དེ་རིང་ངྷ་ཤོད་རྒྱ་གར་འཚིག་ཇ་ཁང་དུ་རྒྱ་གར་བྱང་ཕྱོགས་ཁུལ་ཏུ་བོད་དོན་ཞུ་གཏུག་བྱེད་མཁན་སྤྱི་འཐུས་རྣམ་པའི་ཟླ་གཅིག་ལྷག་རིང་གི་ལས་འགུལ་མཇུག་བསྡོམས་གསར་འགོད་གསལ་བསྒྲགས་གནང་སོང་།
དེ་རིང་ཉིན་གུང་ཆུ་ཚོད་ ༡༢ སྟེང་ངྷ་ཤོད་རྒྱ་གར་འཚིག་ཇ་ཁང་(India Coffee house) དུ་རྒྱ་གར་དང་བོད་པའི་གསར་འགོད་པ་ལྷན་འཛོམས་ཐོག ཉེ་ཆར་ཕྱི་ཟླ་ ༡ པའི་ཚེས་ ༡ ཉིན་ནས་ཟླ་གཅིག་རིང་སྤྱི་འཐུས་ལྷན་ཚོགས་ཀྱིས་རྒྱ་གར་རྒྱལ་ཡོངས་བོད་དོན་ཞུ་གཏུག་སྐོར་སྐྱོད་ལས་འགུལ་ལས། རྒྱ་གར་བྱང་ཕྱོགས་ཁུལ་གྱི་བོད་དོན་ཞུ་གཏུག་ཚོགས་ཆུང་གི་ཞུ་གཏུག་སྐོར་སྐྱོད་མཇུག་སྒྲིལ་པའི་གསར་འགོད་གསལ་བསྒྲགས་སྤེལ་སོང་།
གསར་འགོད་ལྷན་ཚོགས་སྟེང་ཐོག་མར་ཚོགས་ཆུང་དེའི་ཚོགས་གཙོ་སྤྱི་འཐུས་ཟླ་བ་ཚེ་རིང་ལགས་ཀྱིས་ངོ་སྤྲོད་གནང་པ་ལྟར་ན། འདས་པའི་ཟླ་ ༡ དང་ཉིན་ ༨ ཙམ་རིང་རྒྱ་གར་བྱང་ཕྱོགས་ཁུལ་ཇཱ་མཱི་ཀ་ཤཱི་མིར་(J&K) དང་ཡུ་པཱེ་(UP)། ཧི་མ་ཅཱལ་(HP)། པན་ཇབ་(Punjab) ། བྷེ་ཧར་(Bihar)། མ་ཌེ་ཡ་པུར་ཌེ་ཤཱི་(MP)། ཧ་རེ་ཡ་ཎ་(Haryana)། ཨུ་ཊར་ཁན་(UK)། ཅཱན་ངྷེ་གྷར་(Chandigarh) བཅས་མངའ་སྡེ་དང་ས་ཁུལ་ ༩ ནང་། མངའ་སྡེ་བློན་ཆེན་དང་འཛིན་སྐྱོང་གི་གནད་ཡོད་མི་སྣ། མངའ་སྡེ་དང་ས་གནས་གྲོས་ཚོགས་གོང་འོག་གི་འཐུས་མི། ཕྱོགས་འགལ་ཚོགས་པའི་མི་སྣ་སོགས་ལ་འབྲེལ་གཏུག་ཀྱིས་ད་ལྟའི་བོད་ནང་གི་ཛ་དྲག་གནས་བབ་དང་། རང་ལུས་མེར་བསྲེགས་དང་དེའི་རྒྱུ་རྐྱེན། བོད་མི་མང་གི་མངོན་འདོད་སོགས་གསལ་བཤད་ཐོག བོད་ཀྱི་ཛ་དྲག་གནས་བབ་ཐད་རྒྱབ་སྐྱོར་ཡོང་བའི་རེ་སྐུལ་ཞུ་གཏུག་གནང་ཡོད་འདུག
