ཆང་ས་ལོ་དེབ་དབུ་འབྱེད།

དེ་རིང་སྔ་དྲོར་ངྷ་སའི་ཧི་མ་ལ་ཡའི་ཟ་ཁང་དུ་ཆང་ས་ལོ་དེབ་དབུ་འབྱེད་དང་སྦྲགས། བོད་སྤྱི་ཚོགས་ནང་གི་གོམས་སྲོལ་དང་སྐད་ཡིག་སྲུང་སྐྱོབ་སྐོར་ལ་གཏམ་བཤད་གནང་སོང་།

དེ་རིང་ཕྱི་ཚེས་ ༣ ཉིན་གྱི་སྔ་དྲོའི་ཆུ་ཚོད་ ༡༠ སྟེང་ངྷ་སའི་ཧི་མ་ལ་ཡའི་ཟ་ཁང་དུ་ཆང་ས་དྲ་ཚིགས་ཀྱིས་རྩོམ་སྒྲིག་བྱས་པའི་ཆང་སའི་སྐོར་གྱི་ལོ་དེབ་ཅིག རྩོམ་པ་པོ་ཤེས་རབ་དར་རྒྱས་ལགས་ཀྱིས་དབུ་འབྱེད་གནང་སོང་། སྐབས་དེར་ཤེས་རབ་དར་རྒྱས་ལགས་ཀྱིས་མིའི་རིགས་ཀྱི་སྤྱི་ཚོགས་ལ་དམ་པའི་ལྷ་ཆོས་དང་འཇིག་རྟེན་མི་ཆོས་ཟེར་པ་གཉིས་ཡོད་པ་ལས། བོད་སྤྱི་ཚོགས་ལ་མཚོན་ན་དམ་པའི་ལྷ་ཆོས་ཀྱི་ཕྱོགས་ནས་ཕྱག་དཔེ་སོགས་གང་ཅིའི་ཐད་ཧ་ཅང་གི་ཚད་མཐོ་བོར་སླེབས་ཡོད་ཀྱང་། འཇིག་རྟེན་མི་ཆོས་སམ་མི་སྐྱའི་འཚོ་བ་དང་འབྲེལ་བའི་དུས་དེབ་རིགས་ཧ་ལམ་མེད་པའི་གནས་སྟངས་ཤིག་གི་སྐབས་འདིར། ཆང་ས་དྲ་བ་དང་ཚགས་པར། ལོ་དེབ་སོགས་ཀྱི་རིགས་གཉེར་ཡོང་པ་ནི་ལས་དོན་རླབས་ཆེན་ཞིག་ཆགས་ཀྱི་ཡོད་སྐོར་བརྗོད་ཡོད།

ཁོང་གིས་མུ་མཐུད་བོད་པའི་སྤྱི་ཚོགས་ཀྱི་གཤིས་ཀའི་ནང་གསར་པ་ཞིག་སླེབས་ཡོང་པའི་སྐབས་སུ་དང་ལེན་བྱེད་མ་ཐུབ་པ་དང་། ག་དུས་ཡིན་ན་རྙིང་པ་ཞིག་བསྐྱར་ཟློས་བྱེད་སྡོད་པའི་སེམས་གཤིས་ཤིག་ཡོད་སྟབས་གསར་པ་རེ་ཐོན་ཡོང་སྐབས་དེར་སུན་གཙེར་བཟོ་བ་དང་སྐྱོད་བརྗོད་སོགས་མ་དགའ་བའི་རྣམ་པ་ཡོང་གི་ཡོད་པ། ལྷག་པར་དུ་བོད་སྤྱི་ཚོགས་ལ་ལོ་མང་པོའི་རིང་ནས་དམ་པའི་ལྷ་ཆོས་ཀྱི་ཕྱོགས་སུ་གོམས་གཤིས་གཏིང་ཟབ་པོ་ཆགས་ཡོད་པས། མི་སྐྱའི་འཚོ་བ་དང་འབྲེལ་བའི་སྐད་ཆ་ཞིག་བཤད་ཡོང་པའི་སྐབས་སུ་དེར་ཚོར་བ་རྣོ་པོས་དགག་རྒྱག་བྱེད་པའི་བཀག་རྒྱ་ཤུགས་ཆེན་པོ་ཡོད་ཀྱང་། རིམ་བཞིན་ལས་དོན་འདིའི་རིགས་ཆུང་ས་ནས་ཆེ་སར་སླེབས་ཡོང་སྐབས། བཀག་རྒྱ་དེ་དག་ལས་གྲོལ་ཏེ་ད་ཆར་ལམ་ཁ་ཞིག་ཡོད་པར་མཐོང་གི་ཡོད་སྐོར་དང་། རྗེས་ཕྱོགས་ཀྱང་ལས་དོན་འདིའི་རིགས་གང་མང་ཞིག་བོད་པའི་སྤྱི་ཚོགས་ནང་སྤེལ་ཐུབ་པ་ཡིན་ན། བོད་པའི་ཤེས་རིག་གི་བང་མཛོད་ཆེན་མོའི་སྟོང་ཆ་དག་རིམ་བཞིན་བསྐང་ཐུབ་པའི་རེ་བ་མཐོང་གི་ཡོད་པར་བརྗོད་བྱུང་།

