གངས་སྐྱིད་སྤྱི་ཐབ་ཚོགས་ཁང་དུ་འཕགས་ཡུལ་ཀིརྟི་བྱེས་པ་གྲྭ་ཚང་གིས་པར་དུ་བསྐྲུན་པའི་རང་ལུས་མེར་བསྲེགས་དང་འབྲེལ་བའི་ལོ་རྒྱུས་ཡིག་ཚགས་ཞེས་པའི་བོད་དབྱིན་རྒྱ་གསུམ་གྱི་དཔེ་དེབ་ལྔ་དབུ་འབྱེད་དང་འགྲེམས་སྤེལ་བྱས་ཡོད།
དེ་རིང་ཞོགས་པ་ཆུ་ཚོད་ ༡༠ སྟེང་། གངས་སྐྱིད་སྤྱི་ཐབས་ཚོགས་ཁང་དུ། ངྷ་སའི་ཀིརྟི་བྱེས་པ་གྲྭ་ཚང་གིས་དཔར་བསྐྲུན་བྱས་པའི་༼རང་ལུས་མེར་སྲེག་དང་འབྲེལ་བའི་ལོ་རྒྱུས་ཡིག་ཚགས།༽ཞེས་པའི་བོད་དབྱིན་རྒྱ་གསུམ་གྱི་དཔེ་དེབ་ ༥ དབུ་འབྱེད་གནང་སོང་། སྐུ་མགྲོན་གཙོ་བོར་སྲིད་སྐྱོང་སྐུ་ཚབ་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དང་དམིགས་བསལ་སྐུ་མགྲོན་དུ་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་རྣམ་གཉིས་གཙོས། སྤྱི་འཐུས་རྒྱུན་ལས་རྣམ་པ་དང་ལྷན་ཁག་ཅིག་གི་དྲུང་ཆེ། གཞུང་འབྲེལ་མིན་པའི་ཚོགས་པ་ཁག་ཅིག་གི་འཐུས་མི་བཅས་མཛད་སྒོར་ཞུགས་སོང་།
མཛད་སྒོའི་ཐོག་མ་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་མོའི་རྒྱལ་གླུ་གྱེར་འདོན་དང་། དེ་ནས་བོད་རྒྱལ་ཁབ་དང་མི་རིགས་ཀྱི་ཆེད་དུ་རང་སྲོག་བློས་གཏོང་གནང་མཁན་དང་ད་ལྟ་རྒྱའི་བཙོན་འོག་ཏུ་སྡུག་སྦྱོང་མནར་གཅོད་མྱོང་བཞིན་པའི་རྒྱལ་གཅེས་དཔའ་བོ་དཔའ་མོ་རྣམས་ལ་གདུང་སེམས་མཉམ་སྐྱེད་དང་མྱ་ངན་བཀུས་འདུད་མཚོན་ཕྱིར་སྐར་མ་གཅིག་རིང་ངག་བཅད་མྱ་ངན་ཞུས་མཐར། སྐུ་མགྲོན་གཙོ་བོ་ནང་སྲིད་བཀའ་བློན་མཆོག་དང་དམིགས་བསལ་སྐུ་མགྲོན་སྤྱི་འཐུས་ཚོགས་གཞོན་རྣམ་གཉིས་ཀྱིས་དཔེ་དེབ་རྣམས་དབུ་འབྱེད་གནང་སོང་།