གཞན་སྤྱི་འཐུས་ཐུབ་བསྟན་ལུང་རིག་ལགས་དང་སྤྱི་འཐུས་སྐལ་བཟང་དགྲ་འདུལ་ལགས་གཉིས་ཀྱིས་ཧིན་རྡུའི་དང་དབྱིན་ཡིག་ནང་སྒྲོག་སྦྱངས་གནང་པའི་གསར་འགོད་གསལ་བསྒྲགས་ནང་། རྒྱ་ནག་གིས་བོད་བཙན་བཟུང་མ་བྱས་གོང་བོད་དང་རྒྱ་གར་གྱི་མཐའ་མཚམས་ཟེར་པ་ཞིག་ལས་རྒྱ་དཀར་ནག་གི་ས་མཚམས་ཟེར་པ་ཞིག་མེད་ཀྱང་། བོད་ཡོངས་རྒྱ་ནག་གིས་བཙན་བཟུང་བྱས་རྗེས་དེང་གི་བར་བོད་དང་རྒྱ་གར་གྱི་མཐའ་མཚམས་དེ་རྒྱ་གར་གྱི་བདེ་འཇགས་ལ་འཕྲད་པའི་དཀའ་ངལ་ཞིག་ཏུ་གྱུར་ཡོད་པ་ཙམ་མ་ཟད། བོད་ཀྱི་ཁོར་ཡུག་ལ་གཏོར་བརླག་ཚབས་ཆེན་བཟོ་བཞིན་པ་དེས་རྒྱ་གར་གཙོས་ལྷོ་ཤར་ཨེ་ཤ་ཡའི་རྒྱལ་ཁབ་ཁག་ལ་ཤུགས་རྐྱེན་ཆེན་པོ་ཐེབས་ཀྱི་ཡོད་ཚུལ་བཀོད་འདུག
གསར་འགོད་གསལ་བསྒྲགས་ནང་མུ་མཐུད་དུ། འདས་པའི་མི་ལོ་ ༦༠ རིང་རྒྱ་ནག་གཞུང་གིས་བོད་ཀྱི་ཆོས་དང་རིག་གཞུང་། སྐད་ཡིག གོམས་སྲོལ་སོགས་རྩ་མེད་བཟོ་བའི་སྲིད་ཇུས་རིམ་པར་ལག་བསྟར་བྱས་ཏེ་བོད་རིགས་ཀྱི་ངོ་བོ་མེད་པར་བཟོ་བཞིན་པའི་གནས་བབ་འོག བོད་མི་ཚོས་རྒྱ་ནག་གི་མཁྲེགས་འཛིན་སྲིད་ཇུས་ལ་ཞི་བའི་ངོ་རྒོལ་རིམ་པར་གནང་ཡོད་ཅིང་། ལྷག་པར་དུ་ ༢༠༠༨ ལོ་ནས་བོད་ཁྱོན་ཡོངས་ལ་གཞི་རྒྱ་ཆེ་བའི་ཞི་རྒོལ་བྱས་པར་བརྟེན་རྒྱ་གཞུང་གིས་བོད་མིའི་སྟེང་དྲག་གནོན་བྱེད་ཀྱི་ཡོད་པ། ༢༠༠༩ ནས་ད་ལྟའི་བར་བོད་མི་བརྒྱ་ལ་ཉེ་བས་རང་ལུས་མེར་བསྲེགས་ཀྱིས་རྒྱ་ནག་གཞུང་གི་ནོར་འཁྲུལ་སྲིད་ཇུས་ལ་ངོ་རྒོལ་བྱེད་ཀྱི་ཡོད་ཀྱང་། རྒྱ་གཞུང་གིས་ཁོང་ཚོའི་མངོན་འདོད་བསྒྲུབ་རྒྱུ་ལས། སྔར་བས་དྲག་གནོན་དང་མཐའ་ན་རང་ལུས་མེར་བསྲེགས་གནང་མཁན་ཚོའི་ནང་མི་གཉེན་ཉེ་དང་འབྲེལ་བ་ཡོད་པ། མཆོད་འབུལ་བསྔོ་སྨོན་བྱེད་མཁན་ཚོ་ཡང་གང་བྱུང་འཛིན་བཟུང་བྱེད་ཀྱི་ཡོད་པ་སོགས་བོད་ནང་གི་གནས་བབ་ཉིན་རེ་ནས་ཉིན་རེར་ཛ་དྲག་ཆེ་རུ་འགྲོ་བཞིན་ཡོད་སྐོར་བཀོད་འདུག