མཐར་ཆང་ས་དུས་ལོ་དེབ་ཀྱི་རྩོམ་སྒྲིག་པ་ཨ་རིག་འགྱུར་མེད་ལགས་ཀྱིས་ད་སྔ་བོད་པའི་སྤྱི་ཚོགས་ནང་ཆོས་དང་ཆབ་སྲིད་སོགས་ཀྱི་ཐད་དྲ་རྒྱ་དང་ཚགས་པར། དུས་དེབ་སོགས་ཤུགས་ཆེན་པོ་ཡོད་ཀྱང་། བོད་སྤྱི་ཚོགས་ཀྱང་སྤྱི་ཚོགས་གཞན་དག་ནང་བཞིན་སེམས་ཁམས་སྣ་ཚོགས་ལས་གྲུབ་པའི་མིའི་རིགས་ཀྱི་སྤྱི་ཚོགས་ཤིག་ཡིན་སྟབས། མི་སོ་སོའི་དགའ་ཕྱོགས་དང་མོས་པ་ལ་བསྟུན་པའི་བོད་ཀྱི་སྐད་ཡིག་གི་བརྗོད་བྱ་སྣ་མང་ཅན་དུ་བཏང་སྟེ། བོད་སྐད་ཡིག་འཇིག་ཉེན་ལས་སྐྱོབ་རྒྱུ་དེ་ཡིན་པ་དང་།

དགོས་དམིགས་གཉིས་པ་ནི་དེང་སྐབས་བོད་མི་རྣམས་ཁ་འཐོར་དང་སྤྱི་ཚོགས་འདྲ་མིན་ནང་གནས་ཡོད་པ། མི་རིགས་གཞན་དག་དང་སྲས་ལྷད་ཡོང་གི་ཡོད་པའི་གནས་བབ་འོག བོད་ཀྱི་མི་འབོར་ལ་འཇིག་ཉེན་ཆེན་པོ་ཞིག་འཕྲད་བཞིན་པའི་སྐབས་འདིར། ཆང་ས་དྲ་བ་དང་ཚགས་པར། ལོ་དེབ་སོགས་བརྒྱུད་བོད་པ་ནང་ཁུལ་ལ་འགྲོག་འདྲིས་དང་གཉེན་སྒྲིག་ཡོང་ཐབས་སུ་འབྲེལ་ལམ་གྱི་ཟམ་པ་ལྟ་བུ་ཞིག་ཆགས་རྒྱུར་འབད་བརྩོད་བྱེད་ཀྱི་ཡོད་སྐོར་བརྗོད་སོང་།

ཆང་ས་ལོ་དེབ་ནང་། སེམས་ཀྱི་ཁ་བརྡ་དང་སེམས་ཀྱི་ཕྱི་ནང་། སེམས་ཀྱི་ལམ་སྟོན། སེམས་ཀྱི་སྐྱ་ཡ། སེམས་གཏམ་དམར་པོ་སོགས་ལེ་ཚན་ ༥ ལས་གྲུབ་ཡོད་པ་དང་། དེ་དག་གི་ནང་དུ་བཅར་འདྲི་དང་བསམ་ཚུལ། སྒྱུར་རྩོམ། དཔྱད་བརྗོད། བཟའ་འཚོལ་གྱི་བརྡ་ཁྱབ་སོགས་ཡོད་འདུག

གསར་འགོད་པ། བནྡེ་སྐྱབས།