དཔེ་དེབ་དབུ་འབྱེད་གནང་རྗེས་ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་ཀྱིས་དཔེ་དེབ་དག་ངོ་སྤྲོད་གནང་པ་ལྟར་ན། དེབ་པོ་དང་གཉིས་པ། གསུམ་པ་བཅས་བོད་ཡིག་ནང་ཡོད་པ་དང་། དེབ་དེ་དག་ནང་ ༡༩༩༨ ལོའི་ཟླ་ ༤ ཚེས་ ༢༧ ནས་ ༢༠༡༢ ལོའི་ཟླ་ ༩ ཚེས་ ༢ བར་བྱུང་པའི་བོད་ཕྱི་ནང་གཉིས་ཀྱི་བོད་མི་རང་ལུས་མེར་བསྲེགས་གནང་མཁན་རྣམས་ཀྱི་ལོ་རྒྱུས་དང་། ༢༠༡༡ ཟླ་ ༣ ཚེས་ ༡༦ ནས་ ༢༠༡༢ ཟླ་ ༩ ཚེས་ ༢ བར་རྒྱ་ནག་གཞུང་གིས་བོད་མི་དམར་གསོད་བཏང་པ། བོད་མི་ཚོས་རྒྱ་གཞུང་གི་དྲག་རྩུབ་སྲིད་ཇུས་བཟོད་ཐབས་བྲལ་ཏེ་རང་ཤི་བརྒྱབ་པ། བོད་མི་མང་པོ་བཙོན་འཇུག་ཁྲིམས་ཐག་བཅད་པ། དགོན་གྲོང་མང་པོར་དམ་དྲག་དང་ཁྲིམས་ལུགས་སློབ་གསོ་ཟེར་པའི་ལས་འགུལ་སྤེལ་པ། དེ་དག་ལ་བོད་མི་ཚོས་མགོ་བོ་མ་བསྒུར་པར་དུས་ནས་དུས་ཞི་རྒོལ་བྱས་པ་་སོགས་བཀོད་ཡོད་འདུག
དེ་བཞིན། དཔེ་དེབ་དེ་དག་ནང་བོད་རྒྱལ་ཁབ་དང་མི་རིགས་ཆེད་རང་ལུས་མེར་བསྲེགས་ཀྱི་གནས་ཚུལ་བྱུང་འཕྲལ་རྒྱ་གར་གཙོས་རང་དབང་ལུང་པར་ཡོད་པའི་བཙན་བྱོལ་བོད་མིའི་སྒྲིག་འཛུགས་དང་གཞུང་འབྲེལ་མིན་པའི་ཚོགས་པ་ཁག བོད་མི་དང་བོད་དོན་རྒྱབ་སྐྱོར་སོགས་ཀྱིས་ལས་འགུལ་ཅི་སྤེལ། རྒྱལ་སྤྱིའི་སྲིད་གཞུང་དང་གྲོས་ཚོགས་ཁག་གིས་རྒྱབ་སྐྱོར་གྱི་གཞུང་འབྲེལ་བསྒྲགས་གཏམ་དང་གྲོས་ཆོད་རིགས། གལ་ཆེ་བའི་གསར་ལམ་ཁག་ནང་ཐོན་པའི་གནས་ཚུལ་དང་དཔྱད་གཏམ་རྩོམ་ཡིག གོང་གསལ་ཟླ་ཚེས་རྗེས་སུ་བྱུང་པའི་རང་ལུས་མེར་བསྲེགས་ཀྱི་གནས་ཚུལ་ཁག་ཟུར་དུ་བཀོད་པ་བཅས་འདུས་ཡོད་འདུག་ལ། དེབ་བཞི་བ་དང་ལྔ་བ་གཉིས་བོད་ནང་གི་རང་ལུས་མེར་བསྲེགས་གནས་ཚུལ་དང་འབྲེལ་བའི་དབྱིན་ཡིག་དང་རྒྱ་ཡིག་སོགས་སུ་ཐོན་པའི་གནས་ཚུལ་རྣམས་བསྡུ་བསྒྲིགས་གནང་ཡོད་འདུག
ཁོང་གིས་བཙན་བྱོལ་གྱི་དུས་སྐབས་འདི་ཡང་བོད་མི་རིགས་ཀྱི་རང་དབང་འཐབ་ཁྲོད་དུ་གནས་བབ་གལ་ཆེན་ཞིག་ཡིན་སྟབས། བོད་རང་དབང་འཐབ་རྩོད་ཀྱི་ལོ་རྒྱུས་ནི་ཇི་སྲིད་བསྐལ་བ་ནམ་གནས་ཀྱི་བར་དུ་མིའི་རིགས་ཀྱི་ལོ་རྒྱུས་ནང་གནས་དགོས་པ་ཞིག་ཡིན་སྟབས། གསར་དུ་དབུ་འབྱེད་བྱས་པའི་དཔེ་དེབ་འདི་དག་ནི་བོད་ཕྱི་ནང་གཉིས་ཀྱི་གནས་ཚུལ་འདུས་པའི་རང་སྲེག་ལས་འགུལ་གྱི་ལེའུ་ཞིག་དང་ལོ་རྒྱུས་ཡིག་ཚགས་ཤིག་ཏུ་གྲུབ་པར་བྱས་ཡོད་སྐོར་བརྗོད་སོང་།
