྷ་སར་གསར་འཛུགས་བྱས་པའི་སེ་ཝ་ཐེབས་རྩ་ཚོགས་པར་ཨེམ་ཆིའི་ཕྱག་ལས་གནང་ཡོད་འདུག་ལ། ལོ་མང་རིང་བོད་ས་སྟོད་སྨད་ཀྱི་ས་ཆ་མང་པོར་མིག་ནད་སྐྱ་འགྲིབ་གཤག་བཅོས་ཆེད་འགྲོ་སྐྱོད་བྱས་ཡོད་པ་མ་ཟད། ཞོར་དུ་གསོ་བ་རིག་པའི་སྐོར་གྱི་དཔེ་དེབ་ཅིག་ཀྱང་བརྩམས་ཡོད་འདུག
རྒན་བསྟན་འཛིན་ཐབས་མཁས་ལགས་ནི། ཁམས་ནགས་ཤོད་འབྲི་རུ་རྫོང་བརླན་ཆུ་ཤང་གི་མི་ཡིན་པ་དང་། ལྷ་ས་གསོ་རིག་སློབ་གླིང་ནས་སློབ་མཐར་ཕྱིན་རྗེས། ལྷ་ས་དང་ཁམས་ནགས་ཤོད་འབྲི་རུའི་ཕྱོགས་ཀྱི་རག་ཤི་དང་པད་དཀར་བཅས་སུ་སྒེར་གཉེར་སློབ་གྲྭ་ཁག་ཅིག་བཙུགས་ཏེ་སློབ་ཁྲིད་བྱས་ཡོད་པ་མ་ཟད། སློབ་ཁྲིད་ཉམས་ཞིབ་དང་འབྲེལ་བའི་ གཞི་རིམ་བོད་ཡིག་སློབ་དེབ་ ༦ ཙམ་ཞིག་རྩོམ་སྒྲིག་བྱེད་བཞིན་ཡོད་འདུག
ཟླ་བ་རྡོ་རྗེ་ལགས་ནི། ཁམས་ནགས་ཤོད་འབྲི་རུ་རྫོང་ཆག་རྩེ་ཤང་གི་མི་ཡིན་པ་དང་། རྒྱ་ནག་ཧྲན་ཞི་དང་བོད་ལྗོངས་སློབ་ཆེན་བཅས་ནས་མཐར་ཕྱིན་རྗེས། ནགས་ཤོད་འབྲི་རུ་རྫོང་དུ་གཞོན་སྐྱེས་ཤེས་ཡོན་ཅན་མཉམ་སྒྲིལ་གྱིས་གཉེར་བའི་༼ལམ་བུ༽དུས་དེབ་འདོན་ཐེངས་ ༦ ཙམ་གྱི་རྩོམ་སྒྲིག་པ་གནང་བ་དང་། སྔ་ཕྱི་ལྷ་ས་དང་ཁྲིན་ཏུའུ་བཅས་སུ་བོད་ཀྱི་སྐད་ཡིག་དང་འབྲེལ་བའི་བགྲོ་གླེང་མང་པོར་མཉམ་ཞུགས་གནང་ཡོད་འདུག
གཞན། ཁོང་ཚོ་དང་མཉམ་དུ་འཛིན་བཟུང་བྱས་པའི་སློབ་དགེ་མགོན་དཔོན་ཀླུ་དབང་ལགས་ཉེ་ཆར་ཀློད་གྲོལ་བཏང་ཡོད་ཀྱང་། སྒེར་བཙུགས་སློབ་གྲྭའི་དགེ་རྒན་མར་རིལ་པ་སངས་ལགས་ད་ལྟའི་ཆར་ཡང་བཙོན་འཇུག་བཀག་ཉར་བྱས་ཡོད་འདུག མར་རིལ་པ་སངས་ལགས་ནི། ཁམས་ནགས་ཤོད་བོམ་ཕན་ཤང་གྲོང་སྣེ་གྲོང་ཚོའི་མི་ཡིན་པ་དང་། ༡༩༩༠ ཡས་མས་སུ་རྒྱ་གར་ནང་སྐྱབས་བཅོལ་དུ་ཡོང་སྟེ། ལྷོ་ཕྱོགས་སེ་ར་དགོན་པར་ལོ་ཤས་རིང་སློབ་གཉེར་གནང་མྱོང་བ་དང་། བོད་ནང་ཕྱིར་ལོག་རྗེས་གསེར་རྟ་ལྔ་རིག་ནང་བསྟན་སློབ་གླིང་དང་སྡེ་དགེ་དཔལ་ཡུལ། ཡ་ཆེན་སྒར། སྡེ་དགེ་ཤྲིསེང་བཤད་གྲྭ་སོགས་སུ་ནང་བསྟན་དང་བོད་ཀྱི་རིག་གནས་སྤྱི་ལ་སློབ་གཉེར་གནང་ཡོད་མཁན་ཞིག་ཡིན་འདུག
གསར་འགོད་པ། དོན་གོ
ཁུ་བྱུག་གི་དབྱངས་རྟ་རང་རེད། བཀྲ་ཤིས་བདེ་ལེགས་གྲངས་མེད་ཡོད།