ཡང་རྒྱ་དཔོན་ཞིག་ཨ་རིའི་གཞུང་ཚབ་ཁང་དུ་བྲོས་བྱོལ།

ཉེ་ཆར་རྒྱ་ནག་ཅི་ལིན་ཞིང་ཆེན་གྱི་ཉེན་རྟོག་མགོ་གཙོ་གཞོན་པ་ལིག་ཕའེ་ཀྲུའུ་ཨ་རིའི་གཞུང་ཚབ་ཁང་དུ་བྲོས་བྱོལ་བྱས་འདུག

རྒྱ་ནག་རྒྱལ་ཡོངས་ཚོགས་ཆེན་གཉིས་འཚོགས་ལ་ཉེ་བའི་སྐབས་དང་བསྟུན་ནས།  དྲ་རྒྱའི་བརྒྱུད་ལམ་ཁག་ཏུ་རྒྱ་ནག་ཅི་ལིན་ཞིང་ཆེན་ཉེན་རྟོག་སྡེ་ཁག་གི་མགོ་གཙོ་གཞོན་པ་ལིག་ཕའེ་ཀྲུའུ་ཡང་ཨ་རིའི་གཞུང་ཚབ་ཁང་དུ་བྲོས་བྱོལ་བྱས་ཡོད་པའི་གནས་ཚུལ་ཐོན་འདུག ད་ལྟའི་ཆར་གནས་ཚུལ་དེ་ཁུངས་ལྡན་ཡིན་མིན་ཡོངས་གྲགས་གསལ་ཁ་ཆགས་མེད་པ་རེད། ཡིན་ནའང་། ཡུ་རོབ་ཉིན་རེའི་གསར་ཤོག་གིས་གནས་ཚུལ་དེ་ནི་ཁུངས་ལྡན་ཡིན་སྐོར་བརྗོད་ཡོད་པ་རེད།

གསར་ལམ་ཁག་ཏུ་རྒྱ་ནག་ཅི་ལིན་ཞིང་ཆེན་གྱི་མགོ་ཁྲིད་ཅིག་གི་སྐད་ཆ་ལུང་འདྲེན་བྱས་དོན།  ལིག་ཕའེ་ཀྲུའུ་ཨ་རིའི་གཞུང་ཚབ་ཁང་དུ་བྲོས་བྱོལ་དུ་འཛུལ་བའི་གནས་ཚུལ་དེ་ནི།  རྒྱ་ནག་ཨ་རིའི་གཞུང་ཚབ་ཀྱི་གསར་འགོད་མགྲིན་ཚབ་པ་པའོ་རའི་ཆཱང་གིས་དྲ་རྒྱའི་སྟེང་སྤེལ་བ་ལ་བརྟེན་ནས། རྒྱ་གཞུང་མཐོ་རིམ་དཔོན་རིགས་དང་བདེ་འཇགས་ལྷན་ཁང་གིས་དོ་སྣང་བྱུང་ཡོད་པ་མ་ཟད། དེ་སྔའི་ཅི་ལིན་ཆེན་གྱི་དམར་ཤོག་དྲུང་ཆེ་སཱུང་ཀྲིན་ཚའེ་ལ་གནད་དོན་གང་མགྱོགས་ཐག་གཅོད་བྱས་ཏེ་ཤུགས་རྐྱེན་ངན་པ་སེལ་ཐབས་དགོས་པའི་བཀོལ་མངགས་བྱས་ཡོད་འདུག

གཞན་ཡང་གསར་ལམ་ཁག་གིས་གནས་ཚུལ་སྤེལ་བ་ལྟར་ན། སཱུང་ཀྲིན་ཚའེ་ཡིས་བྲེལ་མྱུར་ངང་དྲག་ཆས་དམག་མི་ ༡༠༠ ལྷག་དང་། ཅི་ལིན་ཞིང་ཆེན་རྒྱལ་ཁབ་བདེ་འཇགས་ལྷན་ཁང་གི་གནད་ཡོད་མི་སྣ་ ༣༠ ལྷག་གོ་སྒྲིག་ཐོག  ཉིན་དེའི་སྔ་དྲོ་ཆུ་ཚོད་ ༦ དང་སྐར་མ་ ༤༠ ཙམ་ལ་ཧྲིན་ཡཱང་ཨ་རིའི་གཞུང་ཚབ་ཁང་ལ་བྲོས་བྱོལ་དུ་ཕྱིན་པའི་ལིག་ཕའེ་ཀྲུའུ་དང་ཁོའི་ནང་མིར་བཀག་སྡོམ་ཆེད། གྲོང་ཁྱེར་གྱི་མྱུར་བགྲོད་གཞུང་ལམ་གྱི་ཞིབ་བཤེར་འགག་སྒོ་དག་ཏུ་བཀག་སྡོམ་བྱེད་མགོ་བརྩམས་ཡོད་འདུག

ཡུ་རོབ་ཉིན་རེའི་གསར་ཤོག་གིས་གནས་ཚུལ་སྤེལ་བའི་ནང་། ཝ་ཤིན་ཌོན་བང་ཆེན་གྱི་གསར་འགོད་པས་གནས་ཚུལ་དེའི་ཐད་ཧྲིན་ཡཱང་གནས་སྡོད་ཨ་རིའི་གཞུང་ཚབ་ཁང་གི་མགོ་གཙོ་ཐཱན་སིན་ལ་སྐད་ཆ་དྲིས་སྐབས། ཐཱན་སིན་གྱིས་གསར་འགོད་པར་ཁོ་ཚོའི་ངོས་ནས་གནས་ཚུལ་དེ་གང་མགྱོགས་ཨ་རིའི་ཕོ་བྲང་དཀར་པོར་སྙན་ཞུ་བྱ་འཆར་ཡོད་སྐོར་ཙམ་ལས། གཞན་པའི་ཞིབ་ཕྲའི་གནས་ཚུལ་གང་ཡང་བརྗོད་མེད་པ་རེད།

ད་ལྟ་སཱུང་ཀྲིན་ཚའེ་ཡིས་ཁྲུང་ཆིན་གྲོང་ཁྱེར་དམར་ཤོག་དྲུང་ཆེ་ཡི་འགན་འཁུར་གྱིན་ཡོད་ལ།   སཱུང་ཀྲིན་ཚའེ་དང་ཧུའུ་ཁྲོན་ཧྭ་གཉིས་ནི་མ་འོངས་པའི་རྒྱ་གཞུང་དཔོན་རབས་དྲུག་པའི་སྐབས།  རྒྱ་གཞུང་གི་སྲིད་འཛིན་དང་སྲིད་བློན་གང་རུང་དུ་བསྐོ་འཇོག་གི་དམིགས་གཞི་ཡོད་པའི་ངོས་འཛིན་བྱེད་བཞིན་ཡོད་ལ། ཧུའུ་ཁྲོན་ཧྭ་ཡིས་དམར་ཤོག་དྲུང་ཆེ་འཁུར་བཞིན་པའི་ཀུང་ཏུང་ཞིང་ཆེན་དུའང་། ཉེ་སྔོན་ལྷོ་ཕྱོགས་གཟའ་མཇུག་གི་དོན་རྐྱེན་བྱུང་མྱོང་ཡོད་པ་རེད། 

གསར་འགོད་པ། ཚེ་རིང་རྒྱལ།