དེའི་རྗེས་སྤྱི་འཐུས་ཚོགས་གཞོན་མཆོག་གིས། དཔེ་དེབ་བསྡུ་བསྒྲིགས་དང་དེ་དག་གི་བརྗོད་བྱ་བཅས་ཀྱི་ཐད་བསྔགས་བརྗོད་དང་འབྲེལ། བོད་ནང་གི་གནས་སྟངས་ཛ་དྲག་ཇེ་ཆེར་འགྲོ་བཞིན་པར་བརྟེན། བཙན་བྱོལ་བོད་མི་ཚོས་བོད་ནང་གི་གནས་ཚུལ་རྒྱལ་སྤྱིའི་སྟེང་བསྐྱལ་ཐུབ་པ་དང་རྒྱལ་སྤྱིའི་རྒྱབ་སྐྱོར་འཚོལ་རྒྱུ་སོགས་ཀྱི་ཐད་སྔར་བས་ཤུགས་གནོན་རྒྱག་དགོས་པ་དང་། ད་སྔ་བོད་མི་ ༡༠༧ ཀྱིས་རང་ལུས་མེ་རུ་སྒྲོན་ཡོད་པ་ཁོང་ཚོ་འགྲོ་བ་མི་གཞན་དག་དང་གཅིག་མཚུངས་ཡིན་ཡང་། རྒྱ་གཞུང་གི་དྲག་གནོན་འོག་རང་ལུས་མེར་བསྲེགས་གཏོང་དགོས་པའི་ཛ་དྲག་གནས་སྟངས་ལ་རྒྱལ་སྤྱིའི་སྲིད་གཞུང་ཁག་གི་སྲིད་འཛིན་དང་སྲིད་བློན་ཚོས་མིའི་རང་དབང་དང་འགྲོ་བ་མིའི་ཐོབ་ཐང་ལ་གཙི་སྲུང་གི་བསམ་བློ་ཡོད་ཚེ་ཁ་རྐམ་པོས་སྐད་ཆ་བཤད་མ་བསྡད་པར་ཁ་ཡོད་ལག་ཡོད་ཐོག བོད་དོན་རྒྱབ་སྐྱོར་གྱི་རྣམ་འགྱུར་ཤུགས་ཆེན་པོ་སྟོན་དགོས་པ་དང་རྒྱ་ནག་ལ་གནོན་ཤུགས་སྤྲོད་པའི་དུས་ལ་སླེབས་ཡོད་སྐོར་གསུངས་སོང་།
ཡང་ཁོང་གིས་རྒྱ་གཞུང་གིས་རང་ལུས་མེར་བསྲེགས་ཐད་དྲག་གནོན་བྱ་རྒྱུ་ལས། བོད་མིའི་རང་ལུས་མེར་བསྲེགས་ཀྱི་རྒྱུ་རྐྱེན་ལ་ཞིབ་འཇུག་བྱས་ཏེ་དཀའ་ངལ་སེལ་ཐབས་བྱ་དགོས་པ་དང་། དེ་ལྟར་མ་བྱས་བར་དུ་བོད་མིའི་རང་ལུས་མེར་བསྲེགས་ཀྱི་ལས་འགུལ་མཚམས་འཇོག་ཐུབ་པ་ཞིག་མིན་པ། བོད་རྒྱུའི་དཀའ་རྙོག་འདི་ཅི་འདྲ་ཞིག་ཏུ་འགྱུར་མིན་རྒྱ་ནག་གཞུང་གི་བྱེད་སྟངས་ལ་རག་ལས་པ་ཞིག་ཡིན་སྟབས། དེང་སྐབས་རྒྱ་ནག་གི་བཀའ་ཤག་རྙིང་པར་འཕོ་འགྱུར་ཐེབས་ཏེ་བཀའ་ཤག་གསར་པའི་མགོ་ཁྲིད་ཚོ་སླེབས་པའི་སྐབས་འདིར། ཁོང་ཚོས་ད་ལྟའི་བོད་ནང་གི་ད་དྲག་གནས་བབ་དང་བོད་རྒྱའི་དཀའ་རྙོག་སེལ་ཆེད་པེ་ཅིན་དང་ངྷ་རམ་ས་ལའི་བར་ཞི་འགྲིག་གི་གྲོས་མགོ་འདོན་དགོས་པའི་འབོད་སྐུལ་གནང་སོང་།
