རེབ་གོང་རོང་བོ་དགོན་ཆེན་གྱི་སྨོན་ལམ་ཆེན་མོའི་སྐབས་རྒྱ་གཞུང་གི་དོ་དམ་ཤུགས་ཆེན་བྱས་ཡོད་པ་དང་། མི་མང་ནང་དཔུང་རྟགས་དམར་པོ་ཅན་བསྐོ་བཞག་གིས་རང་ལུས་མེར་བསྲེགས་དང་ཆབ་སྲིད་ཀྱི་ལས་འགུལ་རིགས་ལ་ལྐོག་མྱུལ་བྱེད་དུ་བཅུག་ཡོད་འདུག
བསོད་ནམས་ལགས་ཀྱིས་གནས་ཚུལ་བཏང་འབྱོར་ལ། ཟླ་འདིའི་ཕྱི་ཚེས་ ༢༠ ཉིན་ནས་བཟུང་རེབ་གོང་དུ་སྨོན་ལམ་ཆེན་མོ་འཚོགས་ཡོད་པ་དང་། ཉིན་འགའི་སྔོན་ནས་རེབ་གོང་ཁུལ་དུ་རྒྱ་དམག་ཕོན་ཆེན་འབྱོར་ཏེ། རོང་བོ་དགོན་པའི་མདུན་གྱི་སྒྲོལ་མ་ཐང་ཆེན་དང་སྐོར་ལམ་ཁག མི་མང་འདུ་འཛོམ་བྱེད་སའི་སུམ་མདོ་དང་ཟམ་ཁ་སོགས་སུ། དམག་མི་མང་པོའི་ལག་ཏུ་དེང་དུས་ཀྱི་གོ་མཚོན་སྣ་ཚོགས་དང་། མེ་གསོད་ཡོ་ཆས་འདྲ་མིན་བཟུང་སྟེ་ཉིན་མཚན་གཉིས་ཀར་ལྟ་རྟོག་བྱེད་བཞིན་ཡོད་པ་དང་། སྲང་ལམ་ཁག་ཏུ་དམག་མིའི་རླངས་འཁོར་མང་པོ་སྐོར་བསྐྱོད་བྱས་ཏེ། རྒྱལ་ཁབ་བདེ་འཇགས་དང་རང་ལུས་མེར་བསྲེགས་སྐོར་ཀྱི་དྲིལ་བསྒྲགས་ཡིག་ཆ་སྣ་ཚོགས་སྐད་ཤུགས་ཆེན་པོས་བསྒྲགས་ཏེ། ཆོས་མཇལ་བ་ཚོར་སུན་གསེར་དང་འཇིགས་སྣང་ཆེན་པོ་སྤྲད་ཡོད་འདུག
གཞན། དེ་སྔོན་ལོ་གསར་མ་སླེབ་སྔོན་ཙམ་ནས། ས་གནས་ཀྱི་གུང་ཁྲན་ཏང་ཡོན་དང་། གཞུང་གི་སྐྱོབ་གསོ་རག་མཁན། དེ་མིན། སྡེ་བ་རེའི་མི་ ༣༠ ཙམ་རེ་ལ་རྒྱན་བརྒྱབ་སྟེ་དཔུང་རྟགས་དམར་བོ་འདོག་ཏུ་བཅུག་ཡོད་པ་དང་། དཔུང་རྟགས་དམར་བོ་འདོག་མཁན་དེ་དག་གི་ལས་འགན་སྐོར་གནས་ཚུལ་དེར་བཀོད་དོན། “ ཁོང་ཅག་གི་ལས་འགན་ནི། རྒྱ་གཞུང་གིས་འཆད་ཀྱིན་པའི་མི་རིགས་ཁ་བྲལ་དང་རང་སྲེག་བྱ་སྤྱོད། ཆབ་སྲིད་ཕྱོགས་གཏོགས་ཀྱི་སྐད་ཆ་འདྲ་མིན་ཐོས་ཚེ་ཡར་ཞུ་བྱ་དགོས་པ་སོགས་ཡིན་ན་ཡང་། རྒྱ་གཞུང་གིས་དཔུང་རྟགས་དམར་པོ་འདོག་མཁན་དག་ནི། རང་ཉིད་གང་དུ་སྡོད་སའི་གྲོང་ཁྱེར་དང་གྲོང་རྡལ་གྱི་གད་སྙིགས་གཙང་བཟོ་དང་། མེ་སྐྱོན་ལ་མཉམ་འཇོག སྤྱི་ཚོགས་ཀྱི་རྒྱུན་ལྡན་མ་ཡིན་པའི་ཉེས་གསོག་རིགས་ལ་ལྟ་རྟོག་བྱེད་བྱ་རྒྱུ་དེ་ཡིན་ཟེར” ཅེས་བཀོད་འདུག
མུ་མཐུད་བསྟན་དོན། “ ཚོང་ཁང་དང་ཟ་ཁང་ཡོད་དོ་ཅོག་ནས་མི་གཅིག་རེ་ཡིས་ངེས་པར་དུ་དཔུང་རྟགས་དམར་བོ་འདོགས་དགོས་ཤིང་། གལ་ཏེ་མ་བཏགས་ཚེ་མ་འོངས་པར་ཚོང་ཁང་ཟ་ཁང་རིགས་གཉེར་མི་ཆོག་པ་མ་ཟད། དེའི་སྟེང་དུ་ཉེས་ཁྲིམས་གཅོད་རྒྱུའི་འཇིགས་བསྐུལ་བྱེད་ཀྱིན་འདུག” ཅེས་དང་། “ དེ་ནི་རྒྱལ་ཁབ་ཀྱི་དམག་མི་མ་ཡིན་པའི་ལས་བྱེད་པ་དང་ལས་བསྐྱུར་ངལ་གསོ་བྱས་པའི་ལས་བྱེད་རྒན་པ། དེ་དག་གི་བུ་རབས་ཚ་རྒྱུད། ཐ་ན་མང་ཚོགས་ཁྲོད་དུའང་མང་བོ་བསྐོ་བཞག་བྱས་འདུག་པར་མ་ཟད། མི་དེ་དག་ལ་རྒྱལ་ཁབ་ཀྱི་བདེ་སྲུང་ལ་འགན་འཁུར་ལེན་དུ་བཅུག་ཡོད་པ་རེད” ཅེས་བཀོད་འདུག
ད་ཐེངས་ཆོ་འཕྲུལ་སྨོན་ལམ་སྐབས་སུ་རྒྱ་གཞུང་གིས་ངན་ཇུས་འདྲ་མིན་དང་ཐབས་བརྒྱ་ཇུས་སྟོང་སྒོས་མི་མང་གི་འདུ་འཛོམ་ལ་བཀག་འགོག་བྱས་ཡོད། མ་ཟད་ཕྱི་ཟླ་ ༢ པའི་ཚེས་ ༢༠ ཉིན་ཕ་ཡུལ་སི་ཁྲོན་དཀར་མཛེས་ཁུལ་སེར་ཤུལ་དགོན་པ་ནས་ཡིན་པའི་གྲྭ་བཙུན་ ༢༥ རེབ་གོང་ལ་མཇལ་སྐོར་དུ་ཡོང་སྟེ། མགྲོན་དུ་སྡོད་སྐབས་ཉེན་རྟོག་པ་སྐོར་ཞིག་གིས་མགྲོན་ཁང་ལ་སྡོད་དུ་མ་བཅུག་པར་མཚན་གུང་ཆུ་ཚོད་ ༡༡ ཙམ་ལ་ཕྱིར་ཟི་ལིང་ལ་མི་ལོག་ཐབས་མེད་བྱུང་ཡོད་འདུག
