ཉེ་ཆར་ཨུ་རུ་སུའི་ནང་བོད་ལུགས་གསོ་རིག་སྨན་པའི་ལྷན་ཚོགས་ཤིག་ཚོགས་ཏེ་བོད་སྨན་དེ་ཨུ་རུ་སུའི་གཞུང་གིས་ངོས་ལེན་ཡོང་ཐབས་སོགས་ལ་བགྲོ་གླེང་གནང་འདུག
གནས་ཚུལ་འབྱོར་གསལ་ལ། ཟླ་འདིའི་ཕྱི་ཚེས་ ༢ ཉིན་ཨུ་རུ་སུའི་མངའ་སྡེ་(Ulan-Ude)ནང་གི་ཁུ་ལའོ་ཆེ་ཝེ་སི་ཁ་ཇ་(Kluchevskaja,23)ཞེས་པའི་གྲོང་ཁྱེར་གྱི་གཞུང་གི་དཔེ་མཛོད་ཁང་དུ། བོད་སྨན་ལྟེ་གནས་ཁང་གི་གོ་སྒྲིག་འོག་༼ ཨུ་རུ་སུའི་རྒྱལ་ཡོངས་བོད་ལུགས་གསོ་རིག་སྨན་པའི་ལྷན་ཚོགས༽ཀྱི་སྔོན་འགྲོའི་ཚོགས་ཆེན་དང་པོ་དེ་འཚོགས་ཡོད་འདུག
ལྷན་ཚོགས་དེའི་སྟེང་བོད་མི་དང་ཨུ་རུ་སུ་སོགས་མི་རིགས་འདྲ་མིན་གྱི་བོད་སྨན་ཆེད་མཁས་པ་དང་ནུབ་ལུགས་གསོ་རིགས་ཞིབ་འཇུག་པ། རྫས་སྦྱོར་ཉམས་ཞིབ་པ་སོགས་སྐུ་མགྲོན་ ༤༩ ཙམ་མཉམ་ཞུགས་གནང་ཡོད་པ་དང་། ཉིན་དེའི་སྔ་དྲོའི་ཡུལ་དེའི་ཆུ་ཚོད་ ༡༠ སྟེང་ཚོགས་འདུ་དབུ་འཛུགས་ཀྱིས་སྣང་གསལ་མར་མེ་ཞལ་འབྱེད་གནང་རྗེས། ཚོགས་འདུ་གཙོ་སྐྱོང་པ་ཁེ་ཁུ་ཅའེ་རེའུ་ནཱ་ལགས་ཀྱིས་བོད་སྨན་ཨུ་རུ་སུའི་རྒྱལ་ཁོངས་སུ་དར་བའི་ལོ་རྒྱུས་དང་བོད་སྨན་གྱི་ཕན་ནུས་སོགས་ངོ་སྤྲོད་གནང་ཡོད་པ་དང་། དེའི་རྗེས་སོག་རིགས་སྨན་པ་འཆི་མེད་རྡོ་རྗེ་ལགས་ཀྱིས་ཨུ་རུ་སུའི་རྒྱལ་ཡོངས་སུ་བོད་ལུགས་གསོ་རིག་སྨན་པའི་ལྷན་ཚོགས་ཟེར་བ་དེ་འཛུགས་དགོས་པའི་རྒྱུ་མཚན་ངོ་སྤྲོད་དང་འབྲེལ་ཚོགས་མི་ཡོངས་ཀྱིས་ལྷན་ཚོགས་དེའི་མ་འོངས་པའི་ཕྱག་ལས་གནང་ཕྱོགས་དང་། བོད་སྨན་དེ་ཨུ་རུ་སུའི་གཞུང་གིས་ཁྲིམས་མཐུན་ངོས་ལེན་ཡོང་ཐབས་བཟོ་ཕྱོགས་སོགས་ལ་བགྲོ་གླེང་གནང་ཡོད་འདུག
ཉིན་རྒྱབ་མང་མོས་འོས་ཤོག་འཕངས་ཏེ་སྐབས་དང་པོའི་རྒྱུན་ལས་གསར་འདེམས་གནང་ཡོད་པ་དང་། འོས་བསྡུའི་ཁྲོད་བླ་བྲང་སྐལ་བཟང་ལགས་ལྷན་ཚོགས་ཀྱི་ཚོགས་གཙོ་དང་། ཨེམ་རྗེ་འཆི་མེད་རྡོ་རྗེ་ལགས་ཚོགས་གཞོན་བཅས་སུ་བདམས་ཐོན་བྱུང་ཡོད་པ་མ་ཟད། གཞན་དྲུང་ཆེ་སོགས་ཁྱོན་རྒྱུན་ལས་ ༡༢ བསྐོ་བཞག་གནང་ཡོད་འདུག
གནས་ཚུལ་ནང་བཀོད་པ་ལྟར་ན། ཨུ་རུ་སུའི་རྒྱལ་ཁབ་ལ་བོད་སྨན་དར་ནས་ལོ་ངོ་ ༢༥༠ ལྷག་གི་ལོ་རྒྱུས་ཡོད་པ་དང་། བོད་སྨན་ནི་རྒྱལ་ཁབ་དེར་ཁྱབ་ཆེ་གྲས་ཀྱི་སྨན་སྣ་ཞིག་ཆགས་ཡོད་འདུག གནས་ཚུལ་ནང་“སྔོན་མ་སི་ཏཱ་ལེན་གྱི་ སྐབས་ནས་བཟུང་ཨུ་རུ་སུའི་རྒྱལ་ཁོངས་སུ་བོད་སྨན་གྱི་སྨན་པ་གྲྭ་ཚང་སོགས་ཡོད་པ་དང་། ས་ཁུལ་དེ་དག་གི་དཔེ་མཛོད་ཁང་དང་ལོ་རྒྱུས་འདྲ་མིན་ཐོག་ནའང་བོད་སྨན་ཁོང་ཚོའི་རྒྱལ་ཁོངས་སུ་དར་བའི་ལོ་རྒྱུས་སོགས་མང་པོ་ཡོད” ཞེས་བཀོད་འདུག
ཚོགས་པ་འདིའི་དམིགས་ཡུལ་ནི་བོད་སྨན་འདི་ཨུ་རུ་སུའི་ཁྲིམས་ཐོག་ནས་ངོས་ལེན་ཡོད་པ་ཤིག་བྱ་རྒྱུ་དང་། ༼ཨུ་རུ་སུ་རྒྱལ་ཡོངས་བོད་ལུགས་སྨན་པའི་ལྷན་ཚོགས༽ཞེས་པ་གང་མྱུར་ཁྲིམས་མཐུན་དེབ་སྐྱེལ་བྱས་རྗེས་ལོ་རེར་རྒྱལ་ཡོངས་ཚོགས་ཆེན་ཐེངས་གཅིག་རེར་སྐོང་ཚོགས་བྱས་ཏེ། བོད་སྨན་དར་སྤེལ་དང་ན་ཚ་ངོས་འཛིན་སྟངས། ནད་པར་སྨན་བཅོས་གནང་ཕྱོགས་བཅས་ཀྱི་ཐོག་ཕྱག་ལས་གནང་རྒྱུ་ཡིན་འདུག
ཡག་པོ་འདུག་སྙིང་སྟོབས་མ་ཆུང་