མཐར་ནང་སྲིད་བཀའ་བློན་མཆོག་གིས། རྒྱ་ནག་གིས་བོད་བཙན་བཟུང་བྱས་པ་ནས་བོད་དང་བོད་མི་ཟེར་བ་རྩ་མེད་གཏོང་པའི་སྲིད་ཇུས་ལག་བསྟར་བྱས་ཀྱང་། ད་ཆར་བོད་རྩ་མེད་བཟོ་རྒྱུ་ཟེར་པ་དེ་ཡོང་ཐབས་མེད་པ་ཞིག་ཡིན་པ་ཁ་གསལ་བོ་ཆགས་ཡོད་པ་དང་། བོད་དང་བོད་མིའི་རྣམ་དཔྱོད་ལ་དྲག་གནོན་གྱིས་རྩ་མེད་གཏོང་ཐུབ་པ་ཞིག་མིན་སྐོར། རྒྱ་གཞུང་གིས་༧གོང་ས་མཆོག་དང་བཙན་བྱོལ་བོད་མིའི་སྒྲིག་འཛུགས། ཚོགས་པ་དགོན་སྡེ་སོགས་ལ་བོད་ནང་གི་རང་ལུས་མེར་བསྲེགས་ཐད་བརྒྱུད་སྐུལ་བྱས་པའི་བསྙོན་འཛུགས་བྱས་དང་བྱེད་བཞིན་པ་དེས་ཕན་འབྲས་གང་ཡང་མི་འཐོན་པར། རྒྱ་ནག་མགོ་ཁྲིད་ཚོའི་ངོས་ནས་བོད་ཐོག་འཛིན་པའི་དྲག་གནོན་སྲིད་ཇུས་མཚམས་འཇོག་བྱ་དགོས་ཚུལ་གསུངས་སོང་།
ཡང་ཁོང་གིས་བཙན་བྱོལ་བོད་མིའི་སྒྲིག་འཛུགས་ངོས་ནས། བོད་ནང་གི་བོད་མི་ཚོས་སོ་སོའི་རྒྱལ་ཁབ་དང་མི་རིགས་ཆེད་དྲང་བདེན་དང་འཚེ་བ་མེད་པའི་སྒོ་ནས་ལས་འགུལ་སྤེལ་མཁན་ཚོར་ཡི་རངས་དང་། ཁོང་ཚོའི་དགོས་འདུན་རྣམས་སྒྲུབ་ཐབས་བྱ་རྒྱུ་དེ་བཙན་བྱོལ་བོད་མིའི་སྒྲིག་འཛུགས་ལ་འཁྲི་པའི་ལས་འགན་ཞིག་ཏུ་ངོས་འཛིན་ཐོག མུ་མཐུད་བོད་ཀྱི་བདེན་མཐའ་མ་སེལ་པར་དུ་ཁོང་ཚོའི་དགོས་མདུན་བསྒྲུབ་ཐབས་ཀྱི་འགན་འཁུར་ངེས་ཡིན་ཞེས་གསུངས་སོང་།
དེབ་དང་པོར་ཤོག་གྲངས་ ༦༩༩ དང་། དེབ་གཉིས་པར་ཤོག་གྲངས་ ༨༢༧། དེབ་གསུམ་པར་ཤོག་གྲངས་ ༧༩༩། དེབ་བཞི་བར་ཤོག་གྲངས་ ༧༦༧། དེབ་ལྔ་བར་ཤོག་གྲངས་ ༣༩༡ བཅས་འདུག
གསར་འགོད་པ། བནྡེ་སྐྱབས།
དུས་ཐོག་ཆར་བ་ལྟ་བུའི་རླབས་ཆེ་བའི་བྱ་གཞག་འདི་ལྟ་བུའི་བྱེད་པོ་སྟེ་རྩོམ་སྒྲིག་པ་དག་ལ་གུས་པ་ལན་བརྒྱར་ཞུ།