གནས་ཚུལ་ནང་བཀོད་པར། རེབ་གོང་དུ་འདི་ལྟར་རྒྱ་གཞུང་གིས་དམ་དྲག་བྱེད་དགོས་དོན་ནི་སྨོན་ལམ་སྐབས་མི་མང་མང་པོ་འཛོམས་སྐབས་རང་ལུས་མེར་བསྲེགས་ཀྱི་དོན་རྐྱེན་ཡོང་བར་དོགས་ཟོན་བྱེད་ཀྱི་ཡོད་པ་དང་། ལོ་སྔོན་མའི་གསུམ་བཅུའི་དུས་དྲན་མཇུག་ཏུ་རོང་བོ་དགོན་པའི་གྲྭ་འཇམ་དབྱང་དཔལ་ལྡན་ལགས་དང་། ཤ་རིང་ནས་ཡིན་པས་མི་སྐྱ་བསོད་ནམས་དར་རྒྱས་སོགས་ཀྱིས་རང་ལུས་མེར་བསྲེགས་བཏང་སྟེ་རྒྱ་གཞུང་ལ་ཞི་རྒོལ་བྱས་པ་སོགས་ལ་བརྟེན། ད་ལོ་སླར་ཡང་དོན་རྐྱེན་དེ་དག་ཡོང་སྲིད་པར་འཇིགས་སྣང་བྱས་པ་ཞིག་ཡིན་སྐོར་སོགས་བཀོད་འདུག
རེབ་གོང་ས་ཁུལ་དུ་དར་བའི་ཆོ་འཕྲུལ་སྨོན་ལམ་ཆེན་མོ་ནི། རེབ་གོང་སྐྱབས་མགོན་སྐུ་ཕྲེང་གཉིས་པ་ངག་དབང་འཕྲིན་ལས་རྒྱ་མཚོས་རོང་བོ་ནང་སོ་ངག་དབང་བསོད་ནམས་དང་བཀའ་བགྲོས་མཛད་དེ། རབ་བྱུང་བཅུ་གཉིས་པའི་ཆུ་ཁྱི་ལོར་ཕྱི་ལོ་ ༡༧༣༢ ལོར་གསར་དུ་བཙུགས་ཏེ། ད་ལྟའི་བར་ལོ་ངོ་ཉིས་བརྒྱ་སུམ་ཅུ་ལྷག་རིང་མ་ཉམས་པར་རྒྱུན་མཐུད་པ་ཞིག་ཡིན་འདུག
ཆོ་འཕྲུལ་ཟླ་བའི་ཚེས་ ༡༡ ནས་ ༡༦ བར་རོང་བོ་དགོན་ཆེན་གཙོས་དགོན་མ་ལག་གྱི་དགེ་འདུན་པ་སྟོང་ཕྲག་མང་པོ་འཚོགས་ཆེན་འདུ་ཁང་དུ་ཚོགས་ཏེ་སྨོན་གྱི་ཆོ་ག་སྒྲུབ་ཅིང་། ཚེས་ ༡༣ ཉིན་ཆོས་མཇལ་བ་རྣམས་ལ་རོང་བོ་དགོན་ཆེན་གྱི་ནང་རྟེན་ལ་མཇལ་ཁ་ཡོད་པ་དང་། ཚེས་ ༡༤ ཉིན་གོས་སྐུ་ཆེན་མོར་སེར་སྦྲེངས་དང་བཅས་ཏེ་གདན་འདྲེན་ཞུས་ཏེ་མཇལ་ཁ་གཏོང་བ། ཚེས་ ༡༥ ཉིན་རྗེ་བཙུན་བྱམས་པ་མགོན་པོའི་སྐུ་གཟུགས་གདན་འདྲེན་གྱི་མཇལ་ཁ་གཏོང་བ། ཚེས་ ༡༦ ཉིན་དགྲ་འཆམ་གཏོང་རྒྱག་གིས་སྨོན་ལམ་ཆེན་མོར་འཚོགས་པ་སོགས་ཡོད་འདུག
གསར་འགོད་པ། དོན་འགྲུབ་བཀྲ་ཤིས།
དབུ་མའི་ལམ་སྟེང་ན།
རྒྱ་དམག་ལོས་ཀྱང་ཡོད།
བུ་དགོས་སྟུ་ཚ་བཟོད།
དབུ་འདོད་རྒྱ་དམག་བཟོད།