ད་ནངས་༸གོང་ས་མཆོག་གིས་ཧི་མ་ཅལ་དབུས་གཙུག་ལག་སློབ་གྲྭའི་མཐར་ཕྱིན་མཛད་སྒོའི་སྟེང་བཀའ་སློབ་བསྩལ་ཡོད་འདུག ཁ་སང་ལ་དྭཊ་བྱང་ཐང་དུ་གངས་སྐྱོན་བྱུང་བར་ཧིན་སྒོར་ས་ཡ་ ༡ ཞལ་འདེབས་གནང་ཡོད།
ཧི་མ་ཅལ་མངའ་སྡེ་དབུས་གཙུག་ལག་སློབ་གཉེར་ཁང་ (Himachal Central University ) གིས་ཇི་ལྟར་གདན་ཞུས་ཕུལ་བ་ལྟར། དེ་རིང་ཕྱི་ཚེས་ ༢༨ ཉིན་གྱི་སྔ་དྲོའི་ཆུ་ཚོད་ ༩ དང་ཕྱེད་ཀའི་ཐོག་༸གོང་ས་མཆོག་བཞུགས་སྒར་ངྷ་ས་ནས་ཆིབས་འཁོར་བརྒྱུད། གྷ་གྷལ་གནམ་ཐང་ཉེ་འགྲམ་དུ་ཡོད་པའི་གཙུག་ལག་སློབ་གྲྭ་དེའི་མཐར་ཕྱིན་མཛད་སྒོའི་སྐུ་མགྲོན་དུ་ཆིབས་བསྒྱུར་གནང་སྟེ། དགེ་ལས་སློབ་ཕྲུག་ཚོར་བཀའ་སློབ་ལམ་སྟོན་བསྩལ་ཡོད་འདུག
དེ་བཞིན། ཉེ་ཆར་རྒྱ་གར་ལ་དྭགས་བྱང་ཐང་ཁུལ་དུ་གངས་སྐྱོན་ཆེན་པོ་ཞིག་བྱུང་སྟེ། བྱང་ཐང་ཁུལ་གྱི་བོད་རིགས་འབྲོག་སྡེ་དགུ་གཙོས་པའི་ས་གནས་ཡུལ་མི་ཚོའི་ར་ལུག་ ༥༠༠༠ བརྒལ་བར་འཆི་སྐྱོན་དང་། ས་གནས་མང་ཚོགས་དང་ཤུལ་ལུས་ར་ལུག་མང་པོར་ལྟོ་ཆས་དང་གཟན་ཆས་ཀྱིས་མ་འདང་བའི་དཀའ་ངལ་འཕྲད་བཞིན་པ་བཅས་ལ་བརྟེན། ཁ་སང་ཕྱི་ཚེས་ ༢༧ ཉིན་༸གོང་ས་མཆོག་གིས་གནོད་འཚེ་ཕོག་པའི་མང་ཚོགས་ལ་ཧིན་སྒོར་ས་ཡ་ ༡ ཞལ་འདེབས་གནང་ཡོད་འདུག
གསར་འགོད་པ། དཔལ་ལྡན།
