རྒྱ་གཞུང་གིས་བོད་ནང་གི་དགོན་སྡེ་ཁག་གི་དགེ་བཤེས་སྐོར་ཞིག་བཙན་འཁྲིད་བྱས་རྗེས། ཉིན་ཉི་ཤུ་མ་ཟིན་ཙམ་གྱི་རིང་ནག་ཆུ་ས་ཁུལ་གྱི་དགོན་པ་དང་གྲོང་སྡེ་ཁག་ཏུ་རྒྱལ་གཅེས་སློབ་གསོ་སྤེལ་བཅུག་འདུག
ཟླ་སྔོན་མའི་ཕྱི་ཚེས་ ༡༤ ཉིན་རྒྱ་ནག་གཞུང་གིས་གདན་ས་སེ་འབྲས་དགེ་གསུམ་གྱི་མཁན་པོ་དང་དབུ་མཛད། དཔེ་ཁྲིད་དགེ་རྒན་སོགས་ཚོགས་འདུ་ཁ་གཡར་བཙན་འཁྲིད་བྱས་ཏེ། གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་པ་ལྟར། ཉེ་ལམ་བོད་ལྗོངས་དྲ་བའི་དེའི་སྐོར་ལ་གནས་ཚུལ་ཞིག་སྤེལ་ཏེ། ཁོང་རྣམ་པ་ཀྲུང་གོ་ནང་བསྟན་མཐུན་ཚོགས་བོད་ལྗོངས་ཡན་ལག་མཐུན་ཚོགས་ཀྱིས་གོ་སྒྲིག་འོག ༢༠༡༣ ལོའི་ཟླ་ ༡ ཚེས་ ༡༤ ནས་ཚེས་ ༣༡ བར་ཀྲུང་གོ་ནང་བསྟན་མཐུན་ཚོགས་བོད་ལྗོངས་ཡན་ལག་མཐུན་ཚོགས་ཀྱི་ཚོགས་གཙོ་ཐུབ་བསྟན་མཁས་གྲུབ་ཀྱིས་འགོ་ཁྲིད་དེ། ལྷ་སའི་འབྲས་སྤུངས་དང་སེ་ར། དགའ་ལྡན། ལྷ་ལྡན་གཙུག་ལག་ཁང་། མཚུར་ཕུ་དགོན། འབྲི་གུང་མཐིལ་བཅས་དགོན་སྡེ་ཁག་དྲུག་ལྷག་གི་དཔེ་ཁྲིད་དགེ་རྒན་ ༣༠ ནག་ཆུ་ས་ཁུལ་འབྲི་རུ་རྫོང་ཁོངས་སུ་འཁྲིད་དེ་མི་མང་ལ་གསུང་ཆོས་གནང་ཡོད་སྐོར་བརྗོད་འདུག
གནས་ཚུལ་ཤེས་རྟོགས་བྱུང་བ་ལྟར་ན། ཐེངས་འདིར་རྒྱ་ནག་གིས་བཙན་འཁྲིད་བྱས་པའི་དགེ་བཤེས་དག་ནི། འབྲས་སྤུངས་དགོན་པའི་མཁན་པོ་འཇམ་དཔལ་ལྷག་བསམ་མཆོག་དང་། དབུ་མཛད་ངག་དབང་། རྒན་ངག་དབང་དོན་ལྡན རྒན་ངག་དབང་དཔལ་བཟང་། རྒན་ངག་དབང་བསམ་གཏན། སེ་ར་དགོན་པའི་དགེ་བསྐོས་མིག་དམར། རྒན་བསམ་གཏན། རྒན་ངག་དབང་བློ་གྲོས། རྒན་བཀྲ་ཤིས་རྒྱ་མཚན་བཅས་དང་། དགའ་ལྡན་དགོན་པའི་རྒན་སྐལ་ལྡན། རྒན་བློ་བཟང་དངོས་གྲུབ། ལྷ་སའི་གཙུག་ལག་ཁང་གི་རྒན་ལྷུན་འགྲུབ་ཡར་འཕེལ་ལགས་དང་རྒན་ཚེ་བརྟན་རྡོ་རྗེ། རྒན་ངག་དབང་བློ་འཕེལ་བཅས་ཡིན་འདུག་ལ། ཉེ་ཆར་རྒྱ་གཞུང་གིས་ཁོང་རྣམ་པར་ཚོགས་འདུ་ཞིག་ཚོགས་དགོས་ཚུལ་བཤད་དེ་བཙན་འཁྲིད་བྱས་རྗེས། ཉིན་ཉི་ཤུ་མ་ཟིན་ཙམ་གྱི་རིང་ནག་ཆུ་ས་ཁུལ་འབྲི་རུ་རྫོང་ཁོངས་ཀྱི་དགོན་སྡེ་དང་གྲོང་སྡེ་ཁག་ཏུ་རྒྱལ་གཅེས་ཆོས་གཅེས་ཀྱི་སློབ་གསོ་སྤེལ་བཅུག་ཡོད་འདུག
གསར་འགོད་པ། དོན་གོ
