གཟའ་ཕུར་བའི་མཚན་མོར་རྒྱ་གཞུང་གི་དམག་མིས་ལི་ཐང་གཡོན་རུ་ཧོར་རྙིང་སྡེ་བའི་ཚེ་ཆོས་ཞུ་བ་འཛིན་བཟུང་བྱས་ཡོད་འདུག
སེར་སྨད་བློ་དགའ་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ཕྱི་ཟླ་ ༢ པའི་ཚེས་ ༡༤ ཉིན་གྱི་མཚན་མོའི་ཆུ་ཚོད་ ༡༠ ཙམ་ལ། ལི་ཐང་གཡོན་རུ་ཧོར་རྙིང་སྡེ་བའི་གྲྭ་ཟུར་ཚེ་ཆོས་ལགས། ལི་ཐང་ཧོར་རྙིང་འབྲོག་སྡེའི་བློ་ཟླ་ཚང་ཞེས་པའི་འབྲོག་ཁྱིམ་ཞིག་ནས་རྒྱ་ནག་གི་དམག་མིས་འཛིན་བཟུང་བཙན་འཁྲིད་བྱས་ཡོད་འདུག
ས་གནས་མི་མང་ཚོས་ཚེ་ཆོས་ལགས་འཛིན་བཟུང་བྱས་དོན་ནི། སྔ་ལོའི་ཕྱི་ཟླ་ ༡༢ པའི་ནང་ཧོར་རྙིང་སྡེ་བའི་མི་མང་སྤྱི་ཁང་སྟེང་གུང་ཁྲན་གྱི་དར་དམར་འཛུགས་དགོས་པའི་བཙན་བཀའ་བཏང་སྐབས། ཁོང་མདུན་དུ་ཐོན་ཏེ་དེར་མོས་མཐུན་རྩ་བ་ནས་མེད་པའི་ངོ་རྒོལ་ཤུགས་ཆེན་བྱས་ཡོད་ཡོད་སྟབས། དེ་ཆབ་སྲིད་ཀྱི་ཉེས་པར་བརྩིས་ཏེ་ད་རེབ་ཁོང་འཛིན་བཟུང་བྱས་པ་ཞིག་ཡིན་སྐོར་རྗོད་ཀྱི་ཡོད་འདུག
ཚེ་ཆོས་ལགས་ནི་རྒྱ་གར་ནང་བཙན་བྱོལ་དུ་ཡོང་མྱོང་བ་དང་ ༢༠༠༠ ལོར་ཕྱིར་རང་ཡུལ་དུ་ལོག་ཡོད་པ་དང་། ཁོང་གི་ཕ་མ་གཉིས་སྔོན་མ་ནས་འདས་གྲོངས་སུ་ཕྱིན་ཡོད་འདུག
གཞན། ཟླ་འདིའི་ཕྱི་ཚེས་ ༡༣ ནས་ལི་ཐང་ཐིལ་དུ་རྒྱ་དམག་ཕོན་ཆེའི་འགྲེམ་འཇོག་བྱས་ཏེ་ས་གནས་མི་མང་འདུག་བཟོ་མི་བདེ་བ་བཟོས་ཐོག ལོ་སར་གྱི་སྔོན་དེར་རྫོང་སྲིད་གཞུང་གི་མི་སྣས་ལོ་སར་གྲ་རྒྱས་པོ་གཏོང་དགོས་ཚུལ་དང་། ལོ་སར་སྐབས་དམག་མི་ཕོན་ཆེན་འབྱོར་ཏེ་རུ་སྒྲིག་དཔུང་ངོམ་བྱས་ཏེ་མི་མང་ལ་ཧ་ཅང་སུན་གཙེར་བཟོས་ཡོད་འདུག དེ་སྔོན་ལི་ཐང་ས་ཁུལ་དུ་སྐད་འཕྲིན་(wechat)ཡི་བརྒྱུད་ལམ་ནས་འབྲེལ་བ་བྱེད་ཐུབ་ཀྱང་། ལོ་གསར་སྔ་རྗེས་ནས་བཟུང་སྐད་འཕྲིན་གྱི་འབྲེལ་ལམ་ཡང་བཀག་ཡོད་འདུག
ཕྱི་ཟླ་ ༢ ཚེས་ ༡༠ དང་བོད་ཟླ་ ༡ པའི་ཚེས་ ༢ ཉིན་གྱི་མཚན་མོར་ལི་ཐང་ཨོ་ཐོག་སྨད་ཐལ་མའི་མི་མང་སྤྱི་ཁང་མེར་བསྲེགས་ཡོད་པ་དང་། དེའི་ཉིན་འགའི་སྔོན་དུ་ས་གནས་མི་མང་ཚོས་ལོ་སར་སྐོར་ལ་ཚོགས་འདུ་བསྡུས་ཏེ། ཁག་ཅིག་གིས་རྟེན་འབྲེལ་གྱི་ལོ་གསར་ཙམ་གཏོང་དགོས་ཚུལ་དང་། ཁག་ཅིག་གིས་མྱ་ངན་ཞུ་བའི་ལོ་སར་གཏོང་དགོས་ཚུལ། ཡང་མང་པོ་ཞིག་གིས་ལོ་སར་གྱི་རྣམ་པ་རྩ་བ་ནས་སྟོན་གྱི་མིན་སྐོར་སོགས་གླེང་ཡོད་འདུག
བོད་ཚེས་ ༢ ཉིན་སྨད་ཐ་མའི་ཞབས་རིམ་སྒྲུབ་སའི་སྤྱི་ཁང་མེར་ཤོར་ཡོད་པ་དང་། རྒྱ་མི་ཚོས་སྤྱི་ཁང་དེ་བྲོ་ཁྲབ་སའི་ཁང་པ་ཡིན་སྐོར་བཤད་ཡོད་པ་དང་། ད་ལྟ་རྒྱ་ཕྱོགས་ནས་སྤྱི་ཁང་མེར་བསྲེགས་གཏོང་མཁན་བོད་པ་ཚོ་ཡིན་ཚུལ་རྗོད་ཀྱི་ཡོད་ཀྱང་། ས་གནས་བོད་མི་ཚོས་ལོ་གསར་སྐབས་མི་མང་སྤྱི་ཁང་ནང་མི་མང་འདུ་འཛོམ་གྱིས་མཆོད་འབུལ་དང་ཞལ་འདོན་གསོག་སྒྲུབ་བྱེད་རྒྱུར་དོགས་ཏེ། འབྲེལ་ཡོད་རྒྱ་མིའི་ལས་བྱེད་པས་མེ་བརྒྱབ་ཚུལ་གླེང་གི་ཡོད་འདུག
ད་ལོར་ལི་ཐང་ཐིལ་གྱི་བདེ་སྐྱིད་གྲོང་པས་གཙོས་ལི་ཐང་གྲོང་ཤོག་བརྒྱད་ཀྱིས་ལོ་སར་གྲ་རྒྱས་པོ་བཏང་མེད་པར་མ་ཟད། ཁྱིམ་ཚང་སོ་སོའི་ནང་༸རྒྱལ་བའི་ཞབས་བརྟན་དང་རྒྱལ་གཅེས་དཔའ་བོ་ཚོའི་ཆེད་དུ་སྨོན་ལམ་གསོག་སྒྲུབ་བྱས་ཡོད་འདུག