དྲི་བ། ལོ་གཅིག་གཉིས་ནང་རང་སྲེག་གི་གྲངས་ཚད། མི་ལོ་བརྒྱ་ཕྲག་སྔོན་གསར་གཏོད་བྱས་པའི་དགའ་ལྡན་ཁྲི་པ་རིམ་བྱོན་གྱི་གྲངས་ཚད་ལས་ཀྱང་བརྒལ་སོང། ད་ག་རེ་བྱས་ན་དྲག་གམ།
ལན། བོད་མིའི་སྒྲིག་འཛུགས་བཀའ་ཤག་གི་རང་སྲེག་མཚམས་འཇོག་རོགས་ཞེས་ཞུ་རྒྱུའི་གོ་སྐབས་ཡོལ་ཟིན་པ་རེད། སྤྱི་ཡོངས་ནས་ཞུས་ན་བཀའ་ཤག་གི་གསལ་བསྒྲགས་རིམ་བྱས་ཀྱི་ཚོད་དཔག་དང་བོད་ནང་གི་དོན་རྐྱེན་བྱུང་ཚད་གཉིས་རྦད་དེ་ཁ་ཁར་ཕྱིན་ཡོད། ”ཉེན་འཚབ་ཆེ་བའི་ལས་འགུལ་མ་སྤེལ་”ཞེས་དང་”འུ་ཐུག་ཐབས་ཟད”། ”འུ་ཐུག་ཐབས་ཟད་ཀྱི་ལས་འགུལ་རིགས་མ་སྤེལ་ཞུས་ཀྱང་བོད་ནང་མཚམས་བཞག་མ་སོང་”ཟེར་བ་སོགས་ནི་བཀའ་ཤག་ནས་ཐོན་པའི་རང་སྲེག་ངོས་འཛིན་དང། ཡང་ན་དེའི་གནས་བབ་ཛ་དྲག་ལ་གདོང་ལེན་གནང་ཕྱོགས་ཀྱང་རེད། ད་ལྟ་རིམ་པ་འདི་དག་ཚང་མའི་བྲོ་བ་བརླག་ཟིན་པ་མ་ཟད། ཕྱི་རྒྱལ་ཤིག་ནས་མགོ་སེར་ཞིག་ལ་ཐུག་གི་ཡོད་རབ་ཀྱི་གནས་སྟངས་དེའང་ཚིག་ཙམ་གྱི་ངོ་བོར་མི་གནས་བའི་འབོད་སྐུལ་ང་ཚོའི་དཔོན་རིགས་ཚོའི་ཁ་ནས་གསལ་བོར་ཐོན་ཡོད། རྒྱུ་མཚན་འདིས་ད་ནི་ཐེ་ཚོམ་ངང་གནས་མི་རུང་བ་དང། གདེང་ཚོད་མེད་པར་འདུག་མི་ཉན་པའི་གནས་སྟངས་གསལ་རྗེན་བྱེད་ཀྱི་ཡོད་སྟབས། ཆབ་སྲིད་འགན་དབང་རྩིས་སྤྲོད་ཀྱི་ལོ་གཅིག་ལྷག་རིང་དོན་དངོས་པོར་ང་ཚོས་འགན་འཁྱོག་ཡོད་མེད་གནས་སྟངས་འདིས་གསལ་བཤད་བྱེད་ཐུབ་པས། དངོས་གནས་རང་བཀའ་ཤག་གིས་ཕྱིའི་རྣམ་པ་ལས་ནང་དོན་གཙིགས་སུ་འཛིན་གྱི་ཡོད་ན། རང་སྲེག་གི་གནས་སྟངས་ཐད་ཞིབ་འཇུག་ཚད་ལྡན་ཞིག་བྱས་ནས་ས་གནས་སོ་སོའི་རང་སྲེག་བྱུང་རྐྱེན་གྱི་དངོས་རྒྱུ་གསལ་སྟོན། རང་སྲེག་བྱུང་ཡུལ་སོ་སོར་ད་བར་རྒྱལ་སྤྱིའི་སྟེང་ཡོངས་གྲགས་མ་ཆགས་པའི་གནས་ཚུལ་ག་རེ་བྱུང་ཡོད་མེད། མ་འོངས་པར་རང་སྲེག་འདི་བོད་མི་རིགས་ཀྱི་བདེན་དོན་འཐབ་རྩོད་ནང་རྣམ་པ་ཅི་ལྟར་གནས་མིན་དང་དེའི་ཐད་བཀའ་ཤག་ལ་གྲ་སྒྲིག་ག་རེ་ཡོད་མེད། རྒྱལ་སྤྱི་ཟེར་བའི་ནང