གསར་བསྒྲགས་དེར་གོང་གི་གནས་བབ་དེ་དག་འོག ད་ཆར་རྒྱལ་སྤྱིའི་གཞུང་དང་ཚོགས་སྒེར་མང་པོ་ཞིག་གིས་བོད་པར་གདུང་སེམས་མཉམ་སྐྱེད་དང་། རྒྱ་ནག་གིས་བོད་ཐོག་འཛིན་པའི་སྲིད་ཇུས་ལ་སྐྱོན་བརྗོད། ད་དུང་རྒྱ་གཞུང་ལ་གནོན་ཤུགས་སྤྲོད་རྒྱུའི་གྲོས་ཆོད་གཏན་འབེབས་སོགས་བྱུང་ཡོད་པ་ལྟར། རྒྱ་ནག་བོད་དང་བོད་མིར་བཙན་གནོན་སྡུག་སྦྱོང་ཚད་མེད་གཏོང་བཞིན་པ་མཚམས་འཇོག་དང་རྒྱ་གར་གྱི་གནའ་བོའི་ཆོས་རིག་སྲུང་སྐྱོབ་བཅས་ཀྱི་ཆེད། རྒྱ་གར་གཞུང་དམངས་གཉིས་ཀྱིས་བོད་དོན་རྒྱབ་སྐྱོར་དང་། རྒྱ་ནག་ལ་གནོན་ཤུགས་སྤྲོད་དགོས་པའི་འབོད་སྐུལ་ཞུས་འདུག
མཐར་གསར་འགོད་པ་དང་དྲི་བ་དྲིས་ལན་སྐབས། ཐེངས་འདིའི་ཞུ་གཏུག་སྐོར་སྐྱོད་ཀྱི་ཁ་ཕྱོགས་གཙོ་བོ་བོད་ནང་གི་ཛ་དྲག་གནས་བབ་ལ་རྒྱ་གར་གཞུང་དམངས་གཉིས་ཀྱི་རྒྱབ་སྐྱོར་འཚོལ་ཕྱིར་ཡིན་སྐོར་དང་། ཞུ་གཏུག་མཇལ་འཕྲད་སྐབས་སོ་སོའི་མགོ་ཁྲིད་མི་སྣ་ཚོས་བོད་དོན་ལ་གདུང་སེམས་མཉམ་སྐྱེད་དང་རྒྱབ་སྐྱོར་ཀྱི་རྣམ་འགྱུར་ཤུགས་ཆེན་བསྟན་ཡོད་པ། འགའ་རེས་བསླེབ་ལ་ཉེ་བའི་གྲོས་ཚོགས་སྐབས་བོད་དོན་གླེང་སློང་ཡོང་ཐབས་གནང་རྒྱུ་ཡིན་སྐོར་སོགས་བརྗོད་བྱུང་། རྒྱ་གར་མང་ཚོགས་ནང་བོད་དོན་དྲིལ་བསྒྲགས་ཉུང་དྲགས་པ་དང་། མཐའ་ན་མགོ་ཁྲིད་དང་གནད་ཡོད་མི་སྣའི་ནང་ནའང་ཕར་འགྲེལ་བཤད་ཆ་ཚང་ཞིག་མ་བརྒྱབ་བར་བོད་དོན་སྐོར་གོ་རྟགས་གང་ཡང་མེད་མཁན་ཡོད་སྟབས། མ་འོངས་པར་རྒྱ་གར་སྤྱི་ཚོགས་དང་མཐོ་སློབ་ཁག་ནང་བོད་དོན་གོ་རྟོགས་སེལ་རྒྱུ་ཁ་ཚ་དགོས་གཏུགས་ཆགས་ཡོད་སྐོར་བརྗོད་སོང་།
