རྡོ་སྦིས་ཟླ་བ་ཚེ་རིང་།
ཁ་སང་དེ་རིང་གི་དུས་ཚོད་འདི་ལ་སྐད་ཆ་འདི་འདྲ་གླེང་ནས་ནད་ལོག་རྒྱག་པའི་དུས་ཚོད་ཅིག་གཏན་ནས་མིན་ན་ཡང་། འདས་པའི་དུས་རབས་ཕྱེད་ལྷག་རིང་བཙན་བྱོལ་སྤྱི་ཚོགས་ཁྲོད་ཀྱི་བོད་སྐད་ཡིག་གི་ལོ་ནག་ལ་ཕྱི་མིག་ཅིག་བལྟས་ཚེ་གནད་དོན་འདི་གླེང་མི་འོས་བ་ཞིག་དང་གླེང་ཚད་མིན་པ་ཞིག་ཀྱང་གཏན་ནས་མིན་པའི་ངེས་ཤེས་རྙེད་ཡོང་གི་འདུག
བོད་སྐད་བོད་ཡིག་གི་སྐུ་དྲིན་ལས་ཁ་རྒྱབ་འཚོ་མཁན་གྱི་མི་བུ་ཞིག་ལ་མཚོན་ན། འདིའི་འཕེལ་འགྲིབ་གནས་གསུམ་ལ་བསམ་གཞིགས་གཏོང་རྒྱུའི་འོས་འགན་ངེས་པར་དུ་ཡོད་པས་ན། ངས་རང་གི་འོས་འགན་གང་ཡིན་པ་དེ་ཕྲག་ཏུ་བླངས་ཏེ་ལྷ་ཕོག་ཀླུ་ཕོག་ལ་མ་འཛེམ་པར། སེམས་ཚབ་ཀྱིས་ཀུན་ནས་བསླངས་པའི་བདེན་པའི་གཏམ་འགའ་འདི་ནས་མི་བཤད་ཐུ་མེད་ཆགས་སོང་།
འུ་ཚོས་ལོ་རྒན་དྲུག་ཅུར་ཉེ་བའི་དུས་ཚོད་འདིའི་ནང་དུ་བོད་སྐད་ཡིག་གི་གཞུང་ལམ་ཕྲེད་དུ་བཅད་དེ་སེམས་ཚོར་ཡན་གར་བ་ཞིག་གི་རྨི་ལམ་ལ་ཤི་འཐམ་རོ་འཐམ་བྱས་ནས་བསྡད་ཡོད་པ་ནི་གཞི་རིམ་སློབ་ཆུང་སློབ་གསོ་ནས་ལྟ་གོན་བྱས་ཡོད། དམའ་རིམ་དང་པོ་ནས་མགོ་བཙུགས་ཏེ་རྩ་བ་བོར་ནས་ཡལ་གར་འཇུས་ཤིང་། ཡིག་གཟུགས་སྐམ་པོ་ཞིག་ལ་གསེར་ལས་དཀོན་པའི་དུས་ཚོད་ཡོངས་རྫོགས་གཏུམ་བཞིན་ཡོད་པ་ནི་སློབ་གསོའི་རྨིང་རྡོ་དོར་བ་རེད།
འཛིན་རིམ་དང་པོ་ནས་གཉིས་པའི་བར་སུག་རིང་དང་། འཛིན་རིམ་གསུམ་པ་ནས་སུག་ཐུང་། བཞི་བ་ལྔ་བ་ནས་འཁྱུག་མ་ཚིགས་དང་འཁྱུག་ཡིག་བཅས་སློབ་མ་ཚོའི་དུས་ཚོད་ཡོངས་རྫོགས་བསམ་བཞིན་དུ་ཡིག་གཟུགས་སྒྱུ་རྩལ་འདིས་འཁྱུར་མིད་གཏོང་དུ་འཇུག་གིན་ཡོད་སྟབས། ང་ཚོའི་སྐད་ཡིག་ཡར་རྒྱས་ཀྱི་ལམ་ཁ་འདི་ནས་ཞིག་རལ་དུ་གྱུར་བ་རེད་ཟེར་བ་དེ་ཡིན།
སྤྱིར་བོད་ལ་ཡིག་གཟུགས་མི་མཁོ་བ་དང་། སློབ་ཕྲུག་ཚོས་ཡིག་གཟུགས་སྦྱང་དགོས་ཀྱི་མི་འདུག་གཏན་ནས་ཞུ་གི་མེད། འོན་ཀྱང་། ཡིག་གཟུགས་ཞེས་པ་འདི་སྒྱུ་རྩལ་གྱི་ཆར་གཏོགས་ཤིག་ཡིན་པས་ན། བོད་པའི་བུ་ཕྲུག་ཚོ་ཆུང་བྱིས་པའི་དུས་ནས་སྒྱུ་རྩལ་ཆེད་མཁས་པ་ཞིག་བྱ་དགོས་པའི་ངེས་པ་མེད་ལ། དེའི་ནང་ནས་ཀྱང་ཡིག་གཟུགས་སྒྱུ་རྩལ་ཆེད་མཁས་པ་ཞིག་ཏུ་སྐྱེད་སྲིང་བྱེད་འདོད་པ་ནི་བླུན་རྟགས་ཡ་ང་བ་ཞིག་མ་ཡིན་ནམ།
