བུ་མོ་ལོ་ ༩ ཅན་ཞིག་ལ་ཕྲུ་གུ་སྐྱེས།

ཉེ་ཆར་མེཀ་སེ་ཀོའི་ནང་གི་བུ་མོ་ལོ་ ༩ ཅན་ཞིག་ལ་ཕྲུ་གུ་བུ་མོ་ཞིག་སྐྱེས་ཡོད་ཅིང་། རང་ལོ་ ༡༧ ཡིན་པ་ཕྲུ་གུའི་ཕ་ལ་བྱིས་པ་བུ་མོ་དེར་ཚུལ་མིན་ལོག་སྤྱོད་བྱས་པའི་ཉེས་ཆད་ཕོག་རྒྱུ་ཡིན་འདུག

ཕྱི་ཚེས་ ༦ ཉིན་གནད་དོན་དེའི་ཐད་མེཀ་སེ་ཀོ་ཡི་ཇཱ་ལེ་སི་ཀོ་(Jalisco) མངའ་སྡེ་ཉེན་རྟོག་ཁང་གི་མགྲིན་ཚབ་པ་ལེ་ནོ་ཡིས་བརྗོད་པ་ལྟར་ན། ཉེ་ཆར་མེཀ་སེ་ཀོ་(Mezico) ནང་གི་བུ་མོ་ལོ་ ༩ ཅན་ཞིག་ལ་ཕྲུ་གུ་སྐྱེས་ཡོད་འདུག་ལ། བུ་མོར་ཕྲུ་གུ་སྐྱེས་རྗེས་རང་ལོ་ ༡༧ ཡིན་པའི་མོའི་དགའ་རོགས་བུ་དེ་གར་སོང་ཆ་མེད་དུ་གྱུར་ཡོད་འདུག

གོང་གི་ཉེན་རྟོག་ཁང་གིས་བསྒྲགས་པའི་གནས་ཚུལ་ལྟར་ན། བུ་མོ་ཆུང་ཆུང་དེར་གྷ་ཌ་ལཱ་ཇཱ་རཱ་(Guadalajara) ཞེས་པའི་གྲོང་ཁྱེར་སྨན་ཁང་ཞིག་ཏུ་ཕྲུ་གུ་བུ་མོ་ཞིག་སྐྱེས་ཡོད་པ་དང་། ད་ཆར་བུ་མོ་མ་སྨད་གཉིས་བདེ་ཐང་པ་དང་མོའི་ཁྱིམ་མིར་ཡང་བརྡ་ལན་སྤྲད་ཡོད་ཀྱང་། ཕྲུ་གུའི་ཨ་ཕ་གར་སོང་ཆ་མེད་དུ་གྱུར་ཡོད་འདུག་ལ། ཉེན་རྟོག་པས་བུ་མོ་ཆུང་ཆུང་དེར་ཕྲུ་གུ་སྐྱེས་ཡོད་པ་ཤེས་རྗེས་ཁོ་བྲོས་ཕྱིན་ཡོད་པར་དོགས་གཞི་བྱེད་ཀྱི་ཡོད་འདུག

ཉེན་རྟོག་པས་གལ་སྲིད་བུ་དེ་ལག་སོན་བྱུང་ཚེ་ཁོར་བྱིས་པ་བུ་མོ་དེར་ཚུལ་མིན་ལོག་སྤྱོད་བྱས་པའི་ཉེས་ཁྲིམས་གཅོད་རྒྱུ་ཡིན་པར་བརྗོད་འདུག་ལ། དེང་སྐབས་ཉེན་རྟོག་པས་ཁོ་གར་ཡོད་རྩད་གཅོད་བྱེད་ཀྱིན་ཡོད་འདུག

གསར་འགོད་པ། བནྡེ་སྐྱབས།