གཞན་དེ་རིང་ཕྱི་དྲོའི་ཆུ་ཚོད་ ༥ དང་ཕྱེད་ཀའི་སྟེང་མེག་གྷན་ནས་ཐེགས་ཆེན་ཆོས་གླིོང་གཙུག་ལག་ཁང་བར་མར་མི་མང་མཉམ་ཞུགས་ཐོག་མར་མེ་ཁྲོམ་སྐོར་ཞིག་གནང་རྒྱུ་ཡིན་པ་དང་། ཆུ་ཚོད་ ༧ པའི་སྟེང་སྤྱི་འཐུས་ཚོགས་གཞོན་བསོད་ནམས་བསྟན་འཕེལ་མཆོག་དང་། རྒྱ་གར་བོད་དོན་རྒྱབ་སྐྱོར་པ་ཁག་ཅིག་བཅས་ཆེད་ཕེབས་ཐོག སྤྱི་འཐུས་ཟླ་བ་ཚེ་རིང་ལགས་དང་སྤྱི་འཐུས་ཐུབ་བསྟན་ལུང་རིག་ལགས། སྤྱི་འཐུས་སྐལ་བཟང་དགྲ་འདུལ་ལགས། སྤྱི་འཐུས་རྨོག་རུ་བསྟན་པ་ལགས། སྤྱི་འཐུས་གངས་ལྷ་མོ་ལགས་བཅས་ཀྱིས་རྒྱ་གར་བྱང་ཕྱོགས་ཁུལ་དུ་ཞུ་གཏུག་སྐོར་སྐྱོད་ལས་འགུལ་མཇུག་སྡོམ་གནང་རྒྱུ་ཡིན་འདུག
གསར་འགོད་པ། བནྡེ་སྐྱབས།
བོད་དོན་ལ་གོ་རྟོགས་མེད་པ་རྒྱ་གར་བ་གཅིག་པོ་མིན་པར། བཙན་བྱོལ་ནང་ཁུལ་དུ་མང་ནི་རེད། དེང་སང་རང་རེའི་སྤྱི་ཚོགས་གང་སར་བཤད་མ་དགོས་པར་གཞུང་གི་ལས་ཁུངས་ནང་ལས་ཀ་བྱེད་མཁན་ཚོས་་ཀྱང་བོད་སྐད་དག་མ་ཞིག་མི་ཤོད་པ་དང་མི་བཤད་པར་གཡར་ཚིག་དང་བསྲེ་སྐད་རྒྱག་མཁན་གྱི་ཁེངས་བསྡད་ཡོད་པར་གཞིག་ན་བོད་ལ་ཤ་ཚ་ག་ཚོད་ཡོད་པ་གསལ་བོ་རེད། རང་གི་སྐད་དང་ཡི་གེའི་གལ་ཆེའི་རང་བཞིན་ཙམ་མི་རྟོགས་པའི་སྤྱི་ཚོགས་དེ་ཤིང་ཏོག་རུལ་བ་དང་ཁྱད་པར་ཆེན་པོ་མེད་པར་མཐོང་གི་འདུག ཤིང་ཏོག་རུལ་བ་ཡིན་ཡང་ཕར་ལྟ་ས་ན་མཛེས་མདོག་ཁ་བོ་ཞིག་ཡོད་ཀྱང་དོན་དུ་རུལ་བ་ལ་རུལ་བའི་ནུས་པ་མ་གཏོགས་གང་ཡང་ཡོད་ནི་མ་རེད།
གངས་སྐྱིད་གཞུང་ན་སྦྲགས་སྐད་རི་རབ་ཙམ།།
ཚོགས་པ་ཁག་ན་བསྲེ་སྐད་ལུང་བ་ཁེངས།།
བརྒྱད་བཅུ་སྐྲ་དཀར་རྒད་པོ་མན་ཆད་དང་།།
ལོ་བརྒྱད་སྣབས་ལུག་བྱིས་པ་ཡན་ཆད་ཀྱིས།།
འབད་འབུང་བྱེད་ས་ར་མ་ལུག་གི་སྐད།།