འུ་ཚོས་མགོ་མི་ཤོང་སར་ལུས་འཚང་སྟེ་ཡིག་གཟུགས་སྒྱུ་རྩལ་གྱི་ཆ་འདི་གཞི་རིམ་སློབ་གསོའི་རྨང་རྡོ་རུ་བཞག་ནས་ཡོང་བའི་སློབ་གསོ་འདིའི་བརྒྱུད་རིམ་ནས་བལྟས་ན། ད་བར་འུ་ཅག་ལ་ཐོབ་པ་ལས་ཤོར་བ་མང་ཞིང་། བཙན་བྱོལ་སྤྱི་ཚོགས་ནང་ཤེས་ཡོན་འཐུས་ཤོར་དུ་བཏང་འདུག་ཅེས་པའི་སྡུག་སྐད་ཤོར་བཞིན་པའང་འདི་ལ་ཐུག་ཡོད།
འཛམ་གླིང་འདིར་མི་རིགས་རེ་ལ་ཡིག་གཟུགས་མཛེས་རྩལ་རེ་ཡོད་པ་བཤད་མ་དགོས་ལ། རྒྱ་ནག་ལ་མཚོན་ནའང་སྤུ་སྨྱུག་མཛེས་རྩལ་ཞེས་པའི་ཡིག་གཟུགས་ཀྱི་མཛེས་རིས་སྣ་ཚོགས་ཡོད། དེ་བཞིན། དབྱིན་ཡིག་ལའང་ཀུན་གྱི་མིག་ལམ་དུ་བསྟར་ཡོད་པའི་ཡིག་གཟུགས་མཛེས་རྩལ་སྣ་ཚོགས་ཤིག་ཡོད་ཀྱང་། ཁོང་ཚོས་ཡིག་གཟུགས་ཀྱི་མཛེས་རྩལ་འདི་དག་གཞི་རིམ་སློབ་གསོ་རུ་བཞག་མེད་པ་ནི། རྩ་བ་བོར་ནས་ཡལ་གར་འཐམ་ན་སྙིང་བོ་མེད་པ་དང་། བྱིས་པའི་སློབ་གསོ་ཡིག་གཟུགས་ལ་བཅོལ་བའི་སློབ་གསོ་ཕོང་གསུམ་པ་འདིར་རིན་ཐང་ཆུང་བ་ཤེས་ཡོད་པས་རེད།
བཙན་བྱོལ་ནང་གི་གཏམ་བརྗོད་པ་པ་ཚེ་རིང་ལགས་ཀྱིས་ཀྱང་འདི་ལྟར་བཤད་ཡོད། “བཙན་བྱོལ་གྱི་སློབ་ཕྲུག་ཚོས་ཡིག་གཟུགས་རྐང་པ་རིང་པོ་གཅིག་འབྲི་རག་བར། ཨ་མདོ་བ་ཚོས་དཔེ་དེབ་གཅིག་བཀླགས་ནས་ཚར་འགྲོ་ངེས་རེད” ཅེས་ལབ་པ་འདི་ཡང་གནད་དུ་ཁེལ་བའི་གདམ་པའོ།།
ད་ནས་བཟུང་འུ་ཅག་གིས་ཡིག་གཟུགས་ཐོག་གཏོང་བཞིན་པའི་དུས་ཚོད་དང་། དཀའ་སྤྱད་འབད་བརྩོན་དེ་དག་གཞི་རིམ་དཔེ་ཀློག་གི་ངོ་བོར་བསྒྱུར་ཏེ། རྨིང་གཞིའི་སློབ་གསོ་འདི་གཉིས་ཀྱི་གོ་གནས་བརྗེ་ཐུབ་ཚེ། ཚོགས་སྤྱི་འདིའི་བོད་ཡིག་ཡར་རྒྱས་མི་འདུག་ཟེར་བའི་སྡུག་སྐད་རིམ་གྱིས་ཆད་འགྲོ་ངེས་ཡིན་པ། མི་བུ་བདག་གི་བྱིས་དུས་སློབ་སྦྱོང་གི་གོ་རིམ་དང་ད་ལྟའི་དགེ་རྒན་གྱི་མྱོང་བ་མངོན་སུམ་ལས་བྱུང་བའི་མི་སྐད་ཉིད་དོ།།