་དོན་དངོས་རྒྱབ་སྐྱོར་ག་ཚོད་ཐོབ་ཡོད་མེད་དང་དེར་ནུས་བ་ཅི་ཙམ་ཐོན་མིན་བཅས་ཁ་གསལ་བོ་ཞིག་བོད་ནང་གསལ་བཤད་མ་གནང་དུས། རང་སྲེག་ཁྱབ་བསྒྲགས་ལ་འུར་ཆེ་བ་ཙམ་གཅིག་པུས་རང་སྲེག་གི་ཞུ་འབོད་ཐད་འགན་འཁུར་ཐུབ་ཡོད་པ་མ་རེད་ལ། ག་དུས་ཡིན་ན། མི་མང་གི་རྗེས་སུ་རྒྱུགས་པའི་དབུ་ཁྲིད་ཅིག་ཆགས་པ་ཡིན་ན་དེར་སྔ་ཕྱི་མ་གཏོགས་ལོ་རྒྱུས་ནང་དབུ་ཁྲིད་ཀྱི་ཁྱད་ཡོན་མེད་པའི་ནག་ཉེས་ཕོག་རྒྱུ་ཡིན་པ་གསལ་བོ་རེད།
བཀའ་དྲིན་ཆེ། ཁྱེད་ཚོས་ང་ཚོར་གནང་བ་ཉུང་ཉུང་རྩ་ནས་མིན། མིག་ཅན་ཚོས་རིག་ནས་བསྡད་ཡོད། སེམས་ཡོད་ཚོས་དྲན་ནས་བསྡད་ཡོད། སྐུ་དྲིན་ཆེ།
དཔལ་ལྡན་བཀའ་ཤག་གིས་གནང་དགོས་པ་ཞིག་༧བྱེས་པ་གྲྭ་ཚང་ནས་གནང་བ་འདི་བོད་མི་རིགས་ཀྱིས་ནམ་ཡང་བརྗེད་མི་སྲིད་པས། སྙིང་དབུས་ནས་ཐུགས་རྗེ་ཆེ་ཞུ་རྒྱུ་ཡིན་ལ། ང་ཚོ་གཞུང་སྒེར་སུ་ཡིན་ཡང། ༧གོང་ས་མཆོག་གི་རླབས་ཆེན་དགོངས་གཞི་ལྟར་དོན་དམ་པའི་བོད་དོན་ལས་ཀ་ཞིག་བྱེད་ཀྱི་ཡིན་མིན་ཐདལས་དོན་རླབས་ཆེན་འདིས་དྲི་རྟགས་གནམ་སའི་བར་ལ་མི་ཤོང་བ་ཞིག་བཏང་འདུག སླར་ཡང་ཐུགས་རྗེ་ཆེ་ཞུ་བ་དང། བོད་ནང་གི་སྤུན་ཟླ་འབྲེལ་ཡོད་ཚོ་ལའང་ཁྱེད་ཅག་གི་བྱས་རྗེས་འདི་རྣམས་ངོ་སྤྲོད་བྱ་ངེས་ཡིན།།
ང་རང་གཞུང་འབྲེལ་མིན་སྒྲིག་འཛུགས་ཤིག་གི་སྣེ་མོ་ཡིན་པའི་ཆ་ནས་ནོངས་འགྱོད་དང་བཅས་ལས་དོན་ཉེ་འཚེ་བ་ཞིག་གིས་ཉི་མ་བསྐྱལ་བཞིན་པའི་གནས་བབ་ངོས་ལེན་ཞུ་འདོད་བྱུང་ལ་དཔའ་བོ་དཔའ་མོ་དེ་ཚོར་འགྱོད་གཤེགས་ཀྱང་ཞུ་འདོད་བྱུང། །
ཀིརྟིའི་བྱེས་པ་གྲྭ་ཚང་ལ་ཐུགས་རྗེ་ཆེ་ཞུ། མ་གཞི་དཔེ་དེབ་འདི་བུ་བཙན་བྱོལ་བོད་མིའི་སྒྲིག་འཛུགས་ངོས་ནས་བསྒྲིགས་དགོས་པ་ཞིག་ཡིན་ནའང་། གནད་དོན་འདི་འདྲའི་ཐད་ཁ་ཡོད་ལག་ཡོད་ལྟ་བུ་ག་ནས་ཡིན་ཡང་གཞུང་ལས་སྒེར་བ་ནུས་པ་ཆེ་བ་ཞིག་ཆགས་ཡོད། བཙན་བྱོལ་བོད་མིའི་སྒྲིག་འཛུགས་ཡ། སྒྲིག་འཛུགས།