བོད་
ཁྲིམས་མིག་ནས་ཚད་གཞལ་ན། རྒྱ་ནག་པེ་ཅིན་གློག་བརྙན་སློབ་ཆེན་གྱི་དགེ་རྒན་ཆེན་མོ་ལིས་ཏིག་ཕིན་དང་། ཨ་རིའི་ཁཱ་ལེ་ཧྥོ་ནེ་ཡའི་གློག་བརྙན་བཟོ་སྐྲུན་པ་སཱེམ་བྷ་ཟིལ་གཉིས་ཀྱི་ནག་ཉེས་གཅིག་མཚུངས་ཡིན། སྔ་མས་རྒྱ་ནག་དམར་པོའི་གོ་ཁྲབ་གྱོན་ཏེ་བོད་མི་ཚོར་ཐུབ་ཚོད་བཏང་བ་ཞིག་དང་། ཕྱི་མས་ཨ་རིའི་དམངས་གཙོའི་རང་དབང་སྤྱད་དེ་ཁ་ཆེ་བ་ཚོར་མཐོང་ཆུང་བཏང་བ་འདི་མི་འདྲ་བའི་ཆ་རེད།
བོད་ཆུ་སྦྲུལ་ལོའི་གནམ་ལོ་གསར་ཚེས་ལ་རྒྱ་གཞུང་གིས་རྒྱལ་ཡོངས་མི་མང་ལ་ལོ་གསར་ལེགས་སྐྱེས་གྱ་ནོམ་པ་ཞིག་ལེགས་འགྲུབ་བྱུང་ཡོད་པར་འདོད་ཡོད། བོད་མི་ཚོར་རྒྱ་སྒོར་སྤྲད་དེ་ལོ་གསར་ལ་སྤྲོ་སྐྱིད་གཏོང་དགོས་པ་དང་ཤོག་སྦག་བསྒྲོན་དགོས་པའི་བཙན་བཀའ་བཏང་ཡང་འདོད་དོན་འགྲུབ་མེད། བོད་ཁུལ་ནས་ལོ་གསར་ལ་གྲ་སྒྲིག་བྱས་པའི་རིག་རྩལ་སྤྲོ་ཚོགས་དག་ཀྱང་ལོ་རེ་བཞིན་སྤུས་ཀ་ཇེ་ཞན་དང་ཁ་དོག་ཇེ་ནག་ཏུ་ཕྱིན་ཡོད། ད་ལོ་སླར་ཡང་བྱེད་ཐབས་གཞན་ཞིག་སྤྱད་དེ་༼བོད་ཀྱི་གསང་བ༽ཞེས་པའི་མུ་འབྲེལ་གློག་བརྙན་རིང་པོ་འདི་གྲ་སྒྲིག་བྱས་པ་རེད།
བོད་མི་སུ་འདྲ་ཞིག་ཡིན་ཡང་གློག་བརྙན་འདི་མཐོང་ན་ཧ་ལས་ཤིང་ཧོན་མི་འཐོར་མཁན་སུ་ཡོད། བོད་དང་བོད་པའི་རིག་གཞུང་ལ་དགའ་ཞེན་ཡོད་མཁན་མི་རིགས་གཞན་ཞིག་ཡིན་ཡང་གདོང་པ་ཚ་བིར་བིར་ཆགས་རྒྱུ་གདོན་མི་ཟ། བོད་དང་བོད་པའི་རིག་གཞུང་ལ་རྒྱུས་མངའ་རྩད་ནས་མེད་མཁན་དགེ་རྒན་ཆེན་མོ་ལིས་ཏིག་ཕིན་ལྟ་བུ་དག་ལ་ནི་གློག་བརྙན་འདིས་བྲོ་བ་ཆེན་པོ་སྟེར་སྲིད་པ་དང་། གད་མོ་ཤོར་བ་དང་ཡ་མཚན་སྐྱེ་བའི་གསང་བ་མང་པོ་ཞིག་མཐོང་སོང་བ་འདྲ་བའི་ཚོར་བ་ཡང་སྤྲོད་སྲིད།
མི་བྱེ་བྲག་པ་ཞིག་གིས་རླབས་ཆེ་བའི་མི་རིགས་ཤིག་དང་། དེའི་རིན་ཐང་ཅན་གྱི་རིག་གཞུང་ལ་འདི་འདྲའི་དམའ་འབེབས་ཟུར་ཟ་བྱེད་པའི་བློ་ཁོག་དང་ལས་འགན་དེ་སུ་ཞིག་གིས་ཁོ་ལ་སྤྲད་པ་ཡིན་ནམ། གློག་བརྙན་འདིར་དྲང་ཕྱོགས་ནས་ལྟ་མཁན་ཞིག་ཡིན་ན་༼བོད་ཀྱི་གསང་བ༽འདིའི་རྒྱབ་ལོགས་ན་སྦེད་སྐུང་བྱས་ཡོད་པའི་༼རྒྱ་ནག་གི་གསང་བ༽མང་པོ་ཞིག་གསལ་རྗེན་དུ་མཐོང་ཐུབ་ཅིང་། དེ་དང་མཉམ་དུ་རྒྱ་ནག་གཞུང་གི་ཞེད་སྣང་དང་སེམས་འཚབ་དག་ཀྱང་རྟོགས་ཐུབ།
བོད་མི་ཚོས་སང་ཉིན་གནངས་ཉིན་ཚེས་ ༡༣ ཉིན་རྒྱལ་དབང་བཅུ་གསུམ་པ་ཆེན་པོས་བོད་རང་བཙན་གསལ་བསྒྲགས་བསྐྱངས་ཏེ་ལོ་བརྒྱ་འཁོར་བའི་དུས་དྲན་སྲུང་གཙི་ཞུ་རྒྱུར་གྲ་སྒྲིག་བྱེད་ཀྱིན་ཡོད། རྒྱ་གཞུང་གིས་ཏག་ཏག་དུས་ཚིགས་དེ་མིག་འབེན་དུ་བཟུང་སྟེ། བོད་རིགས་མི་དམངས་ཀྱི་སེམས་ངོར་རྒྱལ་དབང་བཅུ་གསུམ་པ་དང་སྐབས་དེའི་བོད་སྤྱི་ཚོགས། བོད་པའི་ཆོས་སྲིད་ཟུང་འབྲེལ་སོགས་ནི་ཧ་ཅང་འཇིགས་སུ་རུང་བ་ཞིག་དང་། སྐྱུག་མེར་ལངས་པ་ཞིག་ཡིན་པའི་སྣང་བརྙན་བཞེངས་སྐྲུན་བྱེད་འདོད་པ་དེ་རེད།
མདའ་གཅིག་གིས་ཤྭ་གཉིས་གསོད་པའི་དཔེ་ལྟར། གློག་བརྙན་འདིའི་འཁྲབ་སྟོན་པའི་གྲས་སུ་བོད་མི་འགའ་ཡང་བཞག་ཡོད། དེ་ནི་གློག་བརྙན་འདིའི་བགེགས་བར་ཆད་ཞི་ཞིང་ཁ་ལས་རླུང་རྟ་དར་ཆེད་དང་། གློག་བརྙན་འདིའི་ནང་གང་ཞིག་འཁྲབ་ཀྱིན་ཡོད་པ་དང་ཅི་ཞིག་འཆད་ཀྱིན་ཡོད་པ་ཐ་དག་ལ་བོད་མི་ཚོ་ཡིད་ཆེས་ཡོང་ཐབས་ཡིན། དགེ་རྒན་ལིས་ཏིག་ཕིན་གྱི་ལག་པ་ཕྱི་ས་འདིའི་རྒྱབ་ལོགས་ན། ད་དུང་བོད་པ་ནང་ཁུལ་ལ་ལྟ་སྟངས་ཡོང་ཐབས་དང་ནང་ཁུལ་དཀྲུགས་ཤིང་གི་ལྐོག་ཇུས་གཞན་དག་ཀྱང་ཡོད་སྲིད།
ངས་གློག་བརྙན་འདི་མཐོང་མ་ཐག གློག་བརྙན་གཞན་ཞིག་ཀྱང་གློ་བུར་དུ་དྲན་བྱུང་། སྔར་ལོའི་ཕྱི་ཟླ་ ༨ པའི་ནང་ཨ་རིའི་ཁཱ་ལེ་ཧྥོ་ནེ་ཡའི་མི་སེར་མིང་ལ་Sam Bacileཟེར་བ་ཞིག་གིས་ཁ་ཆེའི་སྟོན་པར་དམའ་འབེབས་བྱས་པའི་གློག་བརྙན་ཞིག་བཟོས་པར་རྐྱེན་བྱས་ཏེ། མི་གསོད་ཁྲག་སྦྱོར་གྱི་དོན་རྐྱེན་ཡ་ང་བ་བྱུང་ཡོད། ཨེ་ཇེབ་དང་སུའུ་ཊན། ཊའོ་ནེ་ཤུ་ཡ་སོགས་ཁ་ཆེ་རྒྱལ་ཁབ་ཁག་གི་ཨ་རིའི་གཞུང་ཚབ་ཁང་ལ་གཏོར་རྒོལ་དང་མེ་བརྒྱབ་པ། གཞུང་ཚབ་པ་ཆེན་མོ་དམར་གསོད་བཏང་བ་སོགས་བྱུང་སྟེ། མཐའ་མར་གློག་བརྙན་དེ་ཕྱིར་བསྡུ་བྱེད་དགོས་བྱུང་བ་མ་ཟད། ཨ་རིའི་གཞུང་གིས་གསལ་བཤད་དང་དགོངས་དག་ཞུ་དགོས་པ་བྱུང་ཡོད།
རྒྱ་ནག་གཞུང་གི་དམག་མིའི་ཚན་པ་ནས་ཆེས་མཐོའི་བྱ་དགའ་ཐོབ་མཁན་གླུ་མ་ཧྭན་ཧུང་གིས་བར་སྣང་སྟོང་བའི་དབྱིངས་ནས་གར་སྟབས་སྒྱུར་བཞིན་ཕོ་བྲང་པོ་ཏཱ་ལའི་རྩེར་བབས་ཏེ་གླུ་གཞས་གཏོང་འདོད་པའི་རྨི་ལམ་དེ་དང་། གཞས་པ་གཞས་མ་དང་གློག་བརྙན་འཁྲབ་སྟོན་པ་གཞན་འགའ་ཞིག་གིས་མ་ཕམ་གཡུ་མཚོ་དང་གངས་རིན་པོ་ཆེ། དེ་བཞིན་མཚོ་སྔོན་པོ་སོགས་ནས་མཚན་སྙན་འཚོལ་འདོད་པའི་ཧམ་སེམས་དེ་དག བོད་ཕྱི་ནང་གི་འབོད་སྒྲས་ཞི་བར་གཤེགས་ཡོད་ཀྱང་། ད་རེབ་རྒྱ་ནག་དམར་གཞུང་དགེ་རྒན་ལིས་ཏིག་ཕིན་གྱི་སྨྱུ་གུར་འཛུལ་བའི་གསང་བ་དེ་རྟོགས་མ་ཐུབ།།