ཏག་ཏག་ཅིག་རེད་མི་བསམ་གི འོན་ཀྱང་བོད་སྐད་ཡིག་གི་ལས་དབང་ལ་སེམས་ཁུར་བྱེད་མཁན་ཅིག་གི་ལྟ་ཚུལ་ཡིན་པས་གུས་བཀུར་ཞུ། ལོ་ཤས་ཀྱི་སྔོན་ལ་ཁ་ཤས་ཤིག་གིས་དབུ་མེད་ཀྱི་སྐོར་ནས་མང་པོ་གླེང་སློང་བྱས་པ་དྲན་གི འདྲ་བོ་རེད།
རྒྱ་གར་གཙོས་བཙན་བྱོལ་ནང་གི་བོད་ཡིག་ཡར་རྒྱས་སུ་གཏོང་དགོས་ན་སྔོན་ལ་བོད་ཡིག་བཀོད་སྤྱོད་ཀྱི་ཁོར་ཡུག་ཅིག་ངེས་པར་བཟོ་དགོས། དེ་ཡང་བོད་གཞུང་གི་ལྷན་ཁང་ཁག་ནང་ཕྱི་འབྲེལ་དང་རྩིས་ཞིབ་སོགས་གཞན་ཡིག་མ་སྤྱོད་ཐབས་མེད་རིགས་ཕུད། དེ་མིན་ནང་ཁུལ་བཀོད་སྤྱོད་རིགས་གང་ཡིན་རང་གི་ཡིག་གེ་ཁོ་ན་བེད་སྤྱོད་དགོས་པའི་བཅའ་ཁྲིམས་ཤིག་གཏན་འབེབ་བྱ་དགོས་རེད། དེ་མིན་རང་གི་ཡིག་གེ་རང་གིས་བེད་སྤྱོད་མ་བྱས་ན་གཞན་སུས་ལག་ལེན་བྱེད་ཀྱི་རེད། འཛེམ་དོག་མེད་པའི་སྐད་ཆ་བཤད་ན་བཙན་བྱོལ་ནང་རང་གི་ཚེ་སྲོག་རང་གིས་ཨེ་ཆོད་བལྟ་གི་ཡོད་པ་རེད།
བཙན་བྱོལ་ནང་གི་བོད་ཡིག་ཡར་རྒྱས་སུ་བཏང་དགོས་ན་སྔོན་ལ་སྐད་ཡིག་དང་ཕ་སྐད་གཙང་མ་ཞིག་ཡར་རྒྱས་བཏང་དགོས་འོན་ཀྱང་དེ་ནི་དུས་ནམ་ཡོང་མི་སྲིད་པ་ཞིག་སྤྱང་ཀའི་བུ་གསོས་ན་སྒོ་ཁྱི་ཁག་པོ་རེད
བཙན་བྱོལ་གཞི་རིམ་སློབ་གྲྭའི་སློབ་གསོ་ཡིག་གཟུགས་ཀྱིས་ཕོངས་མེད། འོན་ཀྱང་བྱིས་པའི་སེམས་ཁམས་ལས་རྒལ་བའི་སྐྱེ་བ་སྔ་ཕྱི་དང་ལས་འབྲས་རྣམ་གཞག་སོགས་ཆོས་ཚིག་ཁོ་ནས་བྱིས་པའི་སེམས་ཁམས་ལ་མི་གཤོང་བའི་སློབ་གསོ་དེས་འཛིན་རིམ་བཅུ་གཉིས་ལ་སླེབས་པའི་སློབ་ཕྲུག་ཚོའི་བོད་ཡིག་ཤེས་ཚད་ལས་ཤེས་ཐུབ།
སློབ་ཕྲུག་ཚོས་དབུ་མེད་སྦྱངས་ཀྱང་དཔེ་དེབ་ཀློག་པར་དབུ་ཅན་ཡང་བསྐྱར་སྦྱངས་དགོས་ཀྱི་འདུག་པ་ཨ་མདོ་བ་ཚོས་དབུ་མེད་ཀློག་པར་དབུ་མེད་ཡང་བསྐྱར་སྦྱངས་དགོས་པ་གཉིས་ལ་ཁྱད་པར་མེད་དོ།། གང་ལྟར་གཉིས་ཀ་མཁོ་བས་སྦྱངས་དགོས་སོ།།
སྐད་ཆ་འདི་ལ་རྒྱུ་མཚན་ཏིལ་འབྲུ་ཙམ་ཡང་མིན་འདུག དེ་འདྲ་དེ་འདྲ་བྱས་ནས་ཚང་མ་མེད་པ་བཟོ་མཁན་ཡིན་པས། གང་ཡང་ཤེས་ཀྱི་མིན་འདུག
་་་་་ “བཙན་བྱོལ་གྱི་སློབ་ཕྲུག་ཚོས་ཡིག་གཟུགས་རྐང་པ་རིང་པོ་གཅིག་འབྲི་རག་བར། ཨ་མདོ་བ་ཚོས་དཔེ་དེབ་གཅིག་བཀླགས་ནས་ཚར་འགྲོ་ངེས་རེད” ་་་་